ការបង្រៀនរបស់ព្រះយេស៊ូវគ្រីស្ទ
ព្រះគម្ពីរត្រូវបានប្រទានឲ្យយើង ដើម្បីដឹកនាំជីវិតយើង ។ សារលិខិតខ្ញុំនៅថ្ងៃនេះមាននូវការដកស្រង់ព្រះបន្ទូលរបស់ព្រះអង្គសង្រ្គោះនៃយើង—ជាអ្វីដែលទ្រង់បានមានបន្ទូល ។
យើងជឿលើព្រះគ្រីស្ទ ។ ក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ យើងថ្វាយបង្គំទ្រង់ ហើយធ្វើតាមការបង្រៀនទ្រង់នៅក្នុងព្រះគម្ពីរ ។
ពីមុនការធ្លាក់ ព្រះវរបិតាសួគ៌យើងបានមានបន្ទូលដោយផ្ទាល់ទៅកាន់លោកអ័ដាម និងនាងអេវ៉ា ។ បន្ទាប់មក ព្រះវរបិតាទ្រង់បានណែនាំអំពីព្រះរាជបុត្រាបង្កើតតែមួយគត់របស់ទ្រង់ គឺព្រះយេស៊ូវគ្រីស្ទ ដែលជាព្រះអង្គសង្គ្រោះ និងព្រះប្រោសលោះរបស់យើង រួចទ្រង់បានបង្គាប់យើង « ចូរស្តាប់តាមចុះ » ។១ ចេញពីការណែនាំនេះ យើងសន្និដ្ឋានថា កំណត់ត្រាព្រះគម្ពីរអំពីព្រះបន្ទូលថ្លែងដោយ « ព្រះ » ឬ « ព្រះអម្ចាស់ » គឺសឹងតែជាព្រះបន្ទូលរបស់ព្រះយេហូវ៉ាជានិច្ច ជាព្រះអម្ចាស់ដ៏មានព្រះជន្មរស់ឡើងវិញរបស់យើង គឺព្រះយេស៊ូវគ្រីស្ទ ។២
ព្រះគម្ពីរត្រូវបានប្រទានឲ្យយើង ដើម្បីដឹកនាំជីវិតយើង ។ ដូចដែលព្យាការីនីហ្វៃបានបង្រៀនយើង យើងគួរតែ « ទទួលទាននូវព្រះបន្ទូលទាំងឡាយនៃព្រះគ្រីស្ទ ដ្បិតមើលចុះ ព្រះបន្ទូលទាំងឡាយនៃព្រះគ្រីស្ទ នឹងប្រាប់ដល់អ្នកនូវគ្រប់អ្វីទាំងអស់ដែលអ្នកត្រូវធ្វើ » ។៣ ព្រះគម្ពីរភាគច្រើនរៀបរាប់អំពីការងារបម្រើក្នុងព្រះជន្មរមែងស្លាប់របស់ព្រះយេស៊ូវ គឺជាការពិពណ៌នាអំពីអ្វីដែលទ្រង់ បានធ្វើ ។ សារលិខិតខ្ញុំនៅថ្ងៃនេះមានការដកស្រង់ព្រះបន្ទូលរបស់ព្រះអង្គសង្រ្គោះនៃយើង—ជាអ្វីដែលទ្រង់ មានព្រះបន្ទូល ។ ទាំងនេះគឺជាព្រះបន្ទូលដែលបានកត់ត្រាទុកនៅក្នុងព្រះគម្ពីរសញ្ញាថ្មី ( រួមទាំងសេចក្ដីបន្ថែមដ៏បំផុសគំនិតរបស់ យ៉ូសែប ស្ម៊ីធ ផងដែរ ) និងនៅក្នុងព្រះគម្ពីរមរមន ។ ការជ្រើសរើសទាំងនេះភាគច្រើនគឺមានតាមលំដាប់លំដោយដែលព្រះអង្គសង្គ្រោះរបស់យើងបានមានបន្ទូល ។
