នគរនៃសិរីល្អ
យើងមានព្រះវរបិតាសួគ៌ជាទីស្រឡាញ់ ដែលនឹងចាំទតមើលថាយើងទទួលបានរាល់ពរជ័យ និងអត្ថប្រយោជន៍ទាំងអស់ដែលចំណង់ និងជម្រើសរបស់យើងអនុញ្ញាតឲ្យដែរឬអត់ ។
សមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ តែងតែមានគេសួរថា « តើព្រះវិហាររបស់អ្នកខុសពីព្រះវិហារគ្រីស្ទានដទៃទៀតដោយរបៀបណា ? » នៅក្នុងចំណោមចម្លើយដែលយើងផ្តល់មានដូចជា ភាពពេញលេញនៃគោលលទ្ធិនៃព្រះយេស៊ូវគ្រីស្ទ ។ ដែលសំខាន់បំផុតក្នុងចំណោមគោលលទ្ធិនោះ គឺការពិតដែលថាព្រះវរបិតាសួគ៌យើងស្រឡាញ់បុត្រាបុត្រីទាំងអស់របស់ទ្រង់ខ្លាំងណាស់ ដែលទ្រង់ចង់ឲ្យយើងទាំងអស់គ្នាទៅរស់នៅក្នុងនគរនៃសិរីល្អជារៀងរហូត ។ លើសពីនេះ ទ្រង់ចង់ឲ្យយើងរស់នៅរហូតអស់កល្បជានិច្ចជាមួយនឹងទ្រង់ និងព្រះរាជបុត្រាទ្រង់ គឺព្រះយេស៊ូវគ្រីស្ទ ។ ផែនការរបស់ទ្រង់ផ្តល់ឲ្យយើងនូវការបង្រៀន និងឳកាស ដើម្បីជ្រើសរើសដែលនឹងធានាដល់យើងនូវជោគវាសនា និងជីវិតដែលយើងជ្រើសរើសនោះ ។
I.
ចេញពីវិវណៈសម័យទំនើបយើងដឹងថា ជោគវាសនាចុងក្រោយរបស់មនុស្សទាំងអស់ដែលរស់នៅលើផែនដីនេះ គឺពុំមានគំនិតយោបល់ដឹងគ្រប់ជ្រុងជ្រោយ អំពីស្ថានសួគ៌សម្រាប់ពួកមនុស្សសុចរិត និងការរងទុក្ខដ៏អស់កល្បនៃឋាននរក សម្រាប់មនុស្សឯទៀតនោះទេ ។ ផែនការនៃសេចក្តីស្រឡាញ់របស់ព្រះ សម្រាប់បុត្រាបុត្រីទ្រង់រួមបញ្ចូលការពិតនេះដែលបានបង្រៀនដោយព្រះអង្គសង្គ្រោះព្រះយេស៊ូវគ្រីស្ទថា ៖ « នៅក្នុងដំណាក់នៃព្រះវរបិតាខ្ញុំ មានទីលំនៅជាច្រើន » ។១
គោលលទ្ធិដែលបានបើកសម្តែងអំពីសាសនាចក្រដែលបានស្ដារឡើងវិញរបស់ព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បង្រៀនថា បុត្រាបុត្រីទាំងអស់របស់ព្រះ—មានករណីលើកលែងមានកំណត់ខ្លាំងដើម្បីពិចារណានៅទីនេះ—នៅទីបំផុតនឹងទទួលមរតកមួយនៃនគរសិរីល្អទាំងបី សូម្បីតែសិរីល្អតិចតួចជាងគេបំផុតនោះក៏ « ហួសលើសពីអស់ទាំងយោបល់ » ផង ។២ បន្ទាប់ពីអស់មួយរយៈពេលដែលពួកអ្នកមិនស្ដាប់បង្គាប់រងទុក្ខ ចំពោះអំពើបាបខ្លួន ដែលការរងទុក្ខនោះរៀបចំពួកគេសម្រាប់អ្វីដែលនឹងមកដល់ ដែលមនុស្សទាំងអស់នឹងត្រូវបានរស់ឡើងវិញ ហើយបន្តទៅកាន់ការជំនុំជម្រះចុងក្រោយរបស់ព្រះអម្ចាស់ ព្រះយេស៊ូវគ្រីស្ទ ។ យើងត្រូវបានបង្រៀនថា នៅទីនោះ ព្រះអង្គសង្គ្រោះដ៏ជាទីស្រឡាញ់របស់យើង ទ្រង់ « សរសើរតម្កើងព្រះវរបិតា ហើយសង្គ្រោះអស់ទាំងការនៃព្រះហស្តទ្រង់ » ៣ នឹងបញ្ជូនបុត្រាបុត្រីទាំងអស់របស់ព្រះទៅកាន់នគរនៃសិរីល្អណាមួយក្នុងចំណោម នគរនៃសិរីល្អទាំងបី ស្របតាមបំណងប្រាថ្នាដែលបង្ហាញតាមរយៈការជ្រើសរើសរបស់ពួកគេ ។
គោលលទ្ធិ និងការអនុវត្តជាពិសេសមួយផ្សេងទៀតរបស់សាសនាចក្រដែលបានស្ដារឡើងវិញ គឺបទបញ្ញត្តិ និងសេចក្ដីសញ្ញាដែលបានបើកសម្តែង ដែលផ្តល់ឲ្យដល់ បុត្រាបុត្រីទាំងអស់នៃព្រះ នូវឯកសិទ្ធិដ៏ពិសិដ្ឋ ដើម្បីស័ក្ដិសមនឹងកម្រិតសិរីល្អដ៏ខ្ពស់បំផុតនៅក្នុងនគរសេឡេស្ទាល ។ គោលដៅដ៏ខ្ពស់បំផុតនោះ—គឺជាភាពតម្កើងឡើងនៅក្នុងនគរសេឡេស្ទាល—ជាការផ្តោតដ៏សំខាន់របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
ចេញពីវិវរណៈសម័យទំនើប ពួកបរិសុទ្ធថ្ងៃចុងក្រោយមានការយល់ដឹងជាពិសេស អំពីផែនការនៃសុភមង្គលរបស់ព្រះសម្រាប់បុត្រាបុត្រីរបស់ទ្រង់ ។ ផែនការនោះចាប់ផ្តើមឡើង ពីពេលយើងនៅជាវិញ្ញាណមុនពេលយើងកើតមកនៅលើផែនដីមកម៉េ្លះ ហើយវាបង្ហាញពីគោលបំណង និងលក្ខខណ្ឌនៃការជ្រើសរើសនៃដំណើរជីវិតរមែងស្លាប់របស់យើង និងជោគវាសនាដែលយើងប៉ងប្រាថ្នាក្រោយពីជីវិតនេះ ។
II.
យើងដឹងមកពីវិវរណៈសម័យទំនើបថា « គ្រប់នគរទាំងអស់ត្រូវបានប្រទានក្រឹត្យវិន័យឲ្យ » ៤ ហើយថានគរនៃសិរីល្អដែលយើងទទួលនៅពេលជំនុំជម្រះចុងក្រោយ គឺបានកំណត់ដោយក្រឹត្យវិន័យដែលយើងជ្រើសរើសធ្វើតាមនៅក្នុងដំណើរនៃជីវិតរមែងស្លាប់របស់យើង ។ នៅក្នុងផែនការដ៏ជាទីស្រឡាញ់នោះ មាននគរជាច្រើន—មានវិមានជាច្រើន—ដើម្បីឲ្យបុត្រាបុត្រីទាំងអស់របស់ព្រះទទួលបាននគរនៃសិរីល្អជាមរតក ទៅតាមក្រឹត្យវិន័យដែលពួកគេអាច « កាន់តាម » បាន ។
