អ្នកនឹងមានអំណរដ៏មហិមា
ឥឡូវនេះ ខ្ញុំសូមអញ្ជើញបងប្អូនឲ្យយក ចំណេះដឹង នេះ ផ្គួបនឹងទីបន្ទាល់ដែលទទួលបានរាប់ឆ្នាំរបស់បងប្អូនមក ហើយចេញទៅបេសកកម្ម ។
បងប្អូនប្រុសស្រីជាទីស្រឡាញ់ ថ្ងៃនេះខ្ញុំគិតដល់ការប្រមូលផ្ដុំអ៊ីស្រាអែល ជាអ្វីដែលប្រធាន រ័សុល អិម ណិលសុន ហៅថា « កិច្ចការដ៏ សំខាន់បំផុតនៅលើផែនដីសព្វថ្ងៃនេះ ។ ពុំមានអ្វីផ្សេងទៀតអាចធំជាង មានសារៈសំខាន់ជាង និងមានឫទ្ធិជាងកិច្ចការនេះនោះទេ » ។១
ការប្រមូលផ្ដុំគឺជាការទទួលស្គាល់ដ៏សំខាន់ថា « តម្លៃនៃព្រលឹងទាំងឡាយ គឺមហិមាណាស់ចំពោះព្រះនេត្រនៃព្រះ » ។២ វាសាមញ្ញដូច្នោះឯង ។ យើងកំពុងប្រមូលផ្ដុំបុត្រាបុត្រីរបស់ព្រះនៅថ្ងៃចុងក្រោយនេះ ដើម្បីពួកគេអាចមាន « ព្រះពរដ៏ធំទាំងឡាយបានស្រោចមកលើក្បាលពួកគេ »៣និងការសន្យានៃ « ទ្រព្យសម្បត្តិទាំងឡាយខាងភាពអស់កល្បជានិច្ច » ។៤ ដើម្បីប្រមូលផ្ដុំអ៊ីស្រាអែល យើងត្រូវការអ្នកផ្សព្វផ្សាយសាសនា— ឲ្យនជាងអ្នកកំពុងបម្រើ ។៥ នេះ ខ្ញុំសូមនិយាយទៅកាន់រៀមច្បង ដែលមានបទពិសោធន៍ច្រើនក្នុងសាសនាចក្រ ដែលអាចបម្រើជាអ្នកផ្សព្វផ្សាយសាសនាបាន ។ ព្រះអម្ចាស់ត្រូវការបងប្អូន ។ យើងត្រូវការបងប្អូននៅ ញូវ យ៉ក និង ឈីកាហ្គោ អូស្ត្រាលី និងអាហ្វ្រិក ថៃ និង ម៉ិកស៊ិក និងកន្លែងជាច្រើនទៀត ។
ខ្ញុំសូមនាំបងប្អូនត្រឡប់ទៅឆ្នាំ ២០១៥ ។ ខ្ញុំទើបតែទទួលបានការហៅថ្មីជា សមាជិកនៃកូរ៉ុមនៃពួកសាវកដប់ពីរនាក់ ។ ការទទួលខុសត្រូវដ៏អស្ចារ្យមួយ ដែលយើងមានក្នុងនាមជាសាវក គឺការចាត់តាំងពួកអ្នកផ្សព្វផ្សាយសាសនាឲ្យទៅតំបន់បម្រើរបស់ពួកគេ ។ ធ្លាប់ចូលរួមកាលជាពួកចិតសិបនាក់៦ប៉ុន្ដែឥឡូវនេះជាសាវកម្ដង ហើយខ្ញុំទទួលបន្ទុកពេញទំហឹងក្នុងការចាត់តាំងនេះ ។ ខ្ញុំបានចាប់ផ្ដើមដោយការអធិស្ឋាន ហើយចាត់តាំងអែលឌើរ និងស៊ីស្ទើរវ័យក្មេងជាច្រើននាក់ ម្ដងម្នាក់ៗឲ្យទៅបេសកកម្មនៅជុំវិញពិភពលោក ។ រួច ខ្ញុំងាកទៅគូស្វាមីភរិយារៀមច្បងម្ដង ។ មានតែ១០គូរទេនៅក្នុងបញ្ជី ។ មិនច្រើនទេ ។ ដោយភ្ញាក់ផ្អើល ខ្ញុំក៏បានសួរសហការីខ្ញុំពីនាយកដ្ឋានអ្នកផ្សព្វផ្សាយសាសនាថា « តើយើងត្រូវការប៉ុន្មាននាក់នៅសប្ដាហ៍នេះ ដើម្បីបំពេញតាមសំណើ ? »
