Ha’amana’o i te mea faufa’a roa a’e

I teie hope’a hepetoma tē ha’amana’o nei tātou i tō te Mesia tomora’a atu i roto ia Ierusalema ma te hanahana nā mua a’e i tōna tusia tāra’ehara, tē ha’amana’o nei au i tāna mau parau o te ti’aturira’a ’e te tāmāhanahana : « Tei iā’u te ti’afa’ahoura’a ’e te ora, o tē fa’aro’o mai iā’u ra, pohe noā ’oia e ora ā ïa ».¹

’Ua here au iāna. Tē ti’aturi nei au iāna. Tē fa’a’ite pāpū nei au ē, ’o ’oia te ti’afa’ahoura’a ’e te ora.

’Ua tāmāhanahana ’e ’ua ha’apūai teie ’itera’a pāpū iā’u i te roara’a o nā matahiti e maha ’e te ’āfa i ma’iri mai te taime a pohe ai tā’u vahine, o Barbara. Tē mihi nei au iāna.

Pinepine au i te feruri i tō māua fa’aipoipora’a mure ’ore ’e i tō māua orara’a ’āmui.

’Ua fa’a’ite a’e nā vau e mea nāhea vau i te fārereira’a ia Barbara nō te taime mātāmua ’e e mea nāhea taua ’ohipa ra i te ha’api’ira’a mai iā’u ’ia fa’a’ohipa i te ’aravihi o « te hi’opo’ara’a », tā’u i ha’api’i mai i roto i tā’u misiōni. ’Ua tītauhia iā’u ’ia rave i te hō’ē hi’opo’ara’a vitiviti iāna i muri a’e i tō māua fārereira’a mātāmua, nō te mea e mea nehenehe roa ’oia, e mea tu’iro’o ’e te vai ra tāna tārena teimaha nō te ’ohipa sōtiare. ’Ua tupu ’oi’oi te maere i roto iā’u nō te mea e mea ’ōhie ’ia ha’afātata atu iāna ’e e mea auhoa ’oia. ’Ua fa’ahiahia vau i tōna maita’i. ’Ua ’ite au ē, ’ua tū’ati noa māua. Mai te huru ē, e mea ’ōhie roa i roto i tō’u upo’o.

’Ua arapae māua o Barbara ’e ’ua ha’amata tō māua autā’atira’a i te tupu i te rahi, ’aita rā ’oia i pāpū ē, e mea tano ānei ’ia fa’aipoipo ’oia iā’u.

’Aita i nava’i ’ia ’ite au ; ’ua hina’aro o Barbara ’ia ’ite ’oia iho. ’Ua ’ite au ē, mai te mea e rave māua i te taime nō te ha’apae i te mā’a ’e nō te pure nō taua ’ohipa ra, e nehenehe ïa o Barbara e fāri’i i te hō’ē ha’apāpūra’a nō te ra’i mai.

’Aita māua i fārerei hō’ē hepetoma te maoro, ’ia ti’a ia māua tāta’itahi ’ia ha’apae i te mā’a ’e ’ia pure ’ia ’ite māua iho. Aua’e rā nō’u, ’ua fāri’i ’oia i te hō’ē ā ha’apāpūra’a ’e o vau. Te toe’a, ’ua ’ite hoa ïa ’outou !

I te pohera’a o Barbara, ’ua tu’u tā māua mau tamari’i i ni’a i tōna ’ōfa’i mēnema e rave rahi ha’api’ira’a tā Barbara i hina’aro ’ia ha’amana’o rātou. Hō’ē o te reira mau ha’api’ira’a, maori rā, « Te mau mea faufa’a roa a’e, o te mea ïa e vai maoro a’e ».

I teie mahana, e fa’a’ite atu vau mai roto atu i tō’u ’ā’au, i te tahi mau mana’o ’e mau ferurira’a nō ni’a i te mau mea faufa’a roa a’e.

’A tahi, e mea faufa’a roa te hō’ē autā’atira’a ’e tō tātou Metua i te ao ra ’e tāna tamaiti, o Iesu Mesia. E mea faufa’a roa te reira autā’atira’a i teie nei ’e i roto i te ao a muri atu.