នៅពេលយើងពិពណ៌នាអំពីលក្ខណៈ និងតម្រូវការនៃនគរនីមួយៗក្នុងចំណោមនគរទាំងបីនៅក្នុងផែនការរបស់ព្រះវរបិតា យើងចាប់ផ្តើមពីលំដាប់ខ្ពស់ជាងគេ ដែលជាការផ្តោតដ៏សំខាន់នៃបទបញ្ញត្តិ និងពិធីបរិសុទ្ធដ៏ទេវភាព ដែលព្រះបានបើកសម្តែងតាមរយៈសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ នៅក្នុងសិរីល្អ « សេឡេស្ទាល » ៥ មានបីលំដាប់ ៦ ដែលខ្ពស់ជាងគេនោះ គឺជាភាពលើកតម្កើងនៅក្នុងនគរសេឡេស្ទាល ។ នេះគឺជាលំនៅរបស់អស់អ្នក « ដែលបានទទួលភាពពោរពេញ និងសិរីល្អរបស់ទ្រង់ » ដែល « ពួកគេសុទ្ធតែជាព្រះ គឺជាបុត្រា [ និងបុត្រី ] នៃព្រះ » ៧ ហើយ « នឹងអាស្រ័យនៅក្នុងវត្តមាននៃព្រះ និងព្រះគ្រីស្ទរបស់ទ្រង់នៅអស់កល្បជានិច្ច និងរៀងដរាបតទៅ » ។៨ តាមរយៈវិវរណៈ ព្រះបានបង្ហាញនូវក្រិត្យវិន័យដ៏អស់កល្បជានិច្ច ពិធីបរិសុទ្ធ និងសេចក្តីសញ្ញានានាដែលត្រូវតែគោរព ដើម្បីអភិវឌ្ឍគុណលក្ខណៈនៃព្រះដែលចាំបាច់ដើម្បីដឹងពីសក្តានុពលដ៏ទេវភាពនេះ ។ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយផ្ដោតទៅលើគោលបំណងទាំងនេះនៃសាសនាចក្រដែលបានស្ដារឡើងវិញនេះគឺ ដើម្បីរៀបចំបុត្រាបុត្រីរបស់ព្រះសម្រាប់សេចក្តីសង្គ្រោះនៅក្នុងសិរីល្អនៃសេឡេស្ទាល និងជាពិសេស គឺសម្រាប់ភាពតម្កើងឡើងនៅក្នុងកម្រិតដ៏ខ្ពស់ជាងគេបំផុត ។
ផែនការរបស់ព្រះ បានបង្កើតឡើងនៅលើសេចក្តីពិតដ៏អស់កល្បជានិច្ច ដែលអាចទទួលបានភាពលើកតម្កើងតែតាមរយៈភាពស្មោះត្រង់ចំពោះសេចក្តីសញ្ញា នៃអាពាហ៍ពិពាហ៍ដ៏អស់កល្បជានិច្ចរវាងបុរស និងស្ត្រីនៅក្នុងព្រះវិហារបរិសុទ្ធប៉ុណ្ណោះ ៩ នៅទីបំផុតអាពាហ៍ពិពាហ៍នឹងកើតមានចំពោះមនុស្សស្មោះត្រង់ទាំងអស់ ។ នោះគឺជាមូលហេតុដែលយើងបង្រៀនថា « ភេទប្រុសស្រី គឺជាលក្ខណៈពិសេសនៃអត្តសញ្ញាណ និងគោលបំណងរបស់បុគ្គលម្នាក់ៗនៅជីវិតមុនផែនដី ជីវិតរមែងស្លាប់ និងនៅអស់កល្បជានិច្ច » ។១០
