ස්වාමින්වහන්සේ කෙදිනකවත් මට හෝ මෙම සභාවේ සභාපතිවරයා ලෙස සිටින කිසිඳු මනුෂ්‍යයෙකුට නුඹලාව නොමඟ යැවීමට ඉඩනොදෙන සේක. එය සැලසුමේ නැත. එය දෙවියන්වහන්සේගේ මනසෙහි නැත. මම ඒ සඳහා උත්සහ දරන්නේ නම්, ස්වාමින්වහන්සේ විසින් මාව මගේ ස්ථානයෙන් ඉවත් කරනු ඇත, එමෙන්ම දෙවියන්වහන්සේගේ එළිදරව් වලින් සහ ඔවුන්ගේ වගකීම් වලින් මනුෂ්‍ය දරුවන්ව නොමග යැවීමට උත්සහ කරන ඕනෑම මනුෂ්‍යයෙකුටද උන්වහන්සේ එසේ කරනු ඇත. (සභාවේ හැට-එක්වෙනි අර්ධ වාර්ෂික ප්‍රධාන සම්මන්ත්‍රණය, 1890 ඔක්තෝම්බර් 06 වන සඳුදා දින, යූටා හි, සෝල්ට් ලේක් නගරය. 1890 ඔක්තෝම්බර් 11 වන දින, Deseret Evening News [ඩෙසරට් ඊවිනින් නිවුස්] හි 2 වන පිටුවේ වාර්තා විය.)

කවරෙකු ජීවත් වන්නේද හෝ මරණයට පත්වන්නේද, හෝ මෙම සභාව මෙහෙයවීමට කැඳවා ඇත්තේ කවුරුන්වද යන්න වැදගත් නොවන්නේය, ඔවුන් එය සර්වබලධාරී දෙවියන්වහන්සේගේ අනුභාවයෙන් යුතුව මෙහෙයවිය යුතු වන්නෝය. ඔවුන් එය ඒ ආකාරයට නොකරන්නේ නම්, ඔවුන්ට එය කෙසේවත් කළ හැකි නොවන්නේය. …

පසුව ලැබුණු එළිදරව් මා සමඟ ඇත, තවද ඒවා මා හට ඉතා වැදගත් ඒවාය, තවද ස්වාමින්වහන්සේ මට පැවසුවේ මොනවාදැයි මම නුඹලාට පවසන්නෙමි. ප්‍රතිපත්ති ප්‍රකාශනය ලෙස හඳුන්වන දෙයට ඔබේ මනස ගෙන ඒමට මට ඉඩදෙන්න. …

පසුදවස් වල ශුද්ධවන්තයන්ගෙන් ප්‍රශ්නයක් අසන ලෙස ස්වාමින්වහන්සේ මට පැවසුවේය, තවද උන්වහන්සේ මෙලෙසද මට පැවසුවේය එනම් මා පැවසූ දෙයට ඔවුන් සවන්දී තවද ඔවුන් මත තැබූ ප්‍රශ්නයට පිළිතුරු දෙන්නේ නම්, දෙවියන්වහන්සේගේ ආත්මයෙන් සහ බලයෙන්, ඔවුන් සියල්ලෝම එක සමානව පිළිතුරු දෙන්නෝය, තවද මෙම කාරණය සම්බන්ධව ඔවුන් සියල්ලෝම එක සමානව විශ්වාස කරන්නෝය.