គាត់បានឆ្លើយថា « ៣០០ » ។
គ្រាដ៏សោកសៅនោះនៅដិតជាប់នឹងខ្ញុំ ៖ គូស្វាមីភរិយា ១០ គូទៅបំពេញតម្រូវការ ៣០០ គូ ។
ប្រធាន រ័សុល អិម ណិលសុន បានលើកទឹកចិត្តគូស្វាមីភរិយាឲ្យ « លុតជង្គង់ចុះ ហើយទូលសួរព្រះវរបិតាសួគ៌ថា តើពេលនេះជាពេលត្រឹមត្រូវឲ្យពួកគេបម្រើបេសកកម្មដែរឬទេ » ។៧ ក្នុងចំណោមគុណសម្បត្តិទាំងអស់ លោកបានថ្លែងថា « បំណងប្រាថ្នាដើម្បីបម្រើអាចជាចំណុចដ៏សំខាន់បំផុត » ។៨
ដូចដែលព្រះគម្ពីរចែងថា « បើសិនជាអ្នករាល់គ្នាមានបំណងចង់បម្រើព្រះ នោះអ្នករាល់គ្នាបានហៅឲ្យធ្វើកិច្ចការនោះហើយ » ។៩ កិច្ចការនោះគឺគ្មានអ្វីក្រៅពីច្បាប់នៃការច្រូតកាត់នោះទេ ។ យើងអានក្នុងគម្ពីរយ៉ូហានថា « ដើម្បីឲ្យអ្នកដែលព្រោះ និងអ្នកដែលច្រូត បានអរសប្បាយផងគ្នា » ។១០
ខ្ញុំឃើញច្បាប់នៃការច្រូតកាត់បានបំពេញនៅក្នុងគ្រួសារខ្ញុំផ្ទាល់ ។
ជាច្រើនឆ្នាំកន្លងទៅ ខ្ញុំបានទៅលេងគ្រួសារខ្ញុំ ហើយប៊ីស្សពបានសុំខ្ញុំឲ្យជាអ្នកនិយាយបញ្ចប់ក្នុងកម្មវិធីសាក្រាម៉ង់ ។១១ ពេលខ្ញុំចុះមកពីវេទិកា ស្ដ្រីម្នាក់មកជួបខ្ញុំជាមួយនឹងកូនប្រាំពីរនាក់ ហើយបានណែនាំខ្លួនថាគាត់ជាបងស្រី រេបិកា ហ្គុសមេន ។
គាត់បានសួរថា « អែលឌើរ រ៉ាសបាន តើអែលឌើរ ស្គាល់ រូលុន និង វែដា រ៉ាសបាន ដែរឬទេ ? »
ខ្ញុំញញឹម ហើយឆ្លើយថា « ពួកគាត់ជាឪពុកម្ដាយខ្ញុំ » ។
បងប្អូនអាចដឹងថា រឿងនេះជាយ៉ាងណាហើយ ។ ដោយមានការអនុញ្ញាតពី រេបិកា ដែលនៅទីនេះជាមួយគ្រួសារក្នុងមជ្ឈមណ្ឌលសន្និសីទ ខ្ញុំសូមចែកចាយដំណើររឿងគ្រួសារគាត់ ។១២
