« ’Ei roto ’oe iā’u nei e pārahi ai, ’e ’ei roto vau ia ’oe ; nō reira, ’a haere mai nā muri iho iā’u »
Te parau fafau a te Fa’aora ē ’ei roto ’oia ia tātou, e parau mau ïa ’e ’ua matara ho’i i te mau melo ato’a o tāna ’Ēkālesia i fa’aho’ihia mai, ’o tē ha’apa’o i te fafaura’a.
E ta’ata faufa’a rahi te peropheta tahito ra ’o Enoha, tei fa’ahitihia i roto i te Faufa’a Tahito, te Ha’api’ira’a Tumu ’e te mau Fafaura’a ’e te Poe Tao’a Rahi,1 nō te fa’ati’ara’a i te ’oire nō Ziona.
I roto i te fa’ati’ara’a a te pāpa’ira’a mo’a nō te pi’ira’ahia Enoha ’ia tāvini, tē parauhia nei ē « ’ua fa’aro’o a’era ’oia i te reo nō te ra’i mai, i te nā-’ō-ra’a mai ē : E Enoha, tā’u tamaiti, ’a tohu na i teie feiā, ’e ’a parau atu ia rātou—’A tātarahapa […] nō te mea ’ua fa’a’eta’eta rātou i tō rātou ’ā’au, ’e ’ua turi tō rātou tari’a ’ia fa’aro’o, ’e ’aore tō rātou mata e ’ite i te ātea. »2
« ’E ’ia fa’aro’o a’era Enoha i teie mau parau, ’ua tīpapa ihora ’oia i raro i te fenua […] ’e ’ua parau atu ra i mua i te Fatu, nā ’ō atu ra : Nō te aha ho’i i ’ite-au-hia mai ai au i mua ia ’oe na, ’e e tamaiti ’āpī ho’i au, ’e ’ua au ’ore mai ho’i te mau ta’ata iā’u ; e ta’ata reo maumau vau ; ’e nō te aha ho’i au i riro ai ’ei tāvini nō ’oe ? »3
E hi’o maita’i na ē, i terā taime nō te pi’ira’ahia Enoha ’ia tāvini, tōna ’ite-pāpū-ra’a i tōna fāito nava’i ’ore ’e tōna mau paruparu. ’Aita e hape ē, i terā taime ’e terā taime, ’o te reira ato’a te mana’o mai ia Enoha i roto i tā tātou tāvinira’a i roto i te ’Ēkālesia. Tē ti’aturi nei rā vau ē, te pāhonora’a a te Fatu i tā Enoha tāparura’a, e mea māramarama ïa ’e e tano ia tātou tāta’itahi i teie mahana.
« ’E ’ua parau atu ra te Fatu ia Enoha : ’A haere atu ’e ’a rave i tā’u i fa’aue ia ’oe, ’e ’aita te hō’ē ta’ata e pātia noa atu ia ’oe. ’A hāmama i tō ’oe vaha, ’e e fa’a’īhia ïa, ’e nā’u e hōro’a atu i te parau […]
« Inaha, tei ni’a iho tō’u Vārua ia ’oe, nō reira e fa’ati’a vau i tā ’oe ato’a mau parau ; ’e e haere ’ē atu te mau mou’a mai mua atu ia ’oe, ’e e tīpu’u ’ē atu te mau ’ānāvai pape i tō rātou ra tahera’a ; ’e ’ei roto ’oe iā’u nei e pārahi ai, ’e ’ei roto vau ia ’oe ; nō reira, ’a haere mai nā muri iho iā’u. »4
’E i te hope’a, ’ua riro mai Enoha ’ei peropheta pūai mau ’e ’ei mauiha’a i roto i te rima o te Atua nō te fa’atupu i te hō’ē ’ohipa rahi, ’aita rā i ha’amata mai te reira ! ’Aita, i te roara’a o te tau ’ua fa’arahihia tōna ’aravihi, ’a ha’api’i ai ’oia ’ia pārahi i roto ’e ’ia haere nā muri iho i te Tamaiti a te Atua.
Tē pure pāpū nei au nō te tauturu a te Vārua Maita’i ’a feruri ’āmui ai tātou i teie parau a’o i hōro’ahia ia Enoha e te Fatu ra, ’e e aha tō te reira aura’a nō ’outou ’e nō’u nei i teie mahana.
’Ei roto ’oe iā’u nei e pārahi ai
Tē fa’atae nei te Fatu Iesu Mesia ia tātou tāta’itahi i te anira’a ’ia pārahi i roto iāna.5 Nāhea rā pa’i tātou i te ha’api’i ’e i te pārahi i roto iāna ?