ප්‍රශ්නය මෙය වන්නේය; පසුදවස් වල ශුද්ධවන්තයන්ට අනුගමනය කළ හැකි ඥානාන්විතම ගමන්මග කුමක්ද—බහු විවාහයට එරෙහිව ජාතියේ නීති සහ මිලියන හැටක ජනතාවගේ විරුද්ධත්වය සමඟ, තවද සියලුම දේවමාළිගා රාජසන්තක වී අහිමි වී යාමේ, සහ ජීවත් වන්නන් සහ මළවුන් යන දෙපාර්ශවයම සඳහා එහි වූ සියලුම නියෝග නැවැත්වීමේ අවධානම සමඟ, තවද සභාවේ පළමු සභාපතිත්වය සහ දොළොස්දෙනාද තවද පවුල් වල ගෘහමූලිකයන්ව සිරභාරයට ගැනීම සමඟ, තවද ජනතාවගේ පුද්ගලික දේපළ රාජසන්තක වීම සමඟ මෙම සිරිත දිගටම පවත්වාගෙන යාමද (මේ සියල්ලම සිදුවනු ඇත්තේ එම සිරිත නැවැත්වීම සඳහාය); නැතහොත්, මෙම මූලධර්මය උදෙසා අපගේ ඇදහිලිවන්ත කීකරුකම තුළින් අප සිදුකළ සහ පීඩා විඳි දේවලින් පසුව, අනාගතවක්තෘවරුන්ට, ප්‍රේරිතවරුන්ට සහ පියවරුන්ට ජනතාවට උපදෙස් දීමට සහ සභාවේ වගකීම් වලට සහභාගී වන්නට හැකිවන පරිදි, ඔවුන්ට නිවෙස් වල රැඳෙන්නට සලස්වමින්, තවද ශුද්ධවන්තයින්ට, ජීවත් වන්නන් සහ මළවුන් යන දෙපාර්ශවය සඳහාම, ශුභාරංචියේ නියෝග වලට සහභාගී වන්නට හැකිවන පරිදි, දේවමාළිගා ශුද්ධවන්තයින්ගේ අයිතියේ තැබෙන්නට ඉඩහරිමින්, මෙම සිරිත නවත්වා තවද නීතියට අවනත වීමද?

අපි මෙම සිරිත නවත්වන්නේ නැතිනම් සැබවින්ම සිදුවන්නේ කුමක්දැයි ස්වාමින්වහන්සේ මට දර්ශනයක් සහ එළිරදව්වක් මගින් පෙන්වනු ලැබුවේය. අපි එය නැවැත්වූයේ නොමැති නම්, නුඹලාගෙන් … මෙම ලෝගන් දේවමාළිගාවේ කිසිඳු මනුෂ්‍යයෙකුගෙන් ප්‍රයෝජනයක් නොමැති වන්නේය; මක්නිසාද සයොන දේශය පුරා සියලුම නියෝග නතර කරනු ලැබෙන්නට ඉඩ තිබිණි. ඉශ්‍රායෙලය පුරා ව්‍යාකූලතාවයක් ඇතිවන්නටත්, තවද බොහෝ මනුෂ්‍යයන් සිරගත කරනු ලැබෙන්නටත් ඉඩ තිබිණි. මෙම කරදරය මුළු සභාව මතම පැමිණෙන්නට ඉඩ තිබිණි, තවද මෙම සිරිත නැවැත්වීම සඳහා බලකෙරෙන්නට ඉඩ තිබිණි. දැන්, ප්‍රශ්නය මෙයයි, එය නැවැත්විය යුත්තේ මේ ආකාරයෙන්ද, නැතිනම් අපගේ අනාගතවක්තෘවරුන් සහ ප්‍රේරිතවරුන් සහ පියවරුන් නිදහස් මනුෂ්‍යයන් ලෙස සිටිමින්, තවද මළවුන්ද ගැලවීම ලබන පිණිස, දේවමාළිගා ජනතාවගේ අයිතියේ තිබෙමින්, ස්වාමින්වහන්සේ අපට ප්‍රකාශ කළ ලෙසද? මෙම ජනතාව විසින් දැනටමත් ආත්මික ලෝකයේ හිරගෙදර සිට බොහෝ සංඛ්‍යාවක් මුදාහැර ඇත්තේය, තවද එම කාර්යය දිගටම සිදුවිය යුතුද, හෝ නැවතිය යුතුද? පසුදවස් වල ශුද්ධවන්තයන් ඉදිරියේ මම තබන ප්‍රශ්නය මෙයයි. නුඹලා නුඹලා සඳහාම විනිශ්චය කළ යුතු වන්නෝය. නුඹලා නුඹලා සඳහාම එයට පිළිතුරු දීම මට අවශ්‍ය වන්නේය. මම එයට පිළිතුරු නොදෙන්නෙමි; එහෙත් අපි මෙම ක්‍රියාමාර්ගය නොගත්තේ නම් ජනතාවක් ලෙස අපි පත්වන තත්වය නියත වශයෙන්ම මෙලෙස වන බව මම නුඹලාට පවසන්නෙමි.

