ដង្វាយមួយភាគក្នុងដប់ ៖ ការបើកទ្វារនៃស្ថានសួគ៌
ទ្វារនៃស្ថានសួគ៌បើកតាមរបៀបជាច្រើន ។ សូមទុកចិត្តលើពេលវេលារបស់ព្រះអម្ចាស់ ពរជ័យជាច្រើនតែងមកដល់ ។
កាលខ្ញុំនៅអាមេរិកខាងត្បូងថ្មីៗនេះ បងប្រុស រ៉ូជើ ប៉ារ៉ា មកពីប្រទេស វ៉េណេស៊ុយអេឡា បានចែកបទពិសោធន៍នឹងខ្ញុំដូចខាងក្រោម ៖
« នៅឆ្នាំ ២០១៩ វ៉េណេស៊ុយអេឡា មានបញ្ហាដែលបណ្តាលឲ្យដាច់ចរន្តអគ្គិសនីអស់រយៈពេល ៥ ថ្ងៃ ។
« ការច្របូកច្របល់ និងភាពអនាធិបតេយ្យបានបង្កពេញផ្លូវ ហើយមនុស្សអស់សង្ឃឹមជាច្រើនអត់អាហារទទួលទានគ្រប់គ្រាន់ទេ ។
« អ្នកខ្លះបានចាប់ផ្តើមលួចពីហាងអាហារ ដោយបំផ្លាញអ្វីៗដែលទើសមុខពួកគេ ។
« ក្នុងនាមជាម្ចាស់ហាងលក់នំតូចមួយ ខ្ញុំព្រួយបារម្ភអំពីអាជីវកម្មយើងណាស់ ។ យើងបានសម្រេចចិត្តជាគ្រួសារថានឹងចែកអាហារទាំងអស់ក្នុងហាងនំយើងដល់អ្នកខ្វះខាត ។
« នៅយប់ដ៏ងងឹតមួយមានអំពើកុបកម្មកើតឡើងគ្រប់ទីកន្លែង ។ ការព្រួយបារម្ភតែមួយគត់របស់ខ្ញុំគឺសុវត្ថិភាពភរិយា និងកូនជាទីស្រឡាញ់ ។
« ពេលព្រឹកឡើងខ្ញុំបានទៅហាងនំរបស់យើង ។ គួរឲ្យសោកស្ដាយ អាជីវកម្មអាហារទាំងអស់ដែលនៅជិតនោះ ត្រូវបានបំផ្លាញដោយពួកចោរ ប៉ុន្តែខ្ញុំភ្ញាក់ផ្អើលជាខ្លាំង ដែលហាងនំរបស់យើងមិនមានខូចខាតអ្វី ។ គ្មានអ្វីត្រូវបានបំផ្លាញឡើយ ។ ខ្ញុំបានថ្លែងអំណរគុណយ៉ាងរាបទាបដល់ព្រះវរបិតាសួគ៌ ។
« ពេលមកដល់ផ្ទះ ខ្ញុំបានប្រាប់គ្រួសារអំពីពរជ័យ និងការការពាររបស់ព្រះ ។
« ពួកគេទាំងអស់គ្នាមានអំណរគុណខ្លាំងណាស់ ។
« កូនប្រុសច្បងខ្ញុំ រ៉ូហ្គីលីអូ ទើបតែមានអាយុ១២ឆ្នាំប៉ុណ្ណោះបាននិយាយថា ‹ ប៉ាប៉ា ! កូនដឹងថាហេតុអ្វីបានជាហាងយើងត្រូវបានការពារ ។ ប៉ា និងម៉ាក់តែងតែថ្វាយដង្វាយមួយភាគក្នុងដប់ › » ។
បងប្រុស ប៉ារ៉ា បានបញ្ចប់ថា ៖ « ប្រសាសន៍របស់ម៉ាឡាគី បានផុសឡើងក្នុងគំនិតខ្ញុំ ។ ‹ យើងនឹងបន្ទោសដល់សត្វដែលស៊ីបង្ខូច មិនឲ្យវាបំផ្លាញផលដែលកើតពីដីឯងឡើយ › ។ [ម៉ាឡាគី ៣:១១] ។ យើងបានលុតជង្គង់ចុះ ហើយថ្លែងអំណរគុណដល់ព្រះវរបិតាសួគ៌សម្រាប់អព្ភូតហេតុរបស់ទ្រង់ » ។១
ហើយល្បងលយើងឥឡូវ
