ការថ្លែងសាក្សីអំពីព្រះយេស៊ូវគ្រីស្ទតាមពាក្យសម្ដី និងសកម្មភាព
នៅពេលយើងខិតខំរស់នៅឲ្យស្របតាមដំណឹងល្អនៃព្រះយេស៊ូវគ្រីស្ទ នោះការប្រព្រឹត្តរបស់យើងនឹងក្លាយជាទីបន្ទាល់ដ៏រស់រវើកមួយអំពីព្រះប្រោសលោះរបស់យើង ។
នៅឯពិធីបុណ្យជ្រមុជទឹក យើងធ្វើការសន្យាមួយថា យើងព្រមលើកដាក់មកលើខ្លួនយើងនូវព្រះនាមនៃព្រះយេស៊ូវគ្រីស្ទ ។ គោលបំណងខ្ញុំនៅថ្ងៃនេះ គឺដើម្បីរំឭកយើងថា យើងអាចបង្ហាញដល់ព្រះថា យើងលើកដាក់ព្រះនាមនៃព្រះរាជបុត្រាទ្រង់មកលើខ្លួនយើង តាមរយៈការថ្លែងទីបន្ទាល់ជាពាក្យសម្ដី និងសកម្មភាព ឲ្យញឹកញាប់តាមដែលអាចធ្វើបាន ថាព្រះយេស៊ូវគឺជាព្រះគ្រីស្ទ ។
នៅពេលផ្ដល់ការងារបម្រើ និងបង្រៀនប្រជាជននៅទ្វីបអាមេរិក បន្ទាប់ពីការមានព្រះជន្មរស់ឡើងវិញរបស់ទ្រង់ នោះព្រះអង្គសង្គ្រោះបានប្រកាស ៖
« តើពួកគេពុំបានអានបទគម្ពីរទាំងឡាយ ដែលបានចែងថា អ្នករាល់គ្នាត្រូវយកព្រះនាមព្រះគ្រីស្ទដាក់លើខ្លួនដែលជានាមយើងទេឬ ? ដ្បិតដោយនាមនេះហើយដែលអ្នករាល់គ្នានឹងត្រូវបានហៅនៅថ្ងៃចុងក្រោយបង្អស់
« ហើយអស់អ្នកណាដែលដាក់នាមយើងលើខ្លួន ហើយកាន់ខ្ជាប់ដរាបដល់ចុងបំផុត អ្នកនោះហើយនឹងបានសង្គ្រោះនៅថ្ងៃចុងក្រោយបង្អស់ » ។១
ប្រធាន រ័សុល អិម ណិលសុន បានបង្រៀនយើងថា « ការលើកដាក់ព្រះនាមរបស់ព្រះអង្គសង្គ្រោះមកលើខ្លួនយើង រួមមាន ការប្រកាស និងការធ្វើជាសាក្សីដល់មនុស្សដទៃ—តាមរយៈសកម្មភាព និងពាក្យសម្ដីរបស់យើង—ថា ព្រះយេស៊ូវគឺជាព្រះគ្រីស្ទ » ។២
ក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ យើងមានពរជ័យ និងអភ័យឯកសិទ្ធិ ដើម្បីឈរជាសាក្សីដល់ព្រះអម្ចាស់ និងព្រះនាមទ្រង់នៅគ្រប់ទីកន្លែង ។៣ នៅពេលយើងខិតខំរស់នៅឲ្យស្របតាមដំណឹងល្អនៃព្រះយេស៊ូវគ្រីស្ទ នោះការប្រព្រឹត្តរបស់យើងនឹងក្លាយជាទីបន្ទាល់ដ៏រស់រវើកមួយអំពីព្រះប្រោសលោះ និងព្រះនាមរបស់ទ្រង់ ។ លើសពីនេះទៀត យើងថ្លែងជាសាក្សីអំពីព្រះគ្រីស្ទតាមពាក្យសម្ដី ដោយចែកចាយជាមួយអ្នកដទៃនូវអ្វីដែលយើងជឿ ទទួលអារម្មណ៍ ឬដឹងអំពីព្រះយេស៊ូវគ្រីស្ទ ។