Tē fa’a’ite nei te parau pārahi i te vaira’a pāpū, ’aore rā ’āueue ’ore ’e te tāmau-noa-ra’a ma te fati ’ore. ’Ua parau Elder Jeffrey R. Holland ē « e pārahi », ’o te ’ohipa ïa e « ‘fa’aea—e fa’aea rā ē a muri noa atu.’ ’O te pi’ira’a ïa a te parau nō te ’evanelia […] i te mau ta’ata ato’a […] i roto i te ao nei. ’A haere mai, ’a haere mai rā nō te fa’aea roa mai. ’A haere mai ma te pāpū ’e te fa’a’oroma’i. ’A haere mai tāmau noa atu, nō tō ’outou maita’i ’e te maita’i o te mau u’i ato’a e nā muri mai ia ’outou. »6 Nō reira, e pārahi tātou i roto i te Mesia ’ia vai pāpū ’e ’ia vai ’āueue ’ore tātou i roto i tā tātou pūpūra’a i te Tāra’ehara ’e tāna mau ’ōpuara’a mo’a, i te mau taime au ’e te au ’ore.7
E ha’amata tātou i te pārahi i roto i te Fatu nā roto i te fa’a’ohipara’a i tō tātou ti’amāra’a ’ia mā’iti nō te rave i ni’a ia tātou i tāna zugo,8 nā roto i te mau fafaura’a ’e te mau ’ōro’a o te ’evanelia i fa’aho’ihia mai. Tō tātou tū’atira’a fafaura’a i tō tātou Metua i te ao ra ’e i tāna Tamaiti ti’afa’ahou ’e te ora, ’o te puna hope rahi ïa nō te hi’ora’a ātea, te tīa’ira’a, te mana, te hau ’e te ’oa’oa vai maoro ; ’o te niu papa pa’ari ato’a ïa9 i ni’a iho tātou e patu ai i tō tātou orara’a.
E pārahi tātou i roto iāna nā roto i te tūtava-tāmau-noa-ra’a i te ha’apūai i tō tātou iho tā’amura’a fafaura’a i te Metua ’e i te Tamaiti. ’Ei hi’ora’a, te purera’a ma te mana’o ateate i te Metua mure ’ore nā ni’a i te i’oa o tāna Tamaiti here, e fa’ahōhonu ïa te reira, ’e e ha’apūai ho’i i tō tātou tū’atira’a fafaura’a ia rāua.
E pārahi tātou i roto iāna nā roto i te rave-mau-ra’a i te fa’a’amu’a i te mau parau a te Mesia. E ha’afātata te ha’api’ira’a tumu a te Fa’aora ia tātou, te mau tamari’i nō te fafaura’a, iāna ra10 ’e e parau mai te reira i te mau mea ato’a e ti’a ia tātou ’ia rave.11
E pārahi tātou i roto iāna nā roto i te fa’aineine-pāpū-ra’a nō te ’āmui i roto i te ’ōro’a mo’a, ma te hi’opo’ara’a ’e te ferurira’a i tā tātou parau nō te fafaura’a, ’e ma te tātarahapa-ateate-ra’a. Te rave-ti’a-mā-ra’a i te ’ōro’a, e fa’a’itera’a ïa i te Atua ē ’ua ineine tātou i te rave i ni’a ia tātou i te i’oa o Iesu Mesia, ’e i te tūtava nō te « ha’amana’o noa iāna ē a muri noa atu »,12 i muri mai i terā taime poto tei tītauhia nō te rave i terā ’ōro’a mo’a.
’E e pārahi tātou i roto iāna nā roto i te tāvinira’a i te Atua ’a tāvini ai ’e ’a aupuru ai i tō tātou mau taea’e ’e mau tuahine.13
’Ua parau te Fa’aora : « I ha’apa’o ’outou i tā’u ra parau, e vai-here-hia atu ’otuou e au ; mai iā’u i ha’apa’o i te parau a ta’u Metua ra, ’e tē vai-here-hia nei ā vau e ana. »14
E rave rau rāve’a tā’u i fa’a’ite poto na, e rave rahi ho’i rāve’a e pārahi ai tātou i roto i te Fa’aora. Tē ani nei ïa vau ia tātou tāta’itahi, ’ei pipi, ’ia ani, ’ia ’imi, ’ia pātōtō ’e ’ia ’apo mai nō ’outou iho nā roto i te mana o te Vārua Maita’i, i te tahi atu mau rāve’a maita’i nō te fa’ariro i te Mesia ’ei pū nō tō tātou orara’a, i roto i te mau mea ato’a tā tātou e rave.
