ធ្វើជាអ្នកដើរតាមព្រះយេស៊ូវគ្រីស្ទដោយសុខសាន្ត
ខ្ញុំសូមថ្លែងទីបន្ទាល់ថា « អ្នកដើរតាមព្រះយេស៊ូវគ្រីស្ទដោយសុខសាន្ត » នឹងរកឃើញភាពសុខសាន្តផ្ទាល់ខ្លួនក្នុងជីវិតនេះ និងការជួបជុំដ៏រុងរឿងនៅស្ថានសួគ៌ ។
យើងរស់នៅក្នុងជំនាន់ដែល « អ្នកដើរតាមព្រះយេស៊ូវគ្រីស្ទដោយសុខសាន្ត »១ ជួបនឹងបញ្ហាប្រឈមមុខប្លែកៗ ។ អស់អ្នកដែលជឿថ្វាយបង្គំដោយរាបសា និង ថ្លែងទីបន្ទាល់អំពីព្រះយេស៊ូវគ្រីស្ទ តែងតែជួបប្រទះនឹងការសាកល្បង ទុក្ខលំបាក និងទុក្ខវេទនានា ។២ ភរិយាខ្ញុំ ម៉ារី និងខ្ញុំមិនខុសគ្នាទេ ។ កាលពីរបីឆ្នាំកន្លងទៅ យើងបានឃើញមិត្តភក្ដិនៅវិទ្យាល័យ និងដៃគូផ្សព្វផ្សាយសាសនាសហការីចាស់ៗ ព្រមទាំងឧត្តមភរិយារបស់ពួកគេមួយចំនួនបានទទួលមរណភាព ឬដូចដែលប្រធាន រ័សុល អិម ណិលសុន បានមានប្រសាសន៍ថាបានបញ្ចប់ការសិក្សាទៅផ្នែកម្ខាងទៀតនៃវាំងនន ។ យើងឃើញមនុស្សខ្លះបានធំឡើងក្នុងសេចក្ដីជំនឿ និងមានជំនឿ តែបានដើរចេញពីផ្លូវនៃសេចក្ដីសញ្ញា ។
ជាអកុសលយើងបានបាត់បង់ចៅប្រុសអាយុ ២៣ ឆ្នាំ ម្នាក់នៅក្នុងគ្រោះថ្នាក់រថយន្តដ៏សោកនាដកម្មមួយ ។ មិត្តជាទីស្រឡាញ់ សមាជិកគ្រួសារ និងមិត្តរួមការងារមួយចំនួនក៏បានស៊ូទ្រាំនឹងបញ្ហាសុខភាពដ៏ពិបាកផងដែរ ។
នៅពេលការសាកល្បងកើតឡើង យើងទួញយំ ហើយព្យាយាមសម្រាលបន្ទុកគ្នា ។៣ យើងសោកសៅចំពោះអ្វីមិនបានសម្រេច និងចម្រៀងដែលមិនទាន់បានច្រៀង ។៤ រឿងអាក្រក់ៗកើតឡើងចំពោះមនុស្សល្អ ក្នុងដំណើរនៃជីវិតរមែងស្លាប់នេះ ។ ឧទាហរណ៍ ដូចអគ្គីភ័យដ៏សន្ធោសន្ធៅនៅកោះម៉ូយ រដ្ឋ ហាវ៉ៃ ភាគខាងត្បូងប្រទេស ឈីលី និងប្រទេសកាណាដា មានព្រឹត្តិការណ៍ដ៏រន្ធត់ដែលពេលខ្លះមនុស្សល្អត្រូវប្រឈមមុខ ។
យើងអាននៅក្នុងមុក្តាដ៏មានតម្លៃមហិមា ថា ព្រះអម្ចាស់ទ្រង់បើកសម្ដែងដល់អ័ប្រាហាំ អំពីស្ថានភាពដ៏នៅអស់កល្បជានិច្ចនៃវិញ្ញាណទាំងឡាយ ។ អ័ប្រាហាំរៀនដឹងអំពីជីវិតមុនផែនដី ការតែងតាំងទុកជាមុន ការបង្កបង្កើត ការជ្រើសរើសព្រះដ៏ប្រោសលោះ និងស្ថានភាពទីពីររបស់មនុស្ស ។៥ ព្រះអម្ចាស់បានប្រកាស ៖
« យើងនឹងធ្វើផែនដី ដើម្បីឲ្យពួកគេទាំងនេះអាចរស់នៅលើ
