Hina’arohia te feiā fa’atupu i te hau

E au mau taea’e, e au mau tuahine here ē, e mea ’oa’oa ’ia tae mai i rotopū ia ’outou. I roto i nā ’āva’e e ono i ma’iri a’e nei, ’ua vai tāmau noa ’outou i roto i tō’u ferurira’a ’e i roto i tā’u mau pure. Te pure nei au ’ia fa’a’ite mai te Vārua Maita’i i te mea tā te Fatu e hina’aro ’ia fa’aro’o ’outou ’a paraparau atu ai au ia ’outou i teie nei.

I roto i tā’u ha’api’ipi’ira’a nō te taote tāpū e rave rahi matahiti i ma’iri a’enei, ’ua tauturu vau i te hō’ē taote tāpū o tē tāpura i te hō’ē ’avae tei ro’ohia i te ma’i ha’apē. E mea fifi roa te tāpūra’a. ’E nō te fa’ateimaha roa atu i te pe’ape’a, ’ua hape ri’i te ravera’a a te hō’ē melo o te pupu, ’e ’ua riri roa te taote tāpū. Nō tōna riri rahi, ’ua tā’ue ’oia i tāna tipi tāpū tei ’ī roa i te tirotiro. ’Ua topa mai te reira i ni’a i tō’u rima !

’Ua ri’ari’a roa te mau ta’ata ato’a i roto i te piha tāpūra’a, ’eiaha rā te taote tāpū vī ’ore, nō teie ’ōfatira’a i te ’ohipa tāpūra’a. ’Aua’e rā ’aita vau i ma’ihia. Terā rā ’ua vai te hō’ē mana’o maoro i roto iā’u nō teie ’ohipa i tupu. I taua iho hora ra, ’ua fafau vau iā’u iho ē, noa atu te ’ohipa e tupu mai i roto i tā’u piha tāpūra’a, ’e’ita roa atu tō’u mau hepohepo e upo’oti’a i ni’a iā’u. ’Ua euhe ato’a vau i taua mahana ra ē, ’eiaha roa atu e tā’ue i te hō’ē mea nā roto i te riri, e mau tipi tāpū ānei, ’aore rā e mau parau.

Tae roa mai i teie taime, e rave rahi matahiti i muri a’e, tē uiui nei tō’u mana’o ē, e mea ta’ero a’e ānei te tipi tāpu vi’ivi’i tei topa mai i ni’a i tō’u rima i te mārōra’a ta’ero e ha’avi’ivi’i nei i tā tātou ’āparaura’a ’e te mau auta’atira’a i teie mahana. E au pa’i ’ua mo’e te mana’o pa’ari ’e te fa’atura i roto i teie tau vāhira’a ’e pe’ape’a rahi.

Te parau ’ino, te ’imi hape, ’e te paraura’a i te parau ’ino nō ni’a ia vetahi ’ē ’ua riro ïa ’ei ’ohipa mātarohia. Te mau ta’ata ’aravihi, te feiā poritita, te mau ano’ihi ’e te tahi atu mau ta’ata fa’ahepo, tē taora tāmau nei rātou i te mau parau fa’a’ino. Tē pe’ape’a rahi nei au i te mea ē, e rave rahi ta’ata e mana’o nei ē, e fāri’i-pāpū-hia ’ia fa’ahapa, ’ia fa’a’ino ’e ’ia ha’avi’ivi’i i te hō’ē ta’ata tei ’ore i tuea te mana’o ’e tō rātou. E rave rahi e hina’aro nei e fa’a’ino i te ro’o o te tahi ta’ata nā roto i te mau parau ha’aputapū ’e te pāpū !

’E’ita te riri ’ū’ana e tāparu. ’E’ita te pe’ape’a e patu i te hō’ē ta’ata. ’E’ita roa atu te mārō ’e arata’i atu i te mau rāve’a fa’auruhia. Te vāhi pe’ape’a, te ’ite nei tātou i te tahi taime i te mau peu tahitohito, i rotopū ato’a i tā tātou mau pupu. Tē fa’aro’o nei tātou i te parau nō te feiā e ha’afaufa’a ’ore nei i tō rātou hoa fa’aipoipo ’e i tā rātou mau tamari’i, te feiā e fa’a’ohipa nei i te riri ’ū’ana nō te ha’avī ia vetahi ’ē, ’e nō rātou e fa’autu’a nei i te mau melo o te ’utuāfare ’ia « fa’aea muhu ’ore noa ». Tē fa’aro’o nei tātou i te parau nō te feiā ’āpī ’e nō te mau tamari’i e fa’ari’ari’a nei, ’e te feiā rave ’ohipa e fa’a’ino nei i to rātou mau hoa ’ohipa.

