Mo Faifeautalai o loo Tauivi ma le Soifua Maloloina Faalemafaufau

E mafai ona avea se misiona faafaifeautalai ma se punavai matagofie o faamanuiaga—mo le faifeautalai ma i latou foi o e o loo auauna atu i ai. E pei ona saunoa mai ai Elder Richard G. Scott (1928–2015) o le Korama a Aposetolo e Toasefululua:

“O se misiona o le a e maua ai faamanuiaga tulagaese mo oe i le taimi nei ma lou olaga atoa. …

“… Ou te molimau atu o le auaunaga faafaifeautalai faamisiona faamaoni o se punavai o le fiafia tele ma faamanuiaga e tele” (“O Le Taimi Lenei e Auauna Atu Ai i se Misiona!” Liahona, Me. 2006, 90).

Ae o se misiona e mafai foi ona avea ma se aafiaga faigata e le’i mafaufauina. Na aoao mai Peresitene Thomas S. Monson (1927–2018): “O le galuega faafaifeautalai e faigata. E alu ai le malosi o se tagata, e uma i ai le malosi o se tagata, e manaomia ai le taumafaiga sili ona lelei a se tagata. … E leai se isi galuega e manaomia ai ni itula uumi po o le tuuto tele naua po o se ositaulaga faapena ma le tatalo faatauanau” (“That All May Hear,” Ensign, Me 1995, 49). I le avea ai ma se faifeautalai, o loo e faaaluina le aso atoa ma se tasi atonu e mafai po o le le mafai foi ona e galue faatasi ai, o loo e feagai ma le teenaina ma le faasagatau mai soo se itu e liliu atu i ai, ma e le o i ai le mafanafana ma le toamalie o aso taitasi o le aiga ma le lata mai o e pele e fesoasoani ia te oe e faauau pea. O nei vaega uma e mafai ona aafia ai lou soifua maloloina faalemafaufau ma faalelagona i le avea ai ma se faifeautalai.

E le tutusa uma ni mafaufau se lua, o lea afai e te maua i se tauiviga faaletagata lava ia, ia filifili faatasi ma le Tama Faalelagi, lau peresitene o le misiona, po o lau soa e saili tali lea e fetaui ma oe. E matou te faasoa atu ii ni aafiaga mai talavou matutua e toalua o e na galueaiina o la tauiviga ma popolega ma lē mautonu a o auauna atu i misiona.

Ae ou te le’i alu i la’u misiona i Penisilevania, ISA, na amata ona ou lagonaina aafiaga o le popole. Na taofi a’u fuafuaga o le misiona mo sina taimi a’o o’u galue e foia mea sa ou lagonaina. Na mana’o la’u peresitene o le misiona ia ou i ai i se nofoaga lelei faalemafaufau ona o misiona e mafai ona afua ai le tele o popolega ma atuatuvalega.

Na ou galue e taulima lo’u soifua maloloina faalemafaufau, ona ou alu ai lea i la’u misiona i le mavae ai ona maua le faamaoniga mai se faufautua.

Na lelei mea uma se’ia oo ina ou taunuu i la’u eria lona tolu. Mai le le galulue faatasi ma la’u soa e oo atu i le tauivi e saili tagata e aoaoina, na matautia lo’u popole lea na iu ai i le tau le mafai ona ou alu ese ma le moega i le taeao. Sa i ai taimi na ou matua lagona ai le popole lea na tau le mafai ai ona ou manava, ma na ou maua i aafiaga o le atuatuvale i nofoaga ou te i ai. Na i’u lava ina ou aapa atu i lo’u peresitene o le misiona, o le na fautua mai ma le alofa ou te talanoa i o’u faufautua o le soifua maloloina faalemafaufau a le misiona. O le talanoa atu ia i latou na fesoasoani, ae e le’i mafai ona fo’ia atoa ai le faafitauli.

O mea na fesoasoani ia te a’u e toe foi atu ai i le ala sa’o, o metotia ma faataitaiga na ou aoaoina mai fefautuaaiga. Sa ou faaaogaina mea na e faatumau ai lo’u ola maloloina faalemafaufau. E latou te le’i aveeseina atoa lo’u popole, ae na fesoasoani ia mea e mafai ai ona faaauau la’u auaunaga faafaifeautalai.