« ព្រះយេស៊ូវមានព្រះបន្ទូលឆ្លើយថា ប្រាកដមែន ខ្ញុំប្រាប់អ្នកជាប្រាកដថា បើមិនបានកើតអំពីទឹក ហើយអំពីព្រះវិញ្ញាណ នោះគ្មានអ្នកណាអាចនឹងចូលទៅក្នុងនគរព្រះបានទេ » ។៤
« មានពរហើយ … អស់អ្នក [ ដែល ] ស្រេកឃ្លាននូវសេចក្ដីសុចរិត ដ្បិតអ្នកទាំងនោះនឹងបានពោរពេញ ដោយព្រះវិញ្ញាណបរិសុទ្ធ » ។៥
« មានពរហើយ អស់អ្នកដែលផ្សះផ្សាគេ ដ្បិតអ្នកទាំងនោះនឹងបានហៅជាកូនរបស់ព្រះ » ។៦
« អ្នករាល់គ្នាបានឮសេចក្តីដែលសម្ដែងពីដើមថា កុំផិតឲ្យសោះ ៖
ប៉ុន្តែ ខ្ញុំប្រាប់អ្នករាល់គ្នាថា សូម្បីតែអ្នកណាដែលគ្រាន់តែក្រឡេកឃើញស្ត្រី ហើយមានដំរេកសំរើបចង់បាន នោះឈ្មោះថា បានប្រព្រឹត្តសេចក្តីកំផិតនឹងនាងនោះនៅក្នុងចិត្តខ្លួនហើយ » ។៧
« អ្នករាល់គ្នាបានឮសេចក្តីដែលថ្លែងទុកមកថា ចូរស្រឡាញ់អ្នកជិតខាងឯង តែស្អប់ខ្មាំងសត្រូវឯងវិញ ។
ប៉ុន្តែ ខ្ញុំប្រាប់ថា ត្រូវស្រឡាញ់ពួកខ្មាំងសត្រូវ ត្រូវឲ្យពរដល់អ្នកណាដែលប្រទេចផ្តាសា ត្រូវប្រព្រឹត្តល្អនឹងអ្នកណាដែលស្អប់អ្នករាល់គ្នា ហើយត្រូវអធិស្ឋាន ឲ្យអ្នកណាដែលធ្វើទុក្ខបៀតបៀនដល់អ្នករាល់គ្នាវិញ ។
ដើម្បីឲ្យបានធ្វើជាកូនរបស់ព្រះវរបិតានៃអ្នករាល់គ្នា ដែលគង់នៅស្ថានសួគ៌ ព្រោះទ្រង់ធ្វើឲ្យថ្ងៃរបស់ទ្រង់រះឡើង បំភ្លឺទាំងមនុស្សអាក្រក់ និងមនុស្សល្អ ហើយទ្រង់បង្អុរឲ្យភ្លៀងធ្លាក់មកលើទាំងមនុស្សសុចរិត និងមនុស្សទុច្ចរិតផង » ។៨
« ដ្បិតបើអ្នករាល់គ្នាអត់ទោសចំពោះការរំលងច្បាប់ ដែលមនុស្សលោកប្រព្រឹត្តធ្វើ នោះព្រះវរបិតានៃអ្នក ដែលគង់នៅស្ថានសួគ៌ ទ្រង់នឹងអត់ទោសឲ្យអ្នករាល់គ្នាដែរ ។
តែបើអ្នករាល់គ្នាមិនអត់ទោស ចំពោះការរំលងច្បាប់ឲ្យគេទេ នោះព្រះវរបិតានៃអ្នក ទ្រង់ក៏មិនអត់ទោស ចំពោះការរំលងច្បាប់ ដែលអ្នករាល់គ្នាប្រព្រឹត្តធ្វើដែរ » ។៩
« បើអ្នករាល់គ្នាជារបស់ផងលោកីយ៍ នោះលោកីយ៍នឹងស្រឡាញ់អ្នករាល់គ្នា តែដោយព្រោះខ្ញុំបានរើសចេញពីលោកីយ៍មក ហើយអ្នករាល់គ្នាមិនមែនជារបស់ផងលោកីយ៍ទៀត នោះបានជាលោកីយ៍ស្អប់អ្នករាល់គ្នាវិញ » ។១០
