សរសើរដល់លោក
ឱ យើងមានពរជ័យយ៉ាងច្រើនក្រៃលែង ដើម្បីដឹងអ្វីៗទាំងអស់ដែលយើងដឹង ដោយសារយើងមាន យ៉ូសែប ស្ម៊ីធ ជាព្យាការីនៃគ្រាកាន់កាប់ត្រួតត្រាចុងក្រោយនេះ ។
បងប្អូនប្រុសស្រីជាទីស្រឡាញ់ខ្ញុំអើយ ខ្ញុំមានកិត្តិយសដែលបាននៅជាមួយនឹងបងប្អូននាព្រឹកនេះ ។ ខ្ញុំអធិស្ឋានថា ព្រះអម្ចាស់នឹងប្រទានពរដល់ខ្ញុំ ។
ភ្នែកខ្ញុំលែងដូចមុនហើយ ។ ខ្ញុំបានទៅជួបពេទ្យភ្នែក ហើយខ្ញុំបាននិយាយថា « ខ្ញុំមើលមិនឃើញអក្សរនៅលើកញ្ចក់បង្ហាញអក្សរទេ » ។
ហើយគាត់បានតបថា « មែនហើយ ភ្នែកអែលឌើរចាស់ហើយ ។ វានឹងមិនប្រសើរឡើងទេ » ។
ដូច្នេះ ខ្ញុំនឹងធ្វើឲ្យអស់ពីសមត្ថភាពដែលខ្ញុំអាចធ្វើបាន ។
ខ្ញុំចង់ចែកចាយជាមួយបងប្អូននូវរឿងមួយចំនួន ដែលមាននៅក្នុងចិត្តខ្ញុំ ។ ខ្ញុំហាក់ដូចជាគិតដល់ព្យាការី យ៉ូសែប ក្នុងចិត្តខ្ញុំឥតល្ហែប៉ុន្មានខែចុងក្រោយនេះ ។ ខ្ញុំបានអង្គុយពិចារណាពីការទទួលខុសត្រូវដ៏រុងរឿងរបស់លោក ក្នុងការក្លាយជាព្យាការីនៃគ្រាកាន់កាប់ត្រួតត្រានូវពេលពេញកំណត់នេះ ។
ខ្ញុំគិតថា យើងមានអំណរគុណយ៉ាងខ្លាំងក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែល យ៉ូសែប ស្ម៊ីធ ជាក្មេងប្រុសម្នាក់ដែលចង់ដឹងពីអ្វីដែលលោកត្រូវធ្វើ ដើម្បីទទួលបានការអភ័យទោសដល់អំពើបាបរបស់លោក បានមានភាពក្លាហានដើម្បីចូលទៅក្នុងព្រៃមួយនៅក្បែរផ្ទះរបស់លោកនៅភូមិប៉ាលម៉ៃរ៉ា រដ្ឋញូវយ៉ក ហើយបានលុតជង្គង់នៅទីនោះដើម្បីអធិស្ឋានហើយ—តាមសេចក្ដីថ្លែងការណ៍ផ្ទាល់ខ្លួនរបស់លោក—អធិស្ឋានឮៗជាលើកដំបូង ( សូមមើល យ៉ូសែប ស្ម៊ីធ—ប្រវត្តិ ១:១៤ ) ។
នៅគ្រានោះ កាលដែល យ៉ូសែប បានលុតជង្គង់នៅក្នុងអ្វីដែលយើងហៅថាព្រៃពិសិដ្ឋនោះ ស្ថានសួគ៌ក៏បានបើកឡើង ។ តួអង្គពីរ ដែលភ្លឺជាងព្រះអាទិត្យពេលថ្ងៃត្រង់ទៅទៀត បានបង្ហាញព្រះកាយទ្រង់នៅចំពោះមុខលោក ។ តួអង្គមួយបានមានព្រះបន្ទូលមកកាន់លោកថា « [ យ៉ូសែប ] នេះជាព្រះរាជបុត្រាដ៏ស្ងួនភ្ងារបស់យើង ។ ចូរស្តាប់តាមទ្រង់ចុះ ! » ( យ៉ូសែប ស្ម៊ីធ—ប្រវត្តិ ១:១៧ ) ។ ហេតុដូច្នេះហើយ វាបានចាប់ផ្ដើមមានការស្ដារឡើងវិញនូវភាពពេញលេញនៃដំណឹងល្អដ៏អស់កល្បអស់កាលជានិច្ចរបស់ព្រះយេស៊ូវគ្រីស្ទ ។
