សេចក្តីពិតដ៏អស់កល្ប

សន្និសីទទូទៅ ខែ តុលា ឆ្នាំ ២០២៣

សេចក្តីពិតដ៏អស់កល្ប

ដោយអែលឌើរ ចន ស៊ី ភីងគ្រី ជុញ្ញ័រ

ក្នុងពួកចិតសិបនាក់

តម្រូវការរបស់យើងដើម្បីស្គាល់សេចក្តីពិតរឹតតែសំខាន់ខ្លាំងជាងមុនទៅទៀត !

បងប្អូនប្រុសស្រី អរគុណចំពោះការលះបង់របស់បងប្អូនចំពោះព្រះជាព្រះវរបិតា និងព្រះរាជបុត្រាទ្រង់ គឺព្រះយេស៊ូវគ្រីស្ទ ហើយអរគុណចំពោះសេចក្ដីស្រឡាញ់ និងការបម្រើរបស់បងប្អូនចំពោះគ្នាទៅវិញទៅមក ។ បងប្អូនពិតជាអស្ចារ្យណាស់ !

សេចក្ដីផ្ដើម

បន្ទាប់ពីភរិយាខ្ញុំ អានី និងខ្ញុំបានទទួលការហៅឲ្យបម្រើជាអ្នកដឹកនាំបេសកកម្មពេញម៉ោង គ្រួសារយើងបានតាំងចិត្តរៀនឈ្មោះអ្នកផ្សព្វផ្សាយសាសនាម្នាក់ៗ មុនពេលមកទៅដល់តំបន់បេសកកម្ម។ យើងទទួលបានរូបថត ធ្វើជាកាតឈ្មោះ ហើយចាប់ផ្តើមសម្គាល់មុខ និងទន្ទេញឈ្មោះ ។

ពេលយើងមកដល់ យើងបានធ្វើសន្និសីទណែនាំខ្លួនជាមួយនឹងអ្នកផ្សព្វផ្សាយសាសនាទាំងអស់ ។ ខណៈពេលយើងជួបជុំគ្នា ខ្ញុំបានឮកូនប្រុសអាយុប្រាំបួនឆ្នាំរបស់យើង ៖

« រីករាយដែលបានជួបអ្នកសំ » ។

« រ៉ាជែល តើអ្នកមកពីណា ? »

« អូ !ដាវីឌ ឯងខ្ពស់ណាស់ ! »

ដោយក្តីបារម្ភ ខ្ញុំបានដើរសំដៅកូនប្រុសយើង ហើយខ្សឹបថា « កូន កុំភ្លេច ហៅអ្នកផ្សព្វផ្សាយសាសនាថាជា អែលឌើរ ឬស៊ីស្ទើរ » ។

គាត់មើលមកខ្ញុំឆ្ងល់ ហើយនិយាយថា « ប៉ា ខ្ញុំគិតថាយើងគួរតែទន្ទេញឈ្មោះរបស់ពួកគេ » ។ កូនប្រុសយើងបានធ្វើអ្វីដែលគាត់គិតថាត្រឹមត្រូវដោយផ្អែកលើការយល់ដឹងរបស់គាត់ ។

ដូច្នេះ តើអ្វីទៅជាការយល់ដឹងរបស់យើងអំពីសេចក្ដីពិតក្នុងពិភពលោកបច្ចុប្បន្ន ? ទស្សនៈជ្រុលនិយម របាយការណ៍លម្អៀង និងទិន្នន័យដែលគ្មានព័ត៌មានគ្រប់គ្រាន់ បានវាយលុកមកលើយើងឥតឈប់ឈរ ។ ទន្ទឹមនឹងនេះដែរ ទំហំ និងប្រភពនៃព័ត៌មានកំពុងកើនឡើង ។ តម្រូវការរបស់យើងដើម្បីស្គាល់សេចក្តីពិតរឹតតែសំខាន់ខ្លាំងជាងមុនទៅទៀត !

