អំណាចនៃការផ្សារភ្ជាប់
អំណាចនៃការផ្សារភ្ជាប់ ធ្វើឲ្យមានសេចក្ដីសង្គ្រោះដល់បុគ្គលម្នាក់ៗ ហើយមានភាពតម្កើងឡើងដល់គ្រួសារជាសាកលចំពោះកូនចៅនៃព្រះ ។
យ៉ាងហោចណាស់ វាបានព្យាករចាប់តាំងពីជំនាន់ អេសាយ១ ថានៅថ្ងៃចុងក្រោយ រាស្ដ្រនៃសេចក្ដីសញ្ញាពីបុរាណរបស់ព្រះអម្ចាស់ ជាវង្សអ៊ីស្រាអែល គួរតែ « ប្រមូលមកពីការបែកខ្ញែកដ៏យូរ ពីពួកកោះក្នុងសមុទ្រ និងពីទិសទាំងបួននៃផែនដី »២ ហើយបានស្តារ « ដែនដីទាំងឡាយនៃកេរ្តិ៍អាកររបស់គេវិញ » ។៣ ប្រធាន រ័សុល អិម ណិលសុន បានមានប្រសាសន៍ញឹកញាប់ និងដោយអានុភាព អំពីការប្រមូលផ្ដុំនេះ ដោយហៅការណ៍នេះថា « គឺជាកិច្ចការដ៏សំខាន់បំផុតមាននៅលើផែនដីសព្វថ្ងៃនេះ » ។៤
តើអ្វីជាគោលបំណងនៃការប្រមូលផ្តុំនេះ ?
តាមរយៈវិវរណៈទៅកាន់ព្យាការី យ៉ូសែប ស៊្មីធ ព្រះអម្ចាស់បានប្រកាស ពីគោលបំណងមួយគឺជាការការពាររាស្រ្តនៃសេចក្តីសញ្ញា ។ ទ្រង់មានបន្ទូលថា « ហើយប្រយោជន៍ឲ្យការប្រមូលគ្នាមកលើដែនដីស៊ីយ៉ូន និង មកលើស្តេកទាំងឡាយរបស់នាង [ នឹង ]បានទៅជាទីការពារ និង ជាទីជ្រកកោនពីព្យុះសង្ឃរា និង ពីសេចក្តីក្រោធដែលឥតលាយឡំកាលត្រូវបានចាក់បង្ហូរមកលើផែនដីទាំងមូល » ។៥ ពាក្យ « សេចក្ដីក្រោធ » នៅក្នុងបរិបទនេះ បើតាមការយល់ឃើញអាចជាផលវិបាកពីធម្មជាតិ មកពីការរីករាលដាលក្នុងការមិនគោរពតាមក្រឹត្យវិន័យ និងព្រះបញ្ញត្តិរបស់ព្រះ ។
អ្វីដែលសំខាន់បំផុត គោលបំណងនៃការប្រមូលផ្តុំគឺនាំយកពរជ័យនៃសេចក្តីសង្រ្គោះ និងភាពតម្កើងឡើងដល់អស់អ្នកដែលនឹងទទួលយក ។ វាគឺជារបៀបដែលការសន្យានៃសេចក្ដីសញ្ញាដែលប្រទានដល់អ័ប្រាហាំត្រូវបានយល់ដឹង ។ ព្រះអម្ចាស់បានប្រាប់ទៅ អ័ប្រាហាំ ថាតាមរយៈការងារបម្រើនៃពូជរបស់លោក « អស់ទាំងគ្រួសារនៅលើផែនដី [ នឹង ] បានពរ គឺដោយព្រះពរទាំងឡាយនៃដំណឹងល្អ ដែលជាព្រះពរទាំងឡាយខាងសេចក្ដីសង្គ្រោះ គឺខាងជីវិតដ៏នៅអស់កល្បជានិច្ច » ។៦ ប្រធាន ណិលសុន បានបញ្ជាក់តាមវិធីនេះ ៖ « នៅពេលយើងឱបក្រសោបដំណឹងល្អនេះ ហើយបានទទួលបុណ្យជ្រមុជទឹក នោះយើងលើកដាក់លើខ្លួនយើងនូវព្រះនាមដ៏ពិសិដ្ឋនៃព្រះយេស៊ូវគ្រីស្ទ ។ ពិធីបុណ្យជ្រមុជទឹកគឺជាទ្វារដែលនាំទៅកាន់ការប្រែក្លាយជាអ្នកស្នងមរតករួមគ្នាចំពោះសេចក្តីសន្យាទាំងអស់ ដែលព្រះអម្ចាស់បានប្រទានពីបុរាណដល់អ័ប្រាហាំ អ៊ីសាក យ៉ាកុប និងកូនចៅរបស់ពួកលោក ។៧
ក្នុងឆ្នាំ ១៨៣៦ ម៉ូសេបានលេចមកចំពោះព្យាការី យ៉ូសែប ស្ម៊ីធ នៅក្នុងព្រះវិហារបរិសុទ្ធ ខឺតឡង់ហើយ « បានប្រគល់… កូនសោទាំងឡាយ នៃការប្រមូលសាសន៍អ៊ីស្រាអែលពីទិសទាំងបួននៃផែនដី » ។៨ « នៅក្នុងឳកាសដដែលនោះ អេលីយ៉ាសបានលេចមក ហើយ « បានប្រគល់គ្រាកាន់កាប់ត្រួតត្រានៃដំណឹងល្អរបស់លោកអ័ប្រាហាំដោយប្រាប់ថា នៅក្នុងយើង និងពូជរបស់យើង នោះអស់ទាំងតំណមនុស្សបន្ទាប់ពីយើងមកនឹងបានពរ » ។៩ ដោយសិទ្ធិអំណាចនេះ ឥឡូវនេះ យើងនាំយកដំណឹងល្អនៃព្រះយេស៊ូវគ្រីស្ទ—ដំណឹងល្អនៃការប្រោសលោះតាមរយៈទ្រង់—ទៅគ្រប់ទិសទី និងគ្រប់បណ្តាជននៃផែនដី ហើយប្រមូលអស់អ្នកដែលមានបំណងចូលក្នុងសេចក្ដីសញ្ញានៃដំណឹងល្អ ។ ពួកគេ ក្លាយជា « ពូជនៃលោកអ័ប្រាហាំ និងជាសាសនាចក្រ និងនគរ និងជាពួករើសតាំងនៃព្រះ » ។១០
នៅក្នុងឱកាសដដែលនោះនៅក្នុងព្រះវិហារបរិសុទ្ធខឺតឡង់ មានសារទូតសួគ៌ាទីបីរូបបានលេចមកចំពោះយ៉ូសែប ស្ម៊ីធ និង អូលីវើរ ខៅឌើរី ។ ខ្ញុំសូមថ្លែងអំពីព្យាការី អេលីយ៉ា និងសិទ្ធិអំណាច និងកូនសោ ដែលលោកបានស្ដារឡើងវិញ ខ្ញុំចង់និយាយអំពីរឿងនេះនាថ្ងៃនេះ ។១១ គឺអំណាចដើម្បីធ្វើឲ្យពិធីបរិសុទ្ធបព្វជិតភាពទាំងអស់មានសុពលភាព និងធ្វើឲ្យអំណាចនេះអាចចងភ្ជាប់ទាំងផែនដី និង ស្ថានសួគ៌—អំណាចនៃការផ្សារភ្ជាប់—គឺសំខាន់ណាស់សម្រាប់ការប្រមូលផ្ដុំ និងរៀបចំរាស្ត្រនៃសេចក្ដីសញ្ញា នៅផ្នែកទាំងសងខាងនៃវាំងនន ។
