Fa’atumu i ni’a ia Iesu Mesia

E tauturu tā tātou mau fafaura’a ia tātou ’ia rōtahi i tō tātou mau arara’a, tō tātou mau mana’o ’e tā tātou mau ’ohipa i ni’a i te Mesia. ’A « ha’apa’o ai [tātou] i te mau fafaura’a tā [tātou] i fafau », e nehenehe tātou e ’ite ’ōhie « i te mau mea nō teie nei ao » ’o tā tātou e ti’a « ’ia ha’apae » ’e « ’ia tītau ho’i i te mau mea nō te ao maita’i a’e ».⁸

’O te ’ohipa ïa tā te nūna’a o Amona i rave i roto i te Buka a Moromona. ’A ha’api’i mai ai rātou nō Iesu Mesia ’e ’a ha’amata ai i te fa’atumu i tō rātou orara’a i ni’a iāna, ’ua ’ite rātou ē e ti’a ia rātou e huna i tā rātou mau mauiha’a tama’i ’e ’ua riro mai ’ei ta’ata parauti’a mau ’e « ’ua ’ite-ato’a-hia rātou nō tō rātou itoito i tā te Atua ».⁹

E arata’i te ha’apa’ora’a i te mau fafaura’a ia tātou ’ia ’imi i te mau mea ato’a e tītau i te fa’aurura’a a te Vārua ’e ’ia pāto’i i te mau mea ato’a e fa’aātea ’ē atu i te reira—« inaha ’ua ’ite tātou ē, mai te mea e ti’a-mā tātou i mua i te aro o te Vārua Maita’i, ’ua ti’a-mā ato’a ïa tātou nō te ora i mua i te aro o te Metua i te ao ra ’e tāna Tamaiti ’o Iesu Mesia ».¹⁰ Te aura’a o te reira, e ti’a ia tātou e taui tātou i tā tātou huru paraparau, ma te fa’a’ohipa i te mau ta’o maitata’i a’e. Te aura’a ato’a ’o tē monora’a i te mau peu pae vārua tano ’ore nā roto i te mau peu ’āpī ’o tē ha’apūai i tō tātou aura’a ’e te Fatu, mai te pure tāmahana ’e te tuatāpapara’a pāpa’ira’a mo’a, te ta’ata hō’ē ’e ’e tō tātou ’utuāfare.

’Ua parau te peresideni Russell M. Nelson ē « te mau ta’ata ato’a e rave i te mau fafaura’a i roto i te vāhi bāpetizora’a ’e i roto i te hiero—’e e ha’apa’o i te reira—’ua fa’arahi ïa rātou i te fāna’ora’a i te mana o Iesu Mesia […]

Te tao’a hōro’a nō te ha’apa’ora’a i te mau fafaura’a ’e te Atua ’o te mana ïa nō te ra’i—te mana e ha’apūai ia tātou nō te fa’aruru maita’i a’e i tō tātou mau tāmatara’a, mau fa’ahemara’a, ’e mau māuiui o te ’ā’au ».¹¹

’Ua riro te fa’a’āpīra’a i tā tātou mau fafaura’a i te taime o te ’ōro’a mo’a i te mau sābati ato’a ’ei taime maita’i roa nō te hi’opo’a ia tātou iho¹² ’e ’ia rōtahi fa’ahou i tō tātou orara’a i ni’a ia Iesu Mesia. Te ravera’a i te ’ōro’a mo’a, tē parau ra tātou ē e « ha’amana’o ā [tātou] iāna ».¹³ Te ta’o ā e faufa’a mau tōna. E fa’atae te reira i te fa’aurura’a o te Fa’aora i roto i te mau tuha’a ato’a o tō tātou orara’a. ’Aita tātou e ha’amana’o noa iāna i te fare purera’a ’aore rā i te taime nō tā tātou pure i te po’ipo’i ’aore rā i te taime ’ia fifi ana’e tātou ’e ’ia hina’aro ana’e tātou i te hō’ē ’ohipa.

’Oia mau, e ’ōnevaneva tātou i te tahi taime. E mo’ehia ia tātou. E mo’e tō tātou rōtahira’a. Terā rā, tē fa’a’āpīra’a i tā tātou mau fafaura’a te aura’a e hina’aro tātou e ha’amana’o noa i te Fa’aora, ē tāmata tātou i te rave i te reira i te roara’a o te hepetoma, ’e ē fafau fa’ahou tātou ’e e rōtahi fa’ahou i ni’a ā iāna i te ’aira’a mā’a o te ’ōro’a mo’a i te hepetoma i muri nei.