សេចក្ដីពិតសំខាន់សម្រាប់យើងដើម្បីបង្កើត និងពង្រឹងទំនាក់ទំនងជាមួយព្រះ រកឃើញភាពសុខសាន្ត និងអំណរ ហើយអាចបំពេញនូវសក្តានុពលដ៏ទេវភាពរបស់យើង ។ ថ្ងៃនេះ សូមពិចារណាសំណួរខាងក្រោមនេះ ៖

តើអ្វីទៅជាសេចក្តីពិត ហើយហេតុអ្វីបានជាវាសំខាន់ ?
តើយើងស្វែងរកវាដោយរបៀបណា ?
ពេលយើងរកឃើញសេចក្ដីពិតហើយ តើយើងអាចចែកចាយវាដោយរបៀបណា ?

សេចក្តីពិតគឺអស់កល្បជានិច្ច

ព្រះអម្ចាស់បានបង្រៀនយើងនៅក្នុងបទគម្ពីរថា « សេចក្ដីពិតគឺជាការចេះដឹងអំពីការណ៍ទាំងឡាយដែលមាននៅពេលនេះ និង ការណ៍ទាំងឡាយដែលមានមកហើយ ហើយនឹងការណ៍ទាំងឡាយដែលនឹងមានខាងមុខ » ( គោលលទ្ធិ និងសេចក្តីសញ្ញា ៩៣:២៤ ។ វា « ក៏ពុំបានបង្កើត ឬធ្វើឡើង » ដែរ (គោលលទ្ធិ និងសេចក្តីសញ្ញា ៩៣:២៩)ហើយ « ពុំមានទីបំផុតឡើយ » (គោលលទ្ធិ និងសេចក្តីសញ្ញា ៨៨:៦៦).^១សេចក្ដីពិតគឺឥតខ្ចោះ ស្ថិតស្ថេរ និងមិនប្រែប្រួល ។ និយាយម្យ៉ាងទៀត សេចក្ដីពិតគឺអស់កល្បជានិច្ច ។^២

សេចក្តីពិតជួយយើងឲ្យចៀសវាងពីការបោកបញ្ជោត^៣ អាចដឹងខុស និងត្រូវ ^៤ទទួលបានការការពារ^៥និងរកបានការលួងលោម និងការជាសះស្បើយ ។^៦ សេចក្ដីពិតក៏អាចដឹកនាំសកម្មភាពយើង ^៧ធ្វើឱ្យយើងមានសេរីភាព^៨ញែកយើងជាបរិសុទ្ធ^៩ហើយនាំយើងទៅកាន់ជីវិតដ៏នៅអស់កល្បជានិច្ចផងដែរ ។^១០

ព្រះបើកសម្ដែងសេចក្ដីពិតដ៏អស់កល្បជានិច្ច

ព្រះបើកសម្តែងសេចក្តីពិតដ៏អស់កល្បជានិច្ចមកកាន់យើង តាមរយៈបណ្តាញនៃទំនាក់ទំនងប្រកបដោយវិវរណៈ ដែលរួមមានព្រះទ្រង់ផ្ទាល់ ព្រះយេស៊ូវគ្រីស្ទ ព្រះវិញ្ញាណបរិសុទ្ធ ព្យាការី និងពួកយើង ។ ខ្ញុំសូមពិភាក្សាអំពីតួនាទីផ្សេងៗក្នុងទំនាក់ទំនងអន្ដរកម្មនេះ ដែលតួអង្គនីមួយៗដើរតួក្នុងដំណើរការនេះ ។

ទីមួយ ព្រះគឺជាប្រភពនៃសេចក្ដីពិតដ៏អស់កល្បជានិច្ច ។^១១ ទ្រង់ និងព្រះរាជបុត្រារបស់ទ្រង់ ព្រះយេស៊ូវគ្រីស្ទ ^១២មានការយល់ដឹងដ៏ល្អឥតខ្ចោះអំពីសេចក្ដីពិត ហើយតែងតែធ្វើសកម្មភាពស្របទៅនឹងគោលការណ៍ និងក្រឹត្យវិន័យដ៏ពិតជានិច្ច ។^១៣ អំណាចនេះ អនុញ្ញាតឲ្យពួកទ្រង់ដើម្បីបង្កើត និងគ្រប់គ្រងពិភពលោក^១៤ ក៏ដូចជាដើម្បីស្រឡាញ់ ដឹកនាំ និងបីបាច់យើងម្នាក់ៗយ៉ាងល្អឥតខ្ចោះ ។^១៥ យើង ទ្រង់ចង់ឲ្យយើងយល់ និងអនុវត្តសេចក្ដីពិត ដើម្បីយើងអាចរីករាយនឹងពរជ័យដែលទ្រង់មាន ។^១៦ ពួកគេអាចចែកចាយសេចក្ដីពិតដោយផ្ទាល់ ឬជាធម្មតាតាមរយៈអ្នកនាំសារដូចជាព្រះវិញ្ញាណបរិសុទ្ធ ទេវតា ឬពួកព្យាការីដែលនៅរស់។

