’Ua haru tō’u ferurira’a i teie nei mana’o nō Iesu Mesia
’Ia tāmau ’outou i te ha’apa’o maita’i i te haru mai i te mana’o nō Iesu Mesia, tē parau fafau atu nei au ia ’outou, e ’ere te arata’ira’a hanahana noa tē noa’a mai, ’o te mana ato’a rā nō te ra’i mai.
I roto i teie pu’e tau nehenehe nō te Pāsa, tē tāvevo nei au i te pure o teie hīmene purera’a mana rahi, « Arata’i mai e Iehova. »1
Tē fa’ati’a nei te hō’ē ’ā’amu nō te Buka a Moromona i te parau nō te hō’ē taure’are’a tamāroa o te hō’ē ’utuāfare ’ite-maita’i-hia, ’o Alama te i’oa, ’o tā te mau pāpa’ira’a mo’a e parau nei ē e ta’ata fa’aro’o ’ore ’e te ha’amori ’īdolo.1 E ta’ata vinivini ’e te vaha mona, ’o tē vaha pape i te ta’ata ’ia pe’e iāna. Te mea māere rā, ’ua fā te hō’ē melahi ia Alama ’e i tōna mau hoa. Marua a’era Alama i raro ’e nō te paruparu rahi o tōna tino, ’ua amohia ’oia ma te pūai ’ore i te fare o tōna metua tāne. E toru mahana te maoro ’oia i roto i te hō’ē vaira’a moeari (coma).3 I muri mai, ’ua fa’ata’a mai ’oia ē, i roto i terā vaira’a tūruhe tōna i te mata o te feiā ’ati a’e iāna, tē haere noa ra tōna ferurira’a, tē heva ra tōna vairua i te mana’ora’a i tōna orara’a tei ha’apae i te mau fa’auera’a a te Atua. I parau ’oia i tōna ferurira’a ē « ’ua ahoaho roa […] i te ha’amana’ora’a i [tāna] ra mau hara e rave rahi »4 ’e « ’ua ha’amāuiuihia [’oia] i te māuiui mure ’ore. »5
I roto i tōna tapineva, ’ua ha’amana’o ’oia ē ’ua ha’api’ihia ’oia i tōna ’āpīra’a nō ni’a i « te taera’a mai o te hō’ē ta’ata, ’o Iesu Mesia, te Tamaiti a te Atua, ’ei tāra’ehara nō tō te ao nei. »6 ’Ua parau atu ra ’oia i teie parau rahi mau : « ’A [haru ai tō’u ferurira’a] i teie nei mana’o, ’ua ti’aoro ihora vau i roto i tō’u iho ’ā’au : E Iesu ē, te Tamaiti a te Atua, ’a aroha mai iā’u nei. »7 ’E i te ti’aorora’a ’oia i te mana hanahana o te Fa’aora, ’ua tupu te hō’ē semeio, tē nā ’ō ra ’oia : « I tō’u ferurira’a i te reira, ’aita vau i ha’amana’o fa’ahou i tō’u māuiui. »8 ’Ua tupu a’era tōna mana’o hau ’e te māramarama. « ’Aita roa e mea [i] tuea i te ’oa’oa ’e te au maita’i i tō’u ra ’oa’oa »,9 tāna i parau.
’Ua « haru » ’o Alama i teie nei parau mau nō Iesu Mesia. Mai te peu e fa’a’ohipa tātou i terā parau « haru » i te pae tino nei, e parau ïa tātou : « ’Ua haru ’oia i te tāpe’ara’a i tōna topara’a », ’oia ho’i ’ua toro tā’ue ’oia i te rima ’e ’ua mau pāpū iāna te hō’ē mea tei tīmā-pāpū-hia i ni’a i te hō’ē niu pāpū.
Nō Alama rā, ’o tōna ïa ferurira’a tei toro atu i te mana’o ’e ’ua noa’a mai teie parau mau mana rahi nō te tusia tāra’ehara a Iesu Mesia. Ma te fa’a’ohipa i te fa’aro’o i terā parau mau, ’e nā roto i te mana ’e te maita’i o te Atua, ’ua fa’a’orahia ’oia i te hepohepo ’e ’ua ’ī i te tīa’ira’a.
