ការងារបម្រើ
ចូរយើងឈោងទៅជួយ ហើយយកចិត្តទុកដាក់ដូចជាព្រះអង្គសង្រ្គោះធ្វើ ជាពិសេសដល់អស់អ្នកដែលយើងមានឯកសិទ្ធិផ្ដល់ការងារបម្រើដោយសេចក្ដីស្រឡាញ់ និងការចាត់តាំង ។
បងប្អូនប្រុសស្រីជាទីស្រឡាញ់ សូមស្វាគមន៍មកកាន់សន្និសីទទូទៅ !
បន្ទាប់ ពី សន្និសីទទូទៅខែតុលា ស៊ីស្ទើរ ហ្គង និងខ្ញុំបានដើរក្នុងមជ្ឈមណ្ឌលសន្និសីទនិយាយរាក់ទាក់ និងស្តាប់បទពិសោធន៍ដំណឹងល្អរបស់បងប្អូន ។
សមាជិកយើងមក ពីម៉ិកស៊ិកបាននិយាយថា « Hoy es el tiempo de Mexico » ( ឥឡូវនេះជាពេលសម្រាប់ម៉ិកស៊ិកទទួលពរជ័យ ) ។
យើងបានដឹងថា ហ្គីលី និង ម៉ារី ជាមិត្តភក្ដិគ្នាមកពីប្រទេសអង់គ្លេស ។ នៅពេល ម៉ារី បានចូលរួមក្នុងសាសនាចក្រ នាងបានបាត់បង់កន្លែងរស់នៅ ។ ហ្គីលី មានចិត្តល្អអញ្ជើញ ម៉ារី ឲ្យទៅរស់នៅជាមួយនាង ។ ហ្គីលី ថ្លែងពេញដោយសេចក្ដីជំនឿថា « ព្រះអម្ចាស់គង់នៅនឹងខ្ញុំ ខ្ញុំមិនដែលសង្ស័យទេ » ។ នៅឯសន្និសីទ ហ្គីលី ក៏មានអំណរដែលបានជួបស៊ីស្ទើរអ្នកផ្សព្វផ្សាយសាសនា ដែលជាអ្នកជួយបង្រៀននាងកាលពី ៤៧ ឆ្នាំមុនផងដែរ ។
ជេហ្វ និងភរិយាគាត់ មេលីសា បានចូលរួមសន្និសីទទូទៅជាលើកដំបូង ។ ជេហ្វ ធ្លាប់លេងកីឡាបេស្បលអាជីព ( គាត់ជាអ្នកចាប់បាល់ ) ហើយឥឡូវនេះ គាត់គឺជាគ្រូពេទ្យផ្នែកចាក់ថ្នាំសណ្ដំ ។ គាត់ប្រាប់ខ្ញុំថា « ខ្ញុំភ្ញាក់ផ្អើលយ៉ាងខ្លាំង ដែលខ្ញុំឆ្ពោះទៅរកបុណ្យជ្រមុជទឹក ព្រោះខ្ញុំមានអារម្មណ៍ថា វាគឺជារបៀបរស់នៅដ៏ល្អពិត និងស្មោះត្រង់បំផុត » ។
មុននេះ មេលីសា បានសុំទោសបងប្រុសដែលបានចាត់ឲ្យផ្ដល់ការងារបម្រើដល់ ជេហ្វ ថា « ជេហ្វ មិនចង់ឲ្យ ‹ អ្នកពាក់អាវស › នៅក្នុងផ្ទះរបស់យើងទេ » ។ បងប្រុសដែលផ្ដល់ការងារបម្រើបាននិយាយថា « ខ្ញុំនឹងរកវិធីមួយ » ។ ឥឡូវនេះ គាត់ និង ជេហ្វ គឺជាកល្យាណមិត្តនឹងគ្នា ។ នៅឯពិធីបុណ្យជ្រមុជទឹករបស់ ជេហ្វ ខ្ញុំបានជួបក្រុមជំនុំនៃពួកបរិសុទ្ធថ្ងៃចុងក្រោយដែល ជេហ្វ មេលីសា និងកូនស្រីរបស់ពួកគេឈ្មោះ ឆាឡុតធឹ ស្រឡាញ់ ។