អ្វីៗដែលយើងមាន និងអ្វីៗដែលយើងបានគឺមកពីព្រះ ។ ក្នុងនាមជាសិស្សព្រះគ្រីស្ទ យើងស្ម័គ្រចិត្តចែករំលែកជាមួយអ្នកដែលនៅជុំវិញយើង ។
ជាមួយអ្វីៗទាំងអស់ដែលព្រះអម្ចាស់ប្រទានឲ្យយើង ទ្រង់បានបង្គាប់យើងឲ្យថ្វាយត្រឡប់ទៅទ្រង់ និងនគរទ្រង់នៅលើផែនដី នូវ ១០ ភាគរយនៃប្រាក់ចំណេញរបស់យើង ។ ទ្រង់បានសន្យានឹងយើងថា នៅពេលយើងស្មោះត្រង់ក្នុងការថ្វាយដង្វាយរបស់យើង នោះទ្រង់នឹង « បើក…ទ្វារស្ថានសួគ៌ដើម្បីចាក់…ព្រះពរមក ដែលនឹងគ្មានកន្លែងល្មមទុកបានទេ » ។២ ទ្រង់បានសន្យានឹងយើងថា ទ្រង់នឹងការពារយើងពីអំពើអាក្រក់ ។៣ ការសន្យាទាំងនេះគឺមានច្បាស់ណាស់៤ព្រះអម្ចាស់បានប្រកាសថា « ល្បងលយើងឥឡូវ »៥ឃ្លាមួយដែលពុំមាននៅ កន្លែងណាផ្សេងទៀតក្នុងព្រះគម្ពីរឡើយ ។
ទ្វារនៃស្ថានសួគ៌បើកឡើងតាមរបៀបជាច្រើន ។ ខ្លះជាខាងសាច់ឈាម ប៉ុន្តែភាគច្រើនជាខាងវិញ្ញាណ ។ ខ្លះមានលក្ខណៈស្មុគស្មាញ និងងាយមើលរំលង ។ សូមទុកចិត្តលើពេលវេលារបស់ព្រះអម្ចាស់ ពរជ័យជាច្រើនតែងមកដល់ ។
យើងមានទុក្ខជាមួយនឹងអ្នកដែលពុះពារដើម្បីបំពេញតម្រូវការជីវិត ។ ថ្មីៗនេះ សាសនាចក្របានបរិច្ចាគប្រាក់ចំនួន ៥៤ លានដុល្លារអាមេរិក ដើម្បីផ្តល់ជំនួយសង្គ្រោះដល់កុមារ និងម្តាយដែលងាយរងគ្រោះនៅទូទាំងពិភពលោក ។៦ ដោយមានដង្វាយមកពីការតមអាហារប្រចាំខែរបស់បងប្អូន នោះប៊ីស្សពដ៏ល្អរបស់យើងបានជួយមនុស្សរាប់ពាន់នាក់រៀងរាល់សប្តាហ៍ ដែលត្រូវការអាហារបណ្តោះអាសន្ននៅលើតុ សម្លៀកបំពាក់គ្របបាំង និងទីជម្រកនៅលើក្បាលរបស់ពួកគេ ។ ដំណោះស្រាយអចិន្ត្រៃយ៍តែមួយគត់ចំពោះភាពក្រីក្រនៃពិភពលោកនេះគឺដំណឹងល្អនៃព្រះយេស៊ូវគ្រីស្ទ ។៧
បញ្ហានៃសេចក្ដីជំនឿ
សាវកប៉ុលបានព្រមានថា ប្រាជ្ញារបស់មនុស្សយល់កិច្ចការរបស់មនុស្ស ប៉ុន្តែពិបាកយល់កិច្ចការរបស់ព្រះ ។៨ ពិភពលោកនិយាយអំពីដង្វាយមួយភាគក្នុងដប់ សំដៅទៅលើប្រាក់របស់យើង ប៉ុន្តែក្រឹត្យវិន័យដ៏ពិសិដ្ឋនៃដង្វាយមួយភាគក្នុងដប់គឺជាបញ្ហាចម្បងនៃជំនឿរបស់យើង ។ ការស្មោះត្រង់ក្នុងការថ្វាយដង្វាយមួយភាគក្នុងដប់របស់យើង គឺជារបៀបមួយដែលយើងបង្ហាញឆន្ទៈយើងដាក់ព្រះអម្ចាស់ទីមួយក្នុងជីវិត លើសពីការខ្វល់ខ្វាយ និងចំណាប់អារម្មណ៍របស់យើងផ្ទាល់ ។ ខ្ញុំសន្យានឹងបងប្អូនថា នៅពេលបងប្អូនទុកចិត្តទៅលើព្រះអម្ចាស់ នោះពរជ័យនៃស្ថានសួគ៌នឹងកើតមានតាមក្រោយ ។