Mea pāpū maita’i ē, te fa’atumura’a i ni’a ia Iesu Mesia e ti’a ’ia hau atu i te hō’ē ’ohipara’a a te ’ēkalesia i te mahana sābati. I tō te presideni Nelson vauvau-mātāmua-ra’a i te fa’anahora’a Mai, pe’e mai i te matahiti 2018, ’ua parau ’oia « ’ua tae te taime nō te hō’ē ’Ēkalesia tei fa’atumuhia i ni’a i te ’utuāfare ».¹⁴ ’Ua parau ’oia e ti’a ia tātou ’ia « fa’ariro i tō [tātou] ’utuāfare ’ei vāhi mo’a nō te fa’aro’o » ’e « ’ei pū nō te ha’api’ira’a ’evanelia ». ’E ’ua hōro’a mai ’oia ia tātou e maha parau fafau fa’ahiahia mau, mai te peu e rave tātou.¹⁵

Te parau fafau mātāmua : « E riro mai tā ’outou mau sābati ’ei mahana hina’arohia ». E riro mai te reira ’ei mahana i reira tātou e ha’afātata roa atu ai i te Fa’aora. Mai tā te hō’ē tamāhine ’āpī nō Peru i parau, « te mahana o te Fatu ’o te mahana ïa i reira vau e fāri’i rahi ai i te mau pāhonora’a a te Fatu ».

Te paru fafau piti : « E ’ana’anatae rahi tā ’outou mau tamari’i i te ha’api’i mai ’e i te ora i te mau ha’api’ira’a a te Fa’aora ». Nō reira, « tē paraparau nei tātou i te Mesia, tē ’oa’oa nei tātou i te Mesia, tē a’o nei tātou i te parau a te Mesia […] ’ia ’ite tā tātou mau tamari’i i te tumu e hi’ohia atu e rātou nō te matarara’a i tā rātou mau hara ».¹⁶

Tē rāve nei tātou i te reira penei a’e i te hō’ē mahana, ’ia haere ana’e tā tātou tamaiti i te ’ohipa ’aore rā e ori haere nā ni’a i te mou’a ’aore rā e ’au’au i te animala nā roto te uru rā’au, mai tā Enosa i rave, ’ia ha’amana’o ’oia i te mea tā tātou i ha’api’i iāna nō ni’a i te Mesia ’e te ’oa’oa ’ia ora i te ’evanelia. E hape noa atu ! E riro paha te reira ’ei mahana i reira ’oia e ’ite ai i muri iho te po’ia pae vārua ’o tē fāriu atu iāna i ni’a ia Iesu Mesia, ’ia ti’a iāna ’ia fa’aro’o i te reo o te Fatu e parau ra iāna, « ’ua fa’a’orehia tā ’oe mau hara, e ha’amaita’ihia ’oe ».¹⁷

Te parau fafau toru : « E iti noa mai te mana o te ’enemi i roto i tō ’outou orara’a ’e i roto i tō ’outou ’utuāfare ». Nō te aha ? Nō te mea, rahi atu ā tā tātou fa’atumura’a i ni’a ia Iesu Mesia, rahi ato’a te hara i te fa’aiti mai i tāna fa’ahemara’a.¹⁸ Nō te mea ’ua ’ī tō tātou ’utuāfare i te māramarama o te Fa’aora, ’ua iti roa mai te vāhi nō te pōiri a te ’enemi.

Te parau fafau maha : « E riro te mau tauira’a i roto i tō ’outou ’utuāfare ’ei mea fa’ahiahia ’e te vai maoro ». Nō te aha ? Nō te mea, te tauira’a tā Iesu Mesia e hōpoi mai ’o « te hō’ē tauira’a rahi » ïa.¹⁹ E taui ’oia i tō tātou ato’a natura mau ; ’ia riro tātou ’ei « ta’ata ’āpī ».²⁰ E riro mārū noa mai tātou mai te Fa’aora te huru, ma te fa’a’īhia i tōna here mau nō te mau tamari’i ato’a a te Atua.

’O vai te ta’ata ’aita e hina’aro i teie mau parau fafau ’ia tupu i roto i tōnā orara’a ’e i roto i tōna ’utuāfare ? E aha tei tītauhia ia tātou e rave nō te fāri’i i te reira ? Te pāhonora’a ’o te fa’arirora’a ïa i tō tātou ’utuāfare ’ei vāhi mo’a nō te fa’aro’o ’e ’ei pū nō te ha’api’ira’a ’evanelia. Nāhea ’ia rave i te reira ? Nā roto te fa’atumura’a i ni’a i te Metua i te ao ra ’e ia Iesu Mesia, ’ia fa’arirora’a ia Rāua ’ei pū nō tō tātou orara’a ’utuāfare, te fa’aurura’a rahi roa a’e i roto i tō tātou ’utuāfare.