ក្នុងនាមជាអ្នកដើរតាមព្រះយេស៊ូវគ្រីស្ទ យើងខិតខំព្យាយាមផ្ដល់ការងារបម្រើដល់មនុស្សដទៃ ដូចដែលទ្រង់ធ្វើដោយសារមានជីវិតជាច្រើនកំពុងរង់ចាំការផ្លាស់ប្ដូរ ។
ពេល ភេហ្គី ប្រាប់ខ្ញុំថា ស្វាមីរបស់នាង ឈ្មោះ ចន នឹងទទួលបុណ្យជ្រមុជទឹកក្រោយពីបានរៀបការអស់ ៣១ ឆ្នាំ ខ្ញុំបានសួរនាងថា តើមានអ្វីបានផ្លាស់ប្ដូរទៅ ។
ភេហ្គី បានតបថា « ចន និងខ្ញុំបានសិក្សាព្រះគម្ពីរសញ្ញាថ្មី ចូរមកតាមខ្ញុំ ហើយ ចន បានសួរអំពីគោលលទ្ធិរបស់សាសនាចក្រ » ។
ភេហ្គី បាននិយាយថា « ដូច្នេះចូរយើងអញ្ជើញអ្នកផ្សព្វផ្សាយសាសនាមក » ។
ចន បានថា « គ្មានអ្នកផ្សព្វផ្សាយសាសនាទេ—លុះត្រាតែមិត្តរបស់ខ្ញុំអាចមកដែរ » ។ ជាង ១០ ឆ្នាំហើយដែលបងប្រុសផ្ដល់ការងារបម្រើដល់ ចន នោះបានក្លាយជាមិត្តភក្តិដ៏គួរឲ្យទុកចិត្តរបស់គាត់ ។ ( ខ្ញុំគិតថា ចុះបើបងប្រុសដែលផ្ដល់ការងារបម្រើរបស់ ចន ឈប់មកបន្ទាប់ពីមួយ ពីរ ឬប្រាំបួនឆ្នាំវិញនោះ ? )
ចន បានស្តាប់ ។ គាត់បានអានព្រះគម្ពីរមរមនដោយស្មោះអស់ពីចិត្ត ។ នៅពេលអ្នកផ្សព្វផ្សាយសាសនាបានអញ្ជើញ ចន ឲ្យទទួលបុណ្យជ្រមុជទឹក នោះគាត់បាននិយាយថា បាទ ។ ភេហ្គីបាននិយាយ « ខ្ញុំស្ទើរធ្លាក់ពីលើកៅអី ហើយចាប់ផ្ដើមយំ » ។
ចន បាននិយាយថា « ខ្ញុំបានផ្លាស់ប្ដូរ ពេលខ្ញុំខិតកាន់តែជិតព្រះអម្ចាស់ » ។ ក្រោយមក ចន និង ភេហ្គី បានផ្សារភ្ជាប់នៅក្នុងព្រះវិហារបរិសុទ្ធដ៏ពិសិដ្ឋ ។ កាលពីខែធ្នូ ចន បានទទួលមរណភាពនៅអាយុ ៩២ ឆ្នាំ ។ ភេហ្គី ពោលថា « ចន តែងតែជាមនុស្សដ៏ល្អម្នាក់ ប៉ុន្តែគាត់បានក្លាយជាមនុស្សខុសពីមុន តាមរបៀបដ៏ស្រស់ស្អាតមួយ ក្រោយពីគាត់បានទទួលបុណ្យជ្រមុជទឹក » ។
ស៊ីស្ទើរ ហ្គង និងខ្ញុំបានជួបជាមួយ ម៊ែប និង ជេននី តាមវីដេអូ នៅអំឡុងពេលជំងឺរាតត្បាតកូវីដ ។ ( យើងបានជួបគូស្វាមីភរិយា និងបុគ្គលដ៏អស្ចារ្យជាច្រើននាក់តាមវីដេអូក្នុងអំឡុងពេលជំងឺកូវីដ ដែលម្នាក់ៗត្រូវបានណែនាំដោយប្រធានស្តេករបស់ពួកគេប្រកបដោយការអធិស្ឋាន ) ។
