Uo i le Uo
Fanau a Matua Faalelagi
Saunia e Sister Lisa L. Harkness
Fesoasoani Muamua i le Au Peresitene Aoao o le Peraimeri
Sii mai le Aubrey Eyre, “Sister Cordon and Sister Harkness Say African Women Are a Powerful Force for Change,” Church News, 11 Iuni, 2019.
E ui ina tofu i tatou ma aafiaga eseese i lenei lalolagi, ae e tasi le mea tatou te tutusa uma ai. O i tatou uma o fanau a ni matua faalelagi!
Sa i ai se taimi sa ou lauga ai i se vaega o tamaitai i Aferika i Saute. Sa amata i lo’u hamuina o le viiga “Ia Viia Oe le Atua, mo se Perofeta.” I le mavae ai o ni nai nota, sa faapea ona pepese leotetele mai nei tamaitai! Sa faatumulia lo’u agaga i a latou pesega. Sa matou taufai lagonaina le alofa o le Atua.
I le malaga lava foi lea, sa ou asiasi ai i le DR Congo ma lauga ai i tamaitai ma teine i se faigalotu i le Aso Sa. Sa latou malaga mai i pasi i vaega eseese o le aai ina ia o mai ai. Sa anoanoai tagata ma sa matou toe faaopoopoina nisi nofoa i va, ma sa autilo mai tagata mai i faamalama ina ia mafai ona ofi uma i le potu! Sa faagaeetia lava au e nei tamaitai. Ua latou suia o latou nuu i ni ala mamana. O loo latou faasoa atu le alofa o le Atua.
Sa ou feiloai atu i le anoanoai o tamaiti Peraimeri i Aferika. O le toatele o i latou ua na’o i latou tagata o le Ekalesia i o latou aiga. Ae latou te o mai pea lava na’o latou i le lotu i vaiaso taitasi. E fesoasoani le Peraimeri ia i latou ia lagonaina le alofa o le Atua.
O tagata o Aferika e o mai mai atunuu ma aganuu eseese. E tele gagana latou te tautatala ai. E mauoa i latou i le faatuatua ma i lo latou alolofa i le Atua. Ina ua ou tilotilo atu i o latou mata, sa mafai ona ou lagonaina sa latou iloaina le upumoni ma ua i ai a latou molimau i le talalelei toefuataiina a Iesu Keriso. Sa latou iloaina o i latou o fanau a ni matua faalelagi.
E moni foi lena mea mo oe. O oe o se afafine/atalii o ni matua faalelagi. E alolofa i Laua ia te oe! ●