ព្រះយេស៊ូវមានបន្ទូលឲ្យ « ចូរថ្វាយរបស់សេសារទៅសេសារទៅ ហើយរបស់ព្រះទៅព្រះវិញ » ។៩ព្រះអង្គសង្គ្រោះដ៏មានព្រះជន្មរស់ឡើងវិញបានបង្គាប់ឲ្យសាសន៍នីហ្វៃសរសេរកំណត់ត្រារបស់ពួកគេនូវការសន្យារបស់ទ្រង់ដែលមាននៅក្នុងម៉ាឡាគី ។១០ នៅសម័យរបស់យើង ព្រះអម្ចាស់បានបញ្ជាក់ពីក្រឹត្យវិន័យដ៏ទេវភាពនៃដង្វាយមួយភាគក្នុងដប់ ដោយប្រកាសថា ៖ « នេះនឹងទៅជាការចាប់ផ្ដើមដង្វាយមួយភាគក្នុងដប់នៃរាស្ត្ររបស់យើង ។ ហើយ [ ពួកគេ ] ដែលថ្វាយដង្វាយ១ភាគ១០ ត្រូវថ្វាយ១ភាគ១០នូវធនធានក្នុងមួយឆ្នាំដែលគេបាន ហើយនេះនឹងត្រូវទៅជាក្រឹត្យវិន័យដែលនៅអចិន្ត្រៃយ៍ចំពោះពួកគេជារៀងដរាបតទៅ » ។១១
ព្រះអម្ចាស់បានដឹកនាំយ៉ាងច្បាស់ថាគួរចំណាយដង្វាយមួយភាគក្នុងដប់ដោយរបៀបណា ដោយមានព្រះបន្ទូលថា « ចូរនាំយកដង្វាយ១ភាគក្នុង១០ទាំងអស់ មកដាក់ក្នុងឃ្លាំង »១២មានន័យថានាំយកដង្វាយមួយភាគក្នុងដប់មកក្នុងនគរដែលបានស្ដារឡើងវិញរបស់ទ្រង់ ដែលជាសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។១៣ ទ្រង់បានណែនាំថា ការប្រើប្រាស់ដង្វាយមួយភាគក្នុងដប់ដ៏ពិសិដ្ឋទាំងនេះនឹងត្រូវបានពិចារណាប្រកបដោយការអធិស្ឋានដោយក្រុមប្រឹក្សានៃគណៈប្រធានទីមួយ កូរ៉ុមនៃពួកសាវកដប់ពីរនាក់ គណៈប៊ីស្សពជាអធិបតី « ហើយដោយសំឡេងយើងផ្ទាល់ដល់ពួកគេ ព្រះអម្ចាស់មានព្រះបន្ទូលថាដូច្នោះ » ។១៤
មូលនិធិពិសិដ្ឋរបស់ព្រះអម្ចាស់
មូលនិធិពិសិដ្ឋទាំងនេះពុំនជាកម្មសិទ្ធិរបស់ថ្នាក់ដឹកនាំសាសនាចក្រទេ ។ វាគឺជាកម្មសិទ្ធិរបស់ព្រះអម្ចាស់ ។ ពួកអ្នកបម្រើទ្រង់ដឹងយ៉ាងច្បាស់ពីលក្ខណៈដ៏ពិសិដ្ឋនៃការទទួលខុសត្រូវរបស់ពួកគេ ។