ឪពុកម្តាយខ្ញុំ អែលឌើរ រូលុន និង ស៊ីស្ទើរ វែដា រ៉ាសបាន បានបម្រើបេសកកម្មជាគូស្វាមីភរិយារៀមច្បងនៅបេសកកម្ម ផ្លរីដាហ្វត ឡឌើរដេល ។១៣ ពួកគាត់បានដើរផ្សព្វផ្សាយ ហើយដោយមានការណែនាំពីព្រះ គាត់បានគោះទ្វារផ្ទះរបស់ រេបិកា ។ កាលនោះគាត់នៅក្មេងជំទង់ ហើយចូលចិត្តស្ដាប់តន្ដ្រីរបស់ក្រុម អូសម៉ន ជាពិសេសគឺតន្ដ្រីរបស់មិត្តយើង ដននី—ដែលគាត់នៅទីនេះជាមួយើងផងដែរថ្ងៃនេះ ។១៤ គាត់បានស្ដាប់ការសម្ភាសន៍តាមប្រព័ន្ធផ្សព្វផ្សាយរបស់ពួកគេ ហើយបានដឹងថា ពួកគេគឺជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ គាត់មានអារម្មណ៍ថា ពួកគេមានអ្វីមួយខុសពីគេ ហើយគិតថាវាមកពីសាសនារបស់ពួកគេ រេបិកា បានចំណាយពេលពីរឆ្នាំស្រាវជ្រាវរកជំនឿរបស់សាសនាចក្រក្នុងបណ្ណាល័យសាលារៀន ។ ដូច្នេះ ពេលគូស្វាមីភរិយាចិត្តល្អ បានគោះទ្វារផ្ទះគ្រួសារគាត់ ហើយណែនាំខ្លួនថាពួកគេជាអ្នកផ្សព្វផ្សាយសាសនាពួកបរិសុទ្ធថ្ងៃចុងក្រោយ នោះគាត់បានឈរស្រឡាំងកាំង ។
ក្រោយមក រេបិកា បានសរសេរថា « ម្ដាយខ្ញុំប្រាប់ខ្ញុំឲ្យចេញពីពួកគេ តែចិត្តខ្ញុំនិយាយថា ‹ ទេ › ។ ខ្ញុំមើលមុខពួកគាត់ ហើយមានអារម្មណ៍កក់ក្ដៅ និងក្ដីស្រឡាញ់យ៉ាងខ្លាំង ។ អនុស្សាវរីយ៍នេះនៅតែធ្វើឲ្យខ្ញុំហូរទឹកភ្នែក និងដក់ជាប់យ៉ាងជ្រាលជ្រៅក្នុងចិត្តខ្ញុំ » ។១៥
រេបិកា បានអញ្ជើញពួកគាត់ឲ្យចូលផ្ទះ ហើយឪពុកម្ដាយខ្ញុំដែលជាអ្នកផ្សព្វផ្សាយសាសនានោះ បានចែកចាយសារលិខិតមួយជាមួយនឹងគាត់ ទោះជាប្អូនស្រីគាត់ពីរនាក់ និងម្ដាយគាត់ ជំទាស់ក្ដី ។
រេបិកា បានពិពណ៌នាប្រាប់ខ្ញុំថា « ឪពុកម្ដាយអែលឌើរពូកែពន្យល់ពីសំណួរទាំងប៉ុន្មានដែលយើងមាន ។ ខ្ញុំនៅតែអាចស្រមៃឃើញមុខពួកគាត់ ហាក់ដូចជាមានពន្លឺព័ទ្ធជុំវិញគាត់អ៊ីចឹង ។ យើងតែងឱបម្ដាយអែលឌើរ ពេលគាត់ទៅវិញ ហើយគាត់តែងធ្វើអ្វីមួយដែលជួយឲ្យម្ដាយខ្ញុំមានអារម្មណ៍កក់ក្ដៅ និងការគោរព ។ ភ្នែកឪពុកអែលឌើរតែងភ្លឺថ្លា កាលគាត់បង្រៀនយើងអំពីព្រះយេស៊ូវគ្រីស្ទ ។ គាត់បានព្យាយាមនាំឪពុកខ្ញុំចូលរួមក្នុងការពិភាក្សា ហើយនៅទីបំផុត ឪពុកខ្ញុំព្រមចូលមែន ។ ឪពុកខ្ញុំគឺជាចុងភៅនៅក្លឹបក្នុងស្រុកមួយ ហើយចាប់ផ្តើមចម្អិនអាហារពេលល្ងាចសម្រាប់ឪពុកម្តាយរបស់អែលឌើរ រួមទាំងធ្វើនំដែលឪពុកអែលឌើរចូលចិត្តទៀតផង នំឃីឡែមផាយ » ។១៦