E’ita paha te mau ’ohipa e tupu nō tātou i te mea ’ū’ana mai tā Alama, e mea faufa’a mure ’ore rā. I « haru [ato’a tō tātou ferurira’a] i teie nei mana’o » nō Iesu Mesia ’e tāna tusia aroha, ’e ’ua ’ite tō tātou vairua i te māramarama ’e te ’oa’oa nō reira mai.
Tē mau-pāpū-ra’a i te mana’o nō Iesu Mesia
Tā’u nei pure i teie pu’e tau Pāsa, ’oia ho’i, e rahi atu ā tō tātou mana’o pāpū nō te fa’ahōho’a, nō te ha’apūai ’e ’ia noa’a mai teie mana’o huru rahi nō Iesu Mesia i roto i te mau ’ōpihapiha o tō tātou vairua,10 ’ia ti’a i te reira ’ia mani’i ’ana’anatae i roto i tō tātou ferurira’a, ’ia arata’i i te mau mea tā tātou e mana’o ’e e rave, ’e ’ia fa’atae tāmau mai i te ’oa’oa au roa o te here o te Fa’aora.11
Te fa’a’īra’a i tō tātou ferurira’a i te mana o Iesu Mesia, e ’ere ïa ē, ’o ’oia ana’e te mana’o i roto ia tātou. Terā rā, e ’ati tō tātou mau mana’o i tōna here, tōna orara’a ’e tāna mau ha’api’ira’a, ’e i tāna tusia tāra’ehara ’e tōna ti’afa’ahoura’a hanahana. E’ita roa Iesu e mo’ehia i te hiti, nō te mea tei reira noa tō tātou mana’ora’a iāna, ’e « [’ia ’ārue [tātou pā’āto’a] iāna ra ! »12 E pure tātou ’e e nā ni’a iho noa tō tātou ferurira’a i te mau ’ohipa i tupu, tei ha’afātata ia tātou iāna. E fāri’i maita’i tātou i roto i te ferurira’a i te mau hōho’a hanahana, te mau pāpa’ira’a mo’a ’e te mau hīmene fa’auru nō te tāmarū ri’i i te mau mana’o hope’a ’ore o te mahana e horo haere ra i roto i tō tātou orara’a apiapi. E’ita tō tātou here nōna e pāruru ia tātou i te rumaruma ’e i te ’oto o te orara’a tāhuti nei, terā rā, maoti te reira e ti’a ai ia tātou i te haere nā roto i te mau fifi ma te pūai rahi atu ā i tō tātou iho.
’A ha’amana’o, e tamari’i vārua ’outou nā te Metua i te ao ra. Mai tā te ’āpōsetolo Paulo i parau, « e tamari’i tātou nā te Atua ra. »14 ’Ua ora ’outou nā ni’a i tō ’outou ihota’ata tāta’itahi hou roa ’a haere mai ai i te ao nei. ’Ua fa’anaho tō tātou Metua i te hō’ē fa’anahora’a maita’i roa, ’ia haere mai tātou i ni’a i te fenua nei nō te ha’api’i ’e nō te ho’i iāna ra. ’Ua tono ’oia i tāna Tamaiti here ’e nā roto i te mana o tāna tāra’ehara ’e tōna ti’afa’ahoura’a tā’ōti’a ’ore, e ora tātou i muri mai i te mēnema ; ’e ’ia ineine ho’i tātou i te fa’a’ohipa i te fa’aro’o iāna ’e ’ia tātarahapa i tā tātou mau hara,15 e fa’a’orehia ïa te reira ’e e fāri’i ïa tātou i te tīa’ira’a nō te ora mure ’ore.16
Fa’atupu i roto i tō tātou mana’o ’e tō tātou vārua i te arara’a ta’a ’ē
I roto i teie orara’a tāhuti nei, tītauhia i tō tātou ferurira’a ’e tō tātou vārua ’ia vai ara i te hō’ē fāito ta’a ’ē roa.17 I tō tātou ferurira’a e ti’a ai ia tātou ’ia ora, ’ia mā’iti ’e ’ia hāro’aro’a i te maita’i ’e te ’ino.18 Nā tō tātou vārua e fāri’i i te fa’a’itera’a pāpū ē, ’o te Atua tō tātou Metua, ’o Iesu Mesia te Tamaiti a te Atua, ’e ’o tā rāua mau ha’api’ira’a tō tātou arata’i i te pōpou i’ō nei ’e i te ora mure ’ore i muri mai i te mēnema.