កាលប៉ុន្មានឆ្នាំមុន មរ៉ូណៃបានប្រាប់ដល់យ៉ូសែប ស្ម៊ីធយ៉ាងច្បាស់ថា អេលីយ៉ានឹងនាំមកនូវសិទ្ធិអំណាចបព្វជិតភាពសំខាន់ៗ ៖« មើលចុះ យើងនឹងបើកសម្ដែងដល់អ្នករាល់គ្នានូវបព្វជិតភាព ដោយដៃនៃលោក អេលីយ៉ា ជាព្យាការី » ។១២ ក្រោយមកយ៉ូសែប ស៊្មីធ បានពន្យល់ ៖ « ហេតុអ្វីបានជាបញ្ជូន អេលីយ៉ាឲ្យមក ? ដោយសារលោកកាន់កូនសោនៃសិទ្ធិអំណាច ដើម្បីធ្វើការបម្រើក្នុងគ្រប់ពិធីបរិសុទ្ធនៃបព្វជិតភាព ហើយ [ លុះត្រាតែ ] សិទ្ធិអំណាចបានប្រគល់ឲ្យ បើពុំនោះទេ ពិធីបរិសុទ្ធមិនអាចប្រព្រឹត្តទៅដោយសុចរិតបានឡើយ » ១៣ពិធីបរិសុទ្ធនឹងមិនសុពល សម្រាប់ពេលនេះ និង អស់កល្បជានិច្ចទេ » ។១៤
នៅក្នុងការបង្រៀនមួយដែលឥឡូវនេះបានអនុមតិជាខគម្ពីរនៅក្នុង គោលលទ្ធិ និងសេចក្តីសញ្ញា ព្យាការី បានថ្លែងថា ៖ « ការណ៍នេះអាចមើលទៅថា ជាគោលលទ្ធិមួយដ៏ធំដុំណាស់ ដែលយើងយកមកនិយាយថា—អំណាចដែលកត់ ឬចងនៅផែនដី ហើយចងទុកនៅស្ថានសួគ៌ដែរ ។ ទោះជាយ៉ាងណា នៅគ្រប់សម័យកាល ពេលណាព្រះអម្ចាស់ទ្រង់បានប្រទាននូវការកាន់កាប់ត្រួតត្រានៃបព្វជិតភាពដល់មនុស្សណាម្នាក់ ឬមនុស្សមួយក្រុមណាមួយ ដោយវិវរណៈជាក់ស្ដែង នោះអំណាចនេះក៏ត្រូវបានប្រទានឲ្យជាដរាបដែរ ។ ម្ល៉ោះហើយ អ្វីក៏ដោយដែលពួកអ្នកមានសិទ្ធិអំណាចបានប្រព្រឹត្តដោយនូវព្រះនាមនៃព្រះអម្ចាស់ ហើយបានប្រព្រឹត្ត ដោយពិតស្មោះត្រង់ ហើយបានកត់បញ្ជីត្រឹមត្រូវ និងស្មោះត្រង់នូវអ្វីទាំងនោះ ការណ៍នោះបានក្លាយទៅជាក្រឹត្យវិន័យនៅផែនដី និងនៅស្ថានសួគ៌ដែរ ហើយមិនអាចបំបាត់បានឡើយ ស្របតាមបញ្ញត្តិទាំងឡាយរបស់ព្រះយេហូវ៉ាដ៏មហិមា » ។១៥
យើងមានទំនោរគិតថា សិទ្ធិអំណាចនៃការផ្សារភ្ជាប់ អនុវត្តតែចំពោះពិធីបរិសុទ្ធក្នុងព្រះវិហារបរិសុទ្ធមួយចំនួនប៉ុណ្ណោះ ប៉ុន្តែសិទ្ធិអំណាចនោះគឺចាំបាច់ដើម្បីធ្វើឲ្យពិធីបរិសុទ្ធនានាមានប្រសិទ្ធភាព ហើយ ចងភ្ជាប់ហួសពីសេចក្ដីស្លាប់ ។១៦ អំណាចនៃការផ្សារភ្ជាប់បិទត្រាស្របច្បាប់លើពិធីបុណ្យជ្រមុជទឹករបស់បងប្អូន ឧទាហរណ៍ ដូច្នេះវាត្រូវបានទទួលស្គាល់នៅទីនេះ និងស្ថានសួគ៌ ។ ទីបំផុត ពិធីបរិសុទ្ធបព្វជិតភាពទាំងអស់ ត្រូវបានធ្វើឡើងក្រោមកូនសោនៃប្រធានសាសនាចក្រ ដូចជាប្រធាន យ៉ូសែប ហ្វីលឌីង ស្ម៊ីធ បានពន្យល់ ៖ « [ ប្រធានសាសនាចក្រ ] បានប្រគល់សិទ្ធីអំណាចដល់យើង លោកបានដាក់អំណាចនៃការផ្សារភ្ជាប់នៅក្នុងបព្វជិតភាពរបស់យើង ដោយសារលោកកាន់កូនសោទាំងនោះ » ។១៧
