’A haere tāmau noa—ma te fa’aro’o

’Ua fāri’i Elder George A. Smith, e ’āpōsetolo, i te a’ora’a nā roto mai i te peropheta Iosepha Semita i te hō’ē tau fifi rahi : « ’Ua parau mai ’oia iā’u ē, e ’ore roa e ti’a iā’u ’ia ha’aparuparu te mana’o, noa atu e aha te mau fifi e hā’ati ra iā’u. Mai te mea e mo’e au i roto i te ’āpo’o hōhonu roa a’e nō Nova Scotia ’e ’ia tāpo’ihia vau e te tā’āto’ara’a o te mau Mou’a nō Rocky, e’ita roa e ti’a iā’u ’ia ha’aparuparu, ’ia tāpe’a noa rā, ’ia fa’a’ohipa i te fa’aro’o ’e ’ia vai itoito noa ’e e ti’a mai au i ni’a a’e i te tā’āto’ara’a o te mau fifi ».¹

Nāhea e ti’a ai i te peropheta Iosepha ’ia parau i te reira—i te hō’ē ta’ata e māuiui ra ? Nō te mea ’ua ’ite ’oia e parau mau te reira. ’Ua ora ’oia i te reira. ’Ua fa’aruru Iosepha e rave rahi taime i te mau fifi teimaha i roto i tōna orara’a. Terā rā, ’a fa’a’ohipa ai ’oia i te fa’aro’o ia Iesu Mesia ’e i tāna tāra’ehara ’e i te tāmaura’a i te haere i mua, ’ua upo’oti’a ’oia i ni’a i te mau fifi mai tē huru ra ’e’ita e roa’a ’ia fa’aruru.²

I teie mahana tē hina’aro nei au e fa’a’āpī fa’ahou i te pi’ira’a a Iosepha ’eiaha e vaiiho i te mana’o paruparu ’ia upo’oti’a i ni’a ia tātou, ’ia tupu ana’e mai ia tātou te mana’o ’ino’ino, te mau ’itera’a māuiui, i tō tātou iho mau manuia-’ore-ra’a, ’aore rā i te tahi atu mau tāmatara’a.

’Ia parau vau te mana’o paruparu, ’aita vau e parau ra nō te mau tāmatara’a fifi rahi o te ma’i hepohepo, te ahoaho ’aore rā te tahi atu mau ma’i e tītau i te hō’ē rapa’aura’a ta’a ’ē.³ Tē parau noa nei au nō te mana’o paruparu e fa’atupu mai i te mau taime maita’i ’e te mau taime ’ino o te orara’a.

’Ua fa’auruhia vau e tā’u mau ’aito ’o tē haere tāmau noa nei i mua—ma te fa’aro’o—noa atu te ’ohipa e tupu mai.⁴ I roto i te Buka a Moromona, tē tai’o nei tātou nō ni’a ia Zorama, te tāvini o Labana. I te roa’ara’a te mau ’api veo ia Nephi, ’ua fa’aruru Zorama i mua i te mā’itira’a e pe’e ia Nephi ’e tōna mau taea’e i roto i te medebara, ’aore rā penei a’e e ’ere i tōna ora.

E aha te mā’iti ! Te hina’aro mātāmua ’o Zorama te horora’a ïa, ’ua tāpe’ahia mai rā ’oia e Nephi ’e ’ua tapu iāna ē, mai te mea e ’āpe’e mai ’oia ia rātou, e ti’amā ’oia ’e e ti’ara’a tōna i roto i tō rātou ’utuāfare. ’Ua fa’aitoito Zorama ’e ’ua haere nā muri iho ia rātou.⁵

’Ua fa’aruru Zorama e rave rahi ’ati i roto i tōna orara’a ’āpī, ’ua haere tāmau noa rā ’oia ma te fa’aro’o. ’Aita tā tātou e fa’a’itera’a ē, ’ua tāpe’a noa Zorama i tōna orara’a tahito ’aore rā ’ua tāpe’a i te ’ino’ino i te Atua ’aore rā ia vetahi ’ē.⁶ ’Ua riro mai ’oia ’ei hoa mau nō Nephi, hō’ē peropheta, ’e ’ua pārahi ’oia ’e tōna hua’ai i roto i te ti’amāra’a ’e te orara’a fāna’o i roto i te fenua i parauhia ra. Te mea tei riro ’ei fifi rahi i ni’a i te ’ē’a o Zorama, i te pae hope’a, ’ua arata’i te reira iāna i te mau ha’amaita’ira’a faufa’a rahi nō tōna ha’apa’o maita’i ’e tōna hina’aro ’ia haere tāmau noa—ma te fa’aro’o.⁷