ទីពីរ ព្រះវិញ្ញាណបរិសុទ្ធថ្លែងទីបន្ទាល់អំពីសេចក្ដីពិតគ្រប់យ៉ាង ។^១៧ ទ្រង់បើកសម្ដែងសេចក្ដីពិតដល់យើងផ្ទាល់ថែមទាំងធ្វើជាសាក្សីនៃសេចក្ដីពិត ដែលបានបង្រៀនពីអ្នកដទៃ ។ ជាទូទៅ ចំណាប់អារម្មណ៍មកពីព្រះវិញ្ញាណគឺជាគំនិតក្នុងចិត្ត និងអារម្មណ៍ក្នុងបេះដូងយើង ។^១៨

ទីបី ព្យាការីទទួលសេចក្តីពិតពីព្រះ ហើយចែកចាយសេចក្តីពិតនោះជាមួយយើង ។^១៩ យើងរៀនសេចក្ដីពិតពីព្យាការីមុនៗនៅក្នុងព្រះគម្ពីរ^២០និងពីព្យាការីដែលនៅរស់ពីសន្និសីទទូទៅ និងតាមរយៈប្រព័ន្ធជាផ្លូវការផ្សេងៗទៀត ។

ចុងបញ្ចប់គឺ បងប្អូន និងខ្ញុំដើរតួនាទីយ៉ាងសំខាន់នៅក្នុងដំណើរការនេះ ។ ព្រះរំពឹងឲ្យយើងស្វែងរក ទទួលស្គាល់ ហើយធ្វើតាមសេចក្ដីពិត ។ សមត្ថភាពរបស់យើងក្នុងការទទួល និងអនុវត្តសេចក្តីពិត គឺអាស្រ័យលើភាពរឹងមាំនៃទំនាក់ទំនងរបស់យើងជាមួយព្រះវរបិតា និងព្រះរាជបុត្រា ការឆ្លើយតបរបស់យើងចំពោះឥទ្ធិពលនៃព្រះវិញ្ញាណបរិសុទ្ធ និងការធ្វើទៅតាមព្យាការីថ្ងៃចុងក្រោយ របស់យើង ។

យើងត្រូវចាំថា សាតាំងធ្វើការរារាំងយើងពីសេចក្ដីពិត ។ វាដឹងថា បើគ្មានសេចក្តីពិតទេ នោះយើងមិនអាចទទួលបានជីវិតអស់កល្បជានិច្ចឡើយ ។ វាបានត្បាញអំបោះនៃសេចក្តីពិតជាមួយនឹងទស្សនវិជ្ជាលោកិយ ដើម្បីបំភាន់យើង និងបំបែរអារម្មណ៍យើងពីអ្វីដែលទាក់ទងនឹងព្រះ។^២១

ការស្វែងរក ការទទួលស្គាល់ និងការអនុវត្តសេចក្ដីពិតដ៏អស់កល្បជានិច្ច

នៅពេលយើងស្វែងរកសេចក្ដីពិត ^២២សំណួរពីរខាងក្រោមនេះអាចជួយយើងឲ្យស្គាល់ថា តើគោលគំនិតមួយនេះបានមកពីព្រះ ឬមកពីប្រភពផ្សេង ៖

តើគោលគំនិតត្រូវបានបង្រៀនយ៉ាងខ្ជាប់ខ្ជួននៅក្នុងព្រះគម្ពីរ ឬពាក្យសម្ដីរបស់ព្យាការីនៅរស់ដែរឬទេ ?
តើគោលគំនិតនេះត្រូវបានបញ្ជាក់ពីសាក្សីនៃព្រះវិញ្ញាណបរិសុទ្ធដែរឬទេ ?

