ការស្វែងរកភាពសុខសាន្តផ្ទាល់ខ្លួន
ខ្ញុំសូមអធិស្ឋានថា បងប្អូនអាចរកឃើញភាពសុខសាន្ត ជួយមនុស្សជាច្រើនទៀតឲ្យរកឃើញវា ហើយបន្តចែកចាយវាទៅមនុស្សផ្សេងទៀត ។
បងប្អូនប្រុសស្រីជាទីស្រឡាញ់ យើងបានទទួលពរតាមរយៈការបង្រៀនដ៏បំផុសគំនិត និងតន្ត្រីដ៏ពីរោះដែលបានរំជួលចិត្តយើងពេលបើកសម័យប្រជុំសន្និសីទទូទៅនេះ ។ យើងសូមអរគុណបងប្អូនសម្រាប់ការចូលរួម និងសេចក្តីជំនឿរបស់បងប្អូន ។
ថ្ងៃនេះខ្ញុំនឹងនិយាយអំពីអព្ភូតហេតុដែលខ្ញុំបានរៀន អំពីការស្វែងរកភាពសុខសាន្តផ្ទាល់ខ្លួន មិនថាយើងស្ថិតក្នុងកាលៈទេសៈណាទេ ។ ព្រះអង្គសង្គ្រោះជ្រាបថា បុត្រាបុត្រីរបស់ព្រះវរបិតាសួគ៌ទាំងអស់ចង់បានភាពសុខសាន្ត ហើយទ្រង់មានបន្ទូលថា ទ្រង់អាចប្រទានភាពសុខសាន្តនោះដល់យើងបាន ។ បងប្អូនចាំបន្ទូលរបស់ព្រះយេស៊ូវគ្រីស្ទកត់ត្រានៅក្នុងគម្ពីរយ៉ូហានថា ៖ « ខ្ញុំទុកសេចក្តីសុខនៅនឹងអ្នករាល់គ្នា គឺខ្ញុំឲ្យភាពសុខសាន្តរបស់ខ្ញុំដល់អ្នករាល់គ្នា ហើយដែលខ្ញុំឲ្យនោះមិនមែនដូចជាលោកីយឲ្យទេ ។ កុំឲ្យចិត្តអ្នករាល់គ្នាថប់បារម្ភ ឬភ័យឡើយ » ។១
តើទ្រង់មានន័យយ៉ាងណាអំពីភាពសុខសាន្ត និងរបៀបដែលទ្រង់អាចប្រទានឲ្យ ត្រូវបានបើកសម្តែងតាមរយៈស្ថានភាពនៃអ្នកដែលបានឮទ្រង់មានបន្ទូលពាក្យទាំងនោះ ។ សូមស្តាប់ដំណើររឿងនៅក្នុងយ៉ូហាន អំពីការងារបម្រើដ៏ឧត្តុង្គឧត្តមរបស់ព្រះគ្រីស្ទ ។ កម្លាំងដ៏ខ្លាំងក្លានៃអំពើអាក្រក់បានធ្លាក់មកលើទ្រង់ ហើយមិនយូរប៉ុន្មានក្រោយមកក៏បានធ្លាក់លើពួកសិស្សទ្រង់ផងដែរ ។
នេះគឺជាព្រះបន្ទូលរបស់ព្រះអង្គសង្គ្រោះ ៖
« បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិរបស់ខ្ញុំចុះ ។
នោះខ្ញុំនឹងទូលសូមដល់ព្រះវរបិតា ហើយទ្រង់នឹងប្រទានព្រះដ៏ជាជំនួយ១អង្គទៀត មកអ្នករាល់គ្នាឲ្យបានគង់នៅជាមួយ នៅអស់កល្បរៀងទៅ ។
គឺជាព្រះវិញ្ញាណនៃសេចក្តីពិត ដែលលោកីយទទួលពុំបាន ព្រោះមិនឃើញ ហើយមិនស្គាល់ទ្រង់សោះ តែអ្នករាល់គ្នាស្គាល់ទ្រង់ ដ្បិតទ្រង់គង់ជាមួយ ក៏នឹងសណ្ឋិតនៅក្នុងអ្នករាល់គ្នាដែរ ។