ប្រធាន ហ្គរដុន ប៊ី ហ៊ិងគ្លី បានរៀបរាប់ពីបទពិសោធន៍កុមារភាពថា ៖ « កាលខ្ញុំនៅក្មេង ខ្ញុំបានលើកសំណួរមួយសួរឪពុកខ្ញុំ … ទាក់ទងនឹងការចំណាយថវិកាសាសនាចក្រ ។ គាត់បានរំឭកខ្ញុំថាការថ្វាយដង្វាយមួយភាគក្នុងដប់ និងដង្វាយផ្សេងៗរបស់ខ្ញុំគឺជាកាតព្វកិច្ចដែលព្រះបានប្រទានឲ្យ ។ ពេលខ្ញុំធ្វើដូច្នេះ [ ឪពុកខ្ញុំបានមានប្រសាសន៍ថា ] អ្វីដែលខ្ញុំថ្វាយនោះពុំមែនជារបស់ខ្ញុំទៀតទេ ។ វាជាកម្មសិទ្ធិរបស់ព្រះអម្ចាស់ ដែលខ្ញុំថ្វាយដង្វាយនោះទៅ » ។ ឪពុកលោកបានបន្ថែម ៖ « អ្វីដែលពួកអ្នកមានសិទ្ធិអំណាចនៃសាសនាចក្រធ្វើជាមួយដង្វាយនោះ [ ហ្គរដុន កូន ] មិនបាច់ខ្វល់នោះទេ ។ ពួកគេអាចឆ្លើយតបចំពោះព្រះអម្ចាស់ ដែលនឹងតម្រូវការទទួលខុសត្រូវនៅក្នុងដៃរបស់ពួកគេ » ។១៥
យើងយល់ពីជម្រៅនៃទម្ងន់នៃការ « ឆ្លើយតបចំពោះព្រះអម្ចាស់ » ។
ដង្វាយមួយភាគក្នុងដប់ និងដង្វាយផ្សេងៗដ៏សប្បុរសរបស់បងប្អូន
ចេញពីដង្វាយមួយភាគក្នុងដប់ និងដង្វាយផ្សេងៗដ៏សប្បុរស ដែលបងប្អូនបានថ្វាយដល់ព្រះអម្ចាស់ ឆ្នាំមុនមានទឹកប្រាក់ជាងមួយប៊ីលានដុល្លារអាមេរិកត្រូវបានប្រើដើម្បីផ្ដល់ពរដល់អ្នកដែលខ្វះខាត ។១៦
នៅក្នុងការទទួលខុសត្រូវដ៏សំខាន់របស់យើងក្នុងការយកដំណឹងល្អដែលបានស្ដារឡើងវិញទៅទូទាំងពិភពលោក យើងមានពួកអ្នកផ្សព្វផ្សាយសាសនាច្រើនជាង ៧១,០០០ នាក់ ដែលកំពុងបម្រើក្នុងបេសកកម្មចំនួន ៤១៤ ។១៧ ដោយសារដង្វាយមួយភាគក្នុងដប់ និងដង្វាយផ្សេងៗរបស់បងប្អូន មិនថាពួកអ្នកផ្សព្វផ្សាយសាសនាមានស្ថានភាពហិរញ្ញវត្ថុគ្រួសារយ៉ាងណាទេ ក៏នៅតែអាចបម្រើបាន ។
ព្រះវិហារបរិសុទ្ធទាំងឡាយកំពុងសាងសង់ឡើងពាសពេញពិភពលោកក្នុងចំនួនដែលមិនធ្លាប់មានពីមុនមក ។ បច្ចុប្បន្ននេះ ព្រះវិហារបរិសុទ្ធចំនួន ១៧៧ កំពុងដំណើរការ ៥៩ កំពុងសាងសង់ ឬជួសជុល និង ៧៩ ទៀតកំពុងដាក់ផែនការ និងការរចនា ។១៨ ដង្វាយមួយភាគក្នុងដប់របស់បងប្អូនកំពុងអនុញ្ញាតឲ្យពរជ័យនៃព្រះវិហារបរិសុទ្ធបានស្ថិតនៅកន្លែងដែលមានតែព្រះអម្ចាស់ប៉ុណ្ណោះដែលអាចទតមើលឃើញ ។
មានក្រុមជំនុំជាង ៣០,០០០ កន្លែងដែលស្ថិតនៅក្នុងសាលាប្រជុំ និងអគារផ្សេងទៀតនៅ ១៩៥ ប្រទេស និងដែនដី ។១៩ ដោយសារដង្វាយមួយភាគក្នុងដប់ដ៏ស្មោះត្រង់របស់បងប្អូន សាសនាចក្រកំពុងបង្កើតឡើងនៅកន្លែងឆ្ងាយៗ ដែលបងប្អូនមិនធ្លាប់ទៅដល់ក្នុងចំណោមពួកបរិសុទ្ធសុចរិតដែលបងប្អូនមិនធ្លាប់ស្គាល់ ។
