« នៅក្នុងយើង ហើយយើងក្នុងអ្នក ហេតុដូច្នេះហើយ ចូរដើរជាមួយនឹងយើងចុះ »
ការសន្យារបស់ព្រះអង្គសង្គ្រោះ ដើម្បីនៅជាប់ក្នុងយើងថា ជាការពិត ហើយវាមានដល់សមាជិកគ្រប់រូបដែលរក្សាសេចក្ដីសញ្ញា នៅក្នុងសាសនាចក្រដែលបានស្ដារឡើងវិញរបស់ទ្រង់នេះ ។
នៅក្នុងព្រះគម្ពីរសញ្ញាចាស់ គោលលទ្ធិ និង សេចក្តីសញ្ញា និង មុក្តាដ៏មានតម្លៃមហិមា បានពិពណ៌នាថា ព្យាការី ហេណុកពីបុរាណ១ គឺជាឧបករណ៏ក្នុងការកសាងក្រុងស៊ីយ៉ូន ។
ដំណើររឿងក្នុងព្រះគម្ពីរអំពីការហៅឲ្យបម្រើរបស់ហេណុក បង្ហាញថា « គាត់បានឮសំឡេងចេញពីស្ថានសួគ៌មកថា ៖ ហេណុក បុត្រយើងអើយ ចូរទៅព្យាករដល់ប្រជាជននេះ ហើយប្រាប់ទៅពួកគេថា—ចូរប្រែចិត្តចុះ … ដ្បិតចិត្តរបស់ពួកគេបានរឹងរូស ហើយត្រចៀករបស់ពួកគេបានស្ពឹកលែងឮ ហើយភ្នែករបស់ពួកគេពុំអាចមើលឃើញឆ្ងាយឡើយ » ។២
« ហើយកាលហេណុកបានឮព្រះបន្ទូលទាំងនេះ នោះគាត់ក៏ក្រាបខ្លួនទៅដល់ដី … ហើយទូលចំពោះព្រះអម្ចាស់ថា ៖ ហេតុអ្វីបានជាទូលបង្គំទទួលការប្រណីចំពោះព្រះនេត្ររបស់ព្រះអង្គ ហើយទូលបង្គំគ្រាន់តែជាក្មេងតូចមួយ ហើយប្រជាជនទាំងអស់គ្នាស្អប់ទូលបង្គំ ដ្បិតទូលបង្គំមានមាត់រឹង ម្ដេចឡើយក៏ទូលបង្គំជាអ្នកបម្រើទ្រង់ ? »៣
សូមកត់សម្គាល់ថា នៅគ្រានៃការហៅឲ្យបម្រើរបស់ហេណុក លោកបានដឹងច្បាស់ភ្លាមៗពីភាពខ្វះចន្លោះ និងការខ្វះសមត្ថភាពរបស់លោកផ្ទាល់ ។ ហើយខ្ញុំសង្ស័យថា នៅគ្រាមួយ ឬគ្រាផ្សេងទៀតនៃការបម្រើរបស់យើងក្នុងសាសនាចក្រ នោះយើងទាំងអស់គ្នាមានអារម្មណ៍ស្រដៀងគ្នានឹងហេណុកដែរ ។ ប៉ុន្តែខ្ញុំជឿថា ការឆ្លើយតបរបស់ព្រះអម្ចាស់ចំពោះសំណួរទូលអង្វររបស់ហេណុក គឺជាការណែនាំ និងអនុវត្តចំពោះយើងម្នាក់ៗនៅសព្វថ្ងៃនេះ ។
« ហើយព្រះអម្ចាស់មានព្រះបន្ទូលទៅហេណុកថា ៖ ចូរទៅ ហើយធ្វើដូចដែលយើងបានបញ្ជាដល់អ្នកចុះ ហើយគ្មាននរណានឹងចាក់ទំលុះអ្នកឡើយ ។ ចូរបើកមាត់អ្នក ហើយមាត់នោះនឹងបានពោរពេញ ហើយយើងនឹងប្រទានសម្ដីដល់អ្នក ។ …