« ហើយយើងនឹងសាកល្បងពួកគេមើល បើសិនជាពួកគេនឹងប្រព្រឹត្តនូវអ្វីៗគ្រប់យ៉ាងដែលព្រះអម្ចាស់ដ៏ជាព្រះរបស់ពួកគេនឹងបញ្ជាដល់ពួកគេ » ។៦
ឥឡូវនេះ យើងទាំងអស់គ្នានៅទីនេះនៅក្នុងសណ្ឋានទីពីរនៃដំណើរឆ្ពោះទៅកាន់នគរនៃសិរីល្អ ដែលចំណែកនៃផែនការនៃសេចក្តីសង្គ្រោះដ៏អស្ចារ្យរបស់ព្រះ និងភាពតម្កើងឡើង ។ យើងមានពរជាមួយសិទ្ធិជ្រើសរើស ហើយជាកម្មវត្ថុនៃការសាកល្បងនៃជីវិតរមែងស្លាប់ ។ ជីវិតនេះគឺជាពេលវេលាសម្រាប់ឲ្យ មនុស្សប្រុងប្រៀបខ្លួនទៅជួបនឹងព្រះ ។៧ យើងមានពរដែលបានដឹងអំពីព្រះយេស៊ូវគ្រីស្ទ និងតួនាទីរបស់ទ្រង់នៅក្នុងផែនការ ។ យើងមានឯកសិទ្ធិដើម្បីក្លាយជាសមាជិកនៃសាសនាចក្រដែលបានស្ដារឡើងវិញរបស់ទ្រង់—សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ក្នុងនាមជា អ្នកដើរតាមព្រះយេស៊ូវគ្រីស្ទដោយសុខសាន្ត យើងព្យាយាមធ្វើតាមព្រះបញ្ញត្តិទ្រង់ ។ វាមិនងាយស្រួលទេសម្រាប់អ្នកដើរតាមទ្រង់ ។ ហើយក៏មិនងាយស្រួលសម្រាប់ព្រះអង្គសង្គ្រោះ ដើម្បីបំពេញបេសកកម្មក្នុងជីវិតរមែងស្លាប់ដោយស្មោះត្រង់ដែរ ។
ព្រះគម្ពីរបង្ហាញយ៉ាងច្បាស់ថា មនុស្សជាច្រើននឹងចុះចាញ់នឹងវិធីសាស្រ្តនោះគឺ « ចូរយើងស៊ីផឹក ហើយអរសប្បាយទៅចុះ ត្បិតស្អែកឡើងយើងត្រូវស្លាប់ហើយ » ។៨ អ្នកមិនជឿផ្សេងទៀតដកថយទៅដាច់តែឯងស្រងូតស្រងាត់ជាមួយមនុស្សដែលមានគំនិតដូចគ្នាដែលតស៊ូមតិសម្រាប់ « សេចក្តីថ្មី »៩ និងទស្សនៈរបស់មនុស្ស ។១០ ព្រោះពួកគេមិនដឹងជាទៅរកសេចក្ដីពិតឯណាទេ ។១១
អ្នកដើរតាមព្រះគ្រីស្ទដោយសុខសាន្តមិនដើរតាមផ្លូវណាមួយនោះទេ ។ យើងមានភាពកក់ក្តៅជាសមាជិក ដែលបានចូលរួមចំណែកក្នុងសហគមន៍ដែលយើងរស់នៅ ។ យើងស្រឡាញ់ ចែកចាយ និងអញ្ជើញបុត្រាបុត្រីរបស់ព្រះទាំងអស់ឲ្យធ្វើតាមការបង្រៀនរបស់ព្រះគ្រីស្ទ ។១២ យើងធ្វើតាមពាក្យទូន្មានរបស់ព្យាការីជាទីស្រឡាញ់ គឺ ប្រធាន ណិលសុន យើងជ្រើសរើសតួនាទីជាអ្នកផ្សះផ្សាគេ ក្នុងពេលនេះ និងរហូតតទៅ ។១៣ វិធីសាស្រ្តដ៏បំផុសគំនិតនេះគឺសមស្របតាមទាំងបទគម្ពីរទាំងឡាយ និងការដឹកនាំរបស់ព្យាការី ។