នៅពេលយើងចែកចាយទីបន្ទាល់យើងអំពីព្រះអម្ចាស់ដោយរាបសា តាមរយៈពាក្យសម្ដី និងសកម្មភាព នោះព្រះវិញ្ញាណបរិសុទ្ធធ្វើបន្ទាល់៤ ដល់អ្នកដែលខំដោយស្មោះអស់ពីចិត្ត មានចិត្តបើកទូលាយ និងឆន្ទៈស្ម័គ្រចិត្តថា ព្រះយេស៊ូវគឺពិតជាព្រះគ្រីស្ទមែន ។៥
ខ្ញុំសូមចែកចាយគំរូពីរមកពីពេលថ្មីៗនេះ និងជាគំរូដ៏បំផុសគំនិតនៃសមាជិក ដែលបង្ហាញព្រះថា ពួកគេលើកដាក់ព្រះនាមនៃព្រះយេស៊ូវគ្រីស្ទមកលើខ្លួនគេ តាមរយៈការនិយាយអំពីទ្រង់ និងការថ្លែងសាក្សីដ៏បរិសុទ្ធអំពីព្រះអម្ចាស់នៅក្នុងការប្រជុំសាសនាចក្រ ។
គំរូទីមួយ ៖ នៅពេលភរិយាខ្ញុំ អេលេន និងខ្ញុំបានទៅប្រទេសអេស្ប៉ាញនៅឆ្នាំ ២០២២ យើងបានចូលរួមប្រជុំនៅថ្ងៃអាទិត្យនៅក្នុងអង្គភាពសាសនាចក្រតូចមួយនៅទីនោះ ។ កាលខ្ញុំអង្គុយនៅលើវេទិកា ហើយភរិយាខ្ញុំនៅក្នុងក្រុមជំនុំ ខ្ញុំបានសម្គាល់ឃើញថា គាត់អង្គុយក្បែរស្ដ្រីចំណាស់ម្នាក់ ។ នៅពេលការប្រជុំសាក្រាម៉ង់ចប់ ខ្ញុំបានដើរទៅរក អេលេន ហើយសូមគាត់ឲ្យណែនាំខ្ញុំស្គាល់មិត្តថ្មីរបស់គាត់ផង ។ គាត់បានណែនាំ ហើយបានប្រាប់ថា ស្ដ្រីរូបនេះ ពុំមែនជាសមាជិកសាសនាចក្រទេ តែ បានមកព្រះវិហារប្រហែលពីរឆ្នាំហើយ ។ នៅពេលខ្ញុំឮដូច្នោះ ខ្ញុំបានសួរស្ដ្រីដែលកោតខ្លាចដល់ព្រះរូបនេះថា តើអ្វីទៅដែលធ្វើឲ្យគាត់ត្រឡប់មកចូលរួមការប្រជុំរបស់យើងអស់រយៈពេលជាយូរបែបនេះ ។ ស្ត្រីនោះបានតបដោយក្ដីស្រឡាញ់ថា « ខ្ញុំចូលចិត្តមកទីនេះ ព្រោះពួកអ្នកនិយាយអំពីព្រះយេស៊ូវគ្រីស្ទនៅក្នុងការប្រជុំរបស់អ្នក » ។
ច្បាស់ណាស់ សមាជិកសាសនាចក្រនៅក្នុងអង្គភាពក្នុងប្រទេសអេស្ប៉ាញនោះបាននិយាយ បង្រៀន និងថ្លែងទីបន្ទាល់អំពីព្រះគ្រីស្ទនៅក្នុងការប្រជុំរបស់ពួកគេ ។
គំរូទីពីរ ៖ បន្ទាប់ពីបានបម្រើនៅក្នុងតំបន់ប្រេស៊ីល ខ្ញុំបានទទួលការចាត់តាំងថ្មីមួយឲ្យទៅបម្រើនៅទីស្នាក់ការកណ្ដាលនៃសាសនាចក្រ ។ ពេលយើងប្ដូរទៅនៅទីក្រុង សលត៍ លេក នៅចុងខែកក្កដាឆ្នាំនេះ យើងបានចូលរួមការប្រជុំថ្ងៃអាទិត្យនៅវួដថ្មី ដ៏អស្ចារ្យរបស់យើង ។ ការប្រជុំមួយក្នុងចំណោមការប្រជុំទាំងនេះគឺការប្រជុំតមអាហារ និងថ្លែងទីបន្ទាល់ ។ បន្ទាប់ពីបានទទួលទានសាក្រាម៉ង់ដោយគារវភាពរួចហើយ សមាជិកបានក្រោកឈរឡើងទៅថ្លែងទីបន្ទាល់អស់ពីដួងចិត្តអំពីព្រះអង្គសង្គ្រោះម្ដងម្នាក់ៗ ។ ការប្រជុំនេះបានផ្តោតទៅលើព្រះយេស៊ូវគ្រីស្ទ ហើយយើងអាចទទួលអារម្មណ៍ពីព្រះវិញ្ញាណយ៉ាងច្បាស់ ។ យើងត្រូវបានស្អាង ហើយសេចក្ដីជំនឿរបស់យើងត្រូវបានពង្រឹង ។ បើមិត្តភក្ដិរបស់សាសនាចក្រ ដែលស្វែងរកសេចក្ដីពិតដោយស្មោះត្រង់ បាននៅក្នុងការប្រជុំនោះ នោះពួកគេនឹងដឹងថា នេះគឺជាសាសនាចក្រនៃព្រះយេស៊ូវគ្រីស្ទ ។
ឱ ! វាជាពរជ័យអ្វីម្ល៉េះដែលឃើញថា ការប្រជុំសាសនាចក្ររបស់យើងគឺជាឱកាសជម្រើស ដើម្បីឲ្យយើងថ្លែងទីបន្ទាល់អំពីព្រះគ្រីស្ទ និងបង្ហាញប្រាប់ព្រះថា យើងអររីករាយក្នុងការលើកដាក់មកលើខ្លួនយើងនូវព្រះនាមនៃព្រះរាជបុត្រារបស់ទ្រង់ ។
ឥឡូវនេះ ខ្ញុំសូមលើកឡើងអំពីគំរូដ៏មានអានុភាពមួយនៃការលើកដាក់មកលើខ្លួនយើងនូវព្រះនាមនៃព្រះយេស៊ូវគ្រីស្ទ ដោយការថ្លែងទីបន្ទាល់អំពីទ្រង់តាមរយៈសកម្មភាព ។
កាលពីខែសីហាមុន ខ្ញុំបានអមដំណើរអែលឌើរ ចូណាថាន អេស ឈ្មីត ទៅពិធីសម្ពោធព្រះវិហារបរិសុទ្ធ ហ្វេឌើរ រីវើរ កាលីហ្វ័រញ៉ា នៅទីក្រុងយូបា ។ នៅទីនោះ ខ្ញុំមានពរជ័យក្នុងការនាំដំណើរទស្សនកិច្ចក្នុងព្រះវិហារបរិសុទ្ធ ។ ក្រុមមួយក្នុងចំណោមក្រុមទាំងនេះមានសមាជិកសាសនាចក្រម្នាក់ ឈ្មោះ វឺជីល អាតគីនសុន និងមិត្តភក្តិប្រាំពីរនាក់មកពីជំនឿផ្សេង ។ នៅចុងបញ្ចប់នៃដំណើរទស្សនកិច្ចនេះ នៅក្នុងបន្ទប់ផ្សារភ្ជាប់ក្នុងព្រះវិហារបរិសុទ្ធ បងប្រុស អាតគីនសុន