E au mau taea’e, e au mau tuahine here, e ti’a ho’i ’ia ’ape i te reira. ’Ei pipi nā Iesu Mesia, e ti’a ia tātou ’ia riro ’ei hi’ora’a i roto i te huru nō te ’ohipara’a ’e ’o vetahi ’ē—mai te mea ihoā rā ē tē vai ra te mau ta’a’ēra’a o te mana’o. Hō’ē o te mau rāve’a ’ōhie roa a’e nō te ’ite i te hō’ē pipi mau nā Iesu Mesia o te huru aroha ïa o te reira ta’ata i ni’a i te tahi atu mau ta’ata.

’Ua parau te Fa’aora ma te pāpū i roto i tāna mau a’ora’a i te mau pipi i roto i nā tuha’a ferua e piti. « E ao tō tei fa’atupu i te parau hau ra », tāna ïa parau.¹ « ’O tē moto i tō pāpāri’a i te ’atau ra, e fāriu ato’a atu i te tahi ».² ’E i muri iho, ’oia mau, ’ua hōro’a mai ’oia i te fa’aarara’a o tē ti’aoro mai nei ia tātou tāta’itahi : « E aroha atu i tō ’outou mau ’enemi, e fa’aora atu i tei tuhi mai ia ’outou, e hāmani maita’i atu i te feiā i riri mai ia ’outou, e pure ho’i i te feiā i parau ’ino mai ’e tei hāmani ’ino mai ia ’outou ».³

Nā mua a’e i tōna pohera’a, ’ua fa’aue te Fa’aora i tāna nā ’āpōsetolo hō’ē ’ahuru e ma piti ’ia here te tahi i te tahi mai iāna i here ia ratou.⁴ ’E ’ua parau atura ’oia, « ’O te mea teie e ’ite ai te ta’ata ato’a ē, e pipi ’outou nā’u, ’ia aroha ’outou ia ’outou iho ».⁵

E mea māramarama te parau poro’i a te Fa’aora : ’Ua patu, ’ua fa’ateitei, ’ua fa’aitoito, ’ua tāparu, ’e ’ua fa’auru tāna mau pipi mau —noa atu te fifi o te tupura’a. E feiā fa’atupu i te hau te mau pipi mau nā Iesu Mesia.⁶

E Sābati nō te ’āma’a tāmara teie mahana. Tē fa’aineine nei tātou i te fa’aha’amana’o i te ’ohipa faufa’a roa a’e ’e te fa’ahiahia roa a’e i pāpa’ihia i ni’a i te fenua nei, ’oia te tāra’ehara ’e te ti’afa’ahoura’a o te Fatu ’o Iesu Mesia. Hō’ē o te mau rāve’a maita’i roa a’e nō te fa’atura i te Fa’aora o te rirora’a ïa ’ei ta’ata fa’atupu i te hau.⁷

’Ua tauturu te tara’ehara a te Fa’aora ia tātou ’ia upo’oti’a i te mau ’ino ato’a tae noa atu i te mārōra’a. ’Eiaha e hape i te reira : te mārōra’a o te ’ino ïa ! ’Ua parau Iesu Mesia ē,’o ’oia tei roto iāna « te vārua nō te mārō ra » e ’ere ïa ’oia i tāna « nō te diabolo rā, ’oia te metua nō te mārō, ’e ’ua fa’ati’arepu [te diabolo] i te ’ā’au o te mau ta’ata ’ia mārō ma te riri i te tahi ’e i te tahi ».⁸ Te feiā e fa’aitoito i te mārō, tē rave ra ïa rātou i te hō’ē ’api parau i roto i te buka ha’uti a Satane, ma te ’ite ’aore ma te ’ite ’ore. « ’Aita roa e ti’a i te hō’ē ta’ata ’ia tāvini e piti fatu ».⁹ ’E’ita tā tātou e nehenehe e pāturu ia Satane nā roto i tā tātou mau parau ’arora’a ma te feruri ē, e nehenehe ā tā tātou e tāvini i te Atua.