បច្ចុប្បន្ន សាសនាចក្រឧបត្ថម្ភដល់ស្ថាប័នថ្នាក់ឧត្តមសិក្សាចំនួនប្រាំ ។២០ ស្ថាប័នទាំងនេះមាននិស្សិតជាង ១៤៥,០០០ នាក់ ។ ថ្នាក់រៀនចំនួនមួយសែនមួយម៉ឺនត្រូវបានបង្រៀនជារៀងរាល់សប្តាហ៍នៅក្នុងថ្នាក់សិក្ខាសាលា និងវិទ្យាស្ថានរបស់យើង ។២១
ពរជ័យទាំងនេះ និងអ្វីៗជាច្រើនទៀតកើតឡើងក្នុងទំហំធំដូច្នេះ គឺមកពីកុមារ និងមនុស្សចាស់មកពីគ្រប់ស្ថានភាពសេដ្ឋកិច្ច ដែលបានបង់ដង្វាយមួយភាគក្នុងដប់ដោយស្មោះត្រង់ ។
ព្រះចេស្ដាខាងវិញ្ញាណនៃក្រឹត្យវិន័យដ៏ទេវភាពនៃដង្វាយមួយភាគក្នុងដប់មិនត្រូវបានវាស់វែងដោយចំនួនប្រាក់ដែលបានបរិច្ចាគទេ ដ្បិតទាំងអ្នកចម្រុងចម្រើន និងអ្នកក្រត្រូវបានបង្គាប់ដោយព្រះអម្ចាស់ឲ្យបរិច្ចាគ ១០ ភាគរយនៃប្រាក់ចំណូលរបស់ពួកគេ ។២២ អំណាចកើតចេញពីការទុកចិត្តលើព្រះអម្ចាស់របស់យើង ។២៣
ភាពកាន់តែបរិបូររបស់ព្រះអម្ចាស់ដែលបញ្ជូនតាមរយៈដង្វាយមួយភាគក្នុងដប់ដ៏សប្បុរសរបស់បងប្អូនបានពង្រឹងដល់ការបម្រុងទុកនៃសាសនាចក្រ ដោយផ្តល់ឱកាសដើម្បីជំរុញកិច្ចការរបស់ព្រះអម្ចាស់លើសពីអ្វីដែលយើងធ្លាប់ជួប ។ ព្រះអម្ចាស់ជ្រាបដឹងអ្វីៗគ្រប់យ៉ាង ហើយនៅពេលមកដល់ នោះយើងនឹងឃើញគោលបំណងដ៏ពិសិដ្ឋរបស់ទ្រង់ត្រូវបានសម្រេច ។២៤
ពរជ័យកើតមានមកតាមរបៀបជាច្រើន
ពរជ័យនៃដង្វាយមួយភាគក្នុងដប់កើតឡើងតាមរបៀបជាច្រើន ។ ក្នុងឆ្នាំ ១៩៩៨ ខ្ញុំបានអមដំណើរអែលឌើរ ហិនរី ប៊ី អាវរិង ទៅកាន់ការប្រជុំសាសនាចក្រដ៏ធំមួយនៅក្នុងតំបន់យូថាហ៍ ដែលឥឡូវគេស្គាល់ថាជា ស៊ីលីកុនស្លូប ដែលជាសហគមន៍នៃការច្នៃប្រឌិតដ៏អស្ចារ្យខាងបច្ចេកវិទ្យា ។ វាជាពេលវេលានៃភាពចម្រុងចម្រើន ហើយអែលឌើរ អាវរិង បានដាស់តឿនពួកបរិសុទ្ធអំពីការប្រៀបធៀបអ្វីដែលពួកគេមានជាមួយនឹងអ្នកដទៃ និងការចង់បានបន្ថែមទៀត ។ ខ្ញុំនឹងចងចាំជានិច្ចនូវការសន្យារបស់លោកថា នៅពេលពួកគេបានបង់មួយភាគក្នុងដប់ដោយស្មោះត្រង់ នោះបំណងប្រាថ្នារបស់ពួកគេដើម្បីមានទ្រព្យសម្បត្តិកាន់តែច្រើននឹងថយចុះ ។ ក្នុងរយៈពេលពីរឆ្នាំ សន្ទុះបច្ចេកវិទ្យាបានរីកចម្រើនឡើង ។ មនុស្សជាច្រើនបានបាត់បង់ការងារ ហើយក្រុមហ៊ុនបានជួបការលំបាកក្នុងអំឡុងពេលនៃការកែតម្រូវហិរញ្ញវត្ថុនេះ ។ អ្នកដែលបានធ្វើតាមដំបូន្មានរបស់អែលឌើរ អាវរិង ត្រូវបានប្រទានពរ ។