« ហេតុដូច្នោះហើយ ចូរកុំស្វែងរកអ្វីៗនៃលោកិយនេះឡើយ ប៉ុន្តែចូរអ្នកស្វែងរក ដើម្បីកសាងនគរព្រះ ហើយដើម្បីតាំងសេចក្ដីសុចរិតរបស់ទ្រង់ជាមុនសិន ទើបគ្រប់របស់ទាំងនេះនឹងត្រូវបានប្រទានដល់អ្នកថែមទៀត » ។១១
« ដូច្នេះ អស់ទាំងការអ្វី ដែលអ្នករាល់គ្នាចង់ឲ្យមនុស្សលោកប្រព្រឹត្តនឹងខ្លួន នោះត្រូវឲ្យអ្នកប្រព្រឹត្តនឹងគេដូច្នោះដែរ ដ្បិតនេះឯងជាក្រឹត្យវិន័យ ហើយជាសេចក្តីទំនាយរបស់ពួកហោរា » ។១២
« ចូរប្រយ័ត្ននឹងពួកគ្រូក្លែងក្លាយ ដែលគេមកឯអ្នករាល់គ្នា ដោយពាក់រោមចៀមបំប្លែងខ្លួន តែខាងក្នុងរបស់គេ ជាឆ្កែចចកដែលឆ្មក់ស៊ីវិញ ។
អ្នករាល់គ្នានឹងស្គាល់គេបាន ដោយសារផលគេបង្កើត ។ តើដែលបេះផ្លែទំពាំងបាយជូរពីគុម្ពបន្លា ឬផ្លែល្វាពីដំបងយក្សឬទេ ។
ដូចេ្នះ អស់ទាំងដើមឈើល្អ តែងមានផ្លែល្អ ឯដើមឈើអាក្រក់ ក៏តែងមានផ្លែអាក្រក់ដែរ » ។១៣
« មិនមែនអស់អ្នកណាដែលគ្រាន់តែនិយាយមកខ្ញុំថា ឱព្រះអម្ចាស់ៗអើយ ដែលនឹងចូលទៅក្នុងនគរស្ថានសួគ៌នោះទេ គឺជាអស់អ្នកដែលធ្វើតាមព្រះហឫទ័យនៃព្រះវរបិតា ដែលគង់នៅស្ថានសួគ៌វិញទេតើ » ។១៤
« អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក ។
ចូរទទួលនឹមខ្ញុំ ហើយរៀននឹងខ្ញុំចុះ ដ្បិតខ្ញុំស្លូត ហើយមានចិត្តសុភាព នោះអ្នករាល់គ្នានឹងបានសេចក្តីសម្រាកដល់ព្រលឹង ។
ពីព្រោះនឹមខ្ញុំងាយទេ ហើយបន្ទុកខ្ញុំក៏ស្រាល » ។១៥
« បើអ្នកណាចង់មកតាមខ្ញុំ នោះត្រូវឲ្យលះកាត់ចិត្តខ្លួនឯងចោលចេញ ហើយផ្ទុកឈើឆ្កាងខ្លួនមកតាមខ្ញុំចុះ ។
ហើយឥឡូវនេះ បើសិនជាអ្នកណាចង់ផ្ទុកឈើឆ្កាងរបស់ខ្លួន នោះគឺត្រូវលះកាត់ចិត្តខ្លួនឯងចេញពីអស់ទាំងអំពើដ៏ឥតសុចរិត និងគ្រប់ទាំងសេចក្ដីសម្រើបខាងលោកិយ ហើយកាន់តាមបញ្ញត្តិទាំងឡាយរបស់ខ្ញុំចុះ » ។១៦
« ហេតុដូច្នេះហើយ ចូរលះបង់ខាងលោកិយចោល ហើយសង្គ្រោះព្រលឹងរបស់ខ្លួន ព្រោះតើមនុស្សទទួលបានផលប្រយោជន៍អ្វី បើគេនឹងទទួលបានលោកិយនេះទាំងមូល តែបាត់បង់ព្រលឹងរបស់ខ្លួនឯងនោះ ? ឬតើមនុស្សនឹងបានអ្វីប្ដូរនឹងព្រលឹងរបស់គេទៅ ? »១៧