’Aita i maoro a’enei ’ua fa’aro’o vau i te hō’ē tuahine itoito mau i te fa’ati’ara’a, mea nāhea tōna fa’a’oroma’ira’a i roto i te mau fifi.⁸ ’Ua ro’ohia ’oia e te tahi mau fifi ’e i te hō’ē sābati, tē pārahi ra ’oia i roto i te Sōtaiete Tauturu ’a fa’aro’o noa ai i te hō’ē ’orometua ha’api’i, ’o tāna i mana’o, e orara’a maita’i roa—e mea ta’a ’ē i tōna. ’Ua rohirohi roa ’oia ’e te mana’o paruparu. E au ra iāna ē, e’ita fa’ahou e roa’a iāna—’aore rā ’ia riro i roto—nō reira, ’ua ti’a a’era ’oia i ni’a ’e ’ua haere i rāpae, ma te feruri ē, e’ita ’oia e ho’i fa’ahou mai i te purera’a. ’A haere ai ’oia i tōna pere’o’o, ’ua fāri’i ’oia i te hō’ē mana’o pāpū maita’i : « ’A tomo atu i roto i te fare purera’a ’e ’a fa’aro’o i te ta’ata a’o i roto i te purera’a ’ōro’a ». ’Ua uiui ri’i tōna mana’o nō te muhumuhura’a, ’ua fāri’i pūai fa’ahou rā ’oia i terā mana’o, nō reira ’ua haere atu ’oia i te purera’a.

’O te parau poro’i mau ïa ’o tāna i hina’aro mau. ’Ua fāri’i ’oia i te Vārua. ’Ua ’ite ’oia ē, ’ua hina’aro te Fatu ’ia fa’aea ’oia i pīha’i iho iāna, ’ia riro ’ei pipi nāna ’e ’ia haere ’oia i te purera’a, ’o te mea ïa tāna i rave.

’Ua ’ite ’outou nō te aha ’oia i māuruuru ai ? Nō te mea ’aita ’oia i fa’aru’e. ’Ua haere tāmau noa ’oia—ma te fa’aro’o ia Iesu Mesia ra, noa atu ’ua huti ri’i te reira iāna, ’e ’ua ha’amaita’i-rahi-hia ’oia ’e tōna ’utuāfare ’a haere ai ’oia i mua.

E tauturu mai te Atua o te ra’i ’e o te fenua ia tātou ’ia upo’oti’a i ni’a i te mana’o paruparu ’e i te mau fifi ato’a ’o tā tātou e fārerei nei, mai te mea e fāriu atu tātou i ni’a iāna, e pe’e i te mau fa’aurura’a a te Vārua Maita’i,⁹ ’e ’ia haere tāmau noa—ma te fa’aro’o.

Maoti rā, ’ia paruparu ana’e tātou ’aore rā ’aita ana’e e mara’a, e nehenehe te Fatu e ha’apūai i tō tātou fa’aro’o. E nehenehe ’oia e ha’amara’a i tō tātou ’aravihi i ni’a a’e i tō tātou iho. ’Ua tupu te reira nō’u. ’Ua hau i te 20 matahiti i teienei, ’ua pi’ihia vau ma te mana’o-’ore-hia ’ei hitu ’Ahuru ārea, ’e ’ua mana’o vau e’ita e mara’a iā’u. I muri a’e i tā’u mau tonora’a nō te ha’api’ipi’ira’a, e ti’a iā’u e peresideni i tā’u ’āmuira’a titi mātāmua.¹⁰ ’Ua fa’aineine maīte maita’i māua te peresideni titi i te mau mea ato’a. Tau taime ri’i noa hou te ’āmuira’a, ’ua pi’i mai Boyd K. Packer, e peresideni mono ’oia nō te pupu nō te Tino ’Ahuru ma Piti ’āpōsetolo i taua taime ra, nō te ’ite e nehenehe ānei ’oia e ’āpe’e mai iā’u. ’Ua hitimahuta vau ’e, ’oia mau ’ua fāri’i au. ’Ua ui atu vau, mea nāhea ’oia e hina’aro ai ’ia fa’aterehia te ’ohipa, nāna ho’i e peresideni. ’Ua parau mai ’oia ē ’ia fa’a’ore māua i te mau fa’anahora’a ’e ’ia fa’aineine nō te pe’e i te Vārua. ’Aua’e tē toe ra 10 mahana i mua iā’u nō te tuatāpapa, nō te pure ’e nō te fa’aineine iā’u.