មើលចុះ ព្រះវិញ្ញាណរបស់យើងកំពុងតែស្ថិតនៅលើអ្នក ហេតុដូច្នោះហើយ គ្រប់អស់ទាំងពាក្យសម្ដីរបស់អ្នក យើងនឹងរាប់ជាសុចរិត ហើយភ្នំទាំងឡាយនឹងគេចចេញពីមុខអ្នក ហើយទន្លេទាំងឡាយនឹងបែរចេញពីដំណើរវា ហើយអ្នកនឹង នៅក្នុងយើង ហើយយើងក្នុងអ្នក ហេតុដូច្នេះហើយ ចូរដើរជាមួយនឹងយើងចុះ »៤
នៅទីបំផុតហេណុកបានក្លាយជាព្យាការីដ៏អស្ចារ្យម្នាក់ និងជាឧបករណ៍មួយនៅក្នុងព្រះហស្ថរបស់ព្រះ ដើម្បីសម្រេចកិច្ចការដ៏មហិមាមួយ ប៉ុន្តែលោកមិនបានចាប់ផ្ដើមការងារបម្រើរបស់លោកដ៏អស្ចារ្យដូច្នោះទេ ! ផ្ទុយទៅវិញ សមត្ថភាពរបស់លោកបានកើនឡើង ពេលលោកបានរៀនដើម្បីនៅជាប់នឹងព្រះរាជបុត្រានៃព្រះ ហើយដើរជាមួយទ្រង់ ។
ខ្ញុំអធិស្ឋានដោយស្មោះទូលសូមជំនួយពីព្រះវិញ្ញាណបរិសុទ្ធ នៅពេលយើងពិចារណាជាមួយគ្នាអំពីព្រះឱវាទ ដែលព្រះអម្ចាស់បានប្រទានឲ្យហេណុក និងអត្ថន័យនៃឱវាទនោះមានសម្រាប់បងប្អូន និងខ្ញុំនាពេលបច្ចុប្បន្ននេះ ។
អ្នកនឹងនៅក្នុងយើង
ព្រះអម្ចាស់យេស៊ូវគ្រីស្ទបានប្រទានការអញ្ជើញដល់យើងម្នាក់ៗ ឲ្យនៅជាប់នឹងទ្រង់ ។៥ ប៉ុន្ដែតើយើងពិតជារៀន និងមកនៅជាប់នឹងទ្រង់យ៉ាងដូចម្ដេច ?
ពាក្យថា នៅជាប់ បង្ហាញពីការនៅនឹងមួយកន្លែង ឬឋិតថេរ និងយូរអង្វែង ដោយមិនងាករេ ។ អែលឌើរ ជែហ្វ្រី អ័រ ហូឡិន បានពន្យល់ថា « នៅជាប់ » ជាសកម្មភាពមួយមានន័យថា « ‹ [ ស្នាក់ ] នៅ—ប៉ុន្តែ [ ស្នាក់ ] នៅជារៀងរហូត › ។ នោះគឺជាការអំពាវនាវនៃសារលិខិតនៃដំណឹងល្អដល់ … មនុស្សគ្រប់រូប … នៅក្នុងពិភពលោក ។ ចូរមក ប៉ុន្តែឲ្យនៅបន្ត ។ ចូរមកដោយជំនឿស៊ប់ និងការស៊ូទ្រាំ ។ ចូរមកជាអចិន្ត្រៃយ៍ សម្រាប់ប្រយោជន៍របស់អ្នក និងប្រយោជន៍នៃគ្រប់ជំនាន់ក្រោយៗទៀតរបស់អ្នក » ។៦ ដូច្នេះយើងនៅជាប់នឹងព្រះគ្រីស្ទ ពេលយើងមានភាពរឹងមាំ និងខ្ជាប់ខ្ជួនក្នុងការលះបង់របស់យើងចំពោះព្រះប្រោសលោះ និងព្រះរាជបំណងដ៏បរិសុទ្ធរបស់ទ្រង់ ទាំងគ្រាល្អ និងអាក្រក់ ។៧