មានគោលបំណងសំខាន់មួយទៀតក្នុងការប្រមូលផ្តុំអ៊ីស្រាអែលដែលមានអត្ថន័យពិសេសនៅពេលយើងនិយាយអំពីពិធីផ្សារភ្ជាប់នៅលើផែនដី និងនៅស្ថានសួគ៌ — នោះគឺជាការសាងសង់ និងដំណើរការនៃព្រះវិហារបរិសុទ្ធ ។ កាលព្យាការី យ៉ូសែប ស្ម៊ីធ បានពន្យល់ថា « តើអ្វីជាវត្ថុបំណងនៃការប្រមូលផ្តុំ …រាស្ត្រនៃព្រះនៅគ្រប់ជំនាន់នៃមនុស្សលោក ? … គោលបំណងចម្បង គឺដើម្បីសង់ដំណាក់មួយថ្វាយព្រះអម្ចាស់ ជាទីដែលទ្រង់អាចបើកសម្ដែង ដល់រាស្ត្រទ្រង់នូវពិធីបរិសុទ្ធនៃដំណាក់ទ្រង់ និងសិរីល្អនៃនគរទ្រង់ ហើយបង្រៀនពួកគេអំពីរបៀបនៃសេចក្ដីសង្គ្រោះ ដ្បិតមានពិធីបរិសុទ្ធ និងគោលការណ៍ជាក់លាក់ ពេលវាត្រូវបង្រៀន ហើយអនុវត្តគឺត្រូវធ្វើឡើងនៅក្នុងកន្លែងមួយ ឬ ក្នុងដំណាក់ដែលបានសង់ឡើងដើម្បីគោលបំណងនោះ » ។១៨
សុពលភាពដែលអំណាចនៃការផ្សារភ្ជាប់ផ្តល់ដល់ ពិធីបរិសុទ្ធនៃបព្វជិតភាពរួមមានពិធីបរិសុទ្ធផ្សេងៗដែលធ្វើឡើងនៅកន្លែងដែលព្រះអម្ចាស់បានកំណត់—គឺព្រះវិហារបរិសុទ្ធរបស់ទ្រង់ ។ នៅទីនេះ យើងឃើញពីភាពអស្ចារ្យ និងភាពពិសិដ្ឋនៃអំណាចនៃការផ្សារភ្ជាប់—វាធ្វើឲ្យបុគ្គលម្នាក់ៗ និងក្រុមគ្រួសារ ទទួលបានសេចក្តីសង្គ្រោះ និងភាពលើកតម្កើងដែលវាមានជាសកលសម្រាប់បុត្រាបុត្រីរបស់ព្រះនៅគ្រប់ទីកន្លែង និងគ្រប់ពេលខណៈពេលរស់នៅលើផែនដី ។ គ្មានទ្រឹស្ដី ឬទស្សនវិជ្ជា ឬសិទ្ធិអំណាចណាផ្សេងអាចប្រៀបផ្ទឹមនឹង ឱកាសដែលរួមបញ្ចូលពិធីការទាំងអស់នេះទេ ។ អំណាចនៃការផ្សារភ្ជាប់នេះគឺជាការបង្ហាញដ៏ឥតខ្ចោះអំពីសេចក្ដីយុត្តិធម៌ ក្តីមេត្តានិងក្តីស្រឡាញ់របស់ព្រះ ។