O a’u fesoasoaniga nei mo le taulimaina o le popole i lau misiona:

Faaletino:

• Tausi lelei oe lava! O le faitauina o au tusitusiga paia ma le tatalo e mafai ona fesoasoani e faamaloloina lou agaga, ae afai e te manaomia ona ave se taimi mo oe lava i aso taitasi mo le tausia lelei o oe lava (atonu i le gasologa o taimi o taumafataga po o le taimi ua e sauni ai mo le aso po o mo le moega), fai le mea lea ma faamuamua mo le faatumauina o lou soifua maloloina faalemafaufau.

• Pe a mafai ona fai, fai mea e te fiafia i ai. Atonu o loo e auauna atu i le Alii, a e o oe lava ia o oe! Tusi i lau tusi talaaga, tusi se ata, pese, faalogologo i musika, talanoa atu i lou aiga ma e pele ia te oe i le aso sauniuni, tusi se tusi---fai mea ia e fesoasoani ia te oe e lagona ai le filemu.

• Tusi i lalo mea e lima ia e te lagona ai le loto faafetai mo aso taitasi. O le tumasani lea e mafai moni ai ona suia lou mafaufau mo le lelei.

• Manatunatu e faaaoga fualaau ua faamaonia e foma’i pe a manaomia.

• Ia faailoa atu i lau soa pe afai o loo e tauivi ma iloa ala e mafai ona ia fesoasoani ai ia te oe.

• Faataitai tumasani o le yoga, mafaufau loloto, po o le mafaufau a’ia’i i le gasologa o lau toleniga o le taeao po o i le afiafi.

• Talanoa atu i se faufautua polofesa o le soifua maloloina faalemafaufau pe a e manaomiaina.

Faaleagaga/Faalemafaufau:

• Ia i ai se tusi talaaga “auleaga” e tusia uma ai ou mafaufauga le lelei ma lagona ma popolega, ae aua e te mafaufau ai i na manatu. O le faamoemoe o le faailoa o nei lagona ona aga’i lea i luma. O ni isi o taimi, e fesoasoani le faataape po o le sasaeina o le itulau pe a mae’a ona e tusia ou lagona; o se ituaiga o faatusaga o le tuuina ese atu o na mafaufauga ma lagona.

• Talosaga atu mo se faamanuiaga faaleperisitua pe a e manaomia se malosi faaopoopo.

• Faitau soo lou faamanuiaga faapeteriaka.

• Taulai atu i ou malosiaga, ae le’o ou vaivaiga.

• Talanoa atu e faafetaiaia mafaufauga le lelei! Faitau “Fetuunai i le Olaga Faafaifeautalai” mo nisi fesoasoaniga.

• Faitau ma mafaufau loloto i saunoaga o le konafesi aoao, aemaise lava ia e taula’i atu i le soifua maloloina faalemafaufau, e pei o Tuafafine Reyna I. Aburto, “I Mala i Manū, Iesu, Afio Mai!” (Liahona, Nov. 2019, 57–59) ma Elder Jeffrey R. Holland, “Peiseai o se Ipu ua Nutililii,” (Liahona, Nov. 2013, 40–42).

• Faitau tusitusiga paia, mafaufau loloto i auala na maua ai e perofeta ma faifeautalai le malosi ma le faatuatua pe a feagai ma faigata.

O nei tumasani itiiti ma faatauvaa na telē sona aafiaga i o’u tomai e auauna atu ai i le Alii ma lo’u loto atoa, manatu atoa, mafaufau atoa ma le malosi atoa. O lou tauivi ai ma lou soifua maloloina faalemafaufau e le o se mea e matamuli ai, ma o loo i ai pea lava le faamoemoe e ala atu ia Iesu Keriso ina ia maua ai le malosi, faamoemoe, ma le faamaloloina. Ua tuuina mai e le Tama Faalelagi ia i tatou le tele o mea faigaluega ia tausia ai o tatou mafaufau, tino, ma agaga ia maloloina. Pau lava le mea tatou te manaomia o le naunau e faaaoga ia mea.

Faith Ferguson, Idaho, ISA

Na muamua ona ou feagai ma le atuatuvale i le faaiuga o lau misiona i Aferika i Saute. Na tulaga ese lava lo’u le fiafia. Na maualalo lo’u agaga, o la’u vaaiga i mea ua le tulaga lelei, ma ua faamaluelueina lo’u faatuatua. I le faatumutumuga o na mea, sa ma’i lo’u tina, ma sa i ai isi luitau i lo’u aiga. Sa ou faafoliga o loo lelei mea uma, ae sa le lelei. I se tasi taimi, sa lelei lava ona ou taulimaina ituaiga popolega eseese, ae na iu lava ina ou le mafaia. Ua olopalaina a’u e o’u mafaufauga, ma foliga mai o mea uma ua liliu e faasagatau ia te a’u.

