ព្យាការីដែលនៅរស់សម្រាប់ថ្ងៃចុងក្រោយ
ព្រះវរបិតាដែលគង់នៅស្ថានសួគ៌បានជ្រើសរើសគន្លងនៃការបើកសម្ដែងសេចក្ដីពិតដល់បុត្រាបុត្រីរបស់ទ្រង់តាមរយៈព្យាការី ។
កាលខ្ញុំនៅក្មេង ខ្ញុំស្រឡាញ់ថ្ងៃសៅរ៍ ពីព្រោះអ្វីៗដែលខ្ញុំបានធ្វើនៅថ្ងៃនោះហាក់ដូចជាដំណើរផ្សងព្រេងមួយ ។ ប៉ុន្តែមិនថាខ្ញុំបានធ្វើអ្វីក៏ដោយ វាតែងតែកើតឡើងក្រោយរឿងដ៏សំខាន់បំផុតមួយ—គឺការមើលរឿងគំនូរជីវចលនៅលើទូរទស្សន៍ ។ នៅព្រឹកថ្ងៃសៅរ៍មួយ កាលខ្ញុំកំពុងឈរនៅក្បែរទូរទស្សន៍ ហើយរកមើលប៉ុស្តិ៍តុកត្តា ខ្ញុំបានឃើញថា គំនូរជីវចលដែលខ្ញុំរំពឹងថានឹងមើលនោះ គឺត្រូវបានជំនួសដោយការចាក់ផ្សាយសន្និសីទទូទៅរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ពេលខ្ញុំមើលទៅទូរទស្សន៍ ហើយត្អូញត្អែរដែលគ្មានរឿងគំនូរជីវចលមើលនោះ ខ្ញុំបានឃើញបុរសសក់‑សម្នាក់ពាក់អាវធំ និងចងក្រវ៉ាត់‑កអង្គុយនៅលើកៅអីដ៏ស្រស់ស្អាតមួយ ។
មានអ្វីមួយខុសពីគេអំពីលោក ដូច្នេះខ្ញុំបានសួរបងប្រុសខ្ញុំថា « តើបុរសនោះជានរណា ? »
គាត់បានឆ្លើយថា « នោះគឺជាប្រធាន ដេវីឌ អូ មិកឃេ លោកគឺជាព្យាការី » ។
ខ្ញុំចាំថាមានអារម្មណ៍អ្វីមួយ ហើយដោយមានអ្វីម្យ៉ាងឲ្យដឹងថាលោកគឺជាព្យាការីមែន ។ បន្ទាប់មក ដោយសារខ្ញុំជាក្មេងដែលចូលចិត្តមើលរឿងគំនូរជីវចលយ៉ាងខ្លាំង នោះខ្ញុំបានប្តូរប៉ុស្តិ៍ ។ ប៉ុន្តែ ខ្ញុំមិនដែលភ្លេចពីអារម្មណ៍ដែលខ្ញុំបានមានក្នុងអំឡុងពេលដ៏ខ្លីដែលមិនបានរំពឹងទុកនោះទេ ។ ពេលខ្លះវាត្រូវចំណាយពេលតែមួយភ្លែតប៉ុណ្ណោះដើម្បីដឹងថា លោកជាព្យាការី ។១
ការដឹងដោយវិវរណៈថាមានព្យាការីដែលនៅរស់ម្នាក់លើផែនដីនេះ ផ្លាស់ប្ដូរអ្វីៗទាំងអស់ ។២ វាធ្វើឲ្យមនុស្សម្នាក់មិនចាំបាច់ត្រូវជជែកវែកញែកថា តើពេលណាដែលព្យាការីមានប្រសាសន៍ក្នុងនាមជាព្យាការី ឬថា តើមនុស្សម្នាក់រាប់ជាសុចរិតដែរឬទេបើជ្រើសរើសបដិសេធចំពោះដំបូន្មានរបស់ព្យាការី ។៣ ចំណេះដឹងដែលបានបើកសម្ដែងបែបនេះ អញ្ជើញមនុស្សម្នាក់ឲ្យទុកចិត្តលើដំបូន្មានរបស់ព្យាការីដែលនៅរស់ ទោះបីជាយើងមិនយល់ពីដំបូន្មាននោះបានពេញលេញក៏ដោយ ។៤ នៅទីបំផុត ព្រះវរបិតាដ៏ល្អឥតខ្ចោះ និងជាទីស្រឡាញ់ដែលគង់នៅស្ថានសួគ៌បានជ្រើសរើសលំនាំនៃការបើកបង្ហាញសេចក្ដីពិតដល់បុត្រាបុត្រីរបស់ទ្រង់តាមរយៈព្យាការី ជាបុគ្គលម្នាក់ដែលមិនដែលចង់បានការហៅដ៏ពិសិដ្ឋបែបនេះ ហើយដែលមិនត្រូវការជំនួយរបស់យើងដើម្បីដឹងពីភាពមិនល្អឥតខ្ចោះរបស់លោកឡើយ ។៥ ព្យាការីគឺជាមនុស្សម្នាក់ដែលព្រះបានរៀបចំ បានហៅ បានកែតម្រូវ បានបំផុសគំនិត បានបន្ទោស បានបន្សុទ្ធ និងបានគាំទ្រដោយផ្ទាល់ ។៦ នោះគឺជាមូលហេតុដែលយើងមិនដែលមានគ្រោះថ្នាក់ខាងវិញ្ញាណឡើយ ពេលយើងធ្វើតាមដំបូន្មានរបស់ព្យាការី ។
មិនថាយើងចូលចិត្ត ឬមិនចូលចិត្តទេ យើងទាំងអស់គ្នាត្រូវបានជ្រើសរើសតាមរបៀបណាមួយនៅក្នុងជីវិតមុនផែនដីនេះ ដើម្បីបានកើតនៅជំនាន់ចុងក្រោយនេះ ។ មានការពិតចំនួនពីរដែលទាក់ទងនឹងជំនាន់ចុងក្រោយនេះ ។ ការពិតទីមួយគឺថា សាសនាចក្ររបស់ព្រះគ្រីស្ទនឹងត្រូវបានស្តារឡើងវិញនៅលើផែនដីនេះម្ដងទៀត ។ ការពិតទីពីរគឺថា អ្វីៗនឹងមានការលំបាកខ្លាំងណាស់ ។ ព្រះគម្ពីរបើកសម្ដែងថា នៅថ្ងៃចុងក្រោយនឹងមាន « ព្យុះព្រិលដ៏ធំចាត់ឲ្យមកបំផ្លាញដំណាំនៃផែនដី »៧ គ្រោះអាសន្ន៨ សង្គ្រាម និងពាក្យចចាមអារ៉ាមអំពីសង្គ្រាម ហើយផែនដីទាំងមូលនឹងនៅក្នុងស្ថានភាពចលាចល … រីឯសេចក្ដីទុច្ចរិតនឹងចម្រើនជាច្រើនឡើងវិញ » ។៩
កាលខ្ញុំនៅក្មេង ការព្យាករទាំងនោះអំពីថ្ងៃចុងក្រោយបានធ្វើឲ្យខ្ញុំភ័យខ្លាច ហើយបណ្ដាលឲ្យខ្ញុំអធិស្ឋានថា សូមឲ្យការយាងមកជាលើកទីពីរនឹងមិនកើតឡើងក្នុងជីវិតរបស់ខ្ញុំទេ— មកទល់ពេលនេះវាដូចបានជោគជ័យខ្លះៗហើយ ។ ប៉ុន្តែឥឡូវនេះ ខ្ញុំអធិស្ឋានសូមផ្ទុយពីមុនទៅវិញ ទោះបីជាឧបសគ្គដែលបានព្យាករទាំងនោះប្រាកដជានឹងកើតឡើងក៏ដោយ១០ ព្រោះនៅពេលដែលព្រះគ្រីស្ទយាងត្រឡប់មកសោយរាជ្យវិញ នោះការបង្កបង្កើតរបស់ទ្រង់ទាំងអស់នឹង « បានដេកទៅដោយសុខសាន្ដ » ។១១
ស្ថានភាពបច្ចុប្បន្ននៅលើពិភពលោកនេះបានធ្វើឲ្យមនុស្សមួយចំនួនតក់ស្លុត ។ ក្នុងនាមជាកូនចៅក្នុងសេចក្តីសញ្ញារបស់ព្រះ យើងមិនចាំបាច់ដេញតាមរឿងនេះទេ ឬស្វាត់ស្វែងរកមធ្យោបាយដើម្បីឆ្លងកាត់គ្រាដែលមានបញ្ហាទាំងនេះនោះទេ ។ យើងមិនត្រូវខ្លាចឡើយ ។១២ គោលលទ្ធិ និងគោលការណ៍ដែលយើងត្រូវធ្វើតាមដើម្បីរស់រានមានជីវិតខាងវិញ្ញាណ ហើយស៊ូទ្រាំខាងសាច់ឈាមនោះ គឺមាននៅក្នុងប្រសាសន៍របស់ព្យាការីដែលនៅរស់ ។១៣ នោះគឺជាមូលហេតុដែលប្រធាន អិម រ័សុល បាឡឺដ បានប្រកាសថា « វាមិនមែនជារឿងតូចតាចទេ … ដែលយើងមានព្យាការីនៃព្រះនៅក្នុងចំណោមយើងនោះ » ។១៤