ខ្ញុំមិនចោលអ្នករាល់គ្នាឲ្យនៅកំព្រាទេ ៖ ខ្ញុំនឹងមកឯអ្នករាល់គ្នាវិញ ។
បន្តិចទៀត លោកីយនឹងលែងឃើញខ្ញុំ តែអ្នករាល់គ្នានឹងឃើញខ្ញុំវិញ ហើយដោយព្រោះខ្ញុំរស់ នោះអ្នករាល់គ្នានឹងរស់ដែរ ។
នៅថ្ងៃនោះអ្នករាល់គ្នានឹងដឹងថា ខ្ញុំនៅក្នុងព្រះវរបិតាខ្ញុំ អ្នករាល់គ្នាក៏នៅក្នុងខ្ញុំ ហើយខ្ញុំនៅក្នុងអ្នករាល់គ្នាដែរ ។
អ្នកណាដែលមានបញ្ញត្តិរបស់ខ្ញុំ ហើយកាន់តាម គឺអ្នកនោះហើយ ដែលស្រឡាញ់ខ្ញុំ ឯអ្នកណាដែលស្រឡាញ់ខ្ញុំ នោះជាទីស្រឡាញ់នៃព្រះវរបិតាខ្ញុំ ហើយខ្ញុំនឹងស្រឡាញ់អ្នកនោះដែរ ក៏នឹងសម្តែងខ្លួនឲ្យអ្នកនោះស្គាល់ផង ។
យូដាសគាត់ទូលទ្រង់ថា ព្រះអម្ចាស់អើយ តើកើតមានហេតុដូចម្តេច បានជាទ្រង់នឹងសម្តែងមកឲ្យយើងខ្ញុំស្គាល់ទ្រង់ តែមិនឲ្យលោកីយស្គាល់ផង ?
ព្រះយេស៊ូវមានព្រះបន្ទូលឆ្លើយថា បើអ្នកណាស្រឡាញ់ខ្ញុំ អ្នកនោះនឹងកាន់តាមពាក្យខ្ញុំ នោះព្រះវរបិតាខ្ញុំនឹងស្រឡាញ់អ្នកនោះ ហើយយើងនឹងមកឯអ្នកនោះក៏នឹងតាំងទីលំនៅនៅជាមួយដែរ ។
អ្នកណាដែលមិនស្រឡាញ់ខ្ញុំ នោះមិនកាន់តាមពាក្យខ្ញុំទេ ឯពាក្យដែលអ្នករាល់គ្នាឮ នោះមិនមែនជាពាក្យខ្ញុំ គឺជាព្រះបន្ទូលរបស់ព្រះវរបិតាដែលទ្រង់ចាត់ឲ្យខ្ញុំមកទេតើ ។
ខ្ញុំប្រាប់សេចក្តីទាំងនេះដល់អ្នករាល់គ្នា កំពុងដែលនៅជាមួយគ្នានៅឡើយ ។
តែព្រះដ៏ជាជំនួយ គឺជាព្រះវិញ្ញាណបរិសុទ្ធ ដែលព្រះវរបិតានឹងចាត់មកដោយនូវនាមខ្ញុំ ទ្រង់នឹងបង្រៀនអ្នករាល់គ្នាពីគ្រប់សេចក្តីទាំងអស់ ក៏នឹងរំឭកពីគ្រប់ទាំងសេចក្តីដែលខ្ញុំបានប្រាប់ដល់អ្នករាល់គ្នាដែរ ។
ខ្ញុំទុកសេចក្តីសុខនៅនឹងអ្នករាល់គ្នាគឺខ្ញុំឲ្យភាពសុខសាន្តរបស់ខ្ញុំដល់អ្នករាល់គ្នា ហើយដែលខ្ញុំឲ្យនោះមិនមែនដូចជាលោកីយឲ្យទេ ។ កុំឲ្យចិត្តអ្នករាល់គ្នាថប់បារម្ភ ឬភ័យឡើយ » ។២
ខ្ញុំបានរៀនសេចក្តីពិតយ៉ាងតិចចំនួនប្រាំ មកពីការបង្រៀននោះរបស់ព្រះអង្គសង្រ្គោះ ។