ដោយសារព្រះយេស៊ូវដែលជាព្រះអង្គសង្រ្គោះ និងព្រះប្រោសលោះរបស់យើង បានមានបន្ទូលទៅកាន់ក្មេងប្រុស យ៉ូសែប ហើយបានបើកសម្ដែងឡើងនូវគ្រាកាន់កាប់ត្រួតត្រាដែលយើងកំពុងរស់នៅនាពេលនេះ នោះយើងច្រៀងថា « សរសើរដល់លោកដែលទូលនឹងព្រះយេហូវ៉ា ! » ( « សរសើរដល់លោក » ទំនុកតម្កើង ល.រ. ១៦ ) ។ យើងសូមអរព្រះគុណដល់ព្រះអម្ចាស់សម្រាប់ យ៉ូសែប ស្ម៊ីធ និងភាពក្លាហានរបស់លោក ដើម្បីចូលទៅក្នុងព្រៃពិសិដ្ឋនោះនៅឆ្នាំ ១៨២០ នៅក្បែរផ្ទះរបស់លោកនៅភូមិប៉ាលម៉ៃរ៉ា រដ្ឋញូវយ៉ក ។
ខ្ញុំបានគិតអំពីរឿងដ៏អស្ចារ្យទាំងអស់ដែលយើងដឹង និងអ្វីៗទាំងអស់ដែលយើងមាន ។ បងប្អូនប្រុសស្រីជាទីស្រឡាញ់ខ្ញុំអើយ ទីបន្ទាល់របស់ខ្ញុំទៅកាន់បងប្អូននាព្រឹកនេះគឺថា ឱ យើងមានពរជ័យយ៉ាងច្រើនក្រៃលែង ដើម្បីដឹងអ្វីៗទាំងអស់ដែលយើងដឹង ដោយសារយើងមាន យ៉ូសែប ស្ម៊ីធ ជាព្យាការីនៃគ្រាកាន់កាប់ត្រួតត្រាចុងក្រោយនេះ ។
យើងមានការយល់ដឹងអំពីគោលបំណងនៃជីវិតនេះ ដឹងថាយើងជានរណា ។
យើងដឹងថា ព្រះជានរណា យើងដឹងថា ព្រះអង្គសង្គ្រោះជានរណា ព្រោះយើងមាន យ៉ូសែប ដែលបានចូលទៅក្នុងព្រៃនោះកាលនៅជាក្មេងប្រុសម្នាក់ ដើម្បីស្វែងរកការអភ័យទោសចំពោះអំពើបាបរបស់លោក ។
ខ្ញុំគិតថា វាគឺជារឿងដ៏រុងរឿង និងអស្ចារ្យបំផុតមួយ ដែលនរណាម្នាក់នៅក្នុងពិភពលោកនេះអាចដឹងបាន—ថាព្រះវរបិតាសួគ៌របស់យើង និងព្រះអម្ចាស់ព្រះយេស៊ូវគ្រីស្ទបានបើកសម្ដែងអង្គទ្រង់នៅថ្ងៃចុងក្រោយនេះ ហើយថា យ៉ូសែប បានធំឡើងដើម្បីស្ដារឡើងវិញនូវភាពពេញលេញនៃដំណឹងល្អដ៏អស់កល្បអស់កាលជានិច្ចរបស់ព្រះយេស៊ូវគ្រីស្ទ ។
យើងមានព្រះគម្ពីរមរមន ។ ឱ ព្រះគម្ពីរមរមនគឺជាអំណោយដ៏អស្ចារ្យ និងមហិមាអ្វីម្ល៉េះ សម្រាប់សមាជិកភាពនៅក្នុងសាសនាចក្រនេះ ។ វាគឺជាសាក្សីមួយទៀត ជាសក្ខីបទមួយទៀតថា ព្រះយេស៊ូវគឺជាព្រះគ្រីស្ទ ។ យើងមានព្រះគម្ពីរនេះ ដោយសារ យ៉ូសែប មានភាពស័ក្ដិសមនឹងយកផ្ទាំងចំណារទាំងនោះ ត្រូវបានបំផុសគំនិតពីស្ថានសួគ៌ឲ្យបកប្រែព្រះគម្ពីរនេះដោយអំណោយទាន និងព្រះចេស្ដានៃព្រះ ហើយជូនគម្ពីរនេះដល់ពិភពលោក ។