ម៊ែប និង ជេននី បានថ្លែងយ៉ាងរាបសាថា ការព្រួយបារម្ភនៅក្នុងជីវិតរបស់ពួកគេបានធ្វើឲ្យពួកគេឆ្ងល់ថា តើអាពាហ៍ពិពាហ៍ក្នុងព្រះវិហារបរិសុទ្ធរបស់ពួកគេអាចបានសង្គ្រោះដែរឬទេ ហើយបើបានសង្គ្រោះមែន តើតាមរបៀបណាទៅ ។ ពួកគេជឿថា ដង្វាយធួនរបស់ព្រះយេស៊ូវគ្រីស្ទ និងការតាំងចិត្តចំពោះសេចក្តីសញ្ញារបស់ពួកគេ អាចជួយពួកគេបាន ។
សូមស្រមៃអំពីអំណររបស់ខ្ញុំ នៅពេលដែល ម៊ែប និង ជេននី បានទទួលប័ណ្ណចូលព្រះវិហារបរិសុទ្ធថ្មី ហើយបានត្រឡប់ទៅកាន់ដំណាក់របស់ព្រះអម្ចាស់វិញជាមួយគ្នា ។ ក្រោយមក ម៊ែប ស្ទើរតែបាត់បង់ជីវិត ។ ជាពរជ័យណាស់ដែល ម៊ែប និង ជេននី បានស្តារទំនាក់ទំនងសេចក្ដីសញ្ញានឹងព្រះអម្ចាស់ និងជាមួយគ្នា ហើយទទួលបានអារម្មណ៍ក្ដីស្រឡាញ់មកពីមនុស្សដែលផ្ដល់ការងារបម្រើនៅជុំវិញពួកគេជាច្រើន ។
នៅគ្រប់ទីកន្លែងដែលខ្ញុំទៅ ខ្ញុំមានអំណរគុណដែលបានរៀនពីបងប្អូនប្រុសស្រីដែលផ្ដល់ការងារបម្រើ និងខ្វល់ខ្វាយ ដូចដែលព្រះអង្គសង្គ្រោះរបស់យើងនឹងធ្វើដែរ ។
នៅប្រទេសបេរ៉ូ ស៊ីស្ទើរ ហ្គង និងខ្ញុំបានជួប សាល់វ៉ាឌ័រ និងបងប្អូនរបស់គាត់ ។១ សាល់វ៉ាឌ័រ និងបងប្អូនរបស់គាត់ គឺជាកូនកំព្រា ។ វាគឺជាថ្ងៃខួបកំណើតរបស់ សាល់វ៉ាឌ័រ ។ ថ្នាក់ដឹកនាំសាសនាចក្រ និងសមាជិកដែលផ្ដល់ការងារបម្រើយ៉ាងស្មោះត្រង់ដល់គ្រួសារនេះបំផុសគំនិតដល់ខ្ញុំ ។ « សាសនាដែលបរិសុទ្ធ ហើយឥតសៅហ្មង »២គឺដូច្នេះ—« គឺឲ្យទៅសួរពួកកំព្រា និងពួកមេម៉ាយ »៣ជួយអ្នកទន់ខ្សោយ ចូរលើកដៃដែលរោយ … ចម្រើនកម្លាំងដល់ក្បាលជង្គង់ដែលញ័រផង » ។៤
នៅទីក្រុងហុងកុង ប្រធានកូរ៉ុមអែលឌើរម្នាក់បានចែកចាយយ៉ាងរម្យទមពីរបៀបដែលកូរ៉ុមរបស់គាត់សម្ភាសពីការងារបម្រើបាន ១០០ ភាគរយពេញយ៉ាងខ្ជាប់ខ្ជួន ។ គាត់ថ្លែងថា « យើងរៀបចំដៃគូដោយការអធិស្ឋាន ដើម្បីឲ្យមនុស្សគ្រប់គ្នាអាចថែទាំមនុស្សម្នាក់ ហើយមានគេថែទាំគាត់វិញដែរ » ។ « យើងសួរដៃគូនីមួយៗអំពីមនុស្សដែលពួកគេផ្ដល់ការងារបម្រើជាទៀងទាត់ ។ យើងមិនធ្វើដើម្បីឲ្យតែបាននោះទេ យើងផ្ដល់ការងារបម្រើដល់បងប្អូនប្រុសស្រីដែលផ្ដល់ការងារបម្រើ ដែលខ្វល់ខ្វាយពីសមាជិកយើង » ។