« បើអ្នកណាចង់ធ្វើតាមព្រះហឫទ័យទ្រង់ នោះនឹងបានដឹងជាសេចក្តីបង្រៀននេះមកពីព្រះ ឬជាខ្ញុំនិយាយដោយអាងខ្លួនខ្ញុំ » ។១៨
« បានជាខ្ញុំប្រាប់អ្នករាល់គ្នាថា ចូរសូម នោះតែងនឹងឲ្យមកអ្នក ចូររក នោះតែងនឹងឃើញ ចូរគោះ នោះតែងនឹងបើកឲ្យអ្នក ។
ដ្បិតអស់អ្នកដែលសូម នោះរមែងបាន អ្នកណាដែលរក នោះរមែងឃើញ ក៏បើកឲ្យអ្នកណាដែលគោះដែរ » ។១៩
« ខ្ញុំក៏មានចៀមឯទៀត ដែលមិនទាន់នៅក្នុងក្រោលនេះនៅឡើយ ត្រូវតែខ្ញុំនាំចៀមទាំងនោះមកដែរ វានឹងស្តាប់តាមសំឡេងខ្ញុំ នោះនឹងមានហ្វូងតែ១ និងអ្នកគង្វាលតែ១វិញ » ។២០
« ព្រះយេស៊ូវមានព្រះបន្ទូលទៅនាងថា ខ្ញុំជាសេចក្តីរស់ឡើងវិញ ហើយជាជីវិត អ្នកណាដែលជឿដល់ខ្ញុំ ទោះបើបានស្លាប់ហើយ គង់តែនឹងរស់ឡើងវិញដែរ ៖
ឯអ្នកណាដែលរស់នៅ ហើយជឿដល់ខ្ញុំ នោះមិនត្រូវស្លាប់ឡើយ នាងជឿសេចក្តីនេះឬទេ » ។២១
« [ បទបញ្ញត្តិធំនៅក្នុងក្រឹត្យវិន័យគឺ ] ត្រូវឲ្យស្រឡាញ់ព្រះអម្ចាស់ ជាព្រះនៃឯងឲ្យអស់អំពីចិត្ត អស់អំពីព្រលឹង ហើយអស់អំពីគំនិតឯង ។
នេះជាបញ្ញត្តិយ៉ាងសំខាន់ទី១ ។
ហើយបញ្ញត្តិទី២ក៏បែបដូចគ្នា គឺថា ត្រូវឲ្យស្រឡាញ់អ្នកជិតខាងដូចខ្លួនឯង ។
បណ្តាក្រឹត្យវិន័យ និងអស់ទាំងទំនាយហោរាទាំងប៉ុន្មាន ក៏សម្រេចនៅបទបញ្ញត្តិទាំង២ប្រការនេះឯង » ។២២
« អ្នកណាដែលមានបញ្ញត្តិរបស់ខ្ញុំ ហើយកាន់តាម គឺអ្នកនោះហើយដែលស្រឡាញ់ខ្ញុំ ឯអ្នកណាដែលស្រឡាញ់ខ្ញុំ នោះជាទីស្រឡាញ់នៃព្រះវរបិតាខ្ញុំហើយ ខ្ញុំនឹងស្រឡាញ់អ្នកនោះដែរ ក៏នឹងសម្ដែងខ្លួនឲ្យអ្នកនោះស្គាល់ផង » ។២៣
« ខ្ញុំទុកសេចក្តីសុខនៅនឹងអ្នករាល់គ្នា គឺខ្ញុំឲ្យសេចក្តីសុខសាន្តរបស់ខ្ញុំដល់អ្នករាល់គ្នា ហើយដែលខ្ញុំឲ្យ នោះមិនមែនដូចជាលោកីយ៍ឲ្យទេ ។ កុំឲ្យចិត្តអ្នករាល់គ្នាថប់បារម្ភ ឬភ័យឡើយ » ។២៤
« នេះជាសេចក្តីបញ្ញត្តិរបស់ខ្ញុំ គឺឲ្យអ្នករាល់គ្នាស្រឡាញ់ដល់គ្នាទៅវិញទៅមក ដូចជាខ្ញុំបានស្រឡាញ់អ្នករាល់គ្នាដែរ » ។២៥
« ចូរមើលមកដៃ និងជើងខ្ញុំ ឲ្យបានដឹងថា នេះគឺខ្ញុំពិតមែន ចូរពាល់ខ្ញុំមើល ដ្បិតខ្មោចគ្មានសាច់ឬឆ្អឹង ដូចជាឃើញខ្ញុំនេះទេ » ។២៦