បងប្អូនប្រុសស្រី ទោះបីជាសារលិខិតរបស់ខ្ញុំនៅព្រឹកនេះសាមញ្ញក៏ដោយ ក៏វាជ្រាលជ្រៅដែរ ហើយវាពោរពេញទៅដោយសេចក្ដីស្រឡាញ់ចំពោះព្យាការី យ៉ូសែប ស្ម៊ីធ និងចំពោះអ្នកទាំងអស់ដែលបានគាំទ្រលោក ហើយស្ម័គ្រចិត្តគាំទ្រលោកនៅក្នុងយុវវ័យរបស់លោក ។
ខ្ញុំសូមសរសើរដល់ម្តាយរបស់លោកនៅព្រឹកនេះ ។ ខ្ញុំតែងតែគិតថា តើវាអស្ចារ្យប៉ុណ្ណាទៅ នៅពេលដែល យ៉ូសែប ត្រឡប់មកផ្ទះវិញពីបទពិសោធន៍នៅក្នុងព្រៃពិសិដ្ឋនោះ ហើយបានប្រាប់ម្តាយលោកនូវអ្វីដែលបានកើតឡើង ហើយ លូស៊ី ម៉ាក ស្ម៊ីធ បានជឿលោក ។
ខ្ញុំមានអំណរគុណចំពោះឪពុក និងបងប្អូនប្រុសស្រី និងគ្រួសាររបស់លោក ដែលបានគាំទ្រលោកក្នុងការទទួលខុសត្រូវដ៏សែនធំនេះ ដែលព្រះអម្ចាស់បានប្រទានដល់លោកឲ្យក្លាយជាព្យាការី ដើម្បីស្ដារឡើងវិញនូវដំណឹងល្អដ៏អស់កល្បអស់កាលជានិច្ចរបស់ព្រះយេស៊ូវគ្រីស្ទឲ្យមានម្ដងទៀតនៅលើផែនដីនេះ ។
ដូច្នេះ ទីបន្ទាល់របស់ខ្ញុំនៅព្រឹកនេះគឺថា ខ្ញុំដឹងថា ព្រះយេស៊ូវគ្រីស្ទគឺជាព្រះអង្គសង្គ្រោះ និងជាព្រះប្រោសលោះនៃពិភពលោក ។ ខ្ញុំក៏ដឹងផងដែរថា ព្រះវរបិតាសួគ៌របស់យើង និងព្រះអម្ចាស់ព្រះយេស៊ូវគ្រីស្ទបានបង្ហាញព្រះកាយទ្រង់មក ហើយបានមានបន្ទូលទៅកាន់ យ៉ូសែប ហើយបានរៀបចំលោកឲ្យក្លាយជាព្យាការី ។
ខ្ញុំរំភើប ហើយខ្ញុំប្រាកដថា បងប្អូនទាំងអស់គ្នាជាច្រើនក៏រំភើបដែរ ថាយើងមានពរជ័យយ៉ាងណា ដោយដឹងអ្វីដែលយើងដឹងអំពីគោលបំណងរបស់យើងក្នុងជីវិតនេះ ហេតុអ្វីយើងនៅទីនេះ អ្វីដែលយើងគួរតែព្យាយាមធ្វើ និងសម្រេចឲ្យបាននៅក្នុងជីវិតប្រចាំថ្ងៃរបស់យើង ។ យើងកំពុងតែនៅក្នុងដំណើរការនៃការរៀបចំខ្លួនយើង ម្ដងបន្ដិចៗក្នុងមួយថ្ងៃ ឲ្យបានល្អជាងមុនបន្តិច មានចិត្តសប្បុរសជាងមុនបន្តិច បានត្រៀមខ្លួនច្រើនជាងមុនបន្ដិចសម្រាប់ថ្ងៃនោះ ដែលប្រាកដជានឹងមកដល់ នៅពេលដែលយើងនឹងត្រឡប់ទៅកាន់វត្តមានរបស់ព្រះវរបិតាសួគ៌យើងវិញ និងព្រះអម្ចាស់ព្រះយេស៊ូវគ្រីស្ទ ។