ការបង្រៀនដ៏មានតម្លៃពិសេសមួយ ដើម្បីជួយយើងរៀបចំខ្លួនសម្រាប់ភាពតម្កើងឡើង គឺសេចក្ដីប្រកាសអំពីក្រុមគ្រួសារ នៅឆ្នាំ ១៩៩៥ ។១១ ការប្រកាសរបស់វាបញ្ជាក់អំពីលក្ខខណ្ឌដែលរៀបចំយើងឲ្យរស់នៅជាមួយព្រះជាព្រះវរបិតា និងព្រះរាជបុត្រាទ្រង់ គឺព្រះយេស៊ូវគ្រីស្ទ ។ អស់អ្នកដែលមិនបានយល់ពេញលេញអំពីផែនការនៃសេចក្ដីស្រឡាញ់របស់ព្រះវរបិតាសម្រាប់បុត្រាបុត្រីទ្រង់ ប្រហែលជាចាត់ទុកថា ការប្រកាសស្ដីពីក្រុមគ្រួសារនេះ គ្មានអ្វីក្រៅពីសេចក្ដីថ្លែងការណ៍ដែលកែប្រែគោលនយោបាយមួយតែប៉ុណ្ណោះ ។ ផ្ទុយទៅវិញ យើងអះអាងថា ការប្រកាសស្ដីពីក្រុមគ្រួសារ គឺបានបង្កើតឡើងនៅលើគោលលទ្ធិដែលមិនអាចដកហូតបាន ដែលកំណត់នូវទំនាក់ទំនងគ្រួសារនៃជីវិតរមែងស្លាប់ ដែលជាផ្នែកដ៏សំខាន់បំផុតនៃការអភិវឌ្ឍអស់កល្បរបស់យើង អាចកើតមានឡើងបាន ។
សាវកប៉ុលបានពិពណ៍នាអំពីកម្រិតនៃសិរីល្អទាំងបីលំដាប់ ដោយប្រៀបធៀបលំដាប់ទាំងនោះទៅនឹងសិរីល្អនៃព្រះអាទិត្យ ព្រះចន្ទ័ និងផ្កាយ ។១២ លោកបានហៅលំដាប់ខ្ពស់ជាងគេថាជា « សេឡេស្ទាល » និងលំដាប់ទីពីរថា « ទេរេសទ្រាល » ។១៣ លោកមិនបានដាក់ឈ្មោះលំដាប់ទាបជាងគេទេ ប៉ុន្តែវិវរណៈមួយដល់ យ៉ូសែប ស្មីធ បានបន្ថែមឈ្មោះលំដាប់នោះថា ៖ « ទេឡេស្ទាល » ។១៤ វិវរណៈមួយទៀតនោះក៏ពិពណ៌នាអំពីលក្ខណៈរបស់មនុស្សដែលត្រូវចាត់តាំងឲ្យទៅតាមលំដាប់នៃនគរនៃសិរីល្អទាំងនេះនីមួយៗផងដែរ ។ អស់អ្នកដែលមិនជ្រើសរើស « ជាប់ក្នុងក្រឹត្យវិន័យនៃនគរសេឡេស្ទាល » ១៥នឹងទទួលបាននគរនៃសិរីល្អមួយទៀត ដែលទាបជាងសេឡេស្ទាល ប៉ុន្តែស័ក្តិសមនឹងក្រឹត្យវិន័យដែលពួកគេបានជ្រើសរើស ហើយអាច « ជាប់ក្នុង » ច្បាប់នោះបាន ។ ពាក្យថា ជាប់ក្នុងមានឃើញច្រើននៅក្នុងព្រះគម្ពីរ ដែលមានន័យថាទីតាំងសុវត្ថិភាព ។១៦ ឧទាហរណ៍ អស់អ្នកដែលនៅក្នង នគរទេរេសទ្រាល—អាចប្រៀបធៀបបានទៅនឹងគោលគំនិតដ៏ពេញនិយមនៃស្ថានសួគ៌—« ពួកគេនេះហើយ ដែលទទួលវត្តមាននៃព្រះរាជបុត្រា ប៉ុន្តែពុំមែនភាពពោរពេញនៃព្រះវរបិតាឡើយ » ។១៧ ពួកគេគឺជា « មនុស្សមានកិត្តិយសនៅលើផែនដី ដែលខ្វាក់ដោយសារឧបាយកលនៃមនុស្ស។ » ១៨ប៉ុន្តែ « ពួកគេនេះហើយ ដែលពុំក្លាហានក្នុងទីបន្ទាល់ពីព្រះយេស៊ូវ » ។១៩