នៅគីនស្សាសា សាធារណរដ្ឋប្រជាធិបតេយ្យកុងហ្គោ ប្រធាន បូកូឡូ បានចែកចាយពីរបៀបដែលគាត់ និងគ្រួសារគាត់បានចូលក្នុងសាសនាចក្រនៅប្រទេសបារាំង ។ ថ្ងៃមួយ ពេលគាត់កំពុងអានពរលោកអយ្យកោរបស់គាត់ ព្រះវិញ្ញាណបានបំផុសគំនិតឲ្យបងប្រុស បូកូឡូ ត្រឡប់ទៅកាន់សាធារណរដ្ឋប្រជាធិបតេយ្យកុងហ្គោវិញជាមួយគ្រួសារគាត់ ។ បងប្រុស បូកូឡូ បានដឹងថា ពួកគេនឹងជួបឧបសគ្គជាច្រើន បើពួកគេត្រឡប់ទៅវិញ ។ ហើយព្រះវិហាររបស់ពួកគេ គឺសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ក៏មិនទាន់បានបង្កើតឡើងនៅក្នុងទីក្រុងគីនស្សាសាដែរ ។
តែដោយសារសេចក្ដីជំនឿ ដូចជាមនុស្សជាច្រើនមានដែរ គ្រួសារបូកូឡូបានធ្វើតាមព្រះវិញ្ញាណនៃព្រះអម្ចាស់ ។ នៅគីនស្សាសា ពួកគេបានផ្ដល់ការងារបម្រើ និងផ្ដល់ពរជ័យដល់មនុស្សដែលនៅជុំវិញពួកគេ បានយកឈ្នះលើឧបសគ្គនានា បានទទួលពរជ័យខាងវិញ្ញាណ និងខាងសាច់ឈាម ។ សព្វថ្ងៃនេះ ពួកគេអររីករាយដែលមានដំណាក់របស់ព្រះអម្ចាស់នៅក្នុងប្រទេសរបស់ពួកគេ ។៤
អ្នកប្រែចិត្តជឿម្នាក់ទទួលបានការងារបម្រើតាមរយៈគំរូផ្ទាល់ខ្លួន ។ កាលនៅជាយុវជន គាត់បាននិយាយថា គាត់បានចំណាយពេលជាច្រើនដើរតាមឆ្នេរដោយឥតប្រយោជន៍ ។ គាត់បាននិយាយថា មានថ្ងៃមួយ « ខ្ញុំបានឃើញនារីដ៏ទាក់ទាញម្នាក់នៅក្នុងឈុតហែលទឹកដ៏រម្យទមមួយ » ។ ដោយស្ងើចក្នុងចិត្ត គាត់បានទៅសួរថា ហេតុអ្វីបានជានារីដ៏ទាក់ទាញម្នាក់នេះពាក់ឈុតហែលទឹកដ៏រម្យទមបែបនេះ ។ នាងគឺជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ហើយបានសួរដោយស្នាមញញឹមថា « តើអ្នកចង់មកព្រះវិហារនៅថ្ងៃអាទិត្យដែរឬទេ ? » គាត់បាននិយាយថា បាទ ។