« ដូច្នេះ ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធចុះ ។
ហើយបង្រៀនឲ្យគេកាន់តាមគ្រប់ទាំងសេចក្តី ដែលខ្ញុំបានបង្គាប់មកអ្នករាល់គ្នាផង ហើយមើល ខ្ញុំក៏នៅជាមួយនឹងអ្នករាល់គ្នាជារាល់ថ្ងៃដែរ ដរាបដល់បំផុតកល្ប » ។២៧
បន្ទាប់ពីការងារបម្រើរបស់ទ្រង់នៅដែនដីបរិសុទ្ធ ព្រះយេស៊ូវគ្រីស្ទបានបង្ហាញព្រះកាយដល់ពួកសុចរិតនៅទ្វីបអាមេរិក ។ ទាំងនេះគឺជាព្រះបន្ទូលមួយចំនួន ដែលទ្រង់បានថ្លែងនៅទីនោះ ។
« មើលចុះ យើងគឺព្រះយេស៊ូវគ្រីស្ទ ជាព្រះរាជបុត្រានៃព្រះ ។ យើងបានបង្កើតផ្ទៃមេឃ និងផែនដី និងរបស់សព្វសារពើដែលនៅទីនោះ ។ យើងបានគង់នៅជាមួយនឹងព្រះវរេបិតាចាប់ពីដើមដំបូងមកម្ល៉េះ ។ យើងគង់នៅក្នុងព្រះវរបិតា ហើយព្រះវរបិតាគង់នៅក្នុងយើង ហើយនៅក្នុងយើង នោះព្រះវរបិតាបានសរសើរតម្កើងដល់ព្រះនាមទ្រង់ » ។២៨
« យើងគឺជាពន្លឺ ហើយជាជីវិតនៃពិភពលោក ។ យើងគឺជាអាលផា និងអូមេកា គឺជាដើម ហើយជាចុង ។
ហើយអ្នករាល់គ្នាមិនត្រូវថ្វាយដល់យើងនូវការខ្ចាយឈាមទៀតទេ មែនហើយ យញ្ញបូជា និងដង្វាយដុតទាំងឡាយរបស់អ្នកនឹងត្រូវចោល ដ្បិតយើងមិនទទួលយញ្ញបូជាទាំងឡាយរបស់អ្នក និងដង្វាយដុតទាំងឡាយរបស់អ្នកឡើយ ។
ហើយអ្នករាល់គ្នាត្រូវថ្វាយដល់យើងនូវចិត្តសង្រេង និងវិញ្ញាណទន់ទាបវិញ ។ ហើយអស់អ្នកណាដែលមករកយើង ដោយមានចិត្តសង្រេង និងវិញ្ញាណទន់ទាប អ្នកនោះហើយដែលយើងនឹងធ្វើបុណ្យជ្រមុជដោយភ្លើង និងដោយព្រះវិញ្ញាណបរិសុទ្ធ ។…
មើលចុះ យើងបានមកឯលោកិយ ដើម្បីនាំសេចក្ដីប្រោសលោះមកដល់ពិភពលោក គឺដើម្បីសង្គ្រោះមនុស្សលោកពីបាប » ។២៩
« ហើយយើងប្រាប់អ្នករាល់គ្នាទៀតថា អ្នករាល់គ្នាត្រូវតែប្រែចិត្ត ហើយទទួលបុណ្យជ្រមុជទឹកដោយនូវនាមយើង ហើយក្លាយទៅដូចជាកូនក្មេង បើពុំនោះសោតទេ អ្នករាល់គ្នានឹងគ្មានមធ្យោបាយណា ដែលអាចគ្រងនគរព្រះទុកជាមរតកបានឡើយ » ។៣០
« ដូច្នេះ យើងចង់ឲ្យអ្នករាល់គ្នាបាន ល្អឥតខ្ចោះ ដូចជាយើង ឬដូចជាព្រះវរបិតារបស់អ្នករាល់គ្នាដែលគង់នៅស្ថានសួគ៌ ទ្រង់ល្អឥតខ្ចោះដែរ » ។៣១
