Faaalia e Tagatanuu Toga le Alofa mo o Latou Tuaa e Ala i Talafaasolopito o Aiga

O le tele o aulotu o Le Ekalesia a Iesu Keriso o le Au Paia o Aso e Gata Ai e i ai se nofoaga autū mo talafaasolopito o aiga i o latou falelotu.

E i ai iina volenitia e fesoasoani i tagata faatoa amata e saili mo faamatalaga e uiga i o latou tuaa ma fesoasoani i tagata e sili atu ona atamamai i a latou sailiiliga e faaaoga ai punaoa i luga o le initoneti o le FamilySearch.org.

Mo le Au Paia o Aso e Gata Ai, o talafaasolopito faaleaiga o se vaega taua o le tapuai i le malumalu.

O Sosaia ma Maile Neiufi o faufautua o le malumalu ma talafaasolopito o aiga mo siteki e 21 o Toga. Sa lu’iina talu ai nei i la’ua e lo la taitai o le lotoifale, o Elder Inoke Kupu, e faamalosia Le Au Paia o Aso e Gata Ai o Toga ina ia auai i galuega faalemalumalu ma faaletalafaasolopito o aiga.

Sa faamalamalama mai e Sosaia, “O le faaaogaina o le FamilySearch.org i le gagana Toga, ma te aoaoina i latou uma lava o e mananao ai, le auala e auina atu ai o latou igoa faaleaiga. Ua ma i ai iinei e aoao atu, ae faia lava e i latou le galuega.”

Sa faaopoopo mai Maile, “O le ma sini autū o le fesoasoani i tagata o le Ekalesia ina ia ola tutoatasi i le faia o talafaasolopito o aiga. O faufautua o se puna’oa ma e mafai ona fesoasoani.”

Sa faaauau lana saunoaga e faapea, “Ou te lagona e pei o loo o’u faasoaina atu le Agaga o Elia pe a ou nofo i tafatafa o se tagata matua po o soo se tagata o le Ekalesia i soo se vaitausaga o loo faia lenei galuega. Ma te pasi atu ia te ia ia fataki (keyboard); e faia e i latou a latou lava faitotoa (account), ma e ma te molimauina le olioli latou te maua i lena taunuuga faatauvaa ua ausia.”

Sa ia faamalamalama mai foi o lenei lagona talitonu fou ua maua e faamalosia i latou e toe foi mai ma faaauau le galuega.

O se tasi o ia faataitaiga o le aiga o Faanunu mai le Siteki a Vava’u i Mātū. E leai se tasi o le au Faanunu na tago muamua i se komepiuta ae ina ua mavae ni nai faatonuga, sa la’ua faaaluina le itula i le faaopoopoina o ata o manatuaga i luga o le uepisaite faaletalafaasolopito a lo latou aiga. Sa manino lava le mitamita o Mr Faanunu i lana taleni fou faatoa maua o le feuia’i ai i luga o le uepisaite. Sa mafai ona la faaopoopo i ai ata o a la fanau taitoatasi ma le atalii o le la atalii faatoa fanau mai lava.

Talu mai Iuni 2020, ua vaaia e le au Neiufi ua sili atu ma le faaluaina le galuega faalemalumalu ma faatalafaasolopito o aiga i Toga.

“Tatou te manaomia tagata uma lava e faia le galuega,” sa faamalosi’au mai ai Sosaia Neiufi. “O loo aliali mai le faamanuiaina i luga o a tatou kalafi aua o loo faia e tagata uma le galuega.”

Ua faailoa mai e Maile Neiufi, o le manuia i le siitia o le galuega e mafua ona o le “faatuatua o le Au Paia ma lo latou alolofa i le Alii.”

A o ia toe manatua se aoaoga faalemalumalu sa faia e Elder David A. Bednar, sa ia toe faapea mai, “O le galuega faafaifeautalai ma faatalafaasolopito o aiga mo le malumalu o le galuega lava e tasi. Atonu e manatu nisi e sili atu le taua o le tasi nai lo leisi, ae e tutusa lava lo la taua.”

E ui lava i le pa o le maugamū ma le galuafi i le amataga o le tausaga lenei, o loo faaauau pea le galuega faaletalafaasolopito o aiga.

“I le totonugalēmu o faalavelave uma ma luitau sa feagai ma tagata o Toga, sa tumau pea le maualuga atu o le Au Paia i Toga i le numera o tagata o loo galulue i o latou gafa o aiga pe a faatusatusa atu i isi nofoaga i le Oseania,” na saunoa mai ai Michael Higgins, o le Pule o Talafaasolopito o Aiga i le Eria o le Pasefika.

“Sa ou lagona le ootia faalelagona ina ua ou vaai i nei taunuuga, aemaise lava i le alofa na faaalia e le Au Paia i Toga i o latou tuaa e ala i le saunia e fai faamanatuga mo i latou a o i ai i le lotolotoi o o latou lava faigata moni.”