Ma te hō’ē tāpura ’ohipa matara noa, ’ua pārahi mātou i mua e 20 minuti hou te ha’amatara’a o te rurura’a a te feiā fa’atere. ’Ua pi’o atu vau i ni’a i te peresideni titi ’e ’ua muhumuhu atu, « e titi fa’ahiahia mau teie ».

’Ua patu marū noa mai te peresideni Packer iā’u ’e ’ua nā ’ō mai, « ’eiaha e paraparau ».

’Ua fa’aea vau i te paraparau, ’e ’ua ha’amana’o a’era vau i tāna a’ora’a o te ’āmuira’a rahi « Reverence Invites Revelation [E tītau te fa’atura i te heheura’a] »¹¹. ’Ua ’ite atu vau i te peresideni Packer i te pāpa’ira’a i te mau fa’ahorora’a o te pāpa’ira’a mo’a. ’Ua ha’apāpū mai te vārua iā’u ē, tē fāri’i ra ’oia i te mau mana’o nō te rurura’a. ’Ua ha’amata tō’u ’itera’a nō te ha’api’ipi’ira’a.

’Ua paraparau te peresideni Packer i nā 15 minuti mātāmua ’e ’ua ha’apāpū i te faufa’a rahi nō te arata’ira’a i te mau rurura’a ato’a ma te arata’ihia e te Vārua Maita’i.¹² I muri iho ’ua parau ’oia, « i teienei e fa’aro’o mai tātou ia Elder Cook ».

I tō’u haerera’a i te terōno, ’ua ani atu vau e aha te maorora’a tāna e hina’aro ’ia paraparau vau, ’e te vai ra ānei te hō’ē tumu parau tāna e hina’aro ’ia paraparau vau. ’Ua nā ’ō mai ’oia : ’A rave 15 minuti ’e ’a tāmau noa ’a fa’auruhia ai ’oe ». ’Ua rave au e 14 minuti ’e ’ua vauvau vau i te mau mea ato’a i roto i tō’u ferurira’a.

’Ua ti’a fa’ahou mai te peresideni Packer ’e ’ua paraparau fa’ahou 15 minuti. ’Ua fa’a’ite ’oia i teie pāpa’ira’a mo’a :

« ’A fa’ateitei atu ’ōrua i tō ’ōrua reo i teie nei feiā ; ’a parau atu i te mau mana’o tā’u e tu’u atu i roto i tō ’ōrua ’ā’au, ’e e ’ore ’ōrua e fa’aha’amāhia i mua i te ta’ata nei ;

« E hōro’ahia ho’i ia ’ōrua … i te taime ti’a mau, i te mea tā ’ōrua e parau atu ».¹³

I muri iho, ’ua parau ’oia : « E fa’aro’o mai tātou i teienei ia Elder Cook ».

’Ua hitimahuta roa vau. ’Aita roa atu vau i feruri noa a’e ē, e anihia mai iā’u ’ia paraparau e piti taime i roto i te hō’ē rurura’a. ’Aita roa a’e hō’ē mea i roto i tō’u ferurira’a nō te paraparau. Ma te pure ha’eha’a ’e ma te ti’aturi i ni’a i te tauturu a te Fatu, ma te tahi rāve’a, ’ua ha’amaita’ihia vau e te hō’ē mana’o, te hō’ē ’īrava ’e ’ua ti’a iā’u ’ia paraparau fa’ahou 15 minuti te maoro. ’Ua pārahi atu vau i raro ma te rohirohi hope.

’Ua paraparau fa’ahou te peresideni Packer 15 minuti nō te faufa’a rahi ’ia pe’e i te Vārua ’e ’ua vauvau mai i te mau ha’api’ira’a a Paulo, ’oia ho’i, ’eiaha roa tātou e parau i te « mau parau e ha’api’ihia mai e te pa’ari о te ta’ata nei, ’о tā te Vārua rā i ha’api’i mai ».¹⁴ Mai tā ’outou e nehenehe e feruri, ’ua pe’ape’a roa vau i te taime ’a fa’auru-fa’ahou-hia ai ’oia nō te toru o te taime ’ia parau : « E fa’aro’o mai tātou i teienei ia Elder Cook ».