Te mau taea’e ’e te mau tuahine here, e mea faufa’a mau tō tātou huru i ni’a i te tahi ’e te tahi ! E mea faufa’a mau tā tātou huru paraparaura’a ia vetahi ’ē ’e tā tātou paraparaura’a i te fare, i te fare purera’a, i te vāhi ’ohipara’a ’e i ni’a i te natirara. I teie mahana tē ani nei au ia tātou ’ia ha’a ’e o vetahi ’ē ma te teitei ’e ma te mo’a. ’A fa’aro’o maita’i mai na. E mai te mea tē vai atura te mau mea maita’i, te mau mea fa’ahiahia, te mau mea ro’o maita’i,’e te mau mea poupouhia ra »¹⁰ tā tātou e nehenehe e parau nō ni’a i te tahi atu ta’ata—i mua ānei i tōna mata ’aore rā i muri i tōna tua—’ia riro te reira ’ei ture nō tā tātou’āparaura’a.

Mai te mea e fa’ata’a te hō’ē nā ta’ata fa’aipoipo nō tā ’outou pāroita, ’aore rā e ho’i ’oi’oi mai te hō’ē misiōnare i tōna fare, ’aore rā mai te mea tē tapitapi ra te mana’o o te hō’ē taure’are’a nō ni’a i tōna ’itera’a pāpū, ’aita rātou e tītau i tā ’outou ha’avāra’a. Tītauhia ia rātou ’ia ’ite i te here ateate o Iesu Mesia i roto i tā ’outou mau parau ’e mau ’ohipa.

Mai te mea e hoa tō ’outou i ni’a i te mau rāve’a tūreiara’a sōtiare e mau mana’o poritita ’aore rā sōtiare pūai tōna e fa’ahapa ra i te mau mea ato’a tā ’outou e ti’aturi nei, ’aita e faufa’a ’ia pāhono ma te riri. Te patura’a i te mau ’ē’aturu nō te aroha, e tītau ïa te reira i tō ’outou itoito, ’e ’o terā mau iho ā tā tō ’outou mau hoa e tītau nei.

E fa’aātea te mārōra’a i te Vārua—i te mau taime ato’a. E ha’apūai te mārōra’a i te ’itera’a hape ē, e rāve’a te ’arora’a nō te fa’a’āfaro i te mau ta’a-’ē-ra’a ; e ’ere roa atu rā i te reira. E ma’itiraa te mārōra’a. E ma’itiraa te fa’atupura’a i te hau. E ti’amāra’a tō ’outou ’ia mā’iti i te māro ’aore rā te fa’afaite. Te fa’aitoito atu nei au ia ’outou ’ia mā’iti ’ia riro ’ei feiā fa’atupu i te hau, i teie nei ’e i te mau taime ato’a.¹¹

E a’u mau taea’e, e a’u mau tuahine, e nehenehe tā tātou e taui i te ao nei, hō’ē ta’ata ’e hō’ē ’ohipa i te taime hō’ē. Nāhea ? Nā roto i te fa’atiti’aifarora’a i te mau ta’a-’e-ra’a o te mana’o ma fa’atura te tahi ’e te tahi, ’e te ’āparaura’a tura.

Te mau ta’a’ēra’a o te mana’o, e tuha’a te reira nō te orara’a. Pauroa te mahana te ’ohipa nei au i pīha’i iho i te mau tāvini itoito o te Fatu, tei ta’a’ē te hi’ora’a i te hō’ē fifi i te tahi taime. ’Ua ’ite rātou ē, e hina’aro vau e fa’aro’o i tō rātou mau mana’o mau i ni’a i te mau mea ato’a tā mātou e tau’aparau—i ni’a ihoā rā i te mau tumu parau fifi.

Hōho’a

Te peresideni Dallin H. Oaks ʼe te peresideni Henry<nb/>B. Eyring

’Ua riro tō’u nā tauturu hanahana, te peresideni Oaks ’e te peresideni Eyring, ’ei hi’ora’a i roto i te huru nō tā rāua fa’a’itera’a i tō rāua mau mana’o, mai te mea ihoā rā e mea ta’a ’ē te reira. E rave rāua i te reira ma te here mau i te tahi ’e te tahi. ’Aita hō’ē o rāua e fa’a’ite ē, e mea ’ite ai ’oia, ’e nō reira e pāruru pa’ari ai i tōna mana’o. ’Aita hō’ē o rāua e fa’a’ite i te tītaura’a ’ia tata’u i te tahi. Nō te aroha rahi i roto i te tahi ’e te tahi, « te here ateate o te Mesia »,¹² e nehenehe tā mātou mau fa’aotira’a e arata’ihia e te Vārua o te Fatu. Aue tō’u here ’e te fa’atura i teie nā ta’ata rahi !

