’Ua paraparau rātou nō ni’a i te fa’ati’ara’a i te sōtaiete ’a ha’apa’o ato’a ai i te ’ohipa pae vārua

I te terera’a mai Russell M. Nelson, te peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei, i Pōrīnetia farāni nei i te 24 nō Mē 2019, ’ua fārerei ’oia ia Edouard Fritch tāne, te peresideni nō Pōrīnetia farāni. I roto i terā rurura’a, ’ua parau te peresideni Nelson ē, ’ua hina’aro te ’Ēkālesia ’ia riro ’ei rāve’a nō te fenua, ’eiaha rā ’ei fifi.

I muri iho i te rurura’a, ’ua ’āpe’e te peresideni Fritch i te peresideni Nelson i te Tahua Pater i reira te tupura’a te hō’ē ’āru’i peu tumu ’e i muri iho te hō’ē purera’a pae vārua, 10 000 ta’ata tei tae mai.

I te ’ōmuara’a nō Tiunu 2020, ’ua fārerei te hō’ē pupu nō te ’Ēkālesia a Iesu Mesia i te Feiā Mo’a i te Mau Mahana Hope’a nei i te peresideni nō Pōrīnetia farāni, ’o Edouard Fritch tāne, ’e te mau melo o tāna fa’aterera’a. I roto i taua rurura’a ra, ’ua hōhora ’o Manea Tuahu, fa’atere nō te ’ohipa totauturu ’e te fa’arava’ira’a iāna iho a te ’Ēkālesia i Pōrīnetia farāni, i te mau mātēria ’e te mau fa’anahora’a ha’api’ipi’ira’a nō te fa’arava’ira’a iāna iho.

’Ua au maita’i Teari’i Alpha tāne, fa’atere hau nō te terera’a faufa’a matie ’e tānava ho’i nō Teva i Uta, i te reira, ’e ’ua hina’aro atu ra e ha’api’i rahi atu ā nō ni’a i te reira. Fa’anaho a’era rāua i te hō’ē rurura’a nā rāua.

I te 19 nō Tiunu, ’ua tauturu te taea’e Tuahu i te tāvana Alpha ’ia māramarama i te ’ōpuara’a a te ’Ēkālesia nō te fa’arava’ira’a iāna iho ’e nāhea i te fa’a’ohipa i te reira.

’Ua ti’aturi roa tāvana Alpha i te faufa’a nō te ’ohipa pae vārua nō te tupura’a o te ta’ata ’e o te ’utuāfare. ’Ua fa’aoti ’oia ’e tāna ’āpo’ora’a ’oire ’ia ha’amau i te hō’ē ’ōpuara’a e fa’aō mai i te ’ohipa pae vārua, te mau parau mau ’e te mau ravera’a i te pae nō te ha’apa’ora’a fa’aro’o.

« E’ita e nehenehe e rave ’o tātou noa ana’e », tē parau ra ’oia. « Tītauhia ’ia ’ohipa ’e te mau pūai ato’a i roto i te huira’atira, ’o te pūai pae fa’aro’o ato’a ïa. »

I roto i tāna ’ōpuara’a ’āpo’ora’a ’oire, ’ua riro te ha’amaura’a i te hō’ē pū fa’aineinera’a nō te orara’a ’utuāfare ’ei ’ohipa nūmera hō’ē roa. E ha’amauhia te reira i te hō’ē fare ha’api’ira’a a te ’oire ’aita e fa’a’ohipahia nei, tei fa’a’āpīhia nō terā ’ōpuara’a.