យើងចាប់ផ្ដើមនៅជាប់នឹងព្រះអម្ចាស់ ដោយអនុវត្តសិទ្ធិជ្រើសរើសខាងសីលធម៌របស់យើង ដើម្បីលើកនឹមរបស់ទ្រង់ដាក់មកលើខ្លួនយើង៨ តាមរយៈសេចក្ដីសញ្ញា និងពិធីបរិសុទ្ធទាំងឡាយនៃដំណឹងល្អដែលបានស្ដារឡើងវិញ ។ ទំនាក់ទំនងនៃសេចក្តីសញ្ញាដែលយើងមានជាមួយព្រះវរបិតាសួគ៌ និងព្រះរាជបុត្រាដែលមានព្រះជន្មរស់ឡើងវិញ និងដ៏មានព្រះជន្មរស់ គឺជាប្រភពដ៏អស្ចារ្យនៃទស្សនវិស័យ សេចក្ដីសង្ឃឹម ភាពសុខសាន្ត និងអំណរដ៏យូរអង្វែង ទំនាក់ទំនងនោះក៏ជាសិលាគ្រឹះដ៏ខ្ជាប់ខ្ជួន៩ ដែលយើងគួរតែស្ថាបនាជីវិតរបស់យើងផងដែរ ។
យើងនៅជាប់នឹងទ្រង់ តាមរយៈការបន្តខិតខំពង្រឹងចំណងនៃសេចក្ដីសញ្ញានីមួយៗជាមួយព្រះវរបិតា និងព្រះរាជបុត្រា ។ ឧទាហរណ៍ ការអធិស្ឋានដោយស្មោះចំពោះព្រះវរបិតាដ៏អស់កល្បជានិច្ច នៅក្នុងព្រះនាមនៃព្រះបុត្រាដ៏ស្ងួនភ្ងាទ្រង់ ពង្រីក និងពង្រឹងទំនាក់ទំនងនៃសេចក្ដីសញ្ញារបស់យើងជាមួយទ្រង់ទាំងទ្វេ ។
យើងនៅជាប់នឹងទ្រង់ ដោយទទួលទាននូវព្រះបន្ទូលទាំងឡាយនៃព្រះគ្រីស្ទ ។ គោលលទ្ធិរបស់ព្រះអង្គសង្រ្គោះបាននាំយើង ដែលជាបុត្រាបុត្រីនៃសេចក្ដីសញ្ញាឲ្យខិតកាន់តែជិតទ្រង់១០ ហើយនឹងប្រាប់ដល់យើងនូវគ្រប់អ្វីទាំងអស់ដែលយើងត្រូវធ្វើ ។១១
យើងនៅជាប់នឹងទ្រង់ ដោយរៀបចំខ្លួនចូលរួមពិធីបរិសុទ្ធនៃសាក្រាម៉ង់ដោយស្មោះ ដើម្បីរំឭក និងនឹកគិតពីការសន្យានៃសេចក្ដីសញ្ញារបស់យើង ហើយប្រែចិត្តដោយស្មោះស ។ ការទទួលទានសាក្រាម៉ង់ដោយស័ក្ដិសមគឺជាសាក្សីមួយចំពោះព្រះថា យើងព្រមលើកដាក់មកលើខ្លួនយើងនូវព្រះនាមនៃព្រះយេស៊ូវគ្រីស្ទ ហើយព្យាយាម « ចងចាំទ្រង់ជានិច្ច » ១២ បន្ទាប់ពីចូលរួមក្នុងពិធីបរិសុទ្ធដ៏ពិសិដ្ឋនោះក្នុងរយៈមួយ ។
ហើយយើងនៅជាប់នឹងទ្រង់ តាមរយៈការបម្រើព្រះ ពេលយើងបម្រើបុត្រាបុត្រីរបស់ទ្រង់ និងធ្វើការងារបម្រើដល់បងប្អូនប្រុសស្រីយើង ។១៣