E rā’au te aroha nō te mārōra’a. Te aroha, ’o te hōro’a vārua ïa ’o te tauturu ia tātou ’ia ha’amou i te ta’ata tino nei, tei vai pāto’i noa, tei te’ote’o ’e tei pipiri. Te aroha o te huru mātāmua ïa o te hō’ē pipi mau nā Iesu Mesia.¹³ Nā te aroha e fa’ata’a i te hō’ē ta’ata fa’atupu i te hau.

’Ia fa’aha’eha’a ana’e tātou i mua i te Atua ’e ’ia pure ho’i ma te pūai ato’a o tō tātou ’ā’au, e hōro’a mai te Atua i te aroha ia tātou.¹⁴

O rātou o tē ha’amaita’ihia i taua hōro’a hanahana ra, e fa’a’oroma’ira’a roa ’e te maita’i tō rātou. ’Aita rātou e nounou ia vetahi ’ē ’e ’aita rātou e fa’aahaha i tō rātou iho faufa’a. ’Aita rātou e riri ’ōhie noa ’e ’aita ho’i e mana’o ’ino ia vetahi ’ē.¹⁵

E te mau taea’e ’e te mau tuahine, ’o te here mau o te Mesia te pāhonora’a i te mārōra’a ’e ha’afifi nei ia tātou i teie mahana. E tūra’i te aroha ia tātou « ’ia amo i te hopoi’a a te tahi ’e te tahi »¹⁶ ’eiaha rā te fa’ateimahara’a te ahi i te tahi. E fa’ati’a te here mau o te Mesia ia tātou « ’ia ti’a ’ei ’ite nō te Atua i te mau taime ato’a ’e nō te mau mea ato’a »¹⁷—i roto ihoā rā i te mau tupura’a fifi. E tauturu te aroha ia tātou ’ia fa’a’ite nāhea te mau tāne ’e te mau vahine o te Mesia ’ia parau ’e ’ia ’ohipa—i roto ihoā rā i te auahi.

I teie nei, ’aita vau e parau nei nō ni’a i « te hau noa atu te tahi atu mau mea ».¹⁸ Tē parau nei au nō te hāmani ia vetahi ’ē nā roto i te mau rāve’a e tu’ati ra i te ha’apa’ora’a i te fafaura’a tā ’outou e rave ’a rave ai ’outou i te ’ōro’a mo’a. E fafau ’outou ’ia haamana’o noa i te Faaora. I roto i te mau taime ’ua ’ī i te vārua nō te mārōra’a, te ani manihini nei au ia ’outou ’ia ha’amana’o ia Iesu Mesia. ’A pure ’ia roa’a te itoito ’e te pa’ari nō te fa’a’ite atu ’aore rā nō te rave atu te mea tāna rave atu. ’Ia pe’e tātou i te ari’i o te hau, e riro mai tātou ’ei feiā fa’atupu i te hau nāna.

I te reira faito, penei a’e e feruri ’outou ē, e tauturu mau teie poro’i i te hō’ē ta’ata tā ’outou i mātau. E ti’aturi paha ’outou ē, e tauturu te reira iāna ’ia huru maita’i a’e i ni’a ia ’outou. Mea maita’i ē, ’o te reira ihoā ! Terā rā tē ti’aturi ato’a nei au ē, e hi’o hohonu ’outou i roto i tō ’outou ’ā’au ’aita ānei e vai ra te mau hu’ahu’a te’ote’o ’aore rā hu’ahu’a pohehae e tāpe’a nei ia ’outou ’ia riro ’ei ta’ata fa’atupu i te hau.¹⁹