ព្រះបើកសម្តែងសេចក្តីពិតខាងគោលលទ្ធិតាមរយៈព្យាការី ហើយព្រះវិញ្ញាណបរិសុទ្ធបញ្ជាក់សេចក្តីពិតទាំងនោះដល់យើង និងជួយយើងអនុវត្តតាម ។^២៣ យើងត្រូវតែស្វែងរក និងរៀបចំខ្លួនដើម្បីទទួលបានចំណាប់អារម្មណ៍ខាងវិញ្ញាណទាំងនេះ នៅពេលវាកើតមានឡើង ។^២៤ ភាគច្រើន យើងទទួលបានសាក្សីពីព្រះវិញ្ញាណ នៅពេលយើងបន្ទាបខ្លួន^២៥អធិស្ឋានដោយស្មោះ និងសិក្សាព្រះបន្ទូលរបស់ព្រះ^២៦ហើយរក្សាបទបញ្ញត្តិរបស់ទ្រង់ ។^២៧

នៅពេលព្រះវិញ្ញាណបរិសុទ្ធបញ្ជាក់សេចក្ដីពិតជាក់លាក់មួយដល់យើង នោះយើងយល់ដឹងស៊ីជម្រៅ នៅពេលយើងដាក់គោលការណ៍នោះមកអនុវត្ត ។ នៅពេលយើងរស់នៅតាមគោលការណ៍នោះយ៉ាងខ្ជាប់ខ្ជួនយើងទទួលបានចំណេះដឹងអំពីសេចក្ដីពិតជាក់ជាមិនខាន ។^២៨

ឧទាហរណ៍ ខ្ញុំបានធ្វើខុសច្រើនដង ហើយមានអារម្មណ៍សោកស្តាយ ចំពោះជម្រើសមិនល្អ ។ ប៉ុន្តែតាមរយៈការអធិស្ឋាន ការសិក្សា និងសេចក្តីជំនឿលើព្រះយេស៊ូវគ្រីស្ទ ខ្ញុំបានទទួលសាក្សីអំពីគោលការណ៍នៃការប្រែចិត្ត។^២៩ ពេលខ្ញុំបន្តប្រែចិត្ត នោះការយល់ដឹងរបស់ខ្ញុំអំពីការប្រែចិត្តរីកចម្រើនកាន់តែខ្លាំងឡើង ។ ខ្ញុំមានអារម្មណ៍កាន់តែជិតព្រះ និងព្រះរាជបុត្រាទ្រង់ ។ ឥឡូវនេះ ខ្ញុំដឹងថាព្រះយេស៊ូវគ្រីស្ទអាចអភ័យបាប ពីព្រោះខ្ញុំបានដកពិសោធន៍ពរជ័យនៃការប្រែចិត្តនេះជារៀងរាល់ថ្ងៃ ។^៣០

ការទុកចិត្តលើព្រះ នៅពេលសេចក្ដីពិតមិនទាន់បានបើកសម្តែង

ដូច្នេះ តើយើងគួរធ្វើអ្វីខ្លះ នៅពេលយើងស្វែងរកសេចក្ដីពិតដោយស្មោះ តែវាមិនទាន់បើកសម្តែងនៅឡើយនោះ ? ខ្ញុំអាណិតពួកយើងដែលចង់បានចម្លើយ តែវាហាក់ដូចជាមិនទាន់មកដល់សោះ ។

ព្រះអម្ចាស់បានទូន្មានដល់ យ៉ូសែប ស្ម៊ីធ ថា « ចូរនៅស្ងៀមចុះ លុះត្រាយើងនឹងឃើញថាសមល្មមនឹងធ្វើឲ្យអស់ទាំងអ្វីៗបានដឹង … អំពីការណ៍ទាំងនោះ » ( គោលលទ្ធិ និងសេចក្តីសញ្ញា ១០:៣៧ ) ។

ហើយទ្រង់ពន្យល់ប្រាប់ អិមម៉ា ស្ម៊ីធ ថា « ចូរកុំរអ៊ូរទាំ ដោយសារតែអ្វីដែលអ្នកពុំបានឃើញនោះឡើយ ដ្បិតរបស់ទាំងនោះត្រូវបានទុកមិនឲ្យអ្នក និងមិនឲ្យពិភពលោកឃើញទេ ដែលជាប្រាជ្ញានៅក្នុងយើង នៅពេលខាងមុខ » ( គោលលទ្ធិ និងសេចក្តីសញ្ញា ២៥:៤ ) ។