ប្រធាន រ័សុល អិម ណិលសុន បានថ្លែងទីបន្ទាល់ថា « គំរូរបស់ព្រះដែលបានបង្កើតជាយូរមកហើយស្ដីពីការបង្រៀនបុត្រាបុត្រីរបស់ទ្រង់តាមរយៈព្យាការី ធានាដល់យើងថា ទ្រង់នឹងប្រទានពរដល់ព្យាការីម្នាក់ៗ ហើយថាទ្រង់នឹងប្រទានពរដល់អ្នកដែលបានស្ដាប់តាមដំបូន្មានរបស់ព្យាការីផងដែរ » ។១៥ ដូច្នេះ គន្លឹះគឺការធ្វើតាមព្យាការីដែលនៅរស់ ។១៦ បងប្អូនប្រុសស្រី មិនដូចជាសៀវភៅកំប្លែងជំនាន់ដើម និងរថយន្តបុរាណទេ ការបង្រៀនរបស់ព្យាការីមិនកាន់តែមានតម្លៃទៅតាមអាយុកាលវាឡើយ ។ នោះជាមូលហេតុដែលយើងមិនគួរព្យាយាមប្រើពាក្យសម្ដីរបស់ព្យាការីពីមុន ដើម្បីច្រានចោលការបង្រៀនរបស់ព្យាការីដែលកំពុងនៅរស់នោះទេ ។១៧
ខ្ញុំស្រឡាញ់រឿងប្រៀបប្រដូចដែលព្រះយេស៊ូវគ្រីស្ទបានប្រើ ដើម្បីបង្រៀនគោលការណ៍ដំណឹងល្អ ។ ខ្ញុំសូមចែកចាយរឿងប្រៀបប្រដូចមួយមកពីជីវិតពិតជាក់ស្ដែងជាមួយនឹងបងប្អូននៅព្រឹកនេះ ។
ថ្ងៃមួយ ខ្ញុំបានដើរចូលទៅក្នុងកង់ទីននៅឯទីស្នាក់ការកណ្តាលសាសនាចក្រ ដើម្បីបរិភោគអាហារថ្ងៃត្រង់ ។ បន្ទាប់ពីទទួលបានអាហារមួយថាសហើយ ខ្ញុំបានដើរចូលទៅកន្លែងបរិភោគអាហារ ហើយបានកត់សម្គាល់ឃើញតុមួយដែលសមាជិកទាំងបីរូបនៃគណៈប្រធានទីមួយបានអង្គុយ ហើយមានកៅអីមួយនៅទំនេរ ។ ដោយសារខ្ញុំមានអារម្មណ៍មិនស្រួលក្នុងចិត្ត ខ្ញុំក៏បានដើរវាងចេញពីតុនោះភ្លាម ហើយបន្ទាប់មក ខ្ញុំបានឮសំឡេងព្យាការីរបស់យើងគឺ ប្រធាន រ័សុល អិម ណិលសុន និយាយថា « អាឡែន មានកៅអីទំនេរមួយនៅត្រង់នេះ ។ មកអង្គុយជាមួយយើងមក » ។ ហើយខ្ញុំក៏បានទៅអង្គុយ ។
នៅជិតចុងបញ្ចប់នៃអាហារថ្ងៃត្រង់នោះ ខ្ញុំភ្ញាក់ផ្អើលដែលបានឮសំឡេងប្រឹបៗយ៉ាងខ្លាំងមួយ ហើយពេលខ្ញុំក្រឡេកមើលទៅ ខ្ញុំបានឃើញថា ប្រធាន ណិលសុន បានដាក់បញ្ឈរដបទឹកផ្លាស្ទិចរបស់លោក ហើយបន្ទាប់មក សង្កត់ដបទឹកនោះឡើងរាប ហើយបិទគម្របមកវិញ ។