… එහි යමක් සිදුකළේ නොමැතිනම් නියත වශයෙන්ම කුමක් සිදුවන්නේ දැයි මම දුටුවෙමි. බොහෝ කාලයක් තිස්සේ මෙම ආත්මය මා කෙරෙහි තිබිණි. එහෙත් මට මෙසේ පැවසීමට අවශ්‍යය: මා කළ දේ ස්වර්ගයේ දෙවියන්වහන්සේ විසින් මා හට කරන්නට ආඥා කර තිබුණේ නොමැතිනම්, සියලුම දේවමාළිගා නුඹලාගේ අයිතියෙන් පිටතට යාමට ඉඩදීමට මට තිබිණි; මා හිරගෙදරට යාමට ඉඩතිබිණි, තවද අනෙක් සියලුම මනුෂ්‍යයන්ටද එහි යාමට ඉඩදෙන්නට තිබිණි; තවද මට එසේ කිරීමට ආඥා කළ එම පැය පැමිණි විට, ඒ සියල්ල මට ඉතා පැහැදිලි විය. මම ස්වාමින්වහන්සේ ඉදිරියට ගියෙමි, තවද මා ලිවිය යුතු යැයි ස්වාමින්වහන්සේ මට පැවසූ දේ මම ලිව්වෙමි. …

මම මෙය නුඹලා සමඟ තබා යන්නෙමි, මක්නිසාද නුඹලා මෙය සිතින් විමසා තවද සැලකිල්ලට ගැනීම පිණිසය. ස්වාමින්වහන්සේ අප සමඟ ක්‍රියාකරන සේක. (කෑෂ් ස්ටේක සම්මන්ත්‍රණය, ලෝගන්, යූටා, 1891 නොවැම්බර් 1 වන ඉරිදා. 1891 නොවැම්බර් 14, Deseret Weekly [ඩෙසරට් වීක්ලි] හි වාර්තා විය.)

මෙම කාරණය තුළ මා හට ප්‍රකාශ කරනු ලැබුවේ කුමක්ද සහ දෙවියන්වහන්සේගේ පුත්‍රයාණන් ඉටුකළේ කුමක්ද යන්න මම දැන් නුඹලාට පවසන්නෙමි. … එම ප්‍රතිපත්ති ප්‍රකාශය ලබාදී නොතිබුනා නම්, සර්වබලධාරී දෙවියන්වහන්සේ ජීවත් වන්නා සේම, මෙම සියලු දේවල් සිදුවීමට ඉඩ තිබිණි. එසේහෙයින්, උන්වහන්සේගේ ස්වකීය මනසේ අරමුණු වලට අනුව එම දේ සභාවට සහ ලෝකයට ඉදිරිපත් කළ යුතු බව දෙවියන්වහන්සේගේ පුත්‍රයාණන් හට කැමැත්තක් ඇතිවුණි. සයොනයේ පිහිටුවීම ස්වාමින්වහන්සේ විසින් නියෝග කර ඇත්තේය. මෙම දේවමාළිගාව නිමකිරීමට උන්වහන්සේ විසින් නියෝග කර ඇත්තේය. තවද ජීවත් වන්නන්ගේ සහ මළවුන්ගේ ගැලවීම මෙම කඳුකරයේ නිම්න වලදී ලබාදිය යුතු බව උන්වහන්සේ විසින් නියෝග කර ඇත්තේය. තවද යක්ෂයා විසින් එයට බාධා නොකළ යුතු බව සර්වබලධාරී දෙවියන්වහන්සේ විසින් නියෝග කර ඇත්තේය. නුඹලාට එය තේරුම්ගත හැකිනම්, ඒ සඳහා ප්‍රධාන හේතුව එය වන්නේය. (1893 අප්‍රියෙල් මාසයේ, සෝල්ට් ලේක් දේවමාළිගාව කැපකිරීමේ හයවන රැස්වීමේ දේශනාවකින්ය. කැපකිරීමේ සේවාවන්ගේ යතුරුලිඛිතය, සංරක්ෂණාගාරය, සභා ඓතිහාසික දෙපාර්තමේන්තුව, සෝල්ට් ලේක් නගරය, යූටා.)