ទីមួយ អំណោយទាននៃភាពសុខសាន្តបានប្រទានឲ្យ បន្ទាប់ពី យើងមានជំនឿ កាន់តាមបទបញ្ញត្តិរបស់ទ្រង់ ។ សម្រាប់សមាជិកដែលបានចុះសេចក្តីសញ្ញា នៅក្នុងសាសនាក្ររបស់ព្រះអម្ចាស់ការគោរពប្រតិបត្តិ គឺជាអ្វីដែលយើងបានសន្យារួចមកហើយថានឹងធ្វើ ។
ទីពីរ ព្រះវិញ្ញាណបរិសុទ្ធនឹងយាងមក ហើយគង់នៅជាមួយយើង ។ ព្រះអម្ចាស់មានបន្ទូលថា កាលយើងបន្តស្មោះត្រង់ នោះព្រះវិញ្ញាណបរិសុទ្ធនឹងគង់នៅជាប់ក្នុងយើង ។ នោះគឺជាសេចក្តីសន្យានៅក្នុងការអធិស្ឋាននៃពិធីសាក្រាម៉ង់ថា ព្រះវិញ្ញាណនឹងក្លាយជាដៃគូរបស់យើង ហើយថាយើងនឹងទទួលអារម្មណ៍លួងលោមរបស់ទ្រង់ក្នុងចិត្ត និងគំនិតរបស់យើង ។
ទីបី ព្រះអង្គសង្គ្រោះសន្យាថា ពេលយើងរក្សាសេចក្ដីសញ្ញារបស់យើង នោះយើងអាចទទួលអារម្មណ៍នៃក្ដីស្រឡាញ់របស់ព្រះវរបិតា និងព្រះរាជបុត្រាដែលមានរវាងទ្រង់ និងបុត្រាទ្រង់ និងសម្រាប់យើងផងដែរ ។ យើងអាចទទួលអារម្មណ៍ជិតស្និទ្ធនឹងទ្រង់ទាំងទ្វេនៅក្នុងជីវិតរមែងស្លាប់របស់យើង ក៏ដូចជា ពេលយើងមានពររស់នៅជាមួយទ្រង់ទាំងទ្វេជារៀងរហូតដែរ ។
ទីបួន ការកាន់តាមបទបញ្ញត្តិរបស់ព្រះអម្ចាស់ គឺតម្រូវឲ្យធ្វើលើសពីការគោរពប្រតិបត្តិ ។ យើងត្រូវស្រឡាញ់ព្រះឲ្យអស់ពីចិត្ត អស់ពីកម្លាំង អស់ពីគំនិត និងអស់ពីព្រលឹងរបស់យើង ។៣
អស់អ្នកដែលមិនស្រឡាញ់ទ្រង់ នឹងមិនកាន់តាមបញ្ញត្តិទ្រង់ឡើយ ។ ដូច្នេះពួកគេនឹងគ្មានអំណោយទាននៃភាពសុខសាន្តក្នុងជីវិតនេះ និងនៅបរលោកឡើយ ។
ទីប្រាំ ប្រាកដណាស់ព្រះអម្ចាស់សព្វព្រះទ័យនឹងយើងគ្រប់គ្រាន់ល្មម ដើម្បីបង់ថ្លៃអំពើបាបរបស់យើង —តាមរយៈសេចក្តីជំនឿលើទ្រង់ និងការប្រែចិត្តរបស់យើង តាមរយៈឥទ្ធិពលនៃដង្វាយធួនរបស់ទ្រង់—ដូច្នេះយើងអាចបាន អំណោយទាននៃភាពសុខសាន្ត « ដែលហួសលើសពីអស់ទាំងគំនិត »៤នៅក្នុងជីវិតនេះ និងជាមួយទ្រង់រហូតអស់កល្បជានិច្ច ។
បងប្អូនមួយចំនួនប្រហែលគ្មានអារម្មណ៍សុខសាន្តដូចការសន្យារបស់ព្រះអម្ចាស់នោះទេ ។ បងប្អូនប្រហែលជាបានអធិស្ឋានសូមភាពសុខសាន្តផ្ទាល់ខ្លួន និងការលួងលោមខាងវិញ្ញាណ ។ ប៉ុន្តែបងប្អូនប្រហែលជាមានអារម្មណ៍ថា ស្ថានសួគ៌មិនអើពើនឹងការអង្វរសម្រាប់ភាពសុខសាន្តរបស់បងប្អូនទេ ។