បន្ទាប់មក ប្រធាន ដាល្លិន អេក អូក បានសួរសំណួរដែលខ្ញុំចង់សួរថា « ប្រធាន ណិលសុន ហេតុអ្វីលោកសង្កត់ដបទឹកផ្លាស្ទិចលោកឡើងរាបយ៉ាងដូច្នេះ ? »
លោកបានឆ្លើយថា « វាងាយស្រួលជាងសម្រាប់អ្នកដែលប្រមូលសម្រាមកែច្នៃឡើងវិញនេះ ព្រោះវាមិនខាតកន្លែងច្រើននៅក្នុងធុងសម្រាមកែច្នៃ » ។
ខណៈកំពុងពិចារណាពីចម្លើយនោះ ខ្ញុំបានឮសំឡេងប្រឹបៗដូចគ្នានោះម្តងទៀត ។ ខ្ញុំបានមើលទៅខាងស្តាំដៃខ្ញុំ ហើយឃើញប្រធាន អូក សង្កត់ដបទឹកផ្លាស្ទិចរបស់លោកដូចជាប្រធាន ណិលសុន ដែរ ។ បន្ទាប់មក ខ្ញុំបានឮសំឡេងប្រឹបៗនោះនៅខាងឆ្វេងដៃខ្ញុំ ហើយប្រធាន ហែនរី ប៊ី អាវរិង កំពុងសង្កត់ដបទឹកផ្លាស្ទិចរបស់លោកឲ្យរាបដែរ តែលោកប្រើយុទ្ធសាស្ដ្រផ្សេង ដោយការសង្កត់ដបទឹកនោះផ្ដេកវិញ ដែលវាត្រូវចំណាយកម្លាំងខ្លាំងជាងពេលដាក់ដបទឹកបញ្ឈរហើយសង្កត់ ។ ពេលឃើញពិបាកបែបនេះ ប្រធាន ណិលសុន បានបង្ហាញលោកយ៉ាងគួរសមពីវិធីសង្កត់ដបទឹកឲ្យរាបដោយដាក់បញ្ឈរ ដើម្បីងាយស្រួលក្នុងការសង្កត់ដបទឹកនោះជាង ។
មកដល់ត្រង់នេះ ខ្ញុំបានផ្អៀងទៅរកប្រធាន អូក ហើយបានសួរដោយស្ងាត់ៗថា « តើការសង្កត់ដបទឹកផ្លាស្ទិចហ្នឹងគឺជាកិច្ចតម្រូវថ្មីដើម្បីកែច្នៃឡើងវិញនៅក្នុងកង់ទីនឬ ? »
ប្រធាន អូក បានឆ្លើយតបដោយមានស្នាមញញឹមនៅលើទឹកមុខរបស់លោកថា « មែនហើយ អាឡែន ប្អូនត្រូវធ្វើតាមព្យាការី » ។
ខ្ញុំជឿជាក់ថា ប្រធាន ណិលសុន មិនបានប្រកាសពីគោលលទ្ធិកែច្នៃឡើងវិញថ្មីនេះនៅកង់ទីននៅថ្ងៃនោះទេ ។ ប៉ុន្តែ យើងអាចរៀនមកពីការឆ្លើយតបភ្លាមៗ១៨ របស់ប្រធាន អូក និងប្រធាន អាវរិង ទៅកាន់គំរូរបស់ប្រធាន ណិលសុន និងការយកចិត្តទុកដាក់របស់ប្រធាន ណិលសុន ក្នុងការជួយបង្រៀនអ្នកដែលពាក់ព័ន្ធនូវវិធីដ៏ល្អប្រសើរមួយ ។១៩
ជាច្រើនឆ្នាំកន្លងទៅ អែលឌើរ នែល អេ ម៉ាក់ស្វែល បានចែករំលែកការសង្កេតឃើញមួយចំនួន ដែលទាក់ទងនឹងព្យាការីនៅក្នុងស្ថានភាពដែលយើងកំពុងរស់នៅសព្វថ្ងៃនេះ ៖
« នៅប៉ុន្មានខែ និងឆ្នាំខាងមុខទៀត ព្រឹត្តិការណ៍នានាទំនងជានឹងតម្រូវឲ្យសមាជិកម្នាក់ៗសម្រេចចិត្តថា តើគាត់ [ ឬនាង ] នឹងធ្វើតាមគណៈប្រធានទីមួយដែរឬទេ ។ សមាជិកទាំងឡាយនឹងមានការលំបាកកាន់តែខ្លាំងឡើង ដើម្បីជ្រើសរើសថាត្រូវធ្វើតាមគណៈប្រធានទីមួយដែរឬអត់ ។ …