’E ’ei roto vau ia ’oe
Te parau fafau a te Fa’aora i tōna feiā ’āpe’e, e piti ïa tuha’a : mai te mea e pārahi tātou i roto iāna, e pārahi ’oia i roto ia tātou. E nehenehe mau rā ānei i te Mesia ’ia pārahi i roto ia ’outou ’e ’iā’u nei—tātou tāta’itahi ’e te ta’a ’ē ho’i ? Te pāhonora’a i teie uira’a, e ’ē pūai ïa !
I roto i te Buka a Moromona, tē ’ite nei tātou i te parau nō te ha’api’ira’a ’e te fa’a’ite-pāpū-ra’a Alama i te feiā veve tei fa’aha’eha’ahia nā roto i tō rātou mau ’ati. I roto i tāna ha’api’ira’a, ’ua fa’aau ’oia i te parau i te hō’ē huero tei tītau-roa-hia ’ia tanu ’e ’ia aupuru, ’e ’ua fa’ahōho’a ’oia i te « parau » mai te ora, te misiōni ’e te tusia tāra’ehara a Iesu Mesia.
’Ua parau Alama : « ’Ia ha’amata i te ti’aturi i te Tamaiti a te Atua ē, e haere mai ’oia nō te fa’aora i tōna ra mau ta’ata, ’e e ha’amāuiuihia ’oia ’e e pohe ho’i nō te ha’amatara i tā rātou mau hara ; ’e e ti’a fa’ahou mai ’oia mai te pohe mai, ’ia tupu te ti’afa’ahoura’a, ’e e ti’a atu te mau ta’ata ato’a i mua iāna, ’ia ha’avāhia i te mahana hope’a ’e te mahana ha’avāra’a, mai te au i tā rātou mau ’ohipa. »15
I teie fa’ahōho’ara’a a Alama i te « parau », ’a feruri na i te tū’atira’a fa’auru tāna i fa’a’ite i muri iho.
« ’E i teienei […] tē hina’aro nei au ’ia tanu ’outou i teie nei parau i roto i tō ’outou ’ā’au, ’e ’ia ha’amata a’era te reira i te ’oru, ’a aupuru i te reira nā roto i tō ’outou fa’aro’o. ’E inaha, e riro te reira ’ei tumu rā’au, i te tupura’a i roto ia ’outou ē tae noa atu i te ora mure ’ore. ’E ’ia ha’amāmā mai te Atua i tā ’outou mau hōpoi’a, nā roto i te ’oa’oa i tāna ra Tamaiti. ’E e ti’a ia ’outou ’ia rave i teie mau mea ato’a mai te mea e hina’aro ’outou. »16
Te huero e tūtava tātou i te tanu i roto i tō tātou ’ā’au, ’o te parau ïa—’oia ho’i te ora, te misiōni ’e te ha’api’ira’a tumu a Iesu Mesia. ’E ’ia aupuruhia te parau nā roto i te fa’aro’o, e riro mai ïa te reira ’ei tumu rā’au ’o tē tupu i roto ia tātou ē tae noa atu i te ora mure ’ore.17
E aha te fa’ahōho’ara’a o te tumu rā’au i roto i te ’ōrama a Lehi ? E nehenehe te tumu rā’au e hi’ohia ’ei fa’ahōho’ara’a nō Iesu Mesia.18
E au mau taea’e, e au mau tuahine, tei roto ānei te Parau ia tātou ? ’Ua pāpa’ihia ānei te mau parau mau o te ’evanelia a te Fa’aora i ni’a i te papa ta’ata ra i te ’ā’au ?19 Tē haere ra ānei tātou ’e tē riro māite ra ānei tātou mai iāna te huru ? Tē tupu ra ānei te tumu rā’au nō te Mesia i roto ia tātou ? Tē tūtava ra ānei tātou i te riro ’ei « ta’ata ’āpī »20 i roto iāna ?21
Pēnei a’e nō terā fāito pūai ’e te semeio i fa’auruhia ai Alama e ui : « ’Ua fānau-vārua-hia ānei ’outou i tā te Atua ra ? ’Ua fāri’i ānei ’outou i tōna hōho’a i roto i tō ’outou nā mata ? ’Ua ’itea ānei ia ’outou teie tauira’a rahi i roto i tō ’outou na ’ā’au ? »22
E ha’amana’o noa ana tātou i te arata’ira’a a te Fatu ia Enoha : « ’ei roto ’oe iā’u nei e pārahi ai, ’e ’ei roto vau ia ’oe. »23 ’E tē parau pāpū nei au ē, te parau fafau a te Fa’aora ē ’ei roto ’oia ia tātou, e parau mau ïa ’e ’ua matara ho’i i te mau melo ato’a o tāna ’Ēkālesia i fa’aho’ihia mai, ’o tē ha’apa’o i te fafaura’a.