’A piti, te mau autā’atira’a ’utuāfare tei roto te reira i te mau mea faufa’a roa a’e.

I te roara’a o tā’u tāvinira’a, ’ua haere au e fārerei e rave rahi ta’ata ’e te mau ’utuāfare tei ro’ihia i te mau ’ati rahi o te natura. E rave rahi tei taui i te vāhi, tei po’ia, ’e tei ri’ari’a. Tē tītau ra rātou i te tauturu i te pae nō te rapa’aura’a i te ma’i, nō te mā’a ’e nō te nohora’a.

Tē tītau ato’a ra rātou i tō rātou mau fēti’i.

’Ua ’ite au ē, e’ita te tahi pae e nehenehe e fāri’i i te mau ha’amaita’ira’a o te hō’ē ’utuāfare fātata, nō reira e parau vau i te fēti’i ’ā’ano, te mau hoa ’e tae noa atu i te mau ’utuāfare o te pāroita ’ei fēti’i ». E mea faufa’a terā mau autā’atira’a nō te ora maita’i i te pae ferurira’a ’e i te pae tino.

E nehenehe ato’a terā mau autā’atira’a e pūpū i te here, te ’oa’oa, te poupou ’e te tā’aira’a i te hō’ē pupu ta’ata.

’Ua riro te aupurura’a i teie mau autā’atira’a faufa’a ’ei mā’itira’a. Te mā’itira’a ’ia vai i roto i te hō’ē ’utuāfare, e tītau te reira i te fafaura’a, te here, te fa’a’oroma’i, te ’āparaura’a, ’e te fa’a’orera’a hapa.² I te tahi taime, e nehenehe e tupu mai te tū’ati ’ore tātou i te tahi atu ta’ata, e nehenehe rā tātou e rave i te reira ma te ’ore e fa’atupu i te au ’ore. I roto i te ha’amataura’a ’e i te fa’aipoipora’a, ’aita tō tātou here e tupu ’aore rā e ’ore e tupu, mai te huru ē, e tao’a noa tātou o tē fa’anu’unu’uhia i ni’a i te hō’ē ha’utira’a perē. E mā’iti tātou ’ia here ia tātou ’e ’ia pāturu te tahi ’e te tahi. E nā reira ato’a tātou i roto i te tahi atu mau autā’atira’a ’utuāfare ’e i te mau hoa tei riro mai te hō’ē ’utuāfare nō tātou.

Tē parau ra te poro’i nō te ’utuāfare ē, « E fa’ati’a te fa’anahora’a hanahana nō te ’oa’oa i te mau aufēti’ira’a ’ia vai tāmau noa i muri a’e i te pohe. Te mau ’ōro’a ’e te mau fafaura’a mo’a e ravehia i roto i te mau hiero mo’a e fa’ati’a te reira i te mau ta’ata ’ia ho’i fa’ahou atu i mua i te aro o te Atua ’e i te mau ’utuāfare ’ia tāhō’ēhia ’e a muri noa atu ».³

Te tahi atu ’ohipa faufa’a roa a’e, o te pe’era’a ïa i te mau fa’aurura’a a te vārua i roto i tō tātou mau autā’atira’a faufa’a roa a’e ’e i roto i tā tātou mau tūtavara’a nō te here i tō tātou mau ta’ata tupu mai ia tātou iho, i roto ato’a i tā tātou mau tāvinira’a o tātou ana’e ’e i mua i te ta’ata. ’Ua ha’api’i mai au i teie ha’api’ira’a i roto i tō’u orara’a i tō’u ’āpīra’a ’a tāvini ai au ’ei ’episekōpo.