E nehenehe ānei iā’u e parau atu ē, ’ia ha’amata ’outou ma te rave i te mau parau a te Mesia, e ’itehia i roto i te mau pāpa’ira’a mo’a, ’ei tuha’a tāmahana nō tō ’outou orara’a ? ’Aita e rāve’a i fa’ata’ahia mai nō te hō’ē tuatāpapara’a pāpa’ira’a mo’a maita’i roa a’e. E nehenehe te reira e ravehia e 5 ’aore rā e10 minuti i te mahana tāta’itahi––’aore rā hau atu. E nehenehe te reira e ravehia hō’ē pene ’aore rā te tahi ma’a ’īrava iti i te mahana hō’ē. Mea au nā vetahi mau ’utuāfare e tuatāpapa i te po’ipo’i hou ’a haere ai i te ha’api’ira’a ’aore rā i te ’ohipa. Te tahi, mea au a’e e tai’o i te pō hou ’a haere ai e ta’oto. ’Ua parau mai vetahi mau ’āpiti fa’aipoipo-’āpī-hia iā’u ē, tē tuatāpapa tāta’itahi nei rātou nā ni’a i te purūmu nō te ’ohipa, i muri iho e fa’a’ite i te tahi ’e te tahi i tō rātou mana’o nā roto i te rata tairēuira [SMS], ’ia nehenehe i tō rātou mau mana’o ’e mau ’āparaura’a ’ia haruharuhia.

Tē hōro’a nei te Mai, pe’e mai e rave rahi ’ohipara’a ’e te mau rāve’a tauturu ’o te nehenehe e tauturu i te ta’ata hō’ē ’e te ’utuāfare, ’ia ’apo mai i te mau parau tumu o te ’evanelia nā roto mai i te mau pāpa’ira’a mo’a. E nehenehe te mau vidéos o te Bibilia ’e te Buka a Moromona e riro ato’a ’ei mauiha’a faufa’a mau, nō te fa’ariro i te mau pāpa’ira’a mo’a ’ei rāve’a ’ōhie nō tō ’outou ’utuāfare. Pinepine te feiā ’āpī ’e te mau tamari’i i te fa’auruhia e te mau ’ā’amu fa’ahiahia o te pāpa’ira’a mo’a. E vai noa teie mau ’ā’amu ’e te mau parau tumu nō te ’evanelia tā te reira e ha’api’i nei i roto i tā ’outou mau tamari’i, mai te mau hoa e ti’aturihia, ’ia hina’aro ana’e rātou i te mau hi’ora’a maita’i nō te tāvinira’a, te vi’ivi’i ’ore, te ha’apa’o, te fa’a’oroma’i, te tāpe’a-māite-ra’a, te heheura’a o te ta’ata iho, te aroha, te ha’eha’a ’e te fa’aro’o ia Iesu Mesia. I te roara’a o te tau, nā tā ’outou tāmau-noa-ra’a i te fa’a’amuā ia ’outou i te parau a te Atua e tauturu i tā ’outou mau tamari’i ’ia ha’afātata atu ā i te Fa’aora. E ha’api’i mai rātou i te ha’amātau iāna mai tei ’ore i ’itehia na nā mua a’e.

Tē ora nei Iesu Mesia i teienei mahana. E nehenehe ’oia e riro ’ei tuha’a ora i roto i tō tātou orara’a tāmahana. ’O ’oia te rāve’a nō tō tātou mau fifi, e ti’a rā ia tātou e hi’o te mata i ni’a ’e ’ia hi’o nō te ’ite atu iāna. ’Ua parau ’oia, « ’a hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u ».²¹ ’A fa’atumu ai tātou i ni’a iāna ’e i tō tātou Metua i te ao ra, ’a rave ai ’e ’a ha’apa’o ai i te mau fafaura’a ’e Rāua, ’e te fa’arirora’a ia Rāua ’ei fa’aurura’a faufa’a roa a’e i roto i tō tātou fare ’e tō tātou ’utuāfare, e riro mai tātou mai te huru ta’ata tā te peresideni Nelson e hi’o nei : « Te hō’ē nūna’a pāpū, te ineine ’e te ti’a-mā nō te fāri’i i te Fatu ’ia ho’i fa’ahou ana’e mai ’oia ; hō’ē nūna’a tei mā’iti a’ena ia Iesu Mesia i roto i teie ao hi’a ; hō’ē nūna’a ’o tē ’oa’oa nei i roto nō tōna ti’amāra’a ’ia ora i te mau ture teitei a’e ’e te mo’a a’e a Iesu Mesia ».²² I te i’oa o Iesu Mesia, ’āmene.