ទ្រង់មានបន្ទូលថា « បើអ្នករាល់គ្នាកាន់តាមបញ្ញត្តិខ្ញុំ នោះនឹងនៅជាប់ក្នុងសេចក្តីស្រឡាញ់របស់ខ្ញុំ ដូចជាខ្ញុំបានកាន់តាមបញ្ញត្តិនៃព្រះវរបិតាខ្ញុំ ហើយក៏នៅជាប់ក្នុងសេចក្តីស្រឡាញ់របស់ទ្រង់ដែរ » ។១៤
ខ្ញុំបានរៀបរាប់យ៉ាងខ្លីអំពីវិធីជាច្រើន ដែលយើងអាចអនុវត្តនៅក្នុងព្រះអង្គសង្គ្រោះ ។ ឥឡូវខ្ញុំសូមអញ្ជើញយើងម្នាក់ៗដែលជាសិស្សទ្រង់ឲ្យ សូម រក គោះ និងរៀនដោយខ្លួនឯងនូវរបៀបដ៏មានអត្ថន័យផ្សេងទៀត តាមរយៈព្រះចេស្តានៃព្រះវិញ្ញាណបរិសុទ្ធ ដើម្បីយើងអាចធ្វើឲ្យព្រះគ្រីស្ទក្លាយជាចំណុចស្នូលនៃជីវិតយើង ក្នុងគ្រប់អ្វីៗដែលយើងធ្វើ ។
ហើយយើងនៅក្នុងអ្នក
ការសន្យារបស់ព្រះអង្គសង្រ្គោះដល់អ្នកដើរតាមទ្រង់គឺមានពីរផ្នែក ៖ បើយើងនៅជាប់នឹងទ្រង់ នោះទ្រង់នឹងនៅជាប់នឹងយើង ។ ប៉ុន្តែ តើវាពិតជាអាចធ្វើទៅរួចដែរឬទេ ដើម្បីឲ្យព្រះគ្រីស្ទនៅជាប់នឹងបងប្អូន និងរូបខ្ញុំ—ផ្ទាល់ខ្លួនម្នាក់ៗនោះ ? ចម្លើយយ៉ាងច្បាស់ចំពោះសំណួរនេះគឺថា អាចធ្វើបាន !
នៅក្នុងព្រះគម្ពីរមរមន យើងបានរៀនអំពីការបង្រៀនរបស់អាលម៉ា និងការថ្លែងទីបន្ទាល់ទៅកាន់ពួកអ្នកក្រីក្រ ដែលសេចក្តីទុក្ខវេទនាទាំងឡាយបានបង្ខំពួកគេឲ្យរាបទាប ។ នៅក្នុងការណែនាំរបស់លោក លោកបានប្រៀបធៀបព្រះបន្ទូលទៅនឹងគ្រាប់ពូជ ដែលត្រូវតែដាំ និងថែទាំ ហើយលោកបានពិពណ៌នាថា « ព្រះបន្ទូល » គឺជាព្រះជន្ម បេសកកម្ម និងពលិកម្មដ៏ធួនរបស់ព្រះយេស៊ូវគ្រីស្ទ ។
អាលម៉ាបានថ្លែងថា « ចាប់ផ្ដើមជឿដល់ព្រះរាជបុត្រានៃព្រះចុះ ថាទ្រង់នឹងយាងមកប្រោសលោះរាស្ត្រទ្រង់ ហើយថាទ្រង់នឹងរងទុក្ខ ហើយសុគត ដើម្បីធ្វើឲ្យធួននឹងអំពើបាបទាំងឡាយរបស់ពួកគេ ហើយថាទ្រង់នឹងមានព្រះជន្មរស់ពីស្លាប់ឡើងវិញ ដែលនឹងនាំមកនូវដំណើររស់ឡើងវិញ ថាមនុស្សទាំងអស់នឹងឈរនៅចំពោះទ្រង់ ដើម្បីទទួលការជំនុំជម្រះ នៅថ្ងៃចុងក្រោយបង្អស់ ហើយជាថ្ងៃជំនុំជម្រះ ស្របតាមកិច្ចការទាំងឡាយរបស់គេ » ។១៥