ដោយមានសិទ្ធិទទួលបានអំណាចនៃការផ្សារភ្ជាប់ នោះដួងចិត្តរបស់យើងបានបង្វែរទៅរកបុព្វការីជនដែលបានស្លាប់ទៅពីមុន ។ ការប្រមូលផ្ដុំនៅថ្ងៃចុងក្រោយដើម្បីចូលទៅក្នុងសេចក្តីសញ្ញាត្រូវឆ្លងកាត់វាំងនន ។ តាមលំដាប់ដ៏ឥតខ្ចោះរបស់ព្រះ អ្នកនៅរស់មិនអាចទទួលបានបទពិសោធន៍នៃជីវិតដ៏នៅអស់កល្បពេញលេញដោយគ្មានភ្ជាប់ទំនាក់ទំនងដ៏យូរអង្វែងទៅនឹង « ឪពុក » ដែលជាបុព្វការីជនរបស់យើងនោះទេ ។ ម្យ៉ាងទៀត ការរីកចម្រើននៃអស់អ្នកដែលនៅម្ខាងនៃវាំងនន ឬអ្នកដែលឆ្លងកាត់វាំងនននៃសេចក្តីស្លាប់ ដោយមិនបានទទួលប្រយោជន៍ពីការផ្សារភ្ជាប់ គឺពុំបានទទួលពេញលេញទេទាល់តែពួកគេ និងយើង កូនចៅពួកគេ ហើយយើងនិងពួកគេ ត្រូវបានចងភ្ជាប់ដោយពិធីបរិសុទ្ធផ្សេងៗតាមលំដាប់នៃព្រះ ។១៩ ការប្តេជ្ញាចិត្តជួយគ្នាទៅវិញទៅមកឆ្លងកាត់វាំងននអាចចាត់ទុកថា ជាការសន្យានៃសេចក្ដីសញ្ញាមួយ ដែលជាផ្នែកមួយនៃសេចក្តីសញ្ញាថ្មី ហើយអស់កល្បអស់កាលជានិច្ច ។ តាមសម្ដីរបស់យ៉ូសែប ស៊្មីធ ថាយើងចង់ « ផ្សារភ្ជាប់បុព្វការីជនរបស់យើង ដើម្បីឆ្ពោះទៅមុខ [ ជាមួយយើង ] នៅក្នុងដំណើររស់ឡើងវិញដំបូង » ។២០
ការបើកសម្តែងដ៏ខ្ពង់ខ្ពស់ និងបរិសុទ្ធបំផុតនៃអំណាចនៃការផ្សារភ្ជាប់គឺនៅក្នុងការរួបរួមដ៏អស់កល្បរបស់បុរស និងស្ត្រីនៅក្នុងចំណងអាពាហ៍ពិពាហ៍ និងការផ្សារភ្ជាប់មនុស្សលោកទៅគ្រប់ជំនាន់របស់ពួកគេ ។ ដោយសារសិទ្ធិអំណាចដើម្បីធ្វើពិធីបរិសុទ្ធទាំងនេះ គឺពិសិដ្ឋបំផុត នោះប្រធានសាសនាចក្រមើលទៅលើការផ្ទេរសិទ្ធិនេះទៅដល់អ្នកដទៃដោយផ្ទាល់ ។ ប្រធានហ្គ័រដិន ប៊ី ហ៊ីងគ្លី បានមានប្រសាសន៍ក្នុងគ្រាមួយថា « ខ្ញុំបាននិយាយច្រើនដងហើយថា បើគ្មានអ្វីផ្សេងពីភាពសោកសៅ ការឈឺចាប់ និងការប៉ះទង្គិចយ៉ាងខ្លាំងដោយសារការស្ដារឡើងវិញក្រៅពីអំណាចនៃការផ្សារភ្ជាប់ នៃបព្វជិតភាពដ៏បរិសុទ្ធដើម្បីចងក្រុមគ្រួសារជាមួយគ្នាជានិរន្ដរ៍នោះទេ នោះវាមានតម្លៃសមហើយ » ។២១