ការពិពណ៌នាដែលបង្ហាញពីអស់អ្នកដែលត្រូវបានចាត់ឲ្យទៅកាន់នគរដ៏ទាបបំផុតនៃសិរីល្អ គឺស្ថានទេឡេស្ទាលគឺជា « អ្នកណាដែលពុំអាចនៅជាប់ក្នុងក្រឹត្យវិន័យនៃនគរទេរេសទ្រាលបាន » ។២១ ដែលវាពិពណ៌នាអំពីអស់អ្នកដែលបដិសេធព្រះអង្គសង្គ្រោះ ហើយអាកប្បកិរិយារបស់ពួកគេមិនបានគោរពតាមកម្រិតដ៏ទេវភាពទេ ។ នេះគឺជានគរដែលមនុស្សអាក្រក់ស្នាក់នៅ បន្ទាប់ពីពួកគេបានរងទុក្ខដោយសារអំពើបាបរបស់ខ្លួន ។ ការណ៍ទាំងនេះបានពិពណ៌នានៅក្នុងវិវរណៈសម័យទំនើបថា « ពួកគេនេះហើយ ដែលពុំបានទទួលដំណឹងល្អនៃព្រះគ្រីស្ទ ឬក៏ទីបន្ទាល់ពីព្រះយេស៊ូវដែរ ។ …
« ពួកគេនេះហើយ ដែលជាពួកកំភូត និងពួកមន្តអាគម និងពួកកំផិត និងពួកសហាយស្មន់ និងពួកដែលចូលចិត្តហើយកុហក » ។២១
ការនិយាយអំពីនគរនៃសិរីល្អទាំងបីជាមួយនឹងការនិមិត្តព្យាករណ៍របស់ប្រធាន រ័សុល អិម ណិលសុន ថ្មីៗនេះបានសរសេរថា ៖ « « ជីវិតរមែងស្លាប់គឺស្ទើរតែមិនស្មើនឹងមួយវិនាទីផង បើធៀបនឹងភាពអស់កល្បជានិច្ច ។ ប៉ុន្តែវិនាទីនោះហើយ ដែលមានសារៈសំខាន់ជាទីបំផុត ! សូមពិចារណាដោយប្រុងប្រយ័ត្នអំពីរបៀបដែលវាដំណើរការ ៖ នៅក្នុងអំឡុងជីវិតនេះយើងត្រូវជ្រើសរើសថា តើក្រឹត្យវិន័យណាមួយ ដែលយើងស្ម័គ្រគោរពតាម —ក្រឹត្យវិន័យនៃនគរសេឡេស្ទាល ឬទេរេសស្ទ្រាល ឬទេឡេស្ទាល ហេតុដូច្នោះ តើនគរនៃសិរីរុងរឿងណាមួយដែលយើងនឹងរស់នៅជារៀងរហូតនោះ ។ ផែនការដ៏អស្ចារ្យ ! វាគឺជាផែនការដែលផ្តល់ការគោរពដល់សិទ្ធជ្រើសរើស របស់បងប្អូនទាំងស្រុង » ។២២
III.
សាវកប៉ុលបានបង្រៀនថា ការបង្រៀន និងព្រះបញ្ញត្តិរបស់ព្រះអម្ចាស់ត្រូវបានប្រទានមក ដើម្បីឲ្យយើងគ្រប់គ្នាអាចទទួលបាន « ដល់ខ្នាតកម្ពស់នៃសេចក្តីពោរពេញផងព្រះគ្រីស្ទ » ។២៣ ដំណើរការនោះទាមទារឲ្យមាន មិនគ្រាន់តែជាការទទួលបានចំណេះដឹងប៉ុណ្ណោះទេ ។ វាពុំគ្រប់គ្រាន់ឡើយសម្រាប់យើង ដើម្បីគ្រាន់តែត្រូវបាន បញ្ចុះបញ្ចូលឲ្យជឿលើដំណឹងល្អនោះ យើងត្រូវតែអនុវត្ត ប្រយោជន៍ឲ្យយើងអាច ប្រែចិត្តជឿដោយសារដំណឹងល្អ ។ ជាការផ្ទុយគ្នាទៅនឹងពិភពលោក ដែលបង្រៀនយើងឲ្យ ដឹង អ្វីមួយ រីឯដំណឹងល្អនៃព្រះយេស៊ូវគ្រីស្ទជម្រុញយើងឲ្យ ប្រែក្លាយជា អ្វីមួយ ។