អាលម៉ាបានផ្តល់ការពិពណ៌នានេះអំពី « ព្រះបន្ទូល » ។ សូមពិចារណាអំពីទំនាក់ទំនងដ៏បំផុសគំនិត ដែលលោកបានបង្ហាញ ។
« ហើយឥឡូវនេះ … ខ្ញុំចង់ឲ្យអ្នករាល់គ្នា បណ្ដុះពាក្យនេះ នៅក្នុងចិត្តអ្នក ហើយនៅពេលពាក្យនេះចាប់ផ្ដើមរីកឡើង ចូរថែទាំវាដោយសេចក្ដីជំនឿរបស់អ្នក ។ ហើយមើលចុះ វានឹងបានទៅជាដើមមួយ ដោយលូតលាស់ឡើង នៅក្នុងខ្លួនអ្នក ដល់ជីវិតដ៏អស់កល្បជានិច្ច ។ ហើយបន្ទាប់មក សូមព្រះទ្រង់សម្រាលបន្ទុករបស់អ្នក តាមរយៈសេចក្ដីអំណរនៃព្រះរាជបុត្រារបស់ទ្រង់ ។ ហើយការណ៍អស់ទាំងនេះ អ្នករាល់គ្នាអាចធ្វើបាន បើសិនជាអ្នករាល់គ្នាចង់ធ្វើ » ។១៦
គ្រាប់ពូជដែលយើងគួរព្យាយាមដាំក្នុងចិត្តគឺជាពាក្យ—ព្រះជន្ម បេសកកម្ម និងគោលលទ្ធិរបស់ព្រះយេស៊ូវគ្រីស្ទ ។ ហើយពេលដែលព្រះបន្ទូលនោះចិញ្ចឹមបីបាច់ដោយសេចក្ដីជំនឿ នោះវាអាចក្លាយជាដើមឈើមួយដែលដុះឡើង នៅក្នុងយើងរហូតដល់ជីវិតដ៏អស់កល្បជានិច្ច ។១៧
តើដើមឈើនៅក្នុងទស្សននិមិត្តរបស់លីហៃជានិមិត្តរូបនៃអ្វី ? ដើមឈើនោះអាចចាត់ទុកថា ជាតំណាងឲ្យព្រះយេស៊ូវគ្រីស្ទដែរ ។១៨
បងប្អូនប្រុសស្រីជាទីស្រឡាញ់ តើព្រះបន្ទូលមាននៅក្នុងយើងដែរឬទេ ? តើសេចក្ដីពិតនៃដំណឹងល្អរបស់ព្រះអង្គសង្គ្រោះបានឆ្លាក់នៅក្នុងចិត្តខាងសាច់ឈាមយើងដែរឬទេ ?១៩ តើយើងកំពុងមករកទ្រង់ ហើយប្រែក្លាយកាន់តែដូចទ្រង់បន្ដិចម្ដងៗដែរឬទេ ? តើដើមឈើរបស់ព្រះគ្រីស្ទកំពុងដុះលូតលាស់នៅក្នុងខ្លួនយើងដែរឬទេ ? តើយើងកំពុងព្យាយាមក្លាយជា « [ សត្វលោក ] ថ្មី »២០ នៅក្នុងទ្រង់ដែរឬទេ ?២១
ប្រហែលជាសក្តានុពលដ៏អព្ភូតហេតុនេះហើយ បានបំផុសគំនិតអាលម៉ាឲ្យសួរថា ៖ « តើអ្នករាល់គ្នាបានកើតមកពីព្រះនៅក្នុងវិញ្ញាណហើយឬនៅ ? តើអ្នករាល់គ្នាបានទទួលព្រះភក្ត្ររបស់ទ្រង់នៅក្នុងទឹកមុខរបស់អ្នកហើយឬនៅ ? តើអ្នករាល់គ្នាបានស្គាល់ការផ្លាស់ប្ដូរដ៏ធំនេះនៅក្នុងដួងចិត្តអ្នកហើយឬនៅ ? »២២