ខ្ញុំក៏បានស្វែងរកចម្លើយចំពោះសំណួរដ៏ស្មោះផងដែរ ។ ចម្លើយជាច្រើនបានមក ហើយខ្លះទៀតមិនទាន់មក ។^៣១ នៅពេលយើងកាន់ខ្ជាប់—ទុកចិត្តលើប្រាជ្ញា និងសេចក្ដីស្រឡាញ់របស់ព្រះ រក្សាបទបញ្ញត្តិទ្រង់ ហើយពឹងផ្អែកលើអ្វីដែលយើងដឹងច្បាស់—នោះទ្រង់នឹងជួយយើងឲ្យរកបានភាពសុខសាន្ត រហូតដល់ទ្រង់បើកសម្ដែងសេចក្ដីពិតនៃរឿងគ្រប់យ៉ាង ។^៣២

ការយល់ដឹងពីគោលលទ្ធិ និងគោលនយោបាយ

នៅពេលយើងស្វែងរកសេចក្តីពិត វាមានប្រយោជន៍ដើម្បីយល់ពីភាពខុសគ្នារវាងគោលលទ្ធិ និងគោលនយោបាយ ។ គោលលទ្ធិសំដៅទៅលើសេចក្ដីពិតដ៏អស់កល្បជានិច្ច ដូចជានិស្ស័យនៃក្រុមព្រះ ផែនការនៃសេចក្ដីសង្គ្រោះ និងពលិកម្មធួនធួនរបស់ព្រះយេស៊ូវគ្រីស្ទ ។ គោលនយោបាយគឺជាការអនុវត្តតាមគោលលទ្ធិមកពីព្យាការី ដោយផ្អែកលើស្ថានភាពបច្ចុប្បន្ន ។ គោលនយោបាយជួយយើងគ្រប់គ្រងសាសនាចក្រឲ្យមានរបៀបរៀបរយ ។

ខណៈដែលគោលលទ្ធិពុំផ្លាស់ប្ដូរសោះ នោះគោលនយោបាយអាចកែសម្រួលទៅតាមពេលវេលា ។ ព្រះអម្ចាស់ធ្វើ កិច្ចការតាមរយៈពួកព្យាការីរបស់ទ្រង់ ដើម្បីគាំទ្រគោលលទ្ធិរបស់ទ្រង់ និងដើម្បីកែប្រែគោលនយោបាយសាសនាចក្រ ស្របតាមសេចក្ដីត្រូវការរបស់បុត្រាបុត្រីទ្រង់ ។

ជាអកុសល ជួនកាលយើងច្រឡំគោលនយោបាយជាមួយគោលលទ្ធិ ។ បើយើងមិនយល់ពីភាពខុសគ្នា នោះយើងប្រថុយនឹងការខកចិត្ត នៅពេលគោលនយោបាយផ្លាស់ប្តូរ ហើយប្រហែលជាអាចនឹងសង្ស័យចំពោះប្រាជ្ញារបស់ព្រះ ឬតួនាទីទទួលវិវរណៈរបស់ព្យាការី ។^៣៣

ការបង្រៀនសេចក្ដីពិតដ៏អស់កល្បជានិច្ច

នៅពេលយើងទទួលបានសេចក្ដីពិតពីព្រះ ទ្រង់លើកទឹកចិត្តយើងឲ្យចែកចាយចំណេះដឹងនោះជាមួយអ្នកដទៃ ។^៣៤ យើងធ្វើបែបនេះបាន នៅពេលយើងបង្រៀនថ្នាក់មួយ ឡើងនិយាយក្នុងសាសនាចក្រ ណែនាំកុមារ ឬពិភាក្សាអំពីសេចក្ដីពិតនៃដំណឹងល្អជាមួយនឹងមិត្តភក្តិ ។

គោលបំណងយើងគឺ ដើម្បីបង្រៀនសេចក្ដីពិតតាមរបៀបមួយ ដែលអញ្ជើញឲ្យមានអំណាចនៃការ ផ្លាស់ ប្រែចិត្តជឿពីព្រះវិញ្ញាណបរិសុទ្ធ^៣៥ ខ្ញុំសូមចែកចាយការអញ្ជើញខ្លីៗសាមញ្ញៗមួយចំនួនមកពីព្រះអម្ចាស់ និងព្យាការីរបស់ទ្រង់ ដែលអាចជួយបាន ។^៣៦

