Te pāhonora’a ’o Iesu Mesia iho ā ïa

E au mau taea’e, e au mau tuahine, ’ua fa’a’amuhia tātou i te mā’a vārua i te roara’a o teie nā mahana e piti. E mea nehenehe roa ’ino mau te mau hīmene a te pupu hīmene. ’Ua riro te feiā tei paraparau mai ’ei mauha’a nā te Fatu. Te pure nei au ’ia ’imi ’outou i te Vārua Maita’i nō te arata’i ia ’outou i roto i tā ’outou tuatāpapara’a, ’a hi’o ai ’outou i te mau parau mau i ha’api’ihia nā ni’a atu i teie terono. ’Ua hapono-mau-hia mai te reira mai te ra’i mai.

Hō’ē hepetoma mai teie atu mahana, ’o te Sābati Pāta ïa. Teie te ha’amorira’a fa’aro’o faufa’a roa a’e nō te mau pipi nā Iesu Mesia. Tē pāta te tumu rahi tātou e fa’ahanahana ai i te noera. E ’ōmūmū mai te ha’api’ira’a Mai, pe’e mai nō teie hepetoma, ia ’outou ’ia tuatāpapa i te tomora’a hanahana o te Fa’aora i Ierusalema, tāna tāmāra’a i te hiero, tōna mauiuira’a i roto i te ’āua nō Getesemane, tōna fa’asataurora’a, tōna ti’afa’ahoura’a hanahana ’e tōna mau fāra’a mai i tāna mau pipi i muri a’e ra.¹

’A ’oa’oa i teie mau ’īrava mo’a ’e ’a ’imi i te mau rāve’a ato’a e vai ra nō te ha’amāuruuru i tō tātou Metua i te ao ra nō te tonora’a mai i tāna tamaiti fānau tahi.² Maoti Iesu Mesia, e nehenehe tātou e tātarahapa ’e e fa’a’orehia tā tātou mau hara. Maoti ’oia, e ti’a fa’ahou tātou tāta’itahi.

Tē ani manihini ato’a atu nei au ia ’outou ’ia tuatāpapa fa’ahou i te ’ā’amu o te fāra’a mai o te Fa’aora i te ’ati Nephi i te fenua Amerika, i roto i te 3 Néphi. Tau taime ri’i nā mua a’e i taua fāra’a mai, ’ua fa’aro’ohia tōna reo i rotopū i te nuna’a, tae noa atu i teie mau parau tāparu :

« ’Aita ānei ’outou e fāriu mai iā’u i teienei, ’e ’ia tātarahapa ho’i i tā ’outou mau hara, ’e ’ia fa’afāriuhia mai, ’ia fa’aorahia ’outou e au ra ?

« Inaha, ’ua fa’atorohia atu tō’u nei rima nō te aroha ia ’outou na, ’e ’o ’oia ’o tē haere mai iā’u nei ra, ’o tā’u ïa e fāri’i ».³

E a’u mau taea’e ’e a’u mau tuahine here, tē fa’atae ato’a mai nei Iesu Mesia i te reira anira’a manihini ia ’outou i teie mahana. Tē tāparu nei au ia ’outou ’ia haere mai iāna ra ’ia ti’a iāna ’ia fa’aora ia ’outou ! E fa’aora ’oia ia ’outou i te hara mai te mea e tātarahapa ’outou. E fa’aora ’oia ia ’outou i te ’oto ’e te mata’u. E fa’aora ’oia ia ’outou i te mau pēpē o teie nei ao.

Noa atu te huru o tā ’outou mau uira’a ’aore rā, tō ’outou mau fifi, e ’itehia te mau pāhonora’a i te mau taime ato’a i roto i te orara’a ’e i te mau ha’api’ira’a a Iesu Mesia. ’A ha’api’i hau atu nō ni’a i tāna tāra’ehara, tōna here, tōna maita’i, tāna ha’api’ira’a tumu, ’e tāna ’evanelia i fa’aho’i-fa’ahou-hia mai nō te fa’aora ’e ha’amaita’i. ’A fāriu atu i ni’a iāna ! ’A pe’e iāna !

’O Iesu Mesia te tumu e patu ai tātou i te mau hiero. Tōna fare mo’a tāta’itahi te reira. Tē ravera’a i te mau fafaura’a ’e te fāri’ira’a i te mau ’ōro’a faufa’a i roto i te hiero, ’e te ha’afātatara’a i pīha’i iho iāna i reira, e hōro’a mai te reira ia ’outou i te mau ha’amaita’ira’a ’o tē ’ore e nehenehe i te tahi atu huru ha’amorira’a ia hōro’a mai. Nō reira tātou e ’imi ai i te mau rāve’a ato’a ’ia roa’a ’ōhie te mau ha’amaita’ira’a o te hiero i tō tātou mau melo nā te ao ato’a nei. I teie mahana, tē ’oa’oa nei au ’ia fa’a’ite atu i te mau fa’anahora’a nō te patu i te hō’ē hiero ’āpī i roto i teie mau vāhi tāta’itahi i muri nei :

• Retalhuleu, Guatemala

• Iquitos, Peru

• Teresina, Peretīria

• Natal, Peretīria

• Tuguegarao City, Firipino

• Iloilo, Firipino

• Jakarta, Inidonesia

• Hamburg, Purutia

• Lethbridge, Alberta, Tanata

• San Jose, Kalifonia

• Bakersfield, Kalifonia

• Springfield, Misouri

• Charlotte, Carolina apato’erau

• Winchester, Virginia

• Harrisburg, Pennsylvania

E au mau taea’e ’e au mau tuahine here, tē fa’a’ite pāpū nei au ē, tē arata’i nei Iesu Mesia i te mau ’ohipa o tāna ’Ēkālesia. Tē fa’a’ite pāpū nei au ē, te rāve’a hō’ē roa nō te fāri’i i te ’oa’oa tāmau, ’o te pe’era’a ïa iāna. ’Ua ’ite au ē, tē pou mai nei tōna mana i ni’a i tōna mau ta’ata ha’apa’o i te fafaura’a, ’tei « fa’a’ahuhia… i te parauti’a ’e te mana o te Atua ma te hanahana rahi ».⁴ ’O tō’u ïa ’itera’a pāpū, ’e tō’u tāpa’o here ia ’outou tāta’itahi, i te i’oa o Iesu Mesia, ’āmene.