ជាច្រើនឆ្នាំកន្លងទៅ អំឡុងពេលយើងបានទទួលការចាត់តាំងរួមគ្នា អែលឌើរ អិល ថម ភែរី បានចែកចាយពីរបៀបដែលលោក និងដៃគូបានផ្ដល់ការងារបម្រើជាទៀងទាត់ដល់បងស្រីម្នាក់ ដែលរស់នៅតែម្នាក់ឯងនៅតំបន់ដ៏លំបាកមួយជិតបូស្តុន ។ នៅពេលអែលឌើរ ភែរី និងដៃគូបានមកដល់ បងស្រីរូបនោះបានណែនាំយ៉ាងប្រយ័ត្នថា « ដាក់ប័ណ្ណចូលព្រះវិហារបរិសុទ្ធរបស់អ្នកតាមក្រោមទ្វារមក » ។ ទាល់តែគាត់បានឃើញប័ណ្ណចូលព្រះវិហារបរិសុទ្ធសិន ទើបគាត់ចាក់សោជាច្រើនជាន់ ហើយបើកទ្វារឲ្យចូល ។៥ ពិតណាស់ ខ្ញុំមិនបាននិយាយថា ដៃគូផ្ដល់ការងារបម្រើត្រូវតែយកប័ណ្ណចូលព្រះវិហារបរិសុទ្ធតាមខ្លួនរហូតនោះទេ ។ ប៉ុន្តែខ្ញុំចូលចិត្តគំនិតដែលថា អ្នកដែលគោរពសេចក្តីសញ្ញាផ្ដល់ការងារបម្រើ នោះសោផ្ទះនឹងបើក ហើយបេះដូងក៏បើកដែរ ។
អែលឌើរ ភែរី ក៏បានផ្តល់ដំបូន្មានដ៏មានប្រយោជន៍ផងដែរ ។ លោកបានមានប្រសាសន៍ថា « សូមផ្តល់កិច្ចការចាត់តាំងមួយចំនួនដែលសមល្មមដល់ដៃគូទាំងឡាយ ដោយធ្វើការអធិស្ឋានជ្រើសរើស ចាត់តាំងតាមភូមិសាស្ត្រដែលសមរម្យដើម្បីប្រើពេលវេលាធ្វើដំណើរបានល្អ » ។ លោកបានទូន្មានថា « សូមចាប់ផ្ដើមពីអ្នកដែលត្រូវការការសួរសុខទុក្ខច្រើនបំផុត ។ សូមបន្ដទៅអ្នកដែលទំនងជាស្វាគមន៍ និងឆ្លើយតបបានល្អទៅនឹងការសួរសុខទុក្ខ » ។ លោកបានបញ្ចប់ថា « ភាពខ្ជាប់ខ្ជួនដ៏ស្មោះត្រង់នាំមកនូវអព្ភូតហេតុ » ។
ការផ្ដល់ការងារបម្រើតាមរបៀបកាន់តែខ្ពស់ និងកាន់តែបរិសុទ្ធ៦ កើតឡើង នៅពេលយើងអធិស្ឋានទូលសូម « សេចក្ដីស្រឡាញ់ដ៏សុទ្ធសាធនៃព្រះគ្រីស្ទ »៧ ហើយធ្វើតាមព្រះវិញ្ញាណនោះ ។ វាក៏កើតឡើងផងដែរ នៅពេលគណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះ ដោយនៅក្រោមការដឹកនាំរបស់ប៊ីស្សព មើលការខុសត្រូវលើកិច្ចខិតខំផ្ដល់ការងារបម្រើ រួមទាំងការចាត់តាំងដៃគូផ្ដល់ការងារបម្រើផងដែរ ។ សូមផ្ដល់ឱកាសដល់យុវជន និងយុវនារីរបស់យើង អមដំណើរ និងទទួលបានការបង្រៀនពីបងប្អូនប្រុសស្រីដែលផ្ដល់ការងារបម្រើមានបទពិសោធន៍ទាំងឡាយផងដែរ ។ ហើយសូមឲ្យជំនាន់ដែលកំពុងពេញវ័យដ៏ក្មេងខ្ចីរបស់យើង បំផុសគំនិតដល់ដៃគូបងប្អូនប្រុសស្រីដែលផ្ដល់ការងារបម្រើ ។