’Ua pau roa vau. ’Aita hō’ē mea fa’ahou tā’u. ’Ua ’ite au, ’ua tae i te taime nō te fa’a’ohipa i te fa’aro’o rahi atu ā. Ma te marū, ’ua haere atu vau i te terōno, ma te tāparu i te Atua ’ia tauturu mai iā’u. ’A haere ai au i te micro, ’ua ha’amaita’i mai te Fatu iā’u ma te temeio, nō te hōro’a ma te tahi rāve’a, i te tahi atu parau poro’i e 15 minuti te maoro.¹⁵

’Ua fa’aoti iho ra te rurura’a i te pae hope’a, ’ua ’ite ’oi’oi a’era rā vau ē, e ha’amata te tuha’a purera’a a te feiā pa’ari i roto hō’ē hora. ’Auē ! Mai ia Zorama, ’ua hina’aro roa vau e horo, mai ia Nephi rā i haru mai iāna, ’ua ’ite au ē, e haru mai te peresideni Packer iā’u. ’Ua tupu ato’a te reira ’ohipa i te purera’a a te feiā pa’ari. ’Ua paraparau vau e toru fa’ahou taime. I te mahana i muri iho, i roto i te tuha’a purera’a rahi, ’ua paraparau vau hō’ē taime.

I muri a’e i te ’āmuira’a, ’ua parau te peresideni Packer ma te here, « e rave fa’ahou ana’e i te reira hō’ē taime ». ’Ua here au i te peresideni Boyd K. Packer ’e ’ua māuruuru roa vau nō te mau mea ato’a tā’u i ha’api’i mai.

’Ua ’ite ’outou e aha te mea tā’u e māuruuru nei ? ’Aita vau i fa’aru’e—’aore rā i pāto’i. ’Āhiri au i fati i tō’u hina’aro hepohepo ’ia horo ’ē i te reira mau rurura’a, e ’ere au i te hō’ē rāve’a nō te fa’arahi i tō’u fa’aro’o ’e ’ia fāri’i i te hō’ē nini’ira’a rahi o te here ’e te pāturura’a a tō tātou Metua i te ao ra. ’Ua ha’api’i mai au i tōna aroha, te mana fa’atupu temeio a Iesu Mesia ’e tōna tāra’ehara, ’e te mana fa’auru a te Vārua Maita’i. Noa atu tō’u paruparu,¹⁶ ’ua ha’api’i mai au ē, e nehenehe au e tāvini, e nehenehe au e tauturu ’ia vai ana’e te Fatu i pīha’i iho iā’u, mai te mea e haere tāmau noa vau—ma te fa’aro’o.

Noa atu te ’ā’ano, te hōhonu ’e te fifi rahi o te mau tāmatara’a ’o tā tātou e fa’aruru atu i roto i te orara’a, e mau taime tō tātou pā’āto’a e hina’aro tātou e fa’aea, e haere ’ē, e horo ’ē ’aore rā penei a’e e fa’aru’e. Terā rā, te fa’a’ohipara’a i te fa’aro’o i tō tātou Fa’aora, ’o Iesu Mesia, e tauturu ia tātou ’ia upo’oti’a i ni’a i te mana’o paruparu, noa atu te mau huru fifi ’o tā tātou e fārerei atu.

Mai te Fa’aora tei fa’aoti i te ’ohipa ’o tei hōro’ahia ’iāna e rave, e mana tōna nō te tauturu ia tātou ’ia fa’aoti i te ’ohipa tei hōro’ahia mai ia tātou e rave.¹⁷ E nehenehe tātou e ha’amaita’ihia ’a haere ai nā ni’a i te ’ē’a nō te fafaura’a, noa atu e mea fifi, ’e ’ia fāri’i i te ora mure ’ore i te hope’a.¹⁸

Mai tā te peropheta Iosepha Semita i parau, « ’a tāpe’a maīte noa, ’outou te feiā mo’a a te Atua, ’a fa’a’oroma’i ā te tahi ma’a taime, ’e e mahemo te mau fifi nō te orara’a ’e e fa’autu’ahia ’outou e te Atua ’o ’outou ho’i tōna ra mau tāvini ».¹⁹ I te i’oa o Iesu Mesia, ’āmene.