ក្នុងឆ្នាំ ១៨២៩ សាសនាចក្រដែលបានស្ដារឡើងវិញមិនទាន់បានរៀបចំនៅឡើយទេ ហើយព្រះគម្ពីរមរមនក៏មិនទាន់បោះពុម្ពដែរ ។ មនុស្សមួយក្រុមតូចដែលតស៊ូ បានបំផុសគំនិតដោយព្រះវិញ្ញាណនៃព្រះ បានដើរតាមព្យាការី យ៉ូសែប ស៊្មីធ ។ ព្រះអម្ចាស់បានបើកសម្ដែងពាក្យទូន្មាន និងគ្រាដ៏លំបាកទៅដល់យ៉ូសែបថា ៖ « ហេតុដូច្នេះហើយ កុំឲ្យខ្លាចឡើយ ហ្វូងតូចអើយ ចូរធ្វើល្អចុះ ចូរឲ្យផែនដី និងស្ថាននរករួមគ្នាប្រឆាំងនឹងអ្នកចុះ ដ្បិតបើសិនជាអ្នករាល់គ្នាបានសង់នៅលើថ្មដារបស់យើង នោះពួកគេពុំអាចយកឈ្នះបានឡើយ » ។១៤ គាត់ក៏ប្រឹក្សាដល់ពួកគេផងដែរ ៖
« ចូរមើលមកឯយើងដោយនូវគ្រប់ទាំងគំនិត ចូរកុំសង្ស័យកុំខ្លាចឡើយ ។
« ចូរមានចិត្តស្មោះត្រង់កាន់តាមបញ្ញត្តិទាំងឡាយរបស់យើង នោះអ្នករាល់គ្នានឹងគ្រងនគរស្ថានសួគ៌ទុកជាមរតក » ។១៥
ច្បាស់ណាស់ ជោគវាសនាសួគ៌ារបស់យើងគឺមិនកែប្រែទេ នៅពេលយើងរងទុក្ខលំបាកដោយមារសត្រូវ ។ ក្នុងគម្ពីរហេព្រើរបានផ្តល់ដំបូន្មានថា « មកដល់បល្ល័ង្កនៃព្រះគុណ ដោយក្លាហាន ដើម្បីនឹងទទួលសេចក្តីមេត្តា ហើយរកបានព្រះគុណសម្រាប់នឹងជួយដល់ពេលត្រូវការចុះ » ។១៦ ព្រះយេស៊ូវគ្រីស្ទគឺជា « មេបង្កើតនៃសេចក្តីសង្គ្រោះដ៏នៅអស់កល្បជានិច្ច » ។១៧
ខ្ញុំស្រឡាញ់ប្រសាសន៍របស់ មរមន ដែលបានដកស្រង់ដោយកូនប្រុសរបស់គាត់មរ៉ូណៃថា អ្នកដើរតាមព្រះគ្រីស្ទដោយសុខសាន្តពីព្រោះតែដំណើរដ៏សុខសាន្តរបស់បងប្អូនជាមួយនឹងកូនចៅមនុស្ស » ។១៨
សម្រាប់យើងក្នុងសាសនាចក្រដែលខិតខំធ្វើជា « អ្នកដើរតាមព្រះគ្រីស្ទដោយសុខសាន្ត នោះថ្ងៃដ៏ភ្លឺស្វាងកំពុងរង់ចាំយើង នៅពេលយើងផ្ដោតលើព្រះអម្ចាស់ និងព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ។ ការសាកល្បងជាផ្នែកមួយនៃជីវិតរមែងស្លាប់ ហើយកើតឡើងចំពោះជីវិតរបស់មនុស្សគ្រប់រូបទូទាំងពិភពលោក ។ ការណ៍នេះរាប់បញ្ចូលទាំងជម្លោះធំៗរវាងប្រទេសនានា និងបុគ្គលផងដែរ ។
ថ្នាក់ដឹកនាំសាសនាចក្រត្រូវបានគេសួរជាញឹកញាប់ថា « ហេតុអ្វីបានជាព្រះអនុញ្ញាតឲ្យរឿងអាក្រក់ៗកើតឡើង ជាពិសេសចំពោះមនុស្សល្អ ? » ហើយ « ហេតុអ្វីបានជាអស់អ្នកដែលសុចរិត និងអស់អ្នកនៅក្នុងការបម្រើព្រះអម្ចាស់មិនបានការពារពីសោកនាដកម្មបែបនេះ ?