មារសត្រូវដែលទាស់នឹងព្រលឹងរបស់បងប្អូន មិនចង់ឲ្យបងប្អូន និងមនុស្សដែលបងប្អូនស្រឡាញ់រកបានភាពសុខសាន្តទេ ។ វាពុំរីករាយនឹងរឿងនេះទេ ។ វាខិតខំរារាំងបងប្អូន មិនចង់ឲ្យរកបានភាពសុខសាន្តដែលព្រះអង្គសង្រ្គោះ និងព្រះវរបិតាសួគ៌របស់យើងសព្វព្រះទ័យឲ្យបងប្អូនទទួលបាននោះឡើយ ។
សាតាំងខិតខំសាបព្រោះការស្អប់ និងការទាស់ទែងឲ្យកាន់តែខ្លាំងឡើងដល់មនុស្សជុំវិញយើង ។ យើងឃើញភស្តុតាងដែលកំពុងកើតឡើងក្នុងចំណោមប្រជាជាតិ និងទីក្រុងនានា នៅតំបន់ជិតខាង ក្នុងប្រព័ន្ធផ្សព្វផ្សាយអេឡិចត្រូនិចនិងនៅទូទាំងពិភពលោក ។
ប៉ុន្តែមានហេតុផលសម្រាប់ភាពសុទិដ្ឋិនិយម ៖ នោះគឺពន្លឺនៃព្រះគ្រីស្ទ ដែលមានមកជាមួយនឹងទារកទើបនឹងកើតគ្រប់រូប ។ អំណោយទានជាសកលនោះ កើតមកជាមួយនឹងញ្ញាណនៃភាពត្រឹមត្រូវ បំណងប្រាថ្នាដើម្បីស្រឡាញ់ និងត្រូវបានស្រឡាញ់ ។ មានញ្ញាណនៃភាពយុត្តិធម៌ និងសេចក្ដីពិតពីកំណើតក្នុងខ្លួននៃបុត្រគ្រប់រូបរបស់ព្រះ នៅពេលគាត់កើតមកក្នុងជីវិតរមែងស្លាប់នេះ ។
ភាពសុទិដ្ឋិនិយមរបស់យើងចំពោះភាពសុខសាន្តផ្ទាល់ខ្លួនសម្រាប់កុមារទាំងនោះ មាននៅក្នុងដៃមនុស្សដែលមើលថែទាំពួកគេ ។ បើមនុស្សដែលចិញ្ចឹមបីបាច់ និងបម្រើពួកគេ បានខិតខំដើម្បីទទួលអំណោយទាននៃភាពសុខសាន្តពីព្រះអង្គសង្គ្រោះ តាមរយៈគំរូផ្ទាល់ខ្លួន និងការខិតខំរបស់ពួកគេ នោះពួកគេនឹងជំរុញសេចក្ដីជំនឿរបស់កុមារនោះឲ្យមានលក្ខណៈសម្បត្តិគ្រប់គ្រាន់ សម្រាប់អំណោយទានដ៏ខ្ពង់ខ្ពស់នៃភាពសុខសាន្ត ។
នោះគឺជាអ្វីដែលព្រះគម្ពីរសន្យា ៖ « ចូរបង្ហាត់កូនក្មេងឲ្យប្រព្រឹត្តតាមផ្លូវដែលគួរប្រព្រឹត្ត នោះវានឹងមិនលះបង់ពីផ្លូវនោះដរាបដល់ចាស់ » ។៥ វានឹងតម្រូវឲ្យមនុស្សដែលទទួលខុសត្រូវមើលថែទាំ និងចិញ្ចឹមបីបាច់កូន និងមានភាពស័ក្តិសមនឹងអំណោយទាននៃភាពសុខសាន្តនោះ ។