បើគ្មានការផ្សារភ្ជាប់ដែលបង្កើតក្រុមគ្រួសារដ៏អស់កល្បជានិច្ច ហើយភ្ជាប់ជំនាន់នេះ និងជំនាន់ក្រោយៗទៀតទេ នោះយើងនឹងត្រូវបានទុកចោលនៅក្នុងភាពអស់កល្បជានិច្ច ដោយគ្មានទាំងឫស ឬមែក— ដែលគ្មានទាំងបុព្វការីជន ឬកូនចៅទេ ។ វាគឺជាស្ថានភាពរសាត់អណ្តែត ផ្តាច់ទំនាក់ទំនងគ្នា ឬម្យ៉ាងវិញទៀតថា ជាទំនាក់ទំនងដែលរារាំងទំនាក់ទំនងអាពាហ៍ពិពាហ៍ និងគ្រួសារដែលតែងតាំងដោយព្រះ ២២ ឬម្យ៉ាងវិញទៀតថា វានឹងបង្អាក់ដល់គោលបំណងនៃការបង្កើតផែនដី ។ បើវាក្លាយជាលំនាំ នោះគឺវាស្មើនឹងផែនដីនេះត្រូវបានវាយដោយបណ្តាសា ឬ « កម្ទេចចោលសូន្យឈឹង » ក្នុងកាលព្រះអម្ចាស់យាងមក ។២៣
យើងអាចមើលឃើញពីមូលហេតុដែល « អាពាហ៍ពិពាហ៍រវាងបុរស និងស្ត្រី គឺត្រូវបានតែងតាំងឡើងដោយព្រះ ហើយថាគ្រួសារជាផ្នែកដ៏សំខាន់មួយនៅក្នុងផែនការរបស់ព្រះដ៏បង្កបង្កើតសម្រាប់គោលដៅដ៏នៅអស់កល្បជានិច្ចនៃកូនចៅរបស់ទ្រង់ » ។២៤ ក្នុងពេលដំណាលគ្នានេះ យើងទទួលស្គាល់ថានៅក្នុងវត្តមានដែលមិនឥតខ្ចោះនេះ មនុស្សមួយចំនួន គិតថា រឿងនេះ ពុំមែនជាការពិត ឬអាចទៅរួចនោះទេ ។ ប៉ុន្តែយើងមានក្តីសង្ឃឹមលើព្រះគ្រីស្ទ ។ ខណៈពេលយើងរង់ចាំព្រះអម្ចាស់ ប្រធាន អិម រ័សុល បាឡឺដ បានរំព្ញកយើងថា « ព្រះគម្ពីរ និងពួកព្យាការីថ្ងៃចុងក្រោយបញ្ជាក់ថា មនុស្សគ្រប់គ្នាដែលស្មោះត្រង់ក្នុងការរក្សាសេចក្ដីសញ្ញានៃដំណឹងល្អ នឹងមានឱកាសសម្រាប់ភាពលើកតម្កើង » ។២៥
អ្នកខ្លះបានជួបប្រទះនឹងស្ថានភាពគ្រួសារមិនសប្បាយចិត្ត និងឈឺថ្កាត់ ហើយប្រាថ្នាចង់បានទំនាក់ទំនងគ្រួសារដ៏អស់កល្បជានិច្ចខ្លះ ។ អែលឌើរ ដេវីឌ អេ បែដណា បានធ្វើការសង្កេតលើរឿងនេះ ៖ « ចំពោះបងប្អូនដែលបានជួបការឈឺចាប់ដោយសារការលះលែងគ្នានៅក្នុងគ្រួសារ ឬឈឺចាប់ដោយសារការបំពានទំនុកចិត្ត សូមចាំថា វាចាប់ផ្ដើម ម្តងទៀតជាមួយនឹងបងប្អូន [ នោះជាលំនាំរបស់ព្រះសម្រាប់ក្រុមគ្រួសារ ] ! ចំណងភ្ជាប់មួយនៅក្នុងតំណភ្ជាប់នៃជំនាន់ទាំងឡាយរបស់បងប្អូនអាចនឹងត្រូវផ្ដាច់ ប៉ុន្តែចំណងភ្ជាប់សុចរិតផ្សេងទៀត និងអ្វីដែលនៅសេសសល់នៃតំណភ្ជាប់នោះគឺមានសារៈសំខាន់ដ៏អស់កល្ប ។ បងប្អូនអាចបន្ថែមកម្លាំងដល់តំណភ្ជាប់របស់បងប្អូន ហើយប្រហែលជាជួយស្ដារចំណងដែលដាច់នោះឡើងវិញផង ។ កិច្ចការនោះអាចសម្រេចបានម្ដងមួយៗ » ។២៦