នៅកន្លែងមួយចំនួនក្នុងសាសនាចក្រ យើងមានចន្លោះប្រហោងក្នុងការងារបម្រើ ។ មនុស្សជាច្រើននិយាយថា ពួកគេផ្ដល់ការងារបម្រើច្រើនជាងពួកគេទទួលបានការងារបម្រើ ។ យើងមិនចង់ឲ្យមានការព្រួយបារម្ភឲ្យតែរួចនោះទេ ។ ប៉ុន្តែជាញឹកញាប់ យើងចាំបាច់ត្រូវធ្វើលើសពីការគ្រាន់តែនិយាយរាក់ទាក់នៅតាមច្រកចូល ឬការសួរតាមធម្មតានៅចំណតរថយន្ដថា « តើមានអី្វខ្ញុំអាចជួយបានទេ ? » ។ យើងអាចឈោងទៅជួយ ស្វែងយល់ពីអ្នកដទៃ ហើយបង្កើតចំណងមិត្តភាពនៅច្រើនកន្លែង ពេលយើងទៅសួរសុខទុក្ខសមាជិកនៅក្នុងផ្ទះរបស់ពួកគេជាទៀងទាត់ ។ ការអញ្ជើញដ៏បំផុសគំនិតផ្លាស់ប្ដូរជីវិត ។ នៅពេលការអញ្ជើញជួយយើងឲ្យធ្វើ និងរក្សាសេចក្ដីសញ្ញាដ៏ពិសិដ្ឋ នោះយើងខិតទៅកាន់តែជិតព្រះអម្ចាស់ និងជិតគ្នាទៅវិញទៅមក ។
គេនិយាយថា អ្នកដែលយល់ពីស្មារតីពិតនៃការងារបម្រើធ្វើកាន់តែច្រើនជាងមុន ខណៈដែលអ្នកមិនយល់ធ្វើតិចជាងមុន ។ សូមធ្វើឲ្យកាន់តែច្រើន ដូចដែលព្រះអង្គសង្គ្រោះយើងនឹងធ្វើដែរ ។ ដូចទំនុកតម្កើងរបស់យើងបានចែងថា ការងារបម្រើគឺជា « ពរនៃកាតព្វកិច្ច និងស្នេហ៍ » ។៨
ក្រុមប្រឹក្សាវួដ កូរ៉ុមអែលឌើរ និងសមាគមសង្គ្រោះ សូមស្ដាប់តាមអ្នកគង្វាលល្អ ហើយជួយទ្រង់ « ស្វែងរកសត្វណាដែលវង្វេងបាត់ … នាំសត្វណាដែលត្រូវប្រដេញឲ្យមកវិញ សត្វណាដែលបាក់ជើង នោះ … នឹងរុំអបឲ្យ … ចម្រើនកម្លាំងដល់សត្វណាដែលឈឺ » ។៩ យើងអាចទទួល « ទាំងទេវតាឲ្យសំណាក់នៅឥតដឹងផង »១០ នៅពេលយើងរៀបបន្ទប់នៅក្នុងផ្ទះសំណាក់របស់ទ្រង់សម្រាប់មនុស្សទាំងអស់១១
ការងារបម្រើដ៏បំផុសគំនិតផ្ដល់ពរជ័យដល់ក្រុមគ្រួសារ និងបុគ្គលជាច្រើន ។ វាក៏ពង្រឹងដល់វួដ និងសាខាទាំងឡាយផងដែរ ។ សូមគិតអំពីវួដ ឬសាខារបស់បងប្អូនថាជាប្រព័ន្ធបរិស្ថានខាងវិញ្ញាណ ។ តាមស្មារតីនៃដំណើររឿងប្រៀបប្រដូចនៅក្នុងព្រះគម្ពីរមរមនអំពីដើមអូលីវ នោះម្ចាស់ចម្ការ និងអ្នកបម្រើនាំមកនូវផលដ៏មានតម្លៃ និងពង្រឹងដើមនីមួយៗ ដោយការចងភ្ជាប់គ្នានូវភាពខ្លាំង និងភាពខ្សោយនៃដើមទាំងអស់ ។១២ ម្ចាស់ចម្ការ និងអ្នកបម្រើបានសួរម្តងហើយម្តងទៀតថា « តើយើងត្រូវធ្វើអ្វីទៀត ? »១៣ ពួកគេរួមគ្នាផ្ដល់ពរជ័យដល់ដួងចិត្ត និងគេហដ្ឋាន វួដ និងសាខាទាំងឡាយ តាមរយៈការងារបម្រើដ៏បំផុសគំនិត និងខ្ជាប់ខ្ជួន ។១៤
ការងារបម្រើ—ការឃ្វាលចៀម—ធ្វើឲ្យចម្ការរបស់យើងក្លាយជា « ដើមតែមួយ »១៥—ជាព្រៃពិសិដ្ឋមួយ ។ ដើមនីមួយៗនៅក្នុងព្រៃរបស់យើងគឺជាមែកធាងគ្រួសារដែលមានជីវិត ។ ឫស និងមែកត្របាញ់ចូលគ្នា ។ ការងារបម្រើផ្ដល់ពរជ័យដល់មនុស្សរាប់ជំនាន់ ។ នៅពេលត្រូវការការបម្រើ នោះប៊ីស្សព និងគណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះដ៏ឈ្លាសវៃ សួរថា « តើបងប្អូនប្រុសស្រីណាខ្លះជាអ្នកធ្វើការងារបម្រើ ? » ក្រុមប្រឹក្សាវួដ និងការសម្ភាសការងារបម្រើ មិនត្រឹមតែសួរអំពីឧបសគ្គ ឬបញ្ហាទាំងឡាយប៉ុណ្ណោះទេ ប៉ុន្តែថែមទាំងមើលឲ្យយល់ និងអររីករាយក្នុងសេចក្ដីមេត្តាករុណាដ៏ទន់ភ្លន់ជាច្រើនរបស់ព្រះអម្ចាស់នៅក្នុងជីវិតយើង កាលយើងផ្ដល់ការងារបម្រើដូចដែលទ្រង់បានធ្វើផងដែរ ។
ព្រះអង្គសង្គ្រោះរបស់យើង គឺជាគំរូដ៏ល្អឥតខ្ចោះរបស់យើង ។១៦ ដោយសារទ្រង់ល្អ នោះទ្រង់អាចយាងធ្វើអំពើល្អ ។ ១៧ ទ្រង់ប្រទានពរដល់ម្នាក់ និងដល់ ៩៩ នាក់ទៀតដែរ ។ ទ្រង់បានបង្ហាញពីព្រះរាជបំណងផ្ដល់ការងារបម្រើដល់ប្រជាជន ។ យើងប្រែក្លាយកាន់តែដូចជាព្រះយេស៊ូវគ្រីស្ទ នៅពេលយើងធ្វើ « … ដល់អ្នកតូចបំផុតក្នុងពួកបងប្អូនយើងនេះ » ដូចជាយើងនឹងធ្វើដាក់ទ្រង់ដែរ១៨ នៅពេលយើងស្រឡាញ់អ្នកជិតខាងដូចជាខ្លួនយើង១៩ នៅពេលយើង « ស្រឡាញ់គ្នា ដូចជាខ្ញុំបានស្រឡាញ់អ្នករាល់គ្នា »២០ និងនៅពេល « អ្នកណាក្នុងពួកអ្នករាល់គ្នា ដែលចង់ធ្វើជាធំ នោះនឹងត្រូវធ្វើជាអ្នកបម្រើដល់អ្នករាល់គ្នាវិញ » ។២១