សូមផ្តោតលើព្រះវរបិតាសួគ៌ ព្រះយេស៊ូវគ្រីស្ទ និងគោលលទ្ធិគ្រឹះរបស់ពួកទ្រង់ ។^៣៧
សូមបន្ដសិក្សាព្រះគម្ពីរ និងការបង្រៀនរបស់ព្យាការីថ្ងៃចុងក្រោយ ។^៣៨
ពឹងផ្អែកលើគោលលទ្ធិដែលបានស្ថាបនាឡើងតាមរយៈសាក្សីដែលមានសិទ្ធិអំណាចជាច្រើន ។^៣៩
ចៀសវាងការស្មាន ទស្សនៈផ្ទាល់ខ្លួន ឬគំនិតខាងលោកិយ ។^៤០
បង្រៀនចំណុចគោលលទ្ធិមួយនៅក្នុងបរិបទដែលទាក់ទងទៅនឹងសេចក្ដីពិតនៃដំណឹងល្អ ដើម្បីបណ្ដុះឲ្យមានការយល់ដឹងដែលមានតុល្យភាព ។^៤១
សូមវិធីសាស្ត្របង្រៀន ដែលអញ្ជើញឲ្យមានឥទ្ធិពលនៃព្រះវិញ្ញាណ ។^៤២
ធ្វើការទំនាក់ទំនងឲ្យច្បាស់លាស់ ចៀសវាងការយល់ច្រឡំ ។^៤៣

ការនិយាយការពិតដោយសេចក្តីស្រឡាញ់

របៀបដែលយើងបង្រៀនសេចក្តីពិតគឺសំខាន់ខ្លាំងណាស់ ។ ប៉ុលបានលើកទឹកចិត្តយើងឲ្យនិយាយ « សេចក្តីពិតដោយសេចក្តីស្រឡាញ់ » ( សូមមើល អេភេសូរ ៤:១៤–១៥ ) ។ សេចក្ដីពិតមានឱកាសដ៏ល្អបំផុត ដើម្បីផ្តល់ពរជ័យដល់មនុស្សដទៃទៀត នៅពេលវាបង្ហាញដោយក្ដីស្រឡាញ់ដូចជាព្រះគ្រីស្ទ ។^៤៤

សេចក្ដីពិតដែលបង្រៀនដោយគ្មានក្ដីស្រឡាញ់អាចបណ្តាលឲ្យមានអារម្មណ៍នៃការវិនិច្ឆ័យ ការបាក់ទឹកចិត្ត និងភាពឯកោ ។ ជាញឹកញាប់ វានាំឲ្យមានការអាក់អន់ចិត្ត និងការបែកបាក់គ្នា— ព្រមទាំងជម្លោះទៀតផង ។ ម៉្យាងវិញទៀត សេចក្តីស្រឡាញ់ដោយគ្មានសេចក្ដីពិតគឺទទេ ហើយវាខ្វះនូវការសន្យានៃការរីកចម្រើន ។

ទាំងសេចក្ដីពិត និងសេចក្ដីស្រឡាញ់ គឺចាំបាច់សម្រាប់ការអភិវឌ្ឍខាងវិញ្ញាណរបស់យើង ។^៤៥ សេចក្ដីពិតផ្ដល់នូវគោលលទ្ធិ គោលការណ៍ និងក្រឹត្យវិន័យ ដែលចាំបាច់ដើម្បីទទួលបានជីវិតដ៏អស់កល្បជានិច្ច ខណៈដែលសេចក្ដីស្រឡាញ់ វាបង្កើតឲ្យមានការជម្រុញចិត្តចាំបាច់ដើម្បីឱបក្រសោប និងធ្វើសកម្មភាពតាមអ្វីដែលពិតនោះ ។

ខ្ញុំមានអំណរគុណជានិច្ចចំពោះអ្នកដែលមានចិត្តអត់ធ្មត់បង្រៀនខ្ញុំពីសេចក្ដីពិតដ៏អស់កល្បជានិច្ចដោយសេចក្ដីស្រឡាញ់ ។

សេចក្ដីបញ្ចប់

ជាចុងបញ្ចប់ ខ្ញុំសូមចែកចាយនូវសេចក្ដីពិតដ៏អស់កល្ប ដែលបានក្លាយជាយុថ្កាដល់ព្រលឹងខ្ញុំ ។ ខ្ញុំបានដឹងសេចក្ដីពិតទាំងនេះ ដោយការធ្វើតាមគោលការណ៍ដែលបានពិភាក្សានៅថ្ងៃនេះ ។

ខ្ញុំដឹងថាព្រះ គឺជាព្រះវរបិតាសួគ៌របស់យើង ។^៤៦ ទ្រង់ជ្រាបដឹងរឿងទំាងអស់ ^៤៧មានអំណាចគ្រប់យ៉ាង^៤៨និងមានស្រឡាញ់ដ៏ឥតខ្ចោះ ។^៤៩ ទ្រង់បានបង្កើតផែនការមួយ ដើម្បីយើងអាចទទួលបានជីវិតដ៏អស់កល្ប និងប្រែក្លាយដូចជាទ្រង់ ។^៥០

ជាផ្នែកនៃផែនការនោះ ព្រះបានបញ្ជូនព្រះរាជបុត្រារបស់ទ្រង់ព្រះយេស៊ូវគ្រីស្ទដើម្បីជួយយើង ។^៥១ ព្រះយេស៊ូវបានបង្រៀនយើងឲ្យធ្វើតាមព្រះហឫទ័យរបស់ព្រះវរបិតា ^៥២និងឲ្យស្រឡាញ់គ្នា ។^៥៣ ទ្រង់បានធួនសម្រាប់អំពើបាបយើង ^៥៤ហើយស្ម័គ្រថ្វាយព្រះជន្មទ្រង់នៅលើឈើឆ្កាង ។^៥៥ ទ្រង់បានរស់ឡើងវិញពីការសុគតបន្ទាប់ពីបីថ្ងៃក្រោយមក ។^៥៦ តាមរយៈព្រះគ្រីស្ទ និងព្រះគុណទ្រង់ នោះយើងនឹងត្រូវបានរស់ឡើងវិញ ^៥៧ យើងអាចត្រូវបានអភ័យទោស ^៥៨ ហើយយើងអាចស្វែងរកកម្លាំងនៅក្នុងការរងទុក្ខ ។^៥៩

អំឡុងពេលនៃការងារបម្រើនៅលើផែនដី ព្រះយេស៊ូវបានបង្កើតសាសនាចក្រទ្រង់ ។^៦០ យូរៗទៅ សាសនាចក្រនោះត្រូវបានផ្លាស់ប្ដូរ ហើយសេចក្ដីពិតត្រូវបាត់បង់ ។^៦១ ព្រះយេស៊ូវគ្រីស្ទបានស្ដារសាសនាចក្រ និងសេចក្ដីពិតនៃដំណឹងល្អរបស់ទ្រង់ឡើងវិញ តាមរយៈព្យាការី យ៉ូសែប ស្ម៊ីធ ។^៦២ ហើយសព្វថ្ងៃនេះ ព្រះគ្រីស្ទបន្ដដឹកនាំសាសនាចក្រទ្រង់តាមរយៈព្យាការី និងពួកសាវកដែលនៅរស់ ។^៦៣

ខ្ញុំដឹងថា នៅពេលយើងមករកព្រះគ្រីស្ទ នៅទីបំផុតយើងអាច « បានល្អឥតខ្ចោះនៅក្នុងទ្រង់ » ( មរ៉ូណៃ១០:៣២ ) ទទួលបាន « អំណរពេញលេញ » ( គោលលទ្ធិ និងសេចក្តីសញ្ញា ៩៣:៣៣ ) ហើយនឹងទទួលបាន « គ្រប់អ្វីទាំងអស់ [ ដែល ] ព្រះវរបិតាយើងមាន » ( គោលលទ្ធិ និងសេចក្តីសញ្ញា ៨៤:៣៨ ) ។ ខ្ញុំសូមថ្លែងសេចក្ដីពិតដ៏អស់កល្បជានិច្ទាំងនេះនៅក្នុងព្រះនាមដ៏បរិសុទ្ធនៃព្រះយេស៊ូវគ្រីស្ទ អាម៉ែន ។