Na iYalayala Vakaparofita

Mai na gauna ni Koniferedi Raraba totoka ni Epereli 2020, au sa dau mai vakananuma tiko se cava e vakatokai me, yalayala vakaparofita.

Ko sa rogoca beka na veika oqo? Ko saga tiko beka me nomu?

Ena rua na tikina mai na Vunau kei na Veiyalayalati eda raica kina na raititobu me baleta na Yalayala Vakaparofita.

Kena imatai, e vakatavulica na Wase 1:38 ena gauna era vosa kina na italai ni Turaga, Nona parofita, e tautauvata ga ni sa vosa sara tikoga na Turaga vakataki Koya; “. . . . Se mai na domoqu ga se mai na domodra na noqu tamata e sa tautauvata ga.”

Kena ikarua, e vakuria na Wase 82:10 na yalayala mana vakasilesitieli; “Koi au, na Turaga, au sa vauci ni dou muria na noqu vosa; ia ni dou sega ni muria na noqu vosa, sa sega naka e yalataki vei kemudou.”

E dina ga ni rau ciqomi ena rua na ivakatakila duidui, kevaka erau wiliki vata na itukutuku oqo ena kauta mai na kila deivaki vou, ka mana sara vakalevu na kedrau ibalebale.

Ni semati vata na ivakavuvuli ni rua na tikina oqori, e vakadeitaka vei keda, ena gauna era cavuta kina na Parofita bula, Daurairai ka Dauvakatakila na vosa, “Au yalataka” e sa vauci na Turaga ena yalayala oya, kevaka eda bula ena lawa e vauca na veivakalougatataki e sa yalataki kina.¹

E tolu na kabakaba meda rawata kina na, Yalayala Vakaparofita.

1. Noda vakasaqara vakatabakidua.

2. Noda kila na veika e gadrevi me rawa ni noda kina.

3. Bula kilikili tiko me rawa ni da rawata me noda.

E ciwa na Yalayala Vakaparofita e soli ena Koniferedi Raraba ni Epereli 2020.

Peresitedi Russell M Nelson; “Au a yalataka vei kemuni kevaka eda “solia noda igu me da vakalesuya na yaca donu ni Nona Lotu na Turaga,” o Koya ena “sovaraka mai Nona mana kei na veivakalougatataki e uluda na Yalododonu Edaidai, me vaka eda se bera vakadua ni bau raica. Au vakavouya na yalayala oya nikua.”²

“Au yalataka ni ko vakalevutaka nomu gauna ena cakacaka ni valetabu kei na tuva kawa, o na vakalevutaka ka vakatorocaketaka nomu rawa ni rogoci Koya.”³

Ena vosa vata oya e tomana kina na parofita ni Turaga; “Na cava beka ena yaco ni ko rogoca, vakatudaliga, ka muria na ka e kaya na iVakabula kei na ka e tukuna o Koya ena gauna oqo mai vei ira na Nona parofita? Au yalataka ni ko na vakalougatataki ena ikuri ni kaukauwa mo sabaya kina na veitemaki, veika dredre, kei na malumalumu. Au yalataka na cakamana ena nomu bula vakamau, veiwekani vakavuvale, kei na cakacaka ena veisiga. Kau sa yalataka ni nomu gugumatua mo vakila na reki ena vakalevutaki ke yaco mada ga na vei yavavala eso ena nomu bula.”⁴

Ni sa sogota na koniferedi o Peresitedi e vaka toka oqo na yalayala e biuta tu vei keda o Peresitedi Nelson; “Sa neitou masu mo ni tekivuna vou vakaidina mo rogoca, vakatudaliga, ka muria na vosa ni iVakabula. Au sa yalataka ni na vakalailaitaki na rere ka na vakalevutaki na vakabauta.”⁵

Elder Neil L Andersen; “Au yalataka vei iko ena nomu vakadinadinataka ena lomasoli ka mareqeta vakavinaka na veigauna veivakatakilai vakayalo ena nomu bula, ena lako mai vakalevu cake vei iko. E kilai iko ka lomani iko na Tamada Vakalomalagi.”⁶

E kaya o Elder Ulisses Soares ena nona vosa tiko me baleta na iVola i Momani; “Au yalataka vei kemuni ni o masumasu ka tomana mo vulica vinaka na kena vosa ni Kalou, o na rawa ni vakaivotavota ena kena iyalayala kei na veivakalougatataki cecere ka vuabale sara. Au vakadeitaka tale na yalayala e domo voqa ena veidrauniveva oqo: “Ia ni dou sa ciqoma na veika oqo, au gadreva me’u vakamasuti kemudou, mo dou kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko koya ena kaukauwa ni Yalo Tabu ni sa dina.”⁷

Elder Ronald A Rasband; “Au yalataka ena nomu muria na ivakasala vakauqeti ni noda parofita lomani, o Peresitedi Russell M. Nelson, o ira na iApositolo, kei na iliuliu tale eso ni Lotu, vaka kina mo rogoci ira na parofita iliu ka ra tukuna na noda gauna, ko ni na vakasinaiti, ena titobu ni lomamuni kei na yalomuni, ena yalo kei na cakacaka ni Veivakalesui mai. Au yalataka ni o na raica na liga ni Kalou ena nomuni bula, ni na rogoca na Nona veivakauqeti, ka vakila na Nona loloma.”⁸

Au cauraka na noqu vakavinavinaka cecekia ena nodra veidusimaki na Parofita bula, Daurairai, ka Dauvakatakila. Sa dua dina na ka talei ni da mai liutaki tu ena nodra veiliutaki vakauqeti kei na nodra ivakaraitaki ni yalodina vua na Turaga o Jisu Karisito.

Au vakadinadinataka ni dau rogoca ka sauma na noda masu na Tamada Vakalomalagi. Ni ra yalayala vei keda na Parofita, Daurairai ka Dauvakatakila, ka rokovi na veiyalayala oqori kevaka eda bula savasava tiko me rawa kina ni noda. Au vakuria talega noqu ivakadinadina ni sai Jisu na Karisito, ka kena ibalebale, ni Mesaia sa waraki tiko mai vakadede ka iVakabula kei vuravura. E bula tiko o Koya!