យើងមិនដឹងចម្លើយទាំងអស់ទេ តែយើងដឹងពីគោលការណ៍សំខាន់ៗ ដែលអនុញ្ញាតឲ្យយើងប្រឈមមុខនឹងការសាកល្បង ទុក្ខលំបាក និងទុក្ខវេទនាដោយសេចក្តីជំនឿ និងមានទំនុកចិត្តថាមានអនាគតដ៏ភ្លឺស្វាងរង់ចាំយើងម្នាក់ៗ ។ គ្មានឧទាហារណ៍ណា នៅក្នុងព្រះគម្ពីរទាក់ទងនឹងការឆ្លងកាត់ទុក្ខវេទនា ល្អជាងព្រះបន្ទូលរបស់ព្រះអម្ចាស់ទៅកាន់យ៉ូសែប ស្ម៊ីធ ជាព្យាការី កាលលោកជាប់ទោសក្នុងគុក លីប៊ើធី ទេ ។
ព្រះអម្ចាស់បានប្រកាសផ្នែកខ្លះថា ៖
« បើសិនជាថ្គាមនៃស្ថាននរកនឹងហារត្របាក់អ្នកក្ដីបុត្រយើងអើយចូរអ្នកដឹងថាគ្រប់ការណ៍ទាំងនេះនឹងផ្ដល់ ការពិសោធន៍ដល់អ្នកហើយនឹងទៅជាការល្អដល់អ្នកទៅវិញ ។
« កូនមនុស្សបានចុះទាបជាងការណ៍ទាំងនោះទៅទៀត ។ តើអ្នកធំជាងទ្រង់ឬអី ?
« …ចូរកុំខ្លាចនូវអ្វី ដែលមនុស្សអាចប្រព្រឹត្តនោះឡើយ ដ្បិតព្រះទ្រង់នឹងគង់នៅជាមួយអ្នក ជារៀងដរាបតទៅ » ។១៩
ច្បាស់ណាស់យើងមានព្រះវរបិតាសួគ៌ដែលជ្រាប និងស្រឡាញ់យើង ហើយជ្រាបដឹងពីទុក្ខវេទនារបស់យើងដ៏ឥតខ្ចោះ ។ ព្រះរាជបុត្រាទ្រង់ ព្រះយេស៊ូវគ្រីស្ទ គឺជាព្រះអង្គសង្គ្រោះ និងព្រះប្រោសលោះយើង ។
ប្រធាន រ័សុល អិម ណិលសុន និងប្រធាន អិម រ័សុល បាឡឺដ លោកទាំងពីរ បានបញ្ជាក់យ៉ាងមុតមាំអំពីសារៈសំខាន់នៃការបោះពុម្ពកំណែថ្មីនៃ ការប្រកាសដំណឹងល្អរបស់យើង.២០ ។ ខ្ញុំចែករំលែកភាពរីករាយរបស់ពួកលោក ការបោះពុម្ពថ្មីនេះ ជាការពង្រីកព្រះគម្ពីរដ៏ពិសិដ្ឋ ជាការប្រកាសដ៏មានអានុភាព ៖
« នៅក្នុងការរងទុក្ខនៃដង្វាយធួន ព្រះយេស៊ូវគ្រីស្ទ ទ្រង់នឹងយកដាក់លើរូបអង្គទ្រង់នូវសេចក្ដីឈឺចាប់ ទុក្ខវេទនា និងជំងឺរបស់យើង ។ ដោយសាររឿងនេះ ទ្រង់ជ្រាបដឹងស្របតាមសាច់ឈាមថា តើត្រូវជួយរាស្ត្រទ្រង់បែបណាតាមជំងឺរបស់គេ ( អាលម៉ា ៧:១២; សូមមើលផងដែរ ខទី ១១ ) ។ ទ្រង់បានអញ្ជើញថា ចូរមកឯខ្ញុំ ហើយនៅពេលយើងធ្វើដូច្នេះ ទ្រង់នឹងឲ្យយើងរាល់គ្នាឈប់សម្រាក ក្តីសង្ឃឹម កម្លាំង ទស្សនវិស័យ និងការជាសះស្បើយ ( ម៉ាថាយ ១១:២៨; សូមមើលផងដែរ ខទី ២៩–៣០ ) ។
« នៅពេលយើងពឹងផ្អែកទៅលើដង្វាយធួននៃព្រះយេស៊ូវគ្រីស្ទ នោះទ្រង់អាចជួយយើងឲ្យស៊ូទ្រាំការសាកល្បង ជម្ងឺ និង ការឈឺចាប់របស់យើង ។ យើងអាចពេញដោយអំណរ ភាពសុខសាន្ដ និង ការលួងលោមចិត្ត ។ អ្វីៗទាំងអស់ដែលអយុត្តិធម៌នៅក្នុងជីវិតនេះ អាចត្រូវបានធ្វើឲ្យយុត្តិធម៌តាមរយៈដង្វាយធួនរបស់ព្រះយេស៊ូវគ្រីស្ទ » ។២១
យើងអាចរីករាយធ្វើជា អ្នកដើរតាមព្រះគ្រីស្ទដោយសុខសាន្ត
ផែនការនៃសុភមង្គលរបស់ព្រះវរបិតាសម្រាប់បុត្រាបុត្រីទ្រង់ មិនត្រឹមតែរួមបញ្ចូលជីវិតមុនឆាកជីវិតនេះ និងជីវិតរមែងស្លាប់នោះទេ ប៉ុន្តែក៏មានសក្តានុពលសម្រាប់ជីវិតដ៏នៅអស់កល្បជានិច្ច រួមទាំងការជួបជុំគ្នាដ៏អស្ចារ្យ និងដ៏រុងរឿងជាមួយនឹងមនុស្សដែលយើងបាត់បង់ផងដែរ ។ កំហុសទាំងអស់នឹងត្រូវបានកែតម្រូវ ហើយយើងនឹងឃើញយ៉ាងច្បាស់ឥតខ្ចោះ និងដោយទស្សនវិស័យ និងការយល់ដឹងដែលគ្មានទោស ។
ថ្នាក់ដឹកនាំសាសនាចក្របានប្រៀបធៀបទស្សនវិស័យនេះជាមួយនឹងមនុស្សណាម្នាក់ដែលដើរចូលទៅកណ្តាលការសម្តែងទាំងបីឆាក ។២២ អ្នកដែលគ្មានចំណេះដឹងអំពីផែនការរបស់ព្រះវរបិតាមិនយល់ពីអ្វីដែលបានកើតឡើងនៅក្នុងសណ្ឋានដំបូង ( ឬជីវិតមុនផែនដី ) និងគោលបំណងដែលបានបង្កើតឡើងនៅទីនោះទេ ពួកគេក៏មិនយល់ពីការបញ្ជាក់ និងដំណោះស្រាយដែលកើតឡើងក្នុងសណ្ឋានទីបី ដែលជាជោគជ័យដ៏រុងរឿងនៃផែនការរបស់ព្រះវរបិតាដែរ ។
មនុស្សជាច្រើនពុំមានអំណរគុណ ចំពោះផែនការជាទីស្រឡាញ់ និងទូលំទូលាយរបស់ទ្រង់ទេ ចំពោះមនុស្សខ្លះវាក្លាយជាគុណវិបត្តិទៅវិញ ព្រោះវាមិនមែនជាកំហុសគេទេ ដូច្នេះនៅទីបំផុតនឹងមិនរងផលប៉ះពាល់អ្វីទេ ។២៣
ព្រះគម្ពីរបង្ហាញយ៉ាងច្បាស់ថា អ្នកដើរតាមព្រះគ្រីស្ទដោយសុខសាន្ត ដែលធ្វើតាមព្រះអង្គសង្គ្រោះដោយសុចរិត ហើយកាន់តាមបទបញ្ញត្តិរបស់ទ្រង់នឹងទទួលពរ ។ ព្រះគម្ពីរដ៏សំខាន់បំផុតមួយសម្រាប់មនុស្សសុចរិត មិនថាស្ថានភាពក្នុងជីវិតរបស់ពួកគេបែបណាទេ នេះជាផ្នែកមួយនៃសុន្ទរកថារបស់ស្តេចបេនយ៉ាមីនទៅកាន់ប្រជាជនរបស់ទ្រង់ ។ ទ្រង់សន្យាថា អស់អ្នកដែលកាន់តាមព្រះបញ្ញត្តិដោយស្មោះត្រង់ នឹងបានទទួលពរគ្រប់យ៉ាងក្នុងជីវិតនេះនិង « ទទួលនៅស្ថានសួគ៌ …[ និង ]អាចរស់នៅជាមួយនឹងព្រះក្នុងស្ថានភាពសុភមង្គលដ៏មិនចេះចប់មិនចេះហើយ » ។២៤