« ប្រាកដមែន យើងប្រាប់អ្នករាល់គ្នាជាប្រាកដថា អ្នករាល់គ្នាត្រូវចាំយាម ហើយ អធិស្ឋាន ជានិច្ច ខ្លាចក្រែងអារក្សល្បួងអ្នក ហើយអ្នករាល់គ្នានឹងត្រូវវាចាប់នាំយកទៅឃុំឃាំង » ។៣២
« ដូច្នេះ អ្នករាល់គ្នាត្រូវអធិស្ឋានដល់ព្រះវរបិតាដោយនូវព្រះនាមយើងជានិច្ច » ។៣៣
« ដូច្នេះ សូម្បីជាអ្វីដែលអ្នករាល់គ្នានឹងធ្វើ នោះអ្នករាល់គ្នាត្រូវធ្វើដោយនូវនាមយើង ដូច្នេះ អ្នករាល់គ្នាត្រូវហៅសាសនាចក្រតាមនាមយើង » ។៣៤
« មើលចុះ យើងបានប្រទានដល់អ្នករាល់គ្នានូវដំណឹងល្អរបស់យើង ហើយនេះគឺជាដំណឹងល្អដែលយើងបានប្រទានដល់អ្នករាល់គ្នា—គឺយើងបានមកឯលោកិយនេះ ដើម្បីធ្វើតាមព្រះហឫទ័យនៃព្រះវរបិតារបស់យើង ពីព្រោះព្រះវរបិតារបស់យើង ទ្រង់បានចាត់ឲ្យយើងមក ។
ហើយព្រះវរបិតាយើង ទ្រង់បានចាត់ឲ្យយើងមក ដើម្បីឲ្យយើងអាចត្រូវបានលើកឡើងលើឈើឆ្កាង ហើយបន្ទាប់ពីយើងត្រូវបានលើកឡើងលើឈើឆ្កាង គឺប្រយោជន៍ឲ្យយើងអាចទាញនាំគ្រប់មនុស្សទាំងអស់ឲ្យមករកយើង … ដើម្បីទទួលការជំនុំជម្រះស្របតាមកិច្ចការទាំងឡាយរបស់ខ្លួន ដើម្បីឲ្យឃើញថា ពួកគេល្អ ឬក៏ពួកគេអាក្រក់ » ។៣៥
« ឥឡូវនេះ នេះគឺជាបញ្ញត្តិថា ៖ ចូរប្រែចិត្តចុះ ឱអ្នករាល់គ្នានៅចុងផែនដីអើយ ហើយចូរមករកយើង ហើយទទួលបុណ្យជ្រមុជទឹកដោយនូវនាមយើងចុះ ប្រយោជន៍ឲ្យអ្នករាល់គ្នាអាចបានញែកចេញបរិសុទ្ធ ដោយការទទួលនូវព្រះវិញ្ញាណបរិសុទ្ធ ប្រយោជន៍ឲ្យអ្នករាល់គ្នាអាចឈរដោយគ្មានទោសនៅចំពោះយើងនៅថ្ងៃចុងក្រោយបង្អស់ » ។១៦
យើងជឿលើព្រះគ្រីស្ទ ។ ខ្ញុំសូមបញ្ចប់ជាមួយនឹងអ្វីដែលទ្រង់បានមានបន្ទូលអំពីរបៀបដែលយើងគួរដឹង និងធ្វើតាមការបង្រៀនរបស់ទ្រង់ ៖
« តែព្រះដ៏ជាជំនួយ គឺជាព្រះវិញ្ញាណបរិសុទ្ធ ដែលព្រះវរបិតានឹងចាត់មក ដោយនូវឈ្មោះខ្ញុំ ទ្រង់នឹងបង្រៀនអ្នករាល់គ្នា ពីគ្រប់សេចក្តីទាំងអស់ ក៏នឹងរំឭកពីគ្រប់ទាំងសេចក្តី ដែលខ្ញុំបានប្រាប់ដល់អ្នករាល់គ្នាដែរ » ។៣៧
ខ្ញុំសូមអះអាងពីសេចក្ដីពិតនៃការបង្រៀនទាំងនេះ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