Le Auala na Aoao ai A’u e le Lomitusi (Typing) e Ola Tutoatasi

E 16 o’u tausaga na ave ai la’u vasega lomitusi muamua lava. O le 1963 sa ou vasega 10 ai i le A’oga Maualuga a Samoana i Pago Pago, Amerika Samoa. Sa ou miti e i ai se aso e avea ai a’u ma lomitusi faapitoa mo le faamasinoga, o lea sa ou fiafia ai e aoao le faaaogaina o le ituaiga laau lomitusi o le Underwood i la’u vasega fou.

E tatau ona malolosi ou tamai lima e oomi ai ki o le Underwood. Sa faigata tele le aoao e lomitusi e aunoa ma le tilotilo i o’u lima, ma o taimi e se’e ese ai o’u tamailima ma mau i le va o ki . . . auoisa! Ae e ese le manaia o le lomitusi, ma sa faaauau pea ona ou aveina i le aoga maualuga atoa lava. Sa ou lē iloa i lena taimi pe o le a le lelei o o’u tomai lomitusi e aogā ai ia te a’u i aso uma o totoe o lo’u olaga.

Sa ou malaga atu i le Kolisi a le Ekalesia i Hawaii (CCH), o se iunivesite e āna ma pulea e Le Ekalesia a Iesu Keriso o le Au Paia o Aso e Gata Ai. Lea ua ta’ua nei o le Iunivesite a Polika Iaga–Lotoa Hawaii (Brigham Young University–Hawaii Campus), o CCH lea na maua ai la’u molimau o le talalelei a Iesu Keriso ma faia ai le faaiuga taua e avea o se tagata o Lana Ekalesia.

O CCH foi lea na fesoasoani ia te a’u i o’u tomai faalomitusi e ausia ai se tikeri o le Bachelor of Science i Aoaoga Faapisinisi (Business Education), faatasi ai ma se faailoga laitiiti (minor) i le Saienisi Faafailautusi (Secretarial Sciences). Sa maua foi ma lo’u tusipasi faafaiaoga, ma o la’u galuega muamua lava ina ua uma le iunivesite, sa avea a’u ma faiaoga lomitusi.

Sa ou aoao atu ai le lomitusi ma isi mataupu faapisinisi i le a’oga maualuga a le Ekalesia i Pesega, Samoa, ona sosoo ai lea ma le A’oga Maualuga a Kahuku ina ua ou toe foi i Hawaii i ni nai tausaga mulimuli ane.

I le ogatotonu o le vaitausaga o le 1980, ua i ai lo’u tama’i aiga e feaveai, sa ou siitia atu ai i Saipani i le Atumotu o Mariana i Matu. Sa faaauau ona ou aoaoina le lomitusi iina, muamua i le a’oga maualuga ona sosoo lea ma le kolisi e tasi lava a le nuu (community college), lea sa ou maua ai le avanoa matagofie e faatulaga ai le latou potu komepiuta muamua lava. Oka se luitau! Ae na i’u lava ina ou lelei i le faaaogaina o komepiuta ma e le’i umi ae aoao e a’u tamaiti aoga le lomitusi i luga o ki o le komepiuta.

O o’u tomai fou i le faakomepiuta sa iloga le taua mo leisi vaega o la’u galuega. I le amataga o le vaitausaga o le 1990, sa ou faatulagaina ai foi se isi potu komepiuta, ae o le taimi lea i le Kolisi o Aorere, i Niu Sila. Sa ma faaalu ai loa ma lo’u toalua o ma tausaga faaiu faalegaluega e faatautaia ai se tama’i nusipepa i le gagana Samoa i Aukilani, ma o la’u galuega o le taina ma le faataatiaina o le ma lomiga mo le lolomiina. O mea uma lava sa ou faia i luga o le komepiuta, ma o galuega uma lava sa faalagolago i lo’u tomai e taina ai.

I le 70 ai o o’u tausaga, sa ou litaea ai mai galuega masani, ae faia pea galuega mai lea taimi i lea taimi o se faaliliu i le gagana Samoa. E pei o le tele o le lalolagi i aso nei, o lenei galuega e faavae lava i luga o le initoneti, ma o lea e le’i lamatia ai a’u i le leiloa o le tomai e ta ai faalomitusi ia na ou faaleleia i le olaga atoa.

A o o’u tomanatu i le tele o faamanuiaga ua ou fiafia ai e ala i le galuega faatauvaa o le lomitusi, ou te maofa lava i le poto faalelagi i le poloaiga a le Tama Faalelagi ina ia tatou aoaoina, ina ia ausia tomai o le a fesoasoani ia i tatou e maua ai ni tupe ma tauivi ai mo le ola tutoatasi. Ae o le usiusitai i lenei poloaiga e lē na o le maua ai o ni taui faaletino. Sa aumaia ai foi ia te a’u le olioli tele e vaai atu i tomai sa ou aoaoina atu ua maua ai ni suiga lelei i olaga o a’u tamaiti a’oga. O lo’u aafiaga faalefaiaoga sa fesoasoani foi ia te a’u e avea o se tagata aoao ma se tagata faasoa sili atu o le talalelei a Iesu Keriso.

Na fetalai mai le Alii, “O le mea lea . . . Ou te lei tuuina atu lava ia te outou i soo se taimi se tulafono sa faaletino . . .

“ona o a’u poloaiga ua faaleagaga” (Mataupu Faavae ma Feagaiga 29:34–35).

E faapitoa lava lo’u faafetai mo le auala na faamalosia ai e o’u tomai faalomitusi la’u molimau e alofa le Atua i Lana fanau ma tuuina mai ia i tatou mea faigaluega tatou te manaomia e tausi ai i tatou lava ma le tasi i le isi. Ia te a’u, o le uiga moni lava lena o le ola tutoatasi.