យើងទទួលស្គាល់ថាយើងទាំងអស់គ្នាភាគច្រើនបានជួបប្រទះនឹងព្យុះនៃការបំផ្លិចបំផ្លាញមួយចំនួនទាំងខាងរូបកាយ និងខាងវិញ្ញាណក្នុងជីវិតយើង ។ ព្រះវរបិតា និងព្រះរាជបុត្រាទ្រង់គឺព្រះយេស៊ូវគ្រីស្ទ ដែលគង់នៅ ស្ថានសួគ៌ គឺជាព្រះសិរសានៃសាសនាចក្រដែលបានស្ដារឡើងវិញរបស់ទ្រង់នេះ បានប្រទានព្រះគម្ពីរ និងព្យាការីដើម្បីរៀបចំយើង ព្រមានយើងអំពីគ្រោះថ្នាក់ និងផ្ដល់ការណែនាំដល់យើងដើម្បីរៀបចំ និងការពារយើង ។ ការណែនាំខ្លះទាមទារឲ្យធ្វើសកម្មភាពភ្លាមៗ និងខ្លះទៀតផ្តល់ការការពារជាច្រើនឆ្នាំនាពេលអនាគត ។ បុព្វកថារបស់ព្រះអម្ចាស់ក្នុង គោលលទ្ធិ និងសេចក្តីសញ្ញា កណ្ឌទី ១ដាស់តឿនយើងឲ្យ « ស្ដាប់តាមពាក្យសម្ដីនៃពួកព្យាការី » ។២៥
កណ្ឌទី ១ ក៏ព្រមានយើងផងដែរ « ចូររៀបចំ ចូររៀបចំសម្រាប់អ្វីដែលនឹងមកដល់ចុះ » ។២៦ ព្រះអម្ចាស់ប្រទានឱកាសដល់រាស្ដ្រទ្រង់ដើម្បីរៀបចំខ្លួនសម្រាប់ឧបសគ្គដែលពួកគេនឹងជួបប្រទះ ។
ព្រះអម្ចាស់បានប្រទានវិវរណៈដ៏មានព្រះចេស្តា ដល់ប្រធាន ព្រិកហាំ យ៉ង់ នៅថ្ងៃទី ១៤ ខែ មករា ឆ្នាំ ១៨៤៧ នៅ វិនទើរ ខ្វរទើរ្ស ។២៧ វិវរណៈនេះគឺជាគំរូបុរាណនៃការរៀបចំរាស្រ្តរបស់ព្រះអម្ចាស់សម្រាប់អ្វីដែលនឹងមកដល់ ។ ពួកបរិសុទ្ធដ៏ស្មោះត្រង់បានចាប់ផ្តើមការចាកចេញរបស់ពួកគេទៅកាន់ជ្រលងភ្នំ សលត៍ លេក ។ ពួកគេបានសាងសង់ព្រះវិហារបរិសុទ្ធណៅវូដោយជោគជ័យ ហើយបានទទួលពិធីបរិសុទ្ធពិសិដ្ឋនៃសេចក្តីសង្គ្រោះ ។ ពួកគេបានត្រូវបណ្ដេញចេញពីរដ្ឋ មិសសួរី ហើយអ្នកបៀតបៀនពួកគេបានបណ្ដេញពួកគេចេញពីទីក្រុង ណៅវូ ក្នុងរដូវរងាដ៏កាចសាហាវ ។ វិវរណៈដែលប្រទានដល់ ព្រិកហាំ បានផ្ដល់ការប្រឹក្សាច្បាស់លាស់អំពីរបៀបរៀបចំខ្លួនសម្រាប់ការចាកចេញ ។ ព្រះអម្ចាស់បានសង្កត់ធ្ងន់ជាពិសេសទៅលើការថែទាំជនក្រីក្រ ស្ត្រីមេម៉ាយ អ្នកគ្មានឪពុក និងគ្រួសារនៃអស់អ្នកដែលបម្រើក្នុងកងទ័ពមរមន ខណៈដែលបុគ្គលសំខាន់នៃពួកបរិសុទ្ធបានបន្តដំណើរដ៏គ្រោះថ្នាក់របស់ពួកគេ ។