ចេញពីការបង្រៀននេះ យើងសរុបសេចក្តីថា ការជំនុំជម្រះចុងក្រោយ គឺពុំគ្រាន់តែជាការវាយតម្លៃមួយនៃការបូកសរុបនៃសកម្មភាពល្អ និងសកម្មភាពអាក្រក់—ដែលយើង បានធ្វើ ប៉ុណ្ណោះនោះទេ ។ វាអាស្រ័យលើលទ្ធផលចុងក្រោយនៃទង្វើ និងគំនិត—ដែលយើង ប្រែក្លាយ ។ យើងស័ក្ដិសមសម្រាប់ជីវិតអស់កល្បជានិច្ច តាមរយៈដំណើរការនៃ ការផ្លាស់ប្រែចិត្តជឿ ។ ដូចដែលបានប្រើនៅទីនេះ ពាក្យនេះមានអត្ថន័យជាច្រើនដែលបង្ហាញពីការផ្លាស់ប្តូធម្មជាតិយើងយ៉ាងជ្រាលជ្រៅ ។ វាមិនគ្រប់គ្រាន់ទេដែលមនុស្សម្នាក់ គ្រាន់តែធ្វើអ្វីមួយដោយគ្មានការគិតពិចារណានោះ ។ បទបញ្ញត្តិ ពិធីបរិសុទ្ធ និងសេចក្តីសញ្ញាទំាងឡាយនៃដំណឹងល្អ ពុំមែនជាបញ្ជីនៃការដាក់ប្រាក់ ដែលតម្រូវឲ្យដាក់នៅក្នុងគណនីសួគ៌ាមួយចំនួននោះទេ ។ ដំណឹងល្អរបស់ព្រះយេស៊ូវគ្រីស្ទគឺជាផែនការមួយ ដែលបង្ហាញយើងពីរបៀបដើម្បីប្រែក្លាយទៅជាអ្វីដែលព្រះវរបិតាសួគ៌យើងសព្វព្រះហឫទ័យចង់ឲ្យយើងប្រែក្លាយ ។២៤
IV.
ដោយសារព្រះយេស៊ូវគ្រីស្ទ និង ដង្វាយធួនទ្រង់ នៅពេលយើងធ្លាក់ចុះក្នុងជីវិតនេះ នោះយើងអាចប្រែចិត្ត ហើយចូលមកលើផ្លូវនៃសេចក្តីសញ្ញាម្ដងទៀតដែលនាំទៅរកអ្វីដែលព្រះវរបិតាសួគ៌ប្រាថ្នាសម្រាប់យើង ។
ព្រះគម្ពីរមរមនបង្រៀនថា « ជីវិតនេះគឺជាពេលវេលាសម្រាប់ឲ្យ[ យើង ]ប្រុងប្រៀបខ្លួនទៅជួបនឹងព្រះ » ។២៥ ប៉ុន្តែឧបសគ្កដែលរារាំងក្នុង « ជីវិតនេះ » បានផ្តល់ឲ្យនូវបរិបទដ៏មានសង្ឃឹមមួយ ( យ៉ាងហោចណាស់ជួយមនុស្សមួយចំនួនបានខ្លះ ) ដោយសារអ្វីដែលព្រះអម្ចាស់បានបើកសម្ដែងដល់ប្រធាន យ៉ូសែប អេហ្វ ស៊្មីធ ដែលឥឡូវនេះត្រូវបានកត់ត្រានៅក្នុង គោលលទ្ធិ និងសេចក្ដីសញ្ញា ១៣៨ ។ ព្យាការីបានសរសេរថា « ខ្ញុំបានឃើញថា ពួកអែលឌើរដែលស្មោះត្រង់នៅក្នុងគ្រាកាន់កាប់ត្រួតត្រានេះ គឺកាលពួកគេចាកចេញពីជីវិតនេះទៅ នោះគេនៅតែបន្តការងារគេក្នុងការផ្សាយដំណឹងល្អអំពីការប្រែចិត្ត និងសេចក្ដីប្រោសលោះ តាមរយៈដង្វាយធួននៃព្រះរាជបុត្រាបង្កើតតែមួយនៃព្រះ នៅក្នុងចំណោមអស់អ្នកដែលនៅក្នុងសេចក្ដីងងឹត និងនៅក្រោមចំណងនៃអំពើបាបនៅស្ថានឃុំព្រលឹងមនុស្សស្លាប់ដ៏ធំ។