នៅពេលអែលឌើរ និងស៊ីស្ទើរ រ៉ាសបាន បានសុំ រេបិកា និងគ្រួសារគាត់ឲ្យអានព្រះគម្ពីរមរមន រេបិកា ចំណាយពេលអានតែប្រាំថ្ងៃទេ ។ គាត់ចង់ជ្រមុជទឹកភ្លាមៗ ប៉ុន្ដែសមាជិកគ្រួសារគាត់ផ្សេងទៀតមិនទាន់ត្រៀមខ្លួនរួចទេ ។ បួនខែក្រោយមក រេបិកា បានទទូចចង់ជ្រមុជទឹក ហើយចូលរួមសាសនាចក្រដ៏ពិតនេះ ។ គាត់ចាំថា « គ្រប់សរសៃនៃព្រលឹងខ្ញុំដឹងថា នេះគឺជាសេចក្ដីពិត » ។១៧ នៅថ្ងៃទី ៥ ខែ មេសា ឆ្នាំ ១៩៧៩ ពួកអ្នកផ្សព្វផ្សាយសាសនាបានជ្រមុជទឹកឲ្យ រេបិកា ក្នុងវ័យ ១៩ ឆ្នាំ ព្រមទាំងម្ដាយគាត់ និងប្អូនស្រីពីរនាក់ទៀត ។ ឪពុកខ្ញុំគឺជាសាក្សីម្នាក់នៅឯពិធីជ្រមុជទឹក ។
ពេលខ្ញុំជួប រេបិកា និងគ្រួសារគាត់នៅព្រះវិហារ យើងបានថតរូបជាគ្រួសារគាត់ជាមួយខ្ញុំ ។ ខ្ញុំបានយករូបថតនោះទៅផ្ទះឲ្យម្ដាយវ័យចំណាស់ខ្ញុំមើល ហើយគាត់បានឱបរូបនោះនៅនឹងទ្រូងគាត់ ។ បន្ទាប់មក គាត់បានប្រាប់ខ្ញុំថា « រ៉ូនី នេះគឺជាពេលដ៏រីករាយបំផុតមួយក្នុងជីវិតរបស់ម្ដាយ » ។
ចម្លើយម្ដាយខ្ញុំចោទជាសំណួរដល់គូស្វាមីភរិយារៀមច្បងរបស់យើងថា « តើបងប្អូនកំពុងធ្វើអ្វី នៅដំណាក់កាលនេះក្នុងជីវិតបងប្អូន ? » មានរបៀបជាច្រើនដែលអ្នកផ្សព្វផ្សាយសាសនារៀមច្បងអាចធ្វើដែលគ្មានអ្នកផ្សេងទៀតអាចធ្វើបាន ។ បងប្អូនគឺជាកម្លាំងដ៏អស្ចារ្យនៃសេចក្ដីល្អ មានបទពិសោធន៍ច្រើនក្នុងសាសនាចក្រ និងមានគោលជំហរលើកទឹកចិត្ត និងសង្គ្រោះបុត្រាបុត្រីរបស់ព្រះ ។