នៅក្នុងពិធីបុណ្យសពរបស់ ស៊ិស្ទើរ ផាត ហូឡិន ជាភរិយារបស់អែលឌើរ ជែហ្វ្រី អ័រ ហូឡិន កាលពីខែកក្កដាកន្លងទៅ ប្រធាន រ័សុល អិម ណិលសុន បានបង្រៀនថា ៖ « ថ្ងៃណាមួយ ផាទ្រីស្សា និង ជែហ្វ្រី នឹងជួបជុំគ្នាម្តងទៀត ។ ក្រោយមក កូនៗ និងកូនចៅជំនាន់ក្រោយដែលគោរពសេចក្តីសញ្ញារបស់ពួកគេនឹងចូលរួមជាមួយពួកគេ ដើម្បីទទួលបទពិសោធន៍នៃភាពពេញលេញនៃអំណរដែលព្រះរក្សាទុកសម្រាប់បុត្រាបុត្រីដ៏ស្មោះត្រង់របស់ទ្រង់ ។ សូមដឹងថាយើងយល់ដឹងថាថ្ងៃដ៏សំខាន់បំផុតក្នុងជីវិតរបស់ ផាទ្រីស្សា ពុំមែនជាថ្ងៃកំណើត ឬថ្ងៃមរណភាពរបស់គាត់ទេ ។ ថ្ងៃដ៏សំខាន់បំផុតរបស់គាត់គឺ ថ្ងៃទី ០៧ ខែ មិថុនា ឆ្នាំ ១៩៦៣ ជាពេលដែលគាត់ និង ជែហ្វ្រី បានផ្សារភ្ជាប់នៅក្នុងព្រះវិហារបរិសុទ្ធ សេន ចច … ហេតុអ្វីបានជាការណ៍នេះសំខាន់ម្ល៉េះ ? ព្រោះតែផែនដីបានបង្កើតឡើង ដើម្បីក្រុមគ្រួសារអាចបង្កបង្កើត និងផ្សារភ្ជាប់នឹងគ្នា ។ សេចក្ដីសង្គ្រោះគឺជាកិច្ចការនៃបុគ្គលម្នាក់ៗ ប៉ុន្តែភាពលើកតម្កើងឡើងគឺជាកិច្ចការជាគ្រួសារមួយ ។ គ្មាននរណាម្នាក់អាចទទួលបានភាពលើកតម្កើង តែម្នាក់ឯងទេ » ។
ពេលកន្លងទៅនេះ ភរិយាខ្ញុំ និងខ្ញុំបានចូលរួមជាមួយមិត្តសម្លាញ់ម្នាក់ក្នុងបន្ទប់ផ្សារភ្ជាប់នៃព្រះវិហារបរិសុទ្ធ បោនទីហ្វុល យូថាហ៍ ។ ខ្ញុំបានជួបមិត្តម្នាក់នេះជាលើកដំបូងកាលគាត់នៅក្មេងរស់នៅ ខដូបា ប្រទេស អាហ្សង់ទីន ។ ដៃគូផ្សព្វផ្សាយសាសនារបស់ខ្ញុំ និងខ្ញុំកំពុងដើរជួបនិយាយនឹងមនុស្សនៅតំបន់មួយ ដែលនៅមិនឆ្ងាយពីការិយាល័យបេសកកម្មប៉ុន្មានទេ ហើយគាត់បានបើកទ្វារ នៅពេលយើងទៅដល់ផ្ទះគាត់ ។ ដល់ពេលមួយគាត់និងម្ដាយ ព្រមទាំងបងប្អូនបង្កើតគាត់បានចូលរួមក្នុងសាសនាចក្រ ហើយពួកគេបន្តនៅជាសមាជិកដ៏ស្មោះត្រង់ ។ គាត់គឺជាស្ត្រីដ៏គួរឲ្យស្រឡាញ់ ហើយថ្ងៃនេះយើងនៅក្នុងព្រះវិហារបរិសុទ្ធ ដើម្បីផ្សារភ្ជាប់ឪពុកម្ដាយគាត់ដែលបានស្លាប់ទៅនោះជាមួយគ្នា ហើយបន្ទាប់មកផ្សាភ្ជាប់គាត់ទៅនឹងឪពុកម្ដាយ ។