’Ua haru te ferurira’a o Alama i teie nei mana’o nō Iesu Mesia. ’Ua taui roa tōna orara’a. Te ’āmuira’a rahi, e taime ïa nō te māramarama e aha tā te Fatu i hina’aro ia tātou ’ia rave ’e ’ia riro mai. E taime ato’a nō te feruri i tō tātou nu’ura’a i mua. I roto i tō’u mau tonora’a nā te ao ato’a nei, ’ua ’ite au i te pūai pae vārua ’o tē rahi noa atu ra i roto i te mau melo parauti’a ’e te pūpū mau o te ’Ēkālesia.
’A pae matahiti i ma’iri, ’ua anihia tātou ’ia tu’u rahi atu ā i te Fa’aora i te vāhi e ’ite-maita’i-hia ai i roto i tā tātou mau ’ohipa ato’a, nā roto ho’i i te fa’a’ohipara’a i te i’oa mau o Te ’Ēkālesia a Iesu Mesia i te Feiā Mo’a i te mau Mahana Hope’a nei.19 Tē parau māite atu ā nei tātou i tōna i’oa.
’A maha matahiti i ma’iri, nā roto i te ha’apotora’a i te roa o tā tātou purera’a ’ōro’a, ’ua rōtahi rahi atu ā tātou i ni’a i te ravera’a i te ’ōro’a a te Fatu. Tē feruri rahi atu ā ra tātou ia Iesu Mesia, ’e ’ua pāpū atu ā tā tātou parau fafau ’ia ha’amana’o ā iāna ē a muri noa atu.20
Nā roto i te mo’emo’era’a i tupu nō te pararera’a ma’i pe’e ’ati a’e i te ao ei, ’e te tauturu a te Mai, pe’e mai, tē ’ite-maita’i-hia ra te mau ha’api’ira’a a te Fa’aora i roto i tō tātou mau ’utuāfare, ’o tē tauturu i tā tātou ha’amorira’ai te Fa’aora i roto i te hepetoma.
Nā roto i te pe’era’a i te parau a te peresideni Russell M. Nelson e « fa’aro’o iāna »,21 tē ha’amaita’i ra tātou i tō tātou ’aravihi ’ia ’ite i te mau muhumuhu o te Vārua Maita’i ’e ’ia ’ite i te rima o te Fatu i roto i tō tātou orara’a.
Nā roto i te fa’aarara’a ’e te otira’a te mau hiero e rave rahi, ’ua pinepine atu ā tātou i te haere i te fare o te Fatu ’e i te fāri’i i te mau ha’amaita’ira’a tāna i parau mai. Tē ’ite pūai atu ā ra tātou i te nehenehe hau a’e o tō tātou Fa’aora ’e tō tātou Tāra’ehara.
’Ua parau te peresideni Nelson : « ʼAore roa e mea ʼōhie [ʼe te mea tupu noa] te riroraʼa mai [’ei] pipi pūai]. E ti’a i tā tātou tūtonura’a ’ia ha’amau-pāpū-hia i ni’a i te Fa’aora ’e tāna ’evanelia. E tītauhia te tūtavaraʼa rahi o te feruriraʼa nō te hiʼo atu iāna [i] tō tātou mau manaʼo atoʼa. »22
Nā roto i te rōtahira’a tātou i ni’a ia Iesu Mesia, e hi’ohia te tahi atu mau mea ’ati a’e ia tātou nā roto i tō tātou here iāna—noa atu tei reira noa ā. E morohi te mau fa’anevanevara’a faufa’a ’ore, ’e e ’īriti tātou i terā mau mea ’aita e tū’ati ra i tōna māramarama ’e tōna huru. ’Ia tāmau ’outou i te ha’apa’o maita’i i te haru mai i te mana’o nō Iesu Mesia, i te ti’aturi iāna ’e i te ha’apa’o i tāna mau fa’auera’a, tē parau fafau atu nei au ia ’outou, e ’ere te arata’ira’a hanahana noa tē noa’a mai, ’o te mana ato’a rā nō te ra’i mai—te mana ’o tē hōro’a i te pūai i tā ’outou mau fafaura’a, te hau i tā ’outou mau fifi ’e te ’oa’oa i tā ’outou mau ha’amaita’ira’a.