I muri iho i te fa’a’ite’itera’a a te taea’e Tuahu, ’ua nā ’ō te tāvana : « ’O te pāhonora’a teie nō te mea tā’u i tīa’i noa ana. ’Ua hina’aro vau e tūra’i i te reira ’ōpuara’a ma te ’āpiti i te ’Ēkālesia. ’Ua fa’ahiahia noa ana vau i te mea tā te ’Ēkālesia e rave, te ti’ara’a pū iho ā rā o te ’utuāfare i roto i tāna mau ha’api’ira’a. »

’Ua fa’aha’amana’o tāvana Alpha tōna fāri’i-noa-ra’a i te mau tītaura’a manihini a Elder Jean Tefan tei fa’aru’e mai, ’o ’oia te ta’ata mātāmua tei tītau manihini iāna ’ia haere i te mau rurura’a a te ’Ēkālesia. ’Ua haere atu ’oia i te mau taime ato’a ’oia i vata. ’Ua fa’a’ite mai ’oia ē, ’ua tītau manihini Elder Tefan iāna ’ia haere i Roto Miti, nō te rahi roa rā o te ’ohipa, ’aita i roa’a iāna i te haere atu.

I roto i te ’ōpuara’a pū fa’aineinera’a nō te orara’a ’utuāfare, ’ua hina’aro tāvana Teari’i ’ia ha’api’i rahi atu ā nō ni’a i te mau ha’api’ira’a ’e te mau fa’anahora’a a tete ’Ēkālesia, ma te hi’o ta’a ’ē i te ha’amaita’ira’a i te ’aravihi i te pae nō te fa’arava’ira’a iāna iho.

’Ua haere ato’a te ’āparaura’a i ni’a i te ’aitauira’a ’ati a’e i te ao nei ’e te mau fa’ahope’ara’a o te pararera’a ma’i pohe Covid-19.

’Ua parau tāvana Alpha ē, e mea tītauhia ’ia feruri i te ’ōpuara’a i ni’a e piti pou—te nātura ’e te hīro’a tumu. « E ha’amata teie tauira’a ferurira’a nā ni’a i te mau ’utuāfare ’e e tuha’a tā te mau ha’apa’ora’a fa’aro’o i roto i teie patura’a », tāna i parau.

Hou ’a hōro’a atu i te mau mātēria a te ’Ēkālesia, ’ua fa’a’ite te taea’e Tuahu i te faufa’a rahi o te ta’ata hō’ē ’e te ’utuāfare. ’O rātou te pū o te mau fa’anahora’a ato’a a te ’Ēkālesia.

I muri iho ’ua paraparau ato’a ’oia nō te ti’ara’a o te ’ohipa pae vārua—nā reira ato’a te pae ferurira’a, te pae tino ’e te pae manava—i roto i te tupura’a o te ta’ata tāta’itahi.

’Ua tūra’i ato’a ’oia i te hina’aro o te ’Ēkālesia ’ia riro ’ei pūai nō te maita’i i roto tō tātou sōtaiete.

« Tei ’ō nei mātou nō te pa’epa’e i tō mātou ’aravihi ’e ’ua hina’aro mātou ’ia fa’a’ite i te mau mātēria ha’api’ira’a a te ’Ēkālesia nō te tauturu i te huira’atira, ma te fa’atura i te fa’aro’o o te ta’ata tāta’itahi », ’ua parau te taea’e Tuahu.

’Ua tārena a’era te tāvana Alpha e haere i te hō’ē purera’a a Te ’Ēkālesia a Iesu Mesia i te Feiā Mo’a i te mau Mahana Hope’a nei i Papeari ’e ’ia fārerei i te tahi atu mau feiā fa’atere o te ’Ēkālesia nō te fa’ata’a i te mau rāve’a nō te ’ohipa ’āmui.

I te ferurira’a ’oia nō ni’a i teie rurura’a, ’ua parau Noelline Parker vahine, te upo’o fa’atere tūreiara’a a te ’Ēkālesia i te fenua ē : « E’ita e hape ē, e ’ōmuara’a teie rurura’a maita’i roa nō te tahi ’ohipa ’āpipiti tau maoro nō ni’a i teie ’ōpuara’a nō te pū fa’aineinera’a nō te orara’a ’’utuāfare i te ’oire nō Teva i Uta, ’e i muri iho ato’a. »