គួរឲ្យស្តាយណាស់ យើងទាំងអស់គ្នាបានទទួលអារម្មណ៍ការឈឺចាប់ នៅពេលកូនៗត្រូវបានចិញ្ចឹមបីបាច់ដោយឪពុកម្ដាយដ៏បំផុសគំនិត— ជួនកាលមានតែម្តាយ ឬតែឪពុក —ក្រោយមកក្មេងទាំងនោះ ជ្រើសរើសចាកចេញពីសេចក្តីជំនឿ និងភាពសុខសាន្តដែលពួកគេមានស្ទើរពេញមួយជីវិត ទៅរកផ្លូវនៃភាពសោកសៅដែរ ។
ទោះបីជាភាពសោកសៅកើតឡើងក្តី ក៏ខ្ញុំនៅតែមានភាពសុទិដ្ឋិនិយមនៅក្នុងអំណោយទានមួយទៀតមកពីព្រះអម្ចាស់ដែរ ។ ដែលវាដូច្នេះ ៖ ទ្រង់បានបង្កើតអ្នកផ្សះផ្សាជាច្រើន ក្នុងចំណោមសិស្សដែលទ្រង់ទុកព្រះទ័យ ។ ពួកគេទទួលអារម្មណ៍សុខសាន្ត និងសេចក្ដីស្រឡាញ់របស់ព្រះ ។ ពួកគេមានព្រះវិញ្ញាណបរិសុទ្ធនៅក្នុងចិត្តរបស់ពួកគេ ហើយព្រះអម្ចាស់អាចដឹកនាំពួកគេឲ្យទៅរកចៀមដែលវង្វេង ។
ខ្ញុំបានឃើញរឿងនេះពេញមួយជីវិតខ្ញុំ និងទូទាំងពិភពលោកទាំងមូល ។ បងប្អូនក៏បានមើលឃើញរឿងនេះផងដែរ ។ មានគ្រាជាច្រើន បងប្អូនត្រូវបានដឹកនាំឲ្យទៅជួយសង្គ្រោះ ដែលវាហាក់ដូចជារឿងចៃដន្យ ។
គ្រាមួយ ខ្ញុំបានសួរដោយសាមញ្ញដល់មនុស្សម្នាក់ដែលខ្ញុំជួប ពេលធ្វើដំណើរថា « តើបងស្រីអាចប្រាប់ខ្ញុំបន្តិចអំពីគ្រួសាររបស់បងបានទេ ? » ការសន្ទនានេះបានដឹកនាំខ្ញុំឲ្យសូមមើលរូបថតកូនស្រីពេញវ័យរបស់គាត់ ដែលនាងកំពុងតែជួបការលំបាក ។ ខ្ញុំភ្ញាក់ផ្អើលចំពោះសេចក្តីល្អនៅលើផ្ទៃមុខ និងកែវភ្នែករបស់នាងនៅក្នុងរូបថតនោះ ។ ខ្ញុំទទួលអារម្មណ៍បំផុសគំនិតឲ្យសូមអ៊ីម៉ែលរបស់នាង ។ កាលនោះកូនស្រីគាត់បានវង្វេងចេញពីព្រះវិហារ ហើយកំពុងងឿងឆ្ងល់ថា តើព្រះមានសារអ្វីសម្រាប់នាង ។ ទ្រង់មាន ។ សារនោះគឺ ៖ « ព្រះអម្ចាស់ស្រឡាញ់ក្មួយស្រី ។ ទ្រង់ស្រឡាញ់ក្មួយជានិច្ច ។ ព្រះអម្ចាស់សព្វព្រះទ័យឲ្យក្មួយត្រឡប់មកវិញ ។ ពរជ័យដែលបានសន្យាដល់ក្មួយនៅតែមានជានិច្ច » ។
សមាជិកទូទាំងសាសនាចក្របានទទួលអារម្មណ៍ពីអំណោយទាននៃភាពសុខសាន្តផ្ទាល់ខ្លួនរបស់ព្រះអម្ចាស់ ។ ទ្រង់កំពុងលើកទឹកចិត្តមនុស្សគ្រប់រូប ឲ្យជួយអ្នកដទៃមានឱកាសមករកទ្រង់ ហើយសមនឹងទទួលបានភាពសុខសាន្តដូចគ្នានោះ ។ ពួកគេនឹងជ្រើសរើសស្វែងរកការបំផុសគំនិត ដើម្បីដឹងពីរបៀបដែលពួកគេអាចចែកចាយអំណោយទាននេះទៅអ្នកដទៃទៀត ។