« ពួកអ្នកស្លាប់ណាដែលប្រែចិត្ត នោះនឹងបានប្រោសលោះតាមរយៈការគោរពតាមពិធីទាំងឡាយនៃដំណាក់របស់ព្រះ
« ហើយបន្ទាប់ពីពួកគេបានសងទោសនៃអំពើរំលងទាំងឡាយរបស់ពួកគេ ហើយត្រូវបានសំអាតឲ្យបានស្អាត នោះនឹងបានទទួលរង្វាន់តាមការដែលគេបានប្រព្រឹត្ត ព្រោះពួកគេជាអ្នកគ្រងសេចក្ដីសង្គ្រោះទុកជាមរតក » ។២៦
លើសពីនេះយើងដឹងថា សហស្សវត្សរ៍ រយៈពេលមួយពាន់ឆ្នាំដែលនឹងមកតាមក្រោយការយាងមកជាលើកទីពីររបស់ព្រះអង្គសង្គ្រោះ នឹងក្លាយជាពេលវេលាដើម្បីអនុវត្តពិធីបរិសុទ្ធដែលចាំបាច់សម្រាប់អស់អ្នកដែលមិនបានទទួលវានៅក្នុងជីវិតរមែងស្លាប់របស់ពួកគេ ។២៧
មានរឿងជាច្រើនដែលយើងមិនដឹងអំពីរយៈពេលសំខាន់បីនៅក្នុងផែនការនៃសេចក្ដីសង្គ្រោះ ៖ (១) ពិភពវិញ្ញាណមុនជីវិតលើផែនដី (២) ជីវិតលើផែនដី និង (៣) ជីវិតបន្ទាប់ពីនេះ ។ ប៉ុន្តែយើងដឹងនូវសេចក្តីពិតដ៏អស់កល្បជានិច្ចទាំងនេះថា ៖ « សេចក្ដីសង្គ្រោះគឺជាបញ្ហាបុគ្គលម្នាក់ៗ ប៉ុន្តែភាពលើកតម្កើងឡើងគឺជាបញ្ហាជាគ្រួសារ ។២៨ យើងមានព្រះវរបិតាសួគ៌ជាទីស្រឡាញ់ ដែលនឹងចាំទតមើលថាយើងទទួលបានរាល់ពរជ័យ និងអត្ថប្រយោជន៍ទាំងអស់ដែលចំណង់ និងជម្រើសរបស់យើងអនុញ្ញាតឲ្យដែរឬអត់ ។ យើងក៏ដឹងផងដែរថាទ្រង់នឹងមិនបង្ខិតបង្ខំនរណាម្នាក់ឲ្យផ្សារភ្ជាប់ទំនាក់ទំនងប្រឆាំងនឹងឆន្ទៈរបស់ខ្លួនឯងឡើយ ។ ពរជ័យនៃទំនាក់ទំនងដែលផ្សារភ្ជាប់បានធានាសម្រាប់អស់អ្នកដែលរក្សាសេចក្តីសញ្ញាពួកគេ ប៉ុន្តែមិនដោយសារការបង្ខិតបង្ខំឲ្យផ្សារភ្ជាប់ទំនាក់ទំនងលើមនុស្សម្នាក់ផ្សេងទៀតដោយមិនសក្តិសម ឬមិនចង់នោះឡើយ ។
បងប្អូនប្រុសស្រីជាទីស្រឡាញ់របស់ខ្ញុំ ខ្ញុំសូមថ្លែងទីបន្ទាល់ពីភាពពិតនៃការណ៍នេះ ។ ខ្ញុំថ្លែងទីបន្ទាល់អំពីព្រះអម្ចាស់ ព្រះយេស៊ូវគ្រីស្ទយើងថា « ជាមេផ្ដើម ហើយជាមេសម្រេចនូវសេចក្ដីជំនឿរបស់យើង » ២៩ដែលដង្វាយធួនរបស់ទ្រង់ នៅក្រោមផែនការនៃព្រះវរបិតាសួគ៌ធ្វើឲ្យវាអាចបានសម្រេចទាំងអស់ ក្នុងព្រះនាមនៃព្រះយេស៊ូវគ្រីស្ទ អាម៉ែន ៕