ថ្ងៃនោះកាន់តែខិតជិតដល់ហើយសម្រាប់ខ្ញុំ ។ ឆាប់ៗនេះ ខ្ញុំនឹងមានអាយុ ៩៥ ឆ្នាំ ។ កូនៗខ្ញុំប្រាប់ខ្ញុំថា ខ្ញុំចាស់ជាងអាយុនេះទៅទៀតនៅថ្ងៃខ្លះ ប៉ុន្តែវាមិនអីទេ ។ ខ្ញុំកំពុងធ្វើឲ្យអស់ពីសមត្ថភាពរបស់ខ្ញុំហើយ ។
ប៉ុន្តែអស់រយៈពេលជិត ៥០ ឆ្នាំមកហើយ បងប្អូនប្រុសស្រីអើយ ខ្ញុំបានមានអភ័យឯកសិទ្ធិដើរសឹងគ្រប់ប្រទេសក្នុងពិភពលោកនេះ ក្នុងការចាត់តាំងរបស់ខ្ញុំជាអ្នកមានសិទ្ធិអំណាចទូទៅនៃសាសនាចក្រ ។ វាគឺជាពរជ័យដ៏អស្ចារ្យមួយ ។ ខ្ញុំគិតថា ខ្ញុំបានទៅស្ទើរតែគ្រប់ផ្នែកទាំងអស់នៃពិភពលោកនេះ ។ ខ្ញុំបានជួបជាមួយសមាជិកជាច្រើនក្នុងសាសនាចក្រនៅទូទាំងពិភពលោក ។
ឱ ខ្ញុំពិតជាស្រឡាញ់បងប្អូនខ្លាំងណាស់ ។ ឱ នោះជាបទពិសោធន៍ដ៏រុងរឿងអ្វីម្ល៉េះ—ដើម្បីបានមើលមុខបងប្អូន នៅក្នុងវត្តមានរបស់បងប្អូន ហើយទទួលអារម្មណ៍ពីសេចក្ដីស្រឡាញ់ដែលបងប្អូនមានចំពោះព្រះអម្ចាស់ និងចំពោះការស្ដារឡើងវិញនៃដំណឹងល្អរបស់ព្រះយេស៊ូវគ្រីស្ទ ។
សូមឲ្យព្រះវរបិតាសួគ៌របស់យើងតាមថែរក្សាយើងនាពេលនេះ ហើយប្រទានពរជ័យដល់ដំណើរការទាំងអស់នៃសន្និសីទនេះ ។ សូមឲ្យយើងមានព្រះវិញ្ញាណនៃព្រះអម្ចាស់យ៉ាងពេញលេញនៅក្នុងចិត្តយើង ហើយសូមឲ្យសេចក្ដីស្រឡាញ់របស់យើងចំពោះដំណឹងល្អនៃព្រះយេស៊ូវគ្រីស្ទ—ព្រះអង្គសង្រ្គោះជាទីស្រឡាញ់របស់យើង ព្រះអម្ចាស់ព្រះយេស៊ូវគ្រីស្ទ—កើនឡើង កាលយើងខិតខំបម្រើទ្រង់ ហើយរក្សាបទបញ្ញត្តិទាំងឡាយរបស់ទ្រង់ ហើយក្លាយកាន់តែដូចជាទ្រង់ ជាលទ្ធផលនៃការចូលរួមក្នុងសន្និសីទទូទៅរបស់យើងនេះ ។ មិនថាបងប្អូននៅកន្លែងណានៅក្នុងពិភពលោកនេះ សូមឲ្យព្រះប្រទានពរដល់បងប្អូន ។ សូមឲ្យព្រះវិញ្ញាណនៃព្រះអម្ចាស់គង់នៅជាមួយយើង ។ សូមឲ្យយើងទទួលអារម្មណ៍ពីព្រះចេស្ដានៃស្ថានសួគ៌ កាលយើងថ្វាយបង្គំជាមួយគ្នានៅក្នុងសម័យប្រជុំនៃសន្និសីទនេះ ។
ខ្ញុំសូមបន្សល់ទុកនូវសាក្សី និងទីបន្ទាល់របស់ខ្ញុំដល់បងប្អូនថា ខ្ញុំដឹងថា ព្រះយេស៊ូវគឺជាព្រះគ្រីស្ទ ។ ទ្រង់គឺជាព្រះអង្គសង្រ្គោះ និងព្រះប្រោសលោះរបស់យើង ។ ទ្រង់គឺជាមិត្តដ៏ល្អបំផុតរបស់យើង ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