ជំនាន់ដែលកំពុងពេញវ័យនេះ នឹងក្លាយជាអ្នកចិញ្ចឹមបីបាច់ជំនាន់ក្រោយទៀត ។ ឥទ្ធិពលមកពីជំនាន់នេះនឹងបង្កើតអព្ភូតហេតុមួយ ។ ឥទ្ធិពលនេះនឹងដុះដាល ព្រមទាំងលូតលាស់ទៅ ហើយនគររបស់ព្រះអម្ចាស់នៅលើផែនដីនឹងរៀបចំត្រៀមខ្លួនរួចរាល់ ដើម្បីស្វាគមន៍ទ្រង់ដោយការស្រែកហូសាណា ។ ភាពសុខសាន្ដនឹងកើតមាននៅលើផែនដី ។
ខ្ញុំសូមថ្លែងសាក្សីយ៉ាងមុតមាំថា ព្រះអង្គសង្គ្រោះមានព្រះជន្មរស់ ហើយថាទ្រង់ដឹកនាំសាសនាចក្រនេះ ។ ខ្ញុំបានទទួលអារម្មណ៍នៃក្ដីស្រឡាញ់របស់ទ្រង់ក្នុងជីវិតខ្ញុំ ព្រមទាំងសេចក្តីស្រឡាញ់ និងព្រះទ័យខ្វាយខ្វល់របស់ទ្រង់ចំពោះបុត្រាបុត្រីគ្រប់រូបរបស់ព្រះវរបិតាសួគ៌ ។ ការអញ្ជើញរបស់ព្រះអង្គសង្គ្រោះឲ្យមករកទ្រង់ គឺជាការផ្តល់ឲ្យនូវភាពសុខសាន្ត ។
ប្រធាន រ័សុល អិម ណិលសុន គឺជាព្យាការីដែលនៅរស់របស់ព្រះនៅលើផែនដីទាំងមូល ។ លោកបានមានប្រសាសន៍ថា « ខ្ញុំសូមអះអាងថា ទោះពិភពលោកមានស្ថានភាពបែបណា ហើយកាលៈទេសៈផ្ទាល់ខ្លួនរបស់បងប្អូនយ៉ាងណាក្តី បងប្អូនអាចប្រឈមមុខនឹងអនាគត ដោយសុទិដ្ឋិនិយម និងដោយអំណរបាន » ។៦
ខ្ញុំសូមបង្ហាញក្ដីស្រឡាញ់របស់ខ្ញុំចំពោះបងប្អូន ។ សេចក្ដីជំនឿ និងសេចក្ដីស្រឡាញ់ដ៏អស្ចារ្យរបស់ប្អូន កំពុងឈោងទៅរកមនុស្សដទៃ ហើយអនុញ្ញាតឲ្យព្រះអម្ចាស់ផ្លាស់ប្ដូរចិត្ត ហើយបង្កើនបំណងប្រាថ្នាដើម្បីផ្ដល់អំណោយទាននៃភាពសុខសាន្តដល់អ្នកដទៃ ដែលហួសពីគំនិតអាចយល់ ។
ខ្ញុំសូមអធិស្ឋានថា បងប្អូនអាចរកឃើញភាពសុខសាន្ត ជួយមនុស្សជាច្រើនទៀតឲ្យរកឃើញវា ហើយបន្តចែកចាយវាទៅមនុស្សផ្សេងទៀត ។ ហើយនឹងមានភាពសុខសាន្តដ៏អស្ចារ្យរាប់ពាន់ឆ្នាំ នៅពេលព្រះអម្ចាស់យាងមកម្តងទៀត ។ ខ្ញុំសូមថ្លែងទីបន្ទាល់នៅក្នុងក្តីអំណរ និងនៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