ការសន្យារបស់លោកបានរំឭកខ្ញុំអំពីបទពិសោធន៍មួយទៀត ។ ខ្ញុំបានជួប ឆាឡូតេ លីមមី ដែលមានអាយុ ១២ ឆ្នាំនៅជិត ខាខាសូនី ប្រទេសបារាំង ក្នុងឆ្នាំ ១៩៩០ ពេលកំពុងបម្រើជាប្រធានបេសកកម្ម ។ លីមមី គឺជាគ្រួសារដ៏ស្មោះត្រង់រស់នៅក្នុងបន្ទប់មួយដែលមានកូនប្រាំបីនាក់ ។ ពួកគេមានរូបភាពព្រះអង្គសង្គ្រោះ និងព្យាការីនៅលើជញ្ជាំង ។ នៅក្នុងការសម្ភាសដើម្បីទទួលពររបស់លោកអយ្យកោរបស់គាត់ ខ្ញុំបានសួរ ឆាឡូតេ ថាតើគាត់បានថ្វាយដង្វាយមួយភាគក្នុងដប់ដោយស្មោះត្រង់ឬអត់ ។ គាត់បានឆ្លើយថា « ចាស ប្រធាន អាន់ឌើរសិន ។ ម្ដាយខ្ញុំបានបង្រៀនខ្ញុំថា យើងនឹងទទួលបានពរជ័យខាងសាច់ឈាម និងពរជ័យខាងវិញ្ញាណ មកពីការថ្វាយដង្វាយមួយភាគក្នុងដប់របស់យើង ។ ម្ដាយខ្ញុំបានបង្រៀនខ្ញុំថា បើយើងថ្វាយដង្វាយមួយភាគក្នុងដប់របស់យើងជានិច្ច នោះយើងនឹងមិនចង់បានអ្វីទៀតឡើយ ។ ហើយប្រធាន អាន់ឌើរសិន យើងមិនចង់បានអ្វីទាំងអស់ » ។
ខ្ញុំបានការអនុញ្ញាតឲ្យចែកចាយរឿងរបស់គាត់ ឥឡូវនេះឆាឡូតេ មានអាយុ ៤៥ ឆ្នាំ ហើយបានផ្សារភ្ជាប់នៅក្នុងព្រះវិហារបរិសុទ្ធគាត់បានថ្លែងថា ៖ « ទីបន្ទាល់របស់ខ្ញុំពីដង្វាយមួយភាគក្នុងដប់គឺពិតប្រាកដណាស់នៅគ្រានោះ ហើយវាកាន់តែរឹងមាំនៅពេលនេះ ។ … ខ្ញុំមានអំណរគុណយ៉ាងខ្លាំងសម្រាប់បទញ្ញត្តិនេះ ។ នៅពេលដែលខ្ញុំរស់នៅតាមបទញ្ញត្តិនេះខ្ញុំបន្តទទួលបានពរជ័យយ៉ាងសន្ធឹកសន្ធាប់ » ។២៥
មានថ្ងៃមួយ យើងម្នាក់ៗនឹងបញ្ចប់ការធ្វើដំណើរលើផែនដីរបស់យើង ។ កាលពីម្ភៃប្រាំឆ្នាំមុន នៅប៉ុន្មានថ្ងៃមុនម្តាយក្មេករបស់ខ្ញុំ ម៉ាថា វិលលាមស៍ បានទទួលមរណភាពដោយជំងឺមហារីក គាត់បានទទួលមូលប្បទានបត្រតូចមួយនៅក្នុងសំបុត្រ ។ ភ្លាមៗនោះគាត់បានសុំឲ្យ ខាធី យកសៀវភៅមូលប្បទានបត្រគាត់មកដើម្បីគាត់ថ្វាយដង្វាយមួយភាគក្នុងដប់របស់គាត់ ។ ដោយសារម្តាយគាត់ខ្សោយខ្លាំងដែលគាត់មិនអាចសរសេរបាន ដូច្នេះ ខាធី បានសុំជួយសេរសេរមូលប្បទានបត្រឲ្យគាត់ ។ ម្តាយគាត់បានឆ្លើយថា « អត់ទេ ខាធី ។ ម៉ាក់ចង់ធ្វើខ្លួនឯង » ។ បន្ទាប់មក គាត់បានបន្ថែមយ៉ាងស្ងាត់ៗថា « ម៉ាក់ចង់ធ្វើត្រឹមត្រូវចំពោះព្រះអម្ចាស់ » ។ រឿងចុងក្រោយមួយដែល ខាធី បានធ្វើសម្រាប់ម្តាយគាត់ គឺត្រូវយកសំបុត្រដង្វាយមួយភាគក្នុងដប់នោះទៅឲ្យប៊ីស្សពគាត់ ។
កិច្ចការសំខាន់របស់ព្រះ
បងប្អូនប្រុសស្រី សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺ « ចេញពីទីអាប់អួ »២៦នាំមកនូវពរជ័យដ៏អស្ចារ្យទៅកាន់ទូទាំងផែនដី ។ យើងនឹងមានអ្នកដែលលើកទឹកចិត្តយើងឲ្យទៅមុខ និងអ្នកដែលមិនលើកទឹកចិត្តយើង ។ ខ្ញុំបានគិតពីពាក្យសម្តីដ៏ឈ្លាសវៃរបស់ កាម៉ាលាស ដែលជាអ្នកបានឃើញអព្ភូតហេតុរបស់សាវកពេត្រុស និងយ៉ូហាន បានព្រមានដល់ក្រុមប្រឹក្សានៅយេរូសាឡិម ៖
« ចូរដកខ្លួនពី [ បុរសទាំងនេះ ] … ដ្បិតបើសិនជាគំនិតគេ ឬការគេធ្វើនេះកើតឡើងពីមនុស្ស នោះនឹងត្រូវវិនាសទៅជាមិនខាន ៖
តែបើកើតមកពីព្រះវិញនោះ អ្នករាល់គ្នាពុំអាចនឹងធ្វើឲ្យវិនាសបានទេ ក្រែងអ្នករាល់គ្នាជាប់ទោសជាពួកអ្នកតយុទ្ធនឹងព្រះដែរ ។២៧
បងប្អូន និងខ្ញុំគឺជាផ្នែកសំខាន់នៃកិច្ចការរបស់ព្រះនៅលើផែនដីនេះ ។ យើងនឹងមិនវិនាសទេ ប៉ុន្តែនឹងបន្តឆ្លងកាត់ពិភពលោកនេះ ដោយរៀបចំផ្លូវសម្រាប់ការយាងមកវិញរបស់ព្រះអង្គសង្គ្រោះ ។ ខ្ញុំថ្លែងទីបន្ទាល់ចំពោះប្រសាសន៍របស់ប្រធាន រ័សុល អិម ណិលសុន ៖ « នៅពេលដ៏ខ្លីខាងមុខនេះ យើងនឹងឃើញការបើកសម្តែង ដ៏មហិមាអំពីព្រះចេស្តារបស់ព្រះអង្គសង្គ្រោះ ដែលលោកិយនេះ មិនធ្លាប់ បានឃើញពីមុនមក ។ នៅចន្លោះពេលឥឡូវនេះ និងពេលដែលទ្រង់យាងមក … នោះទ្រង់នឹងប្រទានឯកសិទ្ធិ ពរជ័យ និងអព្ភូតហេតុរាប់មិនអស់មកលើមនុស្សស្មោះត្រង់ » ។២៨
នេះគឺជាសាក្សីរបស់ខ្ញុំ ។ ព្រះយេស៊ូវគឺជាព្រះគ្រីស្ទ ។ នេះគឺជាកិច្ចការដ៏បរិសុទ្ធរបស់ទ្រង់ ។ ទ្រង់នឹងយាងមកម្តងទៀត ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