យើងគួរតែចងចាំជានិច្ចនូវការណែនាំរបស់ព្រះអម្ចាស់ចំពោះហេណុកថា « អ្នកនឹងនៅក្នុងយើង ហើយយើងក្នុងអ្នក » ២៣ ហើយខ្ញុំសូមថ្លែងទីបន្ទាល់អំពីការសន្យារបស់ព្រះអង្គសង្គ្រោះ ដើម្បីនៅជាប់ក្នុងយើងថា ជាការពិត ហើយវាមានដល់សមាជិកគ្រប់រូបដែលរក្សាសេចក្ដីសញ្ញា នៅក្នុងសាសនាចក្រដែលបានស្ដារឡើងវិញរបស់ទ្រង់នេះ ។
ហេតុដូច្នេះហើយ ចូរដើរជាមួយនឹងយើងចុះ
សាវកប៉ុលបានដាស់តឿនពួកអ្នកជឿដែលបានទទួលព្រះអម្ចាស់ថា ៖ « នោះចូរដើរក្នុងទ្រង់ តាមបែបយ៉ាងនោះចុះ » ។២៤
ការដើរនៅក្នុង និងជាមួយព្រះអង្គសង្រ្គោះ គូសបញ្ជាក់ពីទិដ្ឋភាពដ៏សំខាន់ពីរនៃភាពជាសិស្ស ៖ ( ១ ) ការគោរពតាមបទបញ្ញត្តិរបស់ព្រះ និង ( ២ ) ការចងចាំ និងការគោរពសេចក្ដីសញ្ញាដ៏ពិសិដ្ឋ ដែលភ្ជាប់យើងទៅនឹងព្រះវរបិតា និងព្រះរាជបុត្រា ។
យ៉ូហានបានប្រកាសថា ៖
យើង រាល់ គ្នា ដឹង ថា យើង ស្គាល់ទ្រង់ ដោយសារ សេចក្តី នេះ គឺ ដោយ យើង កាន់ តាម បញ្ញត្ត របស់ ទ្រង់ ។
អ្នកណាដែលថា បានស្គាល់ទ្រង់ តែមិនកាន់តាមបញ្ញត្តិទ្រង់ទេ អ្នកនោះឈ្មោះថាជាអ្នកកុហក ហើយសេចក្តីពិតមិននៅក្នុងអ្នកនោះឡើយ ។
តែអ្នកណាដែលកាន់តាមព្រះបន្ទូលទ្រង់វិញ នោះបា្រកដជាសេចក្តីស្រឡាញ់នៃព្រះបានពេញខ្នាត នៅក្នុង អ្នកនោះ ហើយគឺដោយសេចក្តីនោះឯង ដែលយើងដឹងថា យើង នៅក្នុងទ្រង់ ។
អ្នកណាដែលថាខ្លួននៅក្នុងទ្រង់ នោះត្រូវតែ ប្រព្រឹត្តដូចជាទ្រង់ដែរ » ។២៥
ព្រះយេស៊ូវទ្រង់ត្រាស់ហៅយើងម្នាក់ៗ ឲ្យ« ចូរមកតាមខ្ញុំចុះ »២៦ហើយ« ដើរជាមួយនឹងយើងចុះ » ។ ២៧
ខ្ញុំសូមថ្លែងទីបន្ទាល់ថា នៅពេលយើងឈានទៅមុខដោយសេចក្ដីជំនឿ ហើយដើរដោយភាពស្លូតបូតនៃព្រះវិញ្ញាណរបស់ព្រះអម្ចាស់ ២៨នោះយើងត្រូវបានប្រទានពរឲ្យមានកម្លាំង ការការពារ និងការណែនាំ ។
ទីបន្ទាល់ និងការសន្យា
អាលម៉ាពិពណ៌នាពីការទូលអង្វរដោយសេចក្ដីស្រឡាញ់ពីព្រះអម្ចាស់ចំពោះមនុស្សទាំងអស់ ៖
« មើលចុះ ទ្រង់បានអញ្ជើញ មនុស្សលោកទាំងអស់ ដ្បិតព្រះពាហុនៃសេចក្ដីមេត្តាករុណាបានលាតសន្ធឹងមករកគេ ហើយទ្រង់មានព្រះបន្ទូលថា ៖ ចូរប្រែចិត្តចុះ នោះយើងនឹងទទួលអ្នក ។