Mai te mea e mana’o pāpū tō ’outou nō ni’a i te tauturura’a ’ia ha’aputuputu ia ’Īserā’ela ’e nō ni’a i te patura’a i te mau autā’atira’a e vai ē a muri noa atu, teie te taime nō te tu’u i te hiti i te ’iriā. Teie te taime nō te fa’aea i te onoono ē, tō ’outou terā ’ē’a ’aore rā ’aita. Teie te taime nō te fa’aea i te rave i te mau mea ’e fa’ahaere ia vetahi ’ē i ni’a i te mau huero mo’a, nō tō rātou ri’ari’a ’ia fa’a’ino’ino ia ’outou. Teie te taime nō te huna i tā ’outou mau mauha’a tama’i.²⁰ Mai e mea ē, ’ua ’ī tā ’outou ha’apu’era’a parau i te fa’a’ino’ra’a ’e te mau parira’a, te taime teie nō te tu’u ’ē atu te reira.²¹ E ti’a mai ïa ’outou ’ei tāne ’aore rā ’ei vahine pūai nō te Mesia i te pae vārua.

E nehenehe te hiero e tauturu ia tātou i roto i tā tātou tauto’ora’a. E fāri’i tātou i reira i te mana o te Atua, o tē hōro’a mai ia tātou i te ti’ara’a ’ia upo’oti’a i ni’a ia Satane, ’oia te ta’ata fa’atupu i te tā’āto’ara’a o te mau mārōraa.²² ’A ti’avaru iāna i rāpae i tā ’outou mau auta’atira’a ! ’Ia ’ite ato’a tātou ē, tē fa’ahapa ato’a nei tātou i te ’enemi i te mau taime ato’a e fa’a’āfaro tātou i te hō’ē ta’a-’ore-ra’a ’aore rā e pāto’i tātou i te riri. Terā rā, e nehenehe tātou e fa’a’ite i te aroha marū e ’itehia i roto i te pipi mau nā Iesu Mesia. E pāto’i te feiā fa’atupu i te hau i te enemi.

’Ei nuna’a, e mata nā tātou i te riro ’ei māramarama mau i ni’a i te ’aivi—hō’ē māramarama « ’e’ita e mo’e ». E mata nā tātou i te fa’a’ite ē, tē vai ra te hō’ē huru tura nō te fa’atiti’aifaro i te mau fifi ’e hō’ē huru māramarama nō te fa’a’āfaro i te mau pe’ape’a. Mai te mea e fa’a’ite ’outou i te aroha e fa’a’itehia ’e te feiā ’āpe’e mau nā Iesu Mesia, e fa’a’ite pāpū te Fatu i tā ’outou mau tauto’ora’a mai te huru ’aita ’outou i ’ite a’enei.

Te ’evanelia, ’o te upe’a rahi roa a’e i te ao nei. ’Ua ani manihini te Atua i te tā’ato’ara’a ’ia haere mai iāna ra, « te ’ere’ere ’e te ’uo’uo, te titi ’e te ti’amā, te tāne ’e te vahine ».²⁴ Tē vai ra te pārahira’a nō te tā’āto’ara’a. Terā rā ’aita e pārahira’a nō te mau mana’o hape, te mau fa’ahapara’a, ’aore rā nō te mārōra’a rau.

E te mau taea’e ’e te mau tuahine here, tē toe nei i mua ia tātou te mea maita’i atu nō rātou o te hōro’a i tō rātou orara’a nō te patu ia vetahi ’ē. I teie mahana, te ani nei au ia ’outou ’ia hi’opo’a i tō ’outou huru ti’ara’a pipi i roto i te parau nō tō ’outou huru i ni’a ia vetahi ’ē. Tē ha’amaita’i nei au ia ’outou nō te rave i te mau fa’atanora’a ato’a e tītauhia, ’ia ti’a i tā ’outou peu ’ia riro ’ei mea hanahana, ’ei mea tura, ’e ’ei hōho’a nō te pipi mau nā Iesu Mesia.

Tē ha’amaita’i nei au ia ’outou nō te mono i te riri i te tāparuparura’a, te au-’ore-ra’a i te haro’aro’ara’a, ’e te fa’a’ino’ra’a i te hau.

Tē ora nei te Atua ! ’O Iesu te Mesia. Te ti’a nei ’oia i te upo’o o te ’Ēkālesia. E tāvini tātou nāna. E tauturu ’oia ia tātou ’ia riro ’ei feiā fa’atupu i te hau. Tē fa’a’ite pāpū nei au i te reira i te i’oa mo’a o Iesu Mesia, ’āmene.