គូស្វាមីភរិយាដែលជាមិត្តជិតស្និទ្ធរាប់ឆ្នាំមកនេះបានធ្វើជាតំណាងឲ្យឪពុកម្តាយរបស់គាត់នៅឯទីអាសនា ។ វាជាពេលវេលាដ៏រំជួលចិត្តមួយ ដែលកាន់តែផ្អែមល្ហែម នៅពេលមិត្តជនជាតិអាហ្សង់ទីនរបស់យើងបានផ្សារភ្ជាប់ជាមួយនឹងឪពុកម្តាយរបស់គាត់ ។ ពួកយើងមានគ្នាតែប្រាំមួយនាក់ប៉ុណ្ណោះនៅរសៀលដ៏ស្ងប់ស្ងាត់ចេញពីពិភពលោកនោះ ប៉ុន្តែជារឿងដែលសំខាន់បំផុតមួយកំពុងកើតឡើងលើផែនដីនេះ ។ ខ្ញុំពេញចិត្តដែលតួនាទី និងទំនាក់ទំនងរបស់ខ្ញុំបានបំពេញពេញលេញ ចាប់ពីគ្រាដែលគោះទ្វារផ្ទះគាត់ ក្នុងនាមជាអ្នកផ្សព្វផ្សាយសាសនាវ័យក្មេង រហូតដល់ការធ្វើពិធីបរិសុទ្ធនៃការផ្សារភ្ជាប់ ដែលភ្ជាប់គាត់ទៅនឹងឪពុកម្ដាយ និងបុព្វការីជនរបស់គាត់ ជាច្រើនឆ្នាំក្រោយមកនោះ ។
នេះជាទិដ្ឋភាពដែលកើតឡើងឥតឈប់ឈរនៅជុំវិញពិភពលោកនៅក្នុងព្រះវិហារបរិសុទ្ធ ។ នេះគឺជាជំហានចុងក្រោយបង្អស់ក្នុងការប្រមូលផ្តុំរាស្រ្តនៃសេចក្ដីសញ្ញា ។ វាគឺជាឯកសិទ្ធិខ្ពស់បំផុតនៃសមាជិកភាពរបស់បងប្អូននៅក្នុងសាសនាចក្រនៃព្រះយេស៊ូវគ្រីស្ទ ។ ខ្ញុំសន្យាថា នៅពេលបងប្អូនស្វែងរកឯកសិទ្ធិនោះដោយស្មោះត្រង់ ក្នុងកាលពេលវេលានេះ ឬដ៏អស់កល្បជានិច្ច ឯកសិទ្ធិនោះប្រាកដជាក្លាយជារបស់បងប្អូន ។
ខ្ញុំសូមថ្លែងទីបន្ទាល់ថា អំណាចនៃការផ្សារភ្ជាប់ និងសិទ្ធិអំណាចដែលបានស្ដារឡើងវិញមកកាន់ផែនដីតាមរយៈ យ៉ូសែប ស្ម៊ីធ គឺពិត អ្វីដែលត្រូវបានចងភ្ជាប់នៅលើផែនដី គឺពិតជាចងភ្ជាប់នៅស្ថានសួគ៌ដែរ ។ ខ្ញុំសូមថ្លែងទីបន្ទាល់ថា ប្រធាន រ័សុល អិម ណិលសុន ជាប្រធាននៃសាសនាចក្រ គឺជាបុរសតែម្នាក់នៅលើផែនដីសព្វថ្ងៃនេះ ដែលតាមរយៈកូនសោ លោក ដឹកនាំការប្រើប្រាស់អំណាចដ៏ខ្ពង់ខ្ពស់នេះផ្ទាល់ ។ ខ្ញុំថ្លែងទីបន្ទាល់ថា ដង្វាយធួននៃព្រះយេស៊ូវគ្រីស្ទបានធ្វើឲ្យអមតភាពក្លាយជាការពិត ហើយ ភាពលើកតម្កើងនៅក្នុងទំនាក់ទំនងគ្រួសារអាចក្លាយជាការពិត ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