បន្ថែមលើការផ្តល់ដំបូន្មានផ្សេងទៀតដើម្បីរស់នៅដោយសុចរិត នោះព្រះអម្ចាស់បានសង្កត់ធ្ងន់លើគោលការណ៍ពីរផ្សេងទៀតដែលបន្តអនុវត្តរហូតដល់សព្វថ្ងៃនេះ ។
ទីមួយ ទ្រង់បានលើកទឹកចិត្តពួកគេឲ្យ « សរសើរតម្កើងដល់ព្រះអម្ចាស់ ដោយការច្រៀង ដោយការលេងភ្លេង ដោយការរាំ និងដោយការអធិស្ឋាន អំពីការសរសើរ និងអំណរគុណ » ។២៨
ទីពីរ ព្រះអម្ចាស់បានទូន្មានបើពួកគេ « មានចិត្តទុក្ខព្រួយ ចូរអំពាវនាវដល់ព្រះអម្ចាស់ដ៏ជាព្រះរបស់អ្នក ដោយការអង្វរករ សូមឲ្យដួងព្រលឹងអ្នកអាចមានអំណរអរផង » ។២៩
ពាក្យដាស់តឿនទាំងពីរនេះជាដំបូន្មានដ៏អស្ចារ្យសម្រាប់ជំនាន់របស់យើងផ្ទាល់ ។ ជីវិតពោរពេញដោយការសរសើរ តន្ត្រី និងអរព្រះគុណគឺជាពរជ័យយ៉ាងពិសេស ។ ការមានអំណរគុណ ហើយពឹងផ្អែកលើជំនួយពីស្ថានសួគ៌តាមរយៈការអធិស្ឋាន គឺជាវិធីដ៏មានព្រះចេស្តាដើម្បីក្លាយជា អ្នកដើរតាមព្រះគ្រីស្ទដោយសុខសាន្ត ។ ការព្យាយាមដើម្បីមានក្តីសង្ឃឹមជានិច្ច ជួយជៀសវាងពីការធ្លាក់ចុះខាងវិញ្ញាណ ។
បន្ទាត់ចុងក្រោយនៃទំនុកតម្កើង បង្ហាញពីចម្លើយនៅទីបំផុតតាមរបៀបមួយដ៏អស្ចារ្យ ៖ « Earth has no sorrow that heav’n cannot heal »៣០
ក្នុងនាមជាសាវកមួយរូបរបស់ព្រះអម្ចាស់យេស៊ូវគ្រីស្ទ ខ្ញុំសូមថ្លែងទីបន្ទាល់ថា « អ្នកដើរតាមព្រះយេស៊ូវគ្រីស្ទដោយសុខសាន្តនឹងរកឃើញភាពសុខសាន្តផ្ទាល់ខ្លួនក្នុងជីវិតនេះ និងការជួបជុំដ៏រុងរឿងនៅស្ថានសួគ៌ ។ ខ្ញុំថ្លែងជាសាក្សីយ៉ាងពិតប្រាកអំពីភាពជាព្រះរបស់ព្រះអង្គសង្គ្រោះ និង ភាពពិតនៃដង្វាយធួនរបស់ទ្រង់ ។ ទ្រង់គឺជាព្រះអង្គសង្រ្គោះ និងព្រះប្រោសលោះរបស់យើង ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