E ’ere i te fāito maita’i roa, e mea fa’ahiahia rā

Nō teie metua vahine e pae tamari’i, ’o Jacinta Tofa, ’ua riro te fa’aineinera’a nō te fa’atupu i te purera’a mātāmua i tōna ’utuāfare ’ei ha’ape’ape’ara’a mau. Tāna noa e hina’aro, ’ia nahonaho maita’i tā rātou rurura’a ’e ’ia nehenehe—mai tei ’itehia i te mau sābati ato’a i tā rātou pāroita nō Otahuhu i roto i te titi nō Otara Auckland, i Aotearoa.

Nō te ’ōpere i te ’ōro’a, ’ua ’imi ’o Jacinta i roto i tōna piha tūtu i te hō’ē pita maita’i ’e te tahi mau hāpaina na’ina’i. Te mea rā tāna i ’ite mai ’o te hō’ē mōhina pape pa’ari ïa ’e te tahi mau ’āu’a inu taofe tū’ati te hōho’a. ’O te reira noa ïa, ’ua ta’a iāna, ma te mana’o iti ’oto. « ’E hō’ē noa faraoa Dollar tā mātou », ’ua ’ata ’oia, tē fa’ahiti ra i te parau nō te faraoa māmā tei tāpūpūhia, ’e tei ho’o-pinepine-hia i te fare toa nā reira. « E ’ere roa atu i te faraoa nehenehe maita’i ’e te ve’ave’a. »

I muri iho ’ua fāriu Jacinta i tōna mana’o i ni’a i te piha fa’afa’aea, ma te feruri ē e tauturu te tāmā-roa-ra’a i te tītau manihini i te Vārua i roto i tō rātou fare. E ’ere ’o ’ōna ana’e tē fa’aineine ra.

Tauturuhia e te tahi o tāna mau tamari’i, tē ha’api’ipi’i ra tāna tāne ’o Elnez i te ha’amaita’ira’a ’ōro’a ’ia ti’a iāna ’ia tāmau ’ā’au i te reira. « ’Ua ’ite mātou e’ita te ’episekōpora’a e tae mai i terā mahana nō te ha’amana i te mau pure », tē parau ra Jacinta. « ’O te taime mātāmua ïa e fa’atere ’oia i te hō’ē purera’a ’ōro’a, e nehenehe tā’u e parau ē e hōpoi’a rahi ato’a i ni’a i tā’u tāne nō te fa’aineine maita’i i te mau mea. »

Noa atu rā, ’ua hina’aro rāua ’ia tupu maita’i tā rātou purera’a sābati i te fare. Nō te rave i te tahi ’ohipa ta’a ’ē—’ōna tei fa’ata’a noa ana te ’ahu sābati o tāna mau tamari’i ’āpī—’ua vaiiho Jacinta ia rātou ’ia mā’iti i tō rātou ’ahu, e ’ahu maita’i rā nō te sābati. ’Ua ’oa’oa roa te mau tamari’i.

Tae mai nei te po’ipo’i sābati, e ’ere i te horora’a te fa’aineinera’a i te piha fa’afa’aeara’a, ha’api’ipi’i i te mau a’ora’a ’e te mau hīmene ta’a ’ē, fa’a’ahu i te mau tamari’i (ma te ha’avare ’ite noa māmā i te ’āvae tia’a ’ore ’e te ’ahu tū’ati ’ore) ’e ha’amata i tā rātou purera’a i te hora.

I te pārahira’a rā te ’utuāfare, māere roa a’era Jacinta i te tura rahi o te mea tā rātou e rave ra.

I terā po’ipo’i ta’a ’ē, i roto i tō rātou iho fare, ’ua putuputu ’oia ’e tāna mau tamari’i—hō’ē ’aiū, hō’ē tē fa’aineine ra nō te misiōni ’e te tahi atu mau pu’era’a i te Paraimere—i raro a’e i te mana peresideni o te Autahu’ara’a mo’a, o tāna tāne e mau ti’amā nei.

« I te ’itera’a vau i te metua tāne o tā’u mau tamari’i i te ha’amaita’ira’a ’e i te ’ōperera’a i te ’ōro’a, e taime putapū ’ā’au mau », tē ha’amana’o ra Jacinta. I taua taime ra, ’ua ’ī roa ’oia i te mana’o māuruuru rahi ’e te māramaramara’a rahi atu ā.

I te hō’ē taime fifi mai teiei e’ita e nehenehe e haere i te purera’a, te fāna’ora’a ’ia fa’atupu i te purera’a ’ōro’a nō tōna ’utuāfare i raro a’e i te hō’ē ā mana o te autahu’ara’a, ’e ’ia putapū i te hō’ē ā Vārua e putapūhia i roto i te hō’ē ’āmuira’a o Te ’Ēkālesia a Iesu Mesia i te Feiā Mo’a i te mau Mahana Hope’a nei, « E fāna’ora’a rahi mau ïa », tē parau ra Jacinta.

« E māuruuru ’āpī tō’u nō te mana autahu’ara’a. E mana’o fa’aha’eha’a ’e te hōhonu e tae mai i te mea ē ’ua ti’amā tā’u tāne nō te ha’amaita’i i tō mātou ’utuāfare i tō te reira mana. Noa atu ā te ’ohipa e tupu ra i roto i te ao nei, ’ua ’ite au ē, ’ua ’ī roa tā mātou ’āua i tō mātou fare. »