បងប្អូនមួយចំនួនអាចគិតថា ៖ « តែខ្ញុំត្រូវចាកចោលចៅៗខ្ញុំឬ ? យើងនឹងខកខានមិនបានចូលរួមក្នុងពិធីសំខាន់ៗរបស់គ្រួសារ ខួបកំណើត មិត្តភក្ដិ និងសត្វចិញ្ចឹមរបស់យើងផងដែរ » ។ បើខ្ញុំសួរម្ដាយខ្ញុំថា ហេតុអ្វីបានជាគាត់និងឪពុកទៅបម្រើបេសកកម្ម ខ្ញុំដឹងថាគាត់នឹងនិយាយដូចនេះថា « ម្ដាយមានចៅៗ ។ ម្ដាយចង់ឲ្យពួកគេដឹងថា ឪពុកឯងនិងម្ដាយបានបម្រើនៅតំបន់បេសកកម្ម យើងចង់ធ្វើជាគំរូដល់កូនចៅយើង ហើយយើងមានពរជ័យខ្លាំងណាស់ » ។
ពេលខ្ញុំទៅជួបបេសកកម្មទាំងឡាយនៅជុំវិញពិភពលោក ខ្ញុំបានឃើញការបម្រើដ៏អស្ចារ្យនៃក្រុមអ្នកផ្សព្វផ្សាយសាសនារៀមច្បងរបស់យើង ។ វាច្បាស់ថា ពួកគាត់រីករាយក្នុងការធ្វើតាម « ព្រះហឫទ័យនៃព្រះអម្ចាស់ » ហើយ ចេញទៅធ្វើ « ធុរកិច្ចរបស់ព្រះអម្ចាស់ » ។១៨
សម្រាប់បងប្អូនមួយចំនួន ការបម្រើជាអ្នកផ្សព្វផ្សាយសាសនាពេញម៉ោងនៅជ្រុងម្ខាងទៀតនៃពិភពលោកគឺជាកន្លែងដ៏ត្រឹមត្រូវ ហើយយើងសង្ឃឹមថា បងប្អូនរាប់ពាន់នាក់នឹងរៀបចំខ្លួន ។១៩ សម្រាប់អ្នកផ្សេងទៀត ការបម្រើបេសកកម្មផ្នែកសេវាកម្មក្នុងសាសនាចក្រនៅផ្ទះជាអ្វីដែលអាចធ្វើបាន ។ ដោយសារបញ្ហាសុខភាព និងស្ថានភាពផ្សេងទៀត មានអ្នកដែលមិនអាចបម្រើ ។ យើងយល់ពីស្ថានភាពទាំងនោះ ហើយវាជាក្ដីសង្ឃឹមរបស់យើងថា បងប្អូនអាចរកឃើញរបៀបដើម្បីគាំទ្រដល់អ្នកដែលកំពុងបម្រើ ។ សូមធ្វើតាមការទូន្មានរបស់ព្យាការី ហើយអធិស្ឋានដើម្បីដឹងថា តើព្រះអម្ចាស់សព្វព្រះទ័យចង់ឲ្យបងប្អូនធ្វើអ្វី ។
តំបន់បេសកកម្មនៅជុំវិញពិភពលោកកំពុងអង្វរសុំជំនួយពីបងប្អូន ។ ប្រធាន ណិលសុន បានថ្លែងអំពីអ្នកផ្សព្វផ្សាយសាសនារៀមច្បងរបស់យើងថា « ពួកគេនៅក្មេងខាងវិញ្ញាណ វាងវៃ និងស្ម័គ្រចិត្តទៅធ្វើការ » ។២០
នៅតំបន់បេសកកម្ម បងប្អូនមានឱកាសអស្ចារ្យជាច្រើន ៖ បងប្អូនអាចបម្រើនៅការិយាល័យបេសកកម្ម ឬព្រះវិហារបរិសុទ្ធ ពង្រឹងពួកអ្នកផ្សព្វផ្សាយសាសនាវ័យក្មេង គាំទ្រដល់សាខាតូចៗ ធ្វើការនៅមជ្ឈមណ្ឌលពង្សប្រវត្តិ ឬនៅទីតាំងប្រវត្តិសាស្ដ្រ បង្រៀនថ្នាក់វិទ្យាស្ថាន ផ្ដល់ការបម្រើខាងសប្បុរសធម៌ ធ្វើការជាមួយយុវមជ្ឈិមវ័យ ជួយក្នុងមជ្ឈមណ្ឌលផ្ដល់ការងារធ្វើ ឬនៅក្នុងកសិដ្ឋានរបស់សាសនាចក្រ ។ គេហទំព័រ « អ្នកផ្សព្វផ្សាយសាសនារៀមច្បង » លើកឡើងពីរបៀបដ៏ពិសេសជាច្រើនក្នុងការបម្រើ អ្វីដែលសមស្របបំផុតនឹងបងប្អូន កន្លែងដែលគេត្រូវការបងប្អូន និងរបៀបដែលបងប្អូនអាចត្រៀមខ្លួនដើម្បីទៅបម្រើ ។២១ បងប្អូនក៏អាចនិយាយជាមួយនឹងប៊ីស្សព ឬប្រធានសាខារបស់បងប្អូនបានដែរ ។
ខ្ញុំបានហៅគូស្វាមីភរិយាជាច្រើនឲ្យបម្រើ ហើយបានឃើញពន្លឺនៃព្រះគ្រីស្ទមានពេញនៅលើទឹកមុខរបស់ពួកគេ ។២២ ពេលត្រឡប់ទៅវិញ ពួកគេបានរៀបរាប់ថា ពួកគេបានខិតទៅកាន់តែជិតព្រះអម្ចាស់ និងគ្នានឹងគ្នា ទទួលអារម្មណ៍ពីព្រះវិញ្ញាណនៃព្រះអម្ចាស់ចាក់ស្រោចលើពួកគេ ហើយដឹងថា ពួកគេកំពុងធ្វើឲ្យមានភាពខុសប្លែកមួយ ។២៣ តើនរណាមិនចង់បានដូច្នេះ ?
បេសកកម្មអាចជាជំពូកដ៏ធំបំផុតមួយក្នុងជីវិតរបស់គូស្វាមីភរិយា ។ ងារដ៏ល្អមួយអាចថា « ព្រះអម្ចាស់ទ្រង់ត្រូវការខ្ញុំ » ។២៤បងប្អូនអាចទៅតំបន់ដែលមិនស្គាល់ ប៉ុន្ដែព្រះចេស្ដានៃព្រះវិញ្ញាណនឹងធ្វើឲ្យបងប្អូនមានអារម្មណ៍កក់ក្ដៅដូចនៅផ្ទះអ៊ីចឹង ។
ឪពុកម្ដាយខ្ញុំ និងគូស្វាមីភរិយាផ្សព្វផ្សាយសាសនាដែលត្រឡប់ពីបេសកកម្មរាប់រយពាន់នាក់ បានថ្លែងទីបន្ទាល់អំពីអំណរដែលពួកគាត់បានទទួលនៅក្នុងកិច្ចការផ្សព្វផ្សាយសាសនា ។ ព្រះអម្ចាស់បានមានបន្ទូលក្នុងព្រះគម្ពីរថ្ងៃចុងក្រោយថា « ហើយបើសិនជាអ្នកត្រូវធ្វើការអស់មួយជីវិតអ្នក ដោយស្រែកប្រាប់ពីការប្រែចិត្តដល់ប្រជាជននេះ ហើយគ្រាន់តែនាំព្រលឹងតែមួយគត់មករកយើង នោះអ្នកនឹងមានអំណរដ៏មហិមាជាមួយអ្នកនោះនៅក្នុងនគរនៃព្រះវរបិតារបស់យើង ! »២៥
អេសាយបានពិពណ៌នាបែបកំណាព្យប្រាប់យើងពីអត្ថន័យនៃការបម្រើក្នុង « តំបន់ » បេសកកម្ម ។ ព្រះគម្ពីរប្រាប់យើងថា « ស្រែនោះគឺជាតួលោកីយ៍ » ។២៦ ព្យាការីពីបុរាណដ៏អស្ចារ្យរូបនេះបានសរសេរថា « ដ្បិតឯងរាល់គ្នានឹងចេញទៅដោយអំណរ ហើយគេ និងនាំឯងចេញទៅដោយសុខសាន្ត ឯអស់ទាំងភ្នំធំ និងភ្នំតូចទាំងប៉ុន្មាននឹងធ្លាយចេញជាចម្រៀងនៅមុខឯង ហើយគ្រប់ទាំងដើមឈើនៅព្រៃនឹងទះដៃផង » ។២៧ ភ្នំ ទីទួល ទីវាល និងដើមឈើ អាចត្រូវបានភ្ជាប់ទៅនឹងប្រធានបេសកកម្ម ប៊ីស្សព ថ្នាក់ដឹកនាំមណ្ឌល សមាជិក និងអ្នក ទាំងឡាយដែលស្វែងរកសេចក្ដីពិត ប៉ុន្តែ « ពួកគេមិនដឹងថាទៅរកសេចក្ដីពិតនៅកន្លែងណា » ។២៨ ពួកគេនឹងថ្លែងទីបន្ទាល់ថា អ្នកផ្សព្វផ្សាយសាសនារៀមច្បង ផ្លាស់ប្ដូរគ្រប់ទិដ្ឋភាពដោយសារទីបន្ទាល់របស់ពួកគាត់អំពីព្រះអង្គសង្គ្រោះ និងព្រះប្រោសលោះរបស់យើង គឺព្រះយេស៊ូវគ្រីស្ទ ។
ក្នុងនាមជាសាវករបស់ព្រះអម្ចាស់ព្រះយេស៊ូវគ្រីស្ទ ខ្ញុំសូមឲ្យបងប្អូនបម្រើជាអ្នកផ្សព្វផ្សាយសាសនា ដើម្បីប្រមូលផ្ដុំអ៊ីស្រាអែល ហើយអាចមកបម្រើម្ដងទៀតផងដែរ ។ យើងត្រូវការបងប្អូន—យើងត្រូវការបងប្អូន ។ យើងមានអំណរគុណចំពោះបងប្អូនរៀមច្បង សម្រាប់ជីវិតទាំងឡាយដែលបងប្អូនដឹកនាំ និងគំរូដែលបងប្អូនបង្ហាញនៅផ្ទះ វួដ និងស្ដេករបស់បងប្អូន ។ ឥឡូវនេះ ខ្ញុំសូមអញ្ជើញបងប្អូនឲ្យយក ចំណេះដឹង នេះ ផ្គួបនឹងទីបន្ទាល់ដែលទទួលបានរាប់ឆ្នាំរបស់បងប្អូនមក ហើយចេញទៅបេសកកម្ម ។ ខ្ញុំអធិស្ឋានថា លើកក្រោយ ពេលខ្ញុំអង្គុយចុះដើម្បីចាត់តាំងគូស្វាមីភរិយារៀមច្បង នោះនឹងមានបងប្អូនរាប់រយនាក់រង់ចាំការហៅបម្រើយ៉ាងអន្ទះសា ។
ខ្ញុំក៏សូមសន្យាដែរថា កាលបងប្អូនបម្រើ នោះបងប្អូននឹងទទួលអារម្មណ៍ពីក្ដីស្រឡាញ់នៃព្រះអម្ចាស់ក្នុងជីវិត ហើយបងប្អូននឹងស្គាល់ទ្រង់ ទ្រង់នឹងស្គាល់បងប្អូន ហើយ « បងប្អូននឹងមានអំណរដ៏មហិមា » ។២៩ ការបម្រើដ៏លះបង់របស់បងប្អូនចំពោះព្រះយេស៊ូវគ្រីស្ទនឹងបំផុសគំនិត និងផ្ដល់ពរជ័យដល់គ្រួសារ ចៅៗ និងចៅទួតរបស់បងប្អូន ។ « ក្តីសុខសាន្ត និងក្តីស្រឡាញ់ [ នឹង ] មានកាន់តែច្រើនឡើង »៣០ក្នុងជីវិតរបស់ពួកគេក្នុងពេលខាងមុខ ។ ខ្ញុំសូមសន្យា ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