Nō reira, ’a haere mai nā muri iho iā’u
’Ua a’o te ’āpōsetolo Paulo i te feiā fa’aro’o tei fāri’i i te Fatu : « E ha’apa’o ā ’outou i tāna. »24
Te haerera’a i roto ’e nā muri i te Fa’aora, e fa’a’itera’a ïa nō e piti hi’ora’a o te ti’ara’a pipi : (1) ha’apa’o i te mau fa’auera’a a te Atua, ’e (2) ha’amana’o ’e fa’atura i te mau fafaura’a mo’a ’o tē tū’ati ia tātou i te Metua ’e te Tamaiti.
’Ua parau ’o Ioane :
« Teie te mea e ’ite ai tātou ē, ’ua ’ite tātou iāna, ’ia ha’apa’o tātou i tāna parau.
« ’O tei parau ē, ’ua ’ite au iāna, ’e ’aore ’oia i ha’apa’o i tāna parau, e ha’avare ’oia, ’aore te parau mau i roto iāna.
« ’O tei ha’apa’o rā i tāna ra parau, ’ua maita’i roa mau ā te hina’aro o te Atua iāna : ’O te mea ïa e ’ite ai tātou ē, tei roto tātou iāna ra.
« ’O tei parau ē tē ’ati ra ’oia iāna, e fa’aau ’oia i tāna iho haere’a ē mai tāna ato’a ra te huru e ti’a ai. »25
Tē pi’i nei Iesu ia tātou tāta’itahi, « ’A pe’e mai »26 ’e « ’a haere mai nā muri iho iā’u. »27
Tē parau pāpū nei au ē, ’ia haere ti’a atu tātou i mua ma te fa’aro’o ’e ma te haere i roto i te marū o te vārua o te Fatu,28 e ha’amaita’ihia tātou i te i te mana, te arata’ira’a, te pāruru ’e te hau.
’Itera’a pāpū ’e parau fafau
Tē fa’a’ite nei Alama i te parau nō te tahi tāparura’a iti a te Fatu i te mau vairua ora ato’a :
« Inaha, tē fa’atae mai ra ’oia i te parau anira’a i te mau ta’ata ato’a, ’oia ho’i tē fa’atorohia ra te rima o te aroha ia rātou ra ; ’e tē nā ’ō mai ra ho’i ’oia ē : ’A tātarahapa, ’e e fāri’i au ia ’outou.
« […] ’A haere mai ’outou iā’u nei ’e e fāri’i ’outou i te mā’a nō te tumu rā’au nō te ora ; ’oia ïa, e ’amu ’outou i te pāne nō te ora, ’e e inu ho’i i te mau pape nō te ora ma te ti’amā. »29
Tē ha’apāpū nei au i te hope roa ’ino o te tāparura’a a te Fa’aora. Tē hia’ai roa nei ’oia e ha’amaita’i i te ta’ata tāta’itahi i tōna maita’i rahi ’e tōna aroha, te ta’ata ’o tē ora nei, ’o tei ora na, ’e ’o tē ora mai i ni’a i te fenua nei.
Tē fāri’i nei vetahi mau melo o te ’Ēkālesia ē, e parau mau te ha’api’ira’a tumu, te mau parau tumu ’e te mau ’itera’a pāpū i parau-pinepine-hia nei mai teie atu puripiti o te pū ’āmuira’a ’e i roto i te mau ’āmuira’a ’ati a’e te ao nei—terā rā tē tāfifi nei paha rātou i te ti’aturi i teie mau parau mure ’ore i roto i tō rātou orara’a ta’a ’ē ’e tō rātou vaira’a. Tē ti’aturi nei rātou ma te mana’o ateate, ’e tē tāvini māite nei ho’i, terā rā, ’aita ā tō rātou tū’atira’a fafaura’a i te Metua ’e i tāna Tama’iti tāra’ehara i riro atu ra ’ei ’ohipa ora ’e te fa’ataui i roto i tō rātou orara’a.
Tē parau fafau atu nei au ē, nā roto i te mana o te Vārua Maita’i, e ti’a ia ’outou ’ia ’ite ’e ’ia putapū i te mau parau mau o te ’evanelia tā’u i tāmata i te fa’a’ite atu ia ’outou—’outou tāta’itahi ’e te ta’a ’ē ho’i.
Tē fa’a’ite ’oa’oa nei au ē, ’o Iesu Mesia tō tātou Fa’aora here ’e te ora, ’e tō tātou Tāra’ehara. Mai te mea ’ei roto tātou iāna, ’ei roto ïa ’oia ia tātou.30 ’E ’ia haere tātou i roto ’e nā muri iāna, e ha’amaita’ihia tātou nō te fa’ahotu i te mā’a e rave rahi. ’O tā’u ïa e parau pāpū nei i te i’oa mo’a o te Fatu Iesu Mesia, ’āmene.