« … ចូរមករកយើងចុះ ហើយអ្នករាល់គ្នានឹងបានទទួលទាននូវផ្លែនៃដើមជីវិត មែនហើយ អ្នករាល់គ្នានឹងបានទទួលទាន ហើយផឹកនូវនំប៉័ង និងទឹកនៃជីវិតតាមចិត្ត » ។២៩
ខ្ញុំសូមគូសបញ្ជាក់ពីការយល់ដឹងទាំងស្រុងអំពីការទូលអង្វររបស់ព្រះអង្គសង្គ្រោះ ។ ទ្រង់សព្វព្រះទ័យប្រទានព្រះគុណ និងសេចក្តីមេត្តាករុណារបស់ទ្រង់ ដល់មនុស្សគ្រប់រូបដែលកំពុងរស់នៅបច្ចុប្បន្ននេះ ដែលធ្លាប់រស់នៅ ហើយដែលនឹងរស់នៅលើផែនដីនេះ ។
សមាជិកសាសនាចក្រមួយចំនួនទទួលយកគោលលទ្ធិ គោលការណ៍ និងទីបន្ទាល់ដែលបានប្រកាសម្តងហើយម្តងទៀត ពីវេទិកានេះនៅក្នុងមជ្ឈមណ្ឌលសន្និសីទ និងនៅក្រុមជំនុំក្នុងមូលដ្ឋាននៅជុំវិញពិភពលោកថា ជាសេចក្តីពិត—ប៉ុន្តែនៅតែពិបាកជឿថា សេចក្ដីពិតដ៏អស់កល្បជានិច្ចទាំងនេះអនុវត្តជាពិសេសក្នុងជីវិត និងកាលៈទេសៈរបស់ពួកគេយ៉ាងណា ។ ពួកគេជឿស្មោះ និងបម្រើក្នុងកាតព្វកិច្ចខ្លួនយ៉ាងយកចិត្តទុកដាក់ ប៉ុន្តែទំនាក់ទំនងនៃសេចក្តីសញ្ញារបស់ពួកគេជាមួយព្រះវរបិតា និងព្រះរាជបុត្រាដ៏ប្រោសលោះមិនទាន់ផ្លាស់ប្រែជាតថភាពពិតដ៏រស់រវើកនៅក្នុងជីវិតរបស់ពួកគេនៅឡើយទេ ។
ខ្ញុំសន្យាថា តាមរយៈព្រះចេស្តានៃព្រះវិញ្ញាណបរិសុទ្ធ នោះបងប្អូនអាចដឹង និងទទួលអារម្មណ៍អំពីសេចក្តីពិតនៃដំណឹងល្អដែលខ្ញុំបានព្យាយាមពិពណ៌នាសម្រាប់បងប្អូន–ពោលគឺសម្រាប់បុគ្គលផ្ទាល់ខ្លួនម្នាក់ៗ ។
ខ្ញុំសូមថ្លែងទីបន្ទាល់ដោយសេចក្តីអំណរថា ព្រះយេស៊ូវគ្រីស្ទគឺជាព្រះអង្គសង្គ្រោះ និងព្រះប្រោសលោះរបស់យើងដែលពេញដោយក្តីស្រឡាញ់ និងមានព្រះជន្មរស់ ។ បើយើងនៅក្នុងទ្រង់ នោះទ្រង់នឹងនៅក្នុងយើងដែរ ។៣០ ហើយពេលយើងដើរនៅក្នុង និងជាមួយទ្រង់ នោះយើងនឹងទទួលបានពរដែលបង្កើតបានផលផ្លែវិសេសជាច្រើន ។ ខ្ញុំសូមថ្លែងទីបន្ទាល់ដូច្នោះនៅក្នុងព្រះនាមដ៏ពិសិដ្ឋនៃព្រះអម្ចាស់ព្រះយេស៊ូវគ្រីស្ទ អាម៉ែន ៕