Ua leai lava so’u malosi faalelagona ma faalemafaufau, o lea sa ou filifili ai e anapogi ma tatalo mo se taitaiga. O le taunuuga, na ou mauaina ni musumusuga patino e tolu:

• Muamua o le talanoa lea i la’u peresitene o le misiona. Na iu ina i lo’u faasoa tatala atu e uiga i o’u tauiviga lea na fesoasoani ia te a’u ia sili atu na lelei ou faalogona ma ou iloa ai e lei tuua na’o a’u.

• Lona lua, na musuia a’u e faapea o le aoao e uiga ia Iesu Keriso e mafai ona fesoasoani ia te a’u i lenei mea. A o o’u suesue e uiga i le Tama Faalelagi ma le Faaola, na manino mai ia te a’u e faapea, e La Te iloa o’u tiga ma lagonaina o’u faanoanoaga. Sa ou faalagolago ia i La’ua mo le malosi pe a ou lagona ua leai so’u malosi.

• O le musumusuga lona tolu na oo mai mai se upusii mai ia Peresitene Gordon B. Hinckley: “O le auauna atu o le vailaau sili lea mo le faanoanoa o le tagata mo ia lava, manatu faapito, faanoanoa, ma le tuuatoatasi” (Aoaoga a Peresitene o le Ekalesia: Gordon B. Hinckley [2016], 201.) A o o’u taulai atu mai totonu i fafo ma i le auauna atu i isi, i le aluga o taimi na ou lagonaina le fiafia sili atu, sili ona mautinoa, ma sili ona faatuatua i le Tama Faalelagi.

Na mae’a la’u misiona, ae na toe osofai foi e le atuatuvale i nai masina muamua i le Iunivesite. Faatoa ou siitia atu i Meleisia mai Samupia ma ua mamao ese tele mai le aiga ma leai ni uo po o aiga e lata mai. Ou te le’i iloa le nofoaga e feiloa’i ai la’u paranesi mo lotu.

Sa ou uumau i le faamoemoe ma lagona le musumusuga e anapogi ma tatalo mo le taitaiga ia toe o’o mai. Mai iina, na taitai atu ai a’u i le avea ma uo a se tamaitai i la’u vasega o le na fesoasoani ia te a’u ia maua le paranesi pito lata mai. A o o’u savali atu i totonu o le falesa i lena Aso Sa muamua, sa ou lagona le sii ese atu e le Agaga Paia o la’u avega mai ia te a’u. Sa ou iloaina e faapea, e mafai ona ou mulimuli i laasaga o le faamalologa na ou laasia i la’u misiona. Sa ou toe talanoa i o’u taitai o le Ekalesia mo se fesoasoani, suesue le soifuaga ma aoaoga a le Faaola, ona taulai atu lea i le auauna atu i isi. Sa ou mauaina tagata e talanoa i ai ma aapa atu, fesoasoani i isi i le aoga, ma talia se valaauga i le ekalesia.

Na ou aoaoina le tele o mea e uiga i le soifua maloloina faalemafaufau mai aafiaga o le atuatuvale. E mafai ona tatou oo atu i le pisi tele ma le siakia ai e i tatou i tatou lava po o e o loo siomia tatou, ae e tatau ia i tatou ona faailoa atu i isi e uiga i a tatou tauiviga---mo lo tatou lava lelei ma faapea foi mo isi. O agasala, tuuatoatasi, faanoanoa, lagona lē fiafia, ma le loto nutimomoia e mafai ona aafia ai tatou taitoatasi faalelagona, faalemafaufau, ma le faaleagaga. O se tasi o vaega sili ona faigata o le atuatuvale e faapea, e te lagonaina le mamao ese mai le Atua.

Ae e le tuua lava na o i tatou. A oo i taimi o o tatou tauiviga, e mafai ona tatou taula’i atu i le o mai ia Keriso, aua e mafai ona Ia faia mea vaivai e avea ma mea malolosi (tagai Eteru 12:27).

Ou te iloa e faapea, e alofa le Atua ia i tatou ma o i tatou o Lana fanau. Afai tatou te faalagolago ia Iesu Keriso ma tausi Ana poloaiga, o le a faamanuiaina ma faamalolosia i tatou. Ona o Ia, ua ou maua ai le malosi e ala i Lana Togiola ma faaauau ona fiafia ai i faamanuiaga o le filemu ma le olioli.

Akasiwa Wamunyima, Malaysia