ព្រះយេស៊ូវគ្រីស្ទផ្ដល់ការងារបម្រើ ។ ពួកទេវតាផ្ដល់ការងារបម្រើ ។២២ អ្នកដើរតាមព្រះយេស៊ូវគ្រីស្ទ « ធ្វើការងារបម្រើគ្នាទៅវិញទៅមក »២៣ « អរសប្បាយជាមួយនឹងអ្នកណាដែលអរសប្បាយ ហើយយំជាមួយនឹងអ្នកណាដែលយំផង »២៤ « ថែទាំប្រជាជន [ ហើយ ] … បានផ្ដល់ដល់ [ ប្រជាជន ] នូវអ្វីៗដែលទាក់ទងទៅនឹងសេចក្ដីសុចរិត »២៥ « នឹកចាំ … ពីមនុស្សទ័លក្រ និងមនុស្សកម្សត់ទុគត៌ និងពីមនុស្សឈឺ និងមនុស្សមានទុក្ខវេទនា »២៦ ហើយឲ្យគេស្គាល់ព្រះនាមរបស់ទ្រង់តាមរយៈការងារបម្រើរបស់យើង ។២៧ កាលដែលយើងផ្ដល់ការងារបម្រើដូចដែលទ្រង់បានធ្វើ នោះយើងនឹងឃើញពរជ័យ និងអព្ភូតហេតុទាំងឡាយរបស់ទ្រង់ ។២៨ យើងទទួលបាន « ការងារដ៏ប្រសើរជាង » ។២៩
យើងអាចនឿយហត់ខាងរាងកាយ ។ ប៉ុន្តែនៅក្នុងការបម្រើរបស់ទ្រង់ យើងមិន « រសាយចិត្តខាងឯការល្អឡើយ » ។៣០ យើងខិតខំព្យាយាមធ្វើឲ្យអស់ពីសមត្ថភាពយើង កុំរត់លឿនជាងកម្លាំងដែលយើងមានឡើយ៣១ ប៉ុន្ដែដូចដែលសាវកប៉ុលបង្រៀនមក សូមទុកចិត្តថា « ព្រះទ្រង់ស្រឡាញ់ដល់អ្នកណាដែលថ្វាយដោយអំណរ » ។៣២ ដោយសារព្រះដែល « ទ្រង់ផ្គត់ផ្គង់ពូជសម្រាប់អ្នកដែលព្រោះ និងអាហារសម្រាប់បរិភោគផង នោះទ្រង់នឹងផ្គត់ផ្គង់ ហើយចម្រើនពូជដែលអ្នករាល់គ្នាព្រោះនោះដែរ » ។៣៣ ឬនិយាយម្យ៉ាងទៀតថា ព្រះចម្រើន « កាន់តែច្រើនឡើងគ្រប់ជំពូក សម្រាប់ជាការសទ្ធាគ្រប់យ៉ាង » ។៣៤ អ្នកណា « ដែលព្រោះដោយសទ្ធា នោះនឹងច្រូតបានច្រើនវិញ » ។៣៥
មិនថាយើងនៅកន្លែងណាទេ នៅរដូវបុណ្យអ៊ីស្ទើរនេះ ចូរយើងឈោងទៅជួយ ហើយយកចិត្តទុកដាក់ដូចជាព្រះអង្គសង្រ្គោះធ្វើ ជាពិសេសដល់អស់អ្នកដែលយើងមានឯកសិទ្ធិផ្ដល់ការងារបម្រើដោយសេចក្ដីស្រឡាញ់ និងការចាត់តាំង ។ ពេលយើងធ្វើបែបនេះ សូមឲ្យយើងចូលកាន់តែជិតព្រះយេស៊ូវគ្រីស្ទ និងគ្នាទៅវិញទៅមក ក្លាយកាន់តែដូចទ្រង់ និងក្លាយជាអ្នកដើរតាមព្រះយេស៊ូវគ្រីស្ទ ដូចដែលទ្រង់ចង់ឲ្យយើងម្នាក់ៗប្រែក្លាយ ។ នៅក្នុងព្រះនាមដ៏ពិសិដ្ឋគឺព្រះយេស៊ូវគ្រីស្ទ អាម៉ែន ។