Ha’amana’o ia Iesu Mesia
Ma’a hepetoma i ma’iri, ’ua haere atu māua Kathy i te fare o Matt ’e Sarah Johnson. Tei ni’a i te papa’i fare te hōho’a o tō rātou ’utuāfare iti, te hō’ē hōho’a nehenehe nō te Fa’aora ’e te hō’ē hōho’a nō te hiero.
’Ua ’oa’oa roa tā rāua e maha tamāhine, ’o Maddy, Ruby, Claire ’e June i te fa’a’itera’a i tō rātou here i tō rātou metua vahine.
Hō’ē matahiti e hau atu, ’ua tāpa’o pinepine ’o Sarah i te i’oa o te ’utuāfare, i te mahana mā’a, nō te haere i te hiero, e haere ïa te mau tamāhine i te bāpetizora’a nō tō rātou mau fēti’i i ora na.
I te ’āva’e Novema i ma’iri, ’ua tāpa’o ’o Sarah i te i’oa o te ’utuāfare i te hiero nō te hepetoma hope’a nō Tītema, e mahana maha, e ’ere i te mahana mā’a. « Maita’i ē ’aita e fifi nō ’oe », ’ua parau ’oia ia Matt.
’Ua ’itehia e ma’i mariri ’aita’ata tōna, ’ua parau rā te mau taote ē, e ora ’oia e piti, e toru fa’ahou matahiti. I roto i te hō’ē purera’a ’ōro’a, ’ua fa’a’ite ’o Sarah i tōna ’itera’a pāpū pūai mau, i te nā-’ō-ra’a ē, noa atu ā te fa’ahope’ara’a nōna, ’ua here ’oia i te Fa’aora ma tōna ’ā’au ato’a, ’e tei iāna a’ena « te rē ». I te ’āva’e Tītema, ma te tīa’i-’ore-hia, ’ino tā’ue atu ra te ea o Sarah, ’e mau atu ra i te fare ma’i. I terā po’ipo’i mahana mā’a, te 29 nō Tītema, ’ua fa’aoti marū ’oia i tōna tau i te tāhuti nei. Tei pīha’i iho ’o Matt ia Sarah i terā pō ē ao noa atu.
Ma te ’ā’au ’oto, ’e te rohirohi o te tino ’e o te manava, ’ua tae atu ’oia i te fare, ma te ta’i ’e tāna mau tamāhine. I te hi’ora’a Matt i tāna niuniu, ’ite a’era ’oia i te fa’aha’amana’ora’a nō taua tere hiero ta’a ’ē tā Sarah i tāpa’o nō taua mahana ra. Tē nā ’ō ra Matt : « I te hi’o-mātāmua-ra’a vau i te reira, ’ua mana’o vau, e’ita roa atu e haere. »
’Ua haru rā te ferurira’a o Matt i teie nei mana’o : « Tē ora nei te Fa’aora. ’Aita e vāhi maita’i a’e nō te ’utuāfare, maori rā i tōna fare mo’a. »
’Ua haere a’era ’o Matt, Maddy, Ruby, Claire ’e June i te hiero nō te hora tā Sarah i tāpa’o nō rātou. Ma te roimata i ni’a i te mata, ’ua rave ’o Matt i te mau bāpetizora’a ’e tāna mau tamāhine. ’Ua putapū hōhonu rātou i tō rātou here ’e tō rātou tā’amura’a mure ’ore ’ia Sarah, ’e ’ua putapū rātou i te here rahi hau ’ē ’e te hau tāmāhanahana o te Fa’aora. ’Ua fa’a’ite marū mai ’o Matt ē : « E ’oto rahi tō’u ’e te heva, terā rā tē tuō nei au i tō’u ’oa’oa, nō te ’itera’a i te fa’anahora’a māere nō te fa’aorara’a a tō’u Metua. »
I teie pu’e tau Pāsa, tē fa’a’ite pāpū nei au i te parau mau hope ’e te rahi roa ’ino o te tusia tāra’ehara fāito ’ore a te Fa’aora, ’e i tōna ti’afa’ahoura’a hanahana. ’Ia vai tō ’outou ferurira’a i ni’a i te mana’o nō Iesu Mesia ma te ’āueue ’ore ’e te mure ’ore, ’e ’ia tāmau i te fa’atumu hope atu ā ’outou i tō ’outou orara’a i ni’a i te Fa’aora, tē parau fafau atu nei au ē, e putapū ’outou i tōna tīa’ira’a, tōna hau ’e tōna here. I te i’oa o Iesu Mesia, ’āmene.