I te hō’ē pō to’eto’e ’e te hiona i te maorora’a pō, ’a fa’aru’e ai au i te piha tōro’a o tō’u ’episekōpo, ’ua tupu maira te hō’ē mana’o pūai i roto iā’u ’ia haere e fārerei i te hō’ē vahine ’ivi rū’au i roto i te pāroita. ’Ua hi’o vau i tā’u uāti—hora ’ahuru i te pō. ’Ua feruri au ē, ’ua taere roa nō te haere e fārerei. Hau atu i te reira, tē topa noa ra te hiona. ’Ua fa’aoti a’era vau e haere e fārerei i terā tuahine here i te po’ipo’i, ’eiaha rā e ha’afifi iāna i te hō’ē hora maoro. ’Ua ho’i au i te fare nā ni’a i tō’u pere’o’o ’e ’ua haere au e ta’oto, terā rā, ’ua hurihuri noa vau i terā pō tā’ato’a, nō te mea ’ua fa’atupu te vārua i te horuhoru i roto iā’u.

I te po’ipo’i roa, ’ua tere au i te fare o te vahine ’ivi. Tāna tamāhine tei ti’a mai i te ’ūputa ’e ma te ta’i, nā ’ō maira : Auē, Bishop, māuruuru i te haerera’a mai. ’Ua pohe o Māmā a piti horo i teie nei »—’Ua māuiui roa vau. E’ita e mo’ehia iā’u te mau mana’o i roto i tō’u ’ā’au. ’Ua ta’i au. O vai tei hau atu i teie vahine ’ivi e ti’a i tōna ’episekōpo ’ia tāpe’a i tōna rima, ’ia tāmāhanahana iāna, e penei a’e ’ia hōro’a i te hō’ē ha’amaita’ira’a hope’a ? ’Ua ma’iri au i taua rāve’a ra nō te mea ’ua feruri au i te ātea roa i taua fa’aurura’a pūai a te vārua.⁴

Te mau taea’e ’e te mau tuahine, te feiā ’āpī tamāroa ’e te feiā ’āpī tamāhine, ’e te mau tamari’i nō te Paraimere, tē fa’a’ite pāpū nei au ē, te pe’era’a i te muhumuhu a te Vārua, ’o te hō’ē ïa o te mau mea faufa’a roa a’e i roto i tō tātou mau autā’atira’a.

I te hope’a ra, i teie hope’a hepetoma nō te sābati o te ’āma’a tamara, tē fa’a’ite pāpū nei au ē, te fāriura’a i te Fatu ra, te fa’a’ite-pāpū-ra’a nō ni’a iāna ’e te tāvinira’a iāna, tei roto ato’a te reira i te mau mea faufa’a roa a’e.

Te fa’aro’o ia Iesu Mesia, o te niu ïa o tō tātou ’itera’a pāpū. Hō’ē ’itera’a pāpū, o te hō’ē ïa fa’a’itera’a ’aore rā hō’ē ha’apāpūra’a i te parau mau mure ’ore tei nene’ihia e te Vārua Maita’i i ni’a i te mau māfatu ’e te mau vārua o te ta’ata hō’ē. Hō’ē ’itera’a pāpū nō Iesu Mesia, tei hōro’ahia mai ’e tei ha’apūaihia e te vārua, e taui te reira i te orara’a—e taui i tā tātou huru ferurira’a ’e tā tātou huru orara’a. E fa’afāriu te hō’ē ’itera’a pāpū ia tātou i ni’a i tō tātou Metua i te ao ra ’e i ni’a i tāna tamaiti hanahana.

’Ua ha’api’i ’o Alama :

« Inaha, tē fa’a’ite pāpū atu nei au ia ’outou na ē, ’ua ’ite mau vau ē e parau mau ana’e teie mau mea ’o tā’u i parau iho nei. ’E i tō ’outou mana’ora’a, e mea nāhea vau i ’ite ai i te parau mau nō te reira ?

« Tē parau atu nei au ia ’outou na ē, ’ua fa’a’itehia mai te reira iā’u nā roto i te Vārua Mo’a o te Atua. Inaha ho’i, ’ua ha’apae a’enei au i te mā’a, ’e ’ua pure a’enei ho’i au e rave rahi mau mahana, ’ia ’ite au iho nei i teie nei mau mea. ’E i teienei ’ua ’ite māite au ē, e parau mau ïa ; nā te Fatu te Atua ho’i i fa’a’ite mai i te reira iā’u nei nā roto i tōna ra Vārua Mo’a ».⁵

E’ita e nava’i te fāri’i-noa-ra’a i te hō’ē ’itera’a pāpū. ’A tupu noa i te rahi tō tātou fa’afāriura’a ia Iesu Mesia, e hina’aro ïa tātou e fa’a’ite pāpū nō ni’a iāna—tōna maita’i, tōna here, ’e tōna hāmani maita’i.