បានរំជួលអារម្មណ៍ កាលគាត់បានបង្ហាញសេចក្តីស្រឡាញ់របស់គាត់ចំពោះមិត្តភក្តិដែលបានមកព្រះវិហារបរិសុទ្ធនៅថ្ងៃនោះ ។ ស្ទើរតែភ្លាមៗបន្ទាប់ពីការចែកចាយអារម្មណ៍របស់គាត់ នោះមានស្ត្រីម្នាក់នៅក្នុងក្រុមនេះបានក្រោកឈរឡើង ហើយនិយាយថា « យើងទាំងអស់គ្នាស្រឡាញ់ វឺជីល ។ គាត់មិនដែលបង្ខំយើងឲ្យជឿលើសាសនារបស់គាត់ទេ ។ ប៉ុន្តែ គាត់ក៏មិនអៀនខ្មាសចំពោះសាសនារបស់គាត់ដែរ ។ គាត់គ្រាន់តែរស់នៅតាមអ្វីដែលគាត់ជឿប៉ុណ្ណោះ » ។
អស់ជាច្រើនឆ្នាំមកហើយ ការរស់នៅដូចជាព្រះគ្រីស្ទរបស់បងប្រុស អាតគីនសុន បានក្លាយជាទីបន្ទាល់ដ៏មានអានុភាពមួយដល់មិត្តភក្តិរបស់គាត់ ។ គំរូរបស់គាត់គឺជាភស្តុតាងដ៏ជាក់ច្បាស់មួយថា គាត់បានលើកដាក់មកលើខ្លួនគាត់នូវព្រះនាមនៃព្រះគ្រីស្ទ ។
នៅចុងបញ្ចប់នេះ ខ្ញុំសូមចែកចាយមេរៀនមួយ ដែលខ្ញុំបានរៀនអំពីរបៀបលើកដាក់មកលើខ្លួនយើងនូវព្រះនាមនៃព្រះគ្រីស្ទ និងថ្លែងទីបន្ទាល់អំពីទ្រង់ តាមរយៈការប្រើឈ្មោះត្រឹមត្រូវរបស់សាសនាចក្រ ។
ប្រធាន ណិលសុន ដែលជាព្យាការីនៅរស់របស់ព្រះ បានថ្លែងសុន្ទរកថាសន្និសីទទូទៅឆ្នាំ ២០១៨ ដែលមានចំណងជើងថា « ឈ្មោះត្រឹមត្រូវរបស់សាសនាចក្រ » លោកបានថ្លែងថា ៖ « វាគឺជាការកែតម្រូវ ។ វា គឺជា បទបញ្ញត្តិរបស់ព្រះអម្ចាស់ ។ យ៉ូសែប ស្ម៊ីធ ពុំបានដាក់ឈ្មោះសាសនាដែលបានស្ដារឡើងវិញតាមឈ្មោះលោកឡើយ ហើយមរមនក៏មិនបានធ្វើដូចគ្នាដែរ ។ គឺព្រះអង្គសង្គ្រោះផ្ទាល់ដែលមានបន្ទូលថា ‹ ដ្បិតសាសនាចក្ររបស់យើងនឹងត្រូវបានហៅថាដូច្នោះ ហើយនៅគ្រាចុងក្រោយបង្អស់ គឺជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ › [ គោលលទ្ធិ និងសេចក្តីសញ្ញា ១១៥:៤ ] ។ ៦
