Vukea e dua na Turaga mai Viti eso era Vakaleqai tu e Yasani Gaunisala

E gole tiko o Api Tuitubou me sikovi rau na nona itubutubu ka qai raica e dua na lori e leqa tu e batinigaunisala. E kele o Api ka lewenilotu i Jisu Karisito ni Yalododonu Edaidai, me veivuke.

Me vaka ni tiko eso na gacagaca ni lori ena nodra itikotiko nona itubutubu, ka toka voleka ga ena vanua oya. Ia nona sa mai saga me qarava na leqa sa raica o koya ni na gadreva na veivukei ni dua na kena dau.

E qai kila talega mai kina o Tuitubou ni ratou kerea mai na nona itokani vou na lori mai vua edua na wekadratou ka ratou gole sara mai na nodratou koro mai Ra me mai volitaki na nodratou ivoli ena makete e Suva. Me vaka ni tiko vua eso na gacagaca ni lori eratou gadreva sa nanuma kina o koya me soli vei iratou ka veivosakitaka e dua na kena dau me mai qarava na leqa ni nodratou lori.

“Ni vakananuma tu na balavu ni vanua eratou goleva mai kei na veika dredre eratou sotava me rawa mai kina na nodratou ivoli kina makete,” e kaya o Tuitubou, “Au sa mani nanuma ga meu sa na solia vei iratou na gacagaca ni lori (me vaka ni tiko vei au). Noqu raica ga na marau ni matadratou e kauta mai vei au na vakacegu.”

Ni oti ga e vica na macawa, e dua mai na nona vulagi sega ni namaka o Tuitubou mai vei koya na taukei ni lori. “Eratou lako mai ka kauta tu mai e dua na taga tavioka kei na rua na daseni niu”. “Na levu ni nodratou vakavinavinaka e kauta mai vakayauyau na marau.” “E kaya o taukei ni lori ni na sega ni veisosomitaki rawa na levu ni ka e kauta mai kei na isau ni gacagaca ni lori, ia sa ka levu na nodratou vakavinavinaka vakavuvale ka ratou sa masulaki au tiko kei na noqu matavuvale,” e kaya o Tuitubou.

E tomana, “E wasea tiko o koya kei na nona matavuvale na veivuke mai vua e dua e sega saraga ni veikilai kei vugona, kei na nona cakacaka na Kalou me kauti iratou mai ki na vanua donu kei na gauna donu me rawa niu mai vukei iratou.”

E kaya o Tuitubou ni vakavinavinaka ni rawa ni veivuke. “Au vakabauta kevaka e nomu na madigi mo vukea e dua, mo vukea sara, baleta o na sega ni kila na nomu na rawa ni vakayarayataka na tamata oya ena veisala vinaka ka na vakalougatataki iko vakalevu sara.”

“Ena veigauna dredre eda lako curuma tiko, na veika oqo e kauta mai vei au na marau ka sa vukei aumeu dau tu vakarau meu dau veivuke.”

Ena Koniferedi Raraba ni Okotova 2019 ni Lotu i Jisu Karisito ni Yalododonu Edaidai, e kaya o Peresitedi Russell M. Nelson: “Na Yalododonu Edaidai kei ira na dau muri Jisu Karisito, eda dau vakasaqara na sala me veivuke, laveta cake, ka lomani ira na tani. O ira era vakatokai me italai ni Turaga era na vakasaqara tiko ga na sala mera veivuke me vakamamadataka na nodra icolacola na tani . . . ka tagi kei ira era sa tagi; . . . ka vukei ira na gadreva na veivuke.’ Era vakasaqara vagumatua me ra bulataka na imatai kei na ikarua ni vunau cecere. Ni sa lomana na Kalou ena yaloda taucoko, ena vukici keda yani vei ira na tani ena sala totoka ka talei” (“Na iKarua ni iVakaro Cecere”, Liaona, noveba 2019, 96).