I roto i tā tātou mau purera’a ’īritira’a mana’o i te mau sābati ha’apaera’a mā’a, e mea pinepine tātou i te fa’aro’o i te mau parau « tē māuruuru nei au » ’e « e mea au nā’u », hau atu i te mau parau « ’ua ’ite au » ’e « tē ti’aturi nei au ».

Tē ani manihini atu nei au ia ’outou ’ia fa’a’ite pinepine i tō ’outou ’itera’a pāpū nō ni’a ia Iesu Mesia. ’A fa’a’ite pāpū i te mea tā ’outou i ’ite ’e tā ’outou e ti’aturi nei ’e tā ’outou e fāri’i nei, ’eiaha noa nō te mau mea tā ’outou e māuruuru nei. ’A fa’a’ite pāpū i tō ’outou iho mau ’itera’a nō ni’a i te ha’api’ira’a ’ia ’ite ’e ’ia here i te Fa’aora, ’ia ora i tāna mau ha’api’ira’a ’e i tōna mana fa’aora ’e te fa’atupu i roto i tō ’outou orara’a. Mai te mea e fa’a’ite ’outou i te ’itera’a pāpū nō ni’a i te mea tā ’outou i ’ite, i ti’aturi, ’e i fāri’i, e ha’apāpū te Vārua Maita’i i te parau mau i te feiā e fa’aro’o maita’i ra i tō ’outou ’itera’a pāpū. E nā reira rātou nō te mea ’ua ’ite rātou ia ’outou i te rirora’a ’ei pipi hau nō Iesu Mesia. E ’ite rātou i te aura’a o te rirora’a ’ei pipi nāna. E ’ite ato’a rātou i te hō’ē mea ’aita paha rātou i ’ite a’e nei. Nō roto mai te hō’ē ’itera’a pāpū ateate i te hō’ē māfatu tauihia ’e e nehenehe e ’āfa’ihia ’e te mana o te Vārua Maita’i i roto i te māfatu o te tahi atu mau ta’ata tei ineine nō te fāri’i i te reira.

Te feiā e fāri’i i te hō’ē mea i muri a’e i tō ’outou ’itera’a pāpū, e nehenehe ïa rātou e ani i te Fatu nā roto i te pure ’ia ha’apāpū mai i te parau mau o tō ’outou ’itera’a pāpū. I muri iho, e nehenehe rātou ’e i te nā roto ia rātou iho.

Te mau taea’e ’e te mau tuahine, tē fa’a’ite pāpū atu nei au ē, ’ua ’ite au ē, o Iesu Mesia te Fa’aora ’e te Tāra’ehara o te ao nei. Tē ora nei ’oia. ’O ’oia te Tamaiti nā te Atua tei ti’afa’ahou, ’e nāna teie ’Ēkālesia e fa’aterehia nei e tāna peropheta ’e te mau ’āpōsetolo. Tē pure nei au ’ia ti’a iā’u i te hō’ē mahana, ’ia haere atu vau i ’ō mai, ’ia haere ’e tō’u ’itera’a pāpū ma te ’ama ’ana’ana.

I roto i tā’u tāvinira’a, ’ua ha’api’i mai au ē, te mea faufa’a roa a’e, tō tātou ïa mau autā’atira’a ’e tō tātou Metua i te ao ra ’e tāna tamaiti here, tō tātou mau ’utuāfare ’e tō tātou mau ta’ata tupu, ’e ’ia ti’a i te vārua o te Fatu ’ia arata’i ia tātou i roto i taua mau autā’atira’a ra, ’ia ti’a ho’i ia tātou ’ia fa’a’ite pāpū i te mau mea faufa’a roa a’e ’e te vai maoro a’e. I te i’oa o Iesu Mesia, ’āmene.