យើងទាំងអស់គ្នាបានចាកចេញពីសន្និសីទទូទៅនៅថ្ងៃនោះ តាំងចិត្តធ្វើតាមព្យាការី ហើយប្រើឈ្មោះដែលបានបើកសម្ដែងរបស់សាសនាចក្រចាប់តាំងពីពេលនោះមក ។ ខ្ញុំពិតជាបានសង្កេតមើលខ្លួនឯងខ្លាំងណាស់ ដើម្បីប្រាកដថា ខ្ញុំប្រើឈ្មោះត្រឹមត្រូវរបស់សាសនាចក្រ ។ ពីរបីដងដំបូង ខ្ញុំត្រូវតែប្រយ័ត្នជានិច្ច ហើយមិនបណ្តោយខ្លួនឲ្យត្រឡប់ទៅទម្លាប់ចាស់វិញទេ ។ បន្ទាប់ពីការព្យាយាមលើកដំបូង ខ្ញុំមានអារម្មណ៍ស្រួលជាងមុនក្នុងការប្រើឈ្មោះដែលបានបើកសម្ដែងរបស់សាសនាចក្រ ។ ខ្ញុំសូមសារភាពថា ខ្ញុំបាននិយាយឈ្មោះសាសនាចក្រយ៉ាងលឿនជាច្រើនដង ។ ខ្ញុំខ្លាចថា មនុស្សនឹងមិនយកចិត្តទុកដាក់លើឈ្មោះពេញរបស់សាសនាចក្រ ហើយថាពួកគេអាចគិតថា វារាងវែង ។
ទោះជាយ៉ាងណាក៏ដោយ ក្រោយមកខ្ញុំបានដឹងថា ការនិយាយឈ្មោះពេញរបស់សាសនាចក្រដោយចេតនាពិត បានផ្ដល់ឱកាសដ៏មានតម្លៃឲ្យខ្ញុំថ្លែងពីព្រះនាមរបស់ព្រះយេស៊ូវគ្រីស្ទ គឺថ្លែងទីបន្ទាល់អំពីព្រះអង្គសង្រ្គោះ តាមរយៈការប្រកាសព្រះនាមរបស់ទ្រង់នៅក្នុងឈ្មោះរបស់សាសនាចក្រទ្រង់ ។ ខ្ញុំក៏បានសម្គាល់ឃើញដែរថា នៅពេលខ្ញុំនិយាយឈ្មោះត្រឹមត្រូវរបស់សាសនាចក្រជាមួយអ្នកដទៃ ខ្ញុំនឹកចាំដល់ព្រះយេស៊ូវគ្រីស្ទបានញឹកញាប់ជាងមុន ហើយទទួលអារម្មណ៍ពីឥទ្ធិពលរបស់ទ្រង់ក្នុងជីវិតខ្ញុំ ។
តាមរយៈការធ្វើតាមព្យាការី យើងទាំងអស់គ្នាអាចរៀនថ្លែងទីបន្ទាល់បន្ថែមទៀតអំពីព្រះយេស៊ូវគ្រីស្ទ ដោយការប្រើឈ្មោះត្រឹមត្រូវរបស់សាសនាចក្រ ដូច្នេះហើយ យើងលើកដាក់មកលើខ្លួនយើងនូវព្រះនាមនៃព្រះអម្ចាស់់បានកាន់តែពេញលេញ ។
នៅព្រឹកថ្ងៃឈប់សម្រាកនេះ ខ្ញុំសូមថ្លែងទីបន្ទាល់ដោយចិត្តសោមន្សថា ប្រធាន ណិលសុន គឺជាព្យាការីនៅរស់របស់ព្រះ ហើយថាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្រដែលបានស្ដារឡើងវិញរបស់ព្រះគ្រីស្ទ ។ ខ្ញុំសូមធ្វើជាសាក្សីដោយរាបសាអំពីព្រះរាជបុត្រានៃព្រះ និងភាពជាព្រះរបស់ទ្រង់ ។ ទ្រង់គឺជាបុត្រច្បង និងព្រះរាជបុត្រាសំណព្វតែមួយគត់របស់ព្រះ ជាព្រះអង្គសង្គ្រោះ និងព្រះប្រោសលោះរបស់យើង គឺអេម៉ាញូអែល ។៧ នៅក្នុងព្រះនាមព្រះយេស៊ូវគ្រីស្ទ អាម៉ែន ។