« … ចូរយើងបន្សល់ទុកកំណត់ត្រាមួយ ដើម្បីឲ្យជម្រើសទាំងឡាយមានភាពច្បាស់លាស់ ដោយទុកឲ្យអ្នកដទៃធ្វើតាមចិត្តដែលពួកគេចង់ នៅពេលទទួលបានដំបូន្មានរបស់ព្យាការី ។ …
ព្រះយេស៊ូវមានបន្ទូលថា នៅពេលដែលដើមល្វាមានស្លឹកប៉ិចឡើង នោះ ‹ រដូវក្ដៅជិតដល់ហើយ › ។ … ដូច្នេះ ដោយបានព្រមានថា រដូវក្តៅគឺមកដល់ហើយ សូមកុំឲ្យយើងត្អូញត្អែរអំពីកម្ដៅថ្ងៃដែលក្ដៅនោះឡើយ ! »២០
ជំនាន់ដែលកំពុងពេញវ័យកំពុងធំឡើងនៅសម័យមួយ ដែលមានស្លឹកល្វាច្រើន ហើយថ្ងៃក៏កាន់តែក្ដៅឡើងដែរ ។ តថភាពបែបនោះដាក់ការទទួលខុសត្រូវកាន់តែធ្ងន់ធ្ងរទៅលើមជ្ឈិមវ័យជាច្រើន ជាពិសេសនៅពេលដែលវាទាក់ទងនឹងការធ្វើតាមដំបូន្មានរបស់ព្យាការី ។ នៅពេលឪពុកម្ដាយមិនអើពើនឹងដំបូន្មានរបស់ព្យាការីនៅរស់ នោះពួកគេមិនត្រឹមតែបាត់បង់ពរជ័យដែលបានសន្យាសម្រាប់ខ្លួនឯងប៉ុណ្ណោះទេ ប៉ុន្តែថែមទាំងបង្រៀនកូនៗរបស់ពួកគេកាន់តែសោកសៅថា អ្វីដែលព្យាការីនិយាយគឺមិនសំខាន់ ឬថាយើងអាចរើសយកអ្វីដែលយើងចង់ធ្វើតាមមកពីដំបូន្មានរបស់ព្យាការីបាន ហើយបោះចោលអ្វីដែលយើងមិនចង់ធ្វើតាម ដោយមិនចាំបាច់ព្រួយបារម្ភពីលទ្ធផលនៃការខ្វះអាហារូបត្ថម្ភខាងវិញ្ញាណឡើយ ។
អែលឌើរ រីឆាដ អិល អេវិនស៍ ធ្លាប់បានសង្កេតឃើញ ៖ « ឪពុកម្ដាយមួយចំនួនគិតខុសឆ្គងថា ពួកគេអាចសម្រាកបន្តិចសិនចំពោះការប្រព្រឹត្ត និងការធ្វើតាមនោះ … ថាពួកគេអាចបន្ថយទម្ងន់បន្តិចលើមូលដ្ឋានគ្រឹះ ហើយវាមិនប៉ះពាល់ដល់គ្រួសាររបស់ពួកគេ ឬអនាគតរបស់គ្រួសារពួកគេឡើយ ។ ប៉ុន្តែ បើឪពុកម្តាយវង្វេងចេញពីគោលការណ៍ និងការបង្រៀនដំណឹងបន្ដិចហើយ នោះកូនៗទំនងជាវង្វេងខ្លាំងជាងឪពុកម្ដាយរបស់ពួកគេទៅទៀត » ។២១
ក្នុងនាមជាជំនាន់មួយដែលមានការទទួលខុសត្រូវដ៏ពិសិដ្ឋ ដើម្បីរៀបចំជំនាន់ដែលកំពុងពេញវ័យ សម្រាប់តួនាទីដែលបានព្យាករមកដ៏អស្ចារ្យនៅថ្ងៃចុងក្រោយនេះ២២ហើយតួនាទីនេះត្រូវតែបំពេញនៅក្នុងគ្រាមួយ ដែលពួកមារសត្រូវមានឥទ្ធិពលខ្លាំងបំផុត២៣នោះយើងមិនអាចជាប្រភពច្របូកច្របល់មួយអំពីសារៈសំខាន់នៃការធ្វើតាមដំបូន្មានរបស់ព្យាការីបានទេ ។ គឺដំបូន្មាននោះឯងដែលនឹងអនុញ្ញាតឲ្យជំនាន់ដែលកំពុងពេញវ័យនេះមើលឃើញ « ខ្មាំងសត្រូវ [តាំងពី ] នៅពេលវានៅឆ្ងាយម្ល៉េះ ហើយខណៈនោះ [ ពួកគេអាចបាន ] ប្រុងប្រៀបខ្លួន » ដើម្បីតទល់នឹងការវាយប្រហាររបស់ពួកខ្មាំងសត្រូវ ។២៤ ការវៀចវេរដ៏តូចតាច ការធ្វេសប្រហែសដោយស្ងៀមស្ងាត់ ឬការរិះគន់ខ្សឹបៗទៅនឹងដំបូន្មានរបស់ព្យាការីយើងមើលទៅហាក់ដូចជាមិនអីទេ តែវាអាចនាំឲ្យយើងដើរដោយគ្រោះថ្នាក់នៅជិតគែមផ្លូវនៃសេចក្ដីសញ្ញាបាន ហើយនៅពេលពួកមារសត្រូវនៅក្នុងជីវិតរបស់ពួកជំនាន់ពេញវ័យតម្កើងឥទ្ធិពលនៃសកម្មភាពបែបនេះឡើង នោះវាអាចជះឥទ្ធិពលខ្លាំងលើពួកគេ ឲ្យពួកគេចាកចេញពីផ្លូវនោះទាំងស្រុងតែម្ដង ។ ឥទ្ធិពលអវិជ្ជមានបែបនេះនឹងមានខ្លាំងណាស់ ហើយវានឹងកើតមានដល់មនុស្សជំនាន់ក្រោយ ។២៥
បងប្អូនមួយចំនួនអាចមានអារម្មណ៍ថា បងប្អូនបានខកខានក្នុងកិច្ចខិតខំរបស់បងប្អូនដើម្បីធ្វើតាមដំបូន្មានរបស់ប្រធាន រ័សុល អិម ណិលសុន ។ ប្រសិនបើវាពិតមែននោះ សូមប្រែចិត្ត ហើយចាប់ផ្ដើមធ្វើតាមដំបូន្មានរបស់ព្យាការីដ៏ជម្រើសរបស់ព្រះម្ដងទៀត ។ សូមចោលនូវការរំខាននៃរឿងគំនូរជីវចលកុមារ ហើយទុកចិត្តលើអ្នកបានចាក់ប្រេងតាំងរបស់ព្រះអម្ចាស់វិញ ។ សូមអររីករាយ ព្រោះជាថ្មីម្តងទៀត « មានហោរា១នៅពួកអ៊ីស្រាអែលមែន » ។២៦
ទោះបីជាបងប្អូនមិនច្បាស់ចិត្តក៏ដោយ ក៏ខ្ញុំសូមធ្វើជាសាក្សីថា យើងអាចទប់ទល់នឹងកម្ដៅថ្ងៃនៃជំនាន់ចុងក្រោយបាន ហើយថែមទាំងរីកចម្រើននៅក្នុងកម្ដៅនោះទៀតផង ។ យើងគឺជាពួកបរិសុទ្ធថ្ងៃចុងក្រោយ ហើយនេះគឺជាជំនាន់ដ៏អស្ចារ្យ ។ យើងអន្ទះសាចង់មកកាន់ផែនដីនេះនៅពេលនេះ ដោយមានទំនុកចិត្តថា យើងនឹងមិនត្រូវទុកចោលឲ្យជំពប់ដួល នៅពេលប្រឈមមុខនឹងអ័ព្ទដែលកាន់តែងងឹត និងច្របូកច្របល់របស់ពួកមារសត្រូវនោះទេ២៧ ប៉ុន្តែយើងត្រូវស្ដាប់តាមដំបូន្មាន និងការណែនាំមកពីលោក ដែលមានសិទ្ធិអំណាច ដើម្បីនិយាយមកកាន់យើង និងពិភពលោកទាំងមូលថា « ព្រះអម្ចាស់យេហូវ៉ា ទ្រង់មានព្រះបន្ទូលដូច្នេះ » ។២៨ នៅក្នុងព្រះនាមដ៏ពិសិដ្ឋនៃព្យាការីដែលព្រះបានតម្កើងឡើង ជាព្រះដ៏បរិសុទ្ធនៃសាសន៍អ៊ីស្រាអែល២៩គឺព្រះយេស៊ូវគ្រីស្ទ អាម៉ែន ៕