Ne u ʻIloʻi Moʻoni Koā?
Hili ha efiafi fakafiefia ʻe taha ʻi ʻAositelēlia ʻi he 1998, ne kole mai hoku kaungāmeʻa lelei tahá ke u ʻave ia ki ʻapi. ʻI heʻema lele atu ki hono ʻapí, naʻe afe hake ʻema talanoá ki he ngaahi tefitoʻi meʻa naʻá ma tui ki aí. Ko ha tokotaha ia naʻe ʻikai tui ʻOtua ka ko e tokotaha Siasi au. Naʻá ku ʻiloʻi maʻu pē ʻoku ʻi ai ha ʻOtua; naʻá ne tui maʻu pē ia naʻe ʻikai ha ʻOtua.
ʻI he efiafi ko ʻení ne u fai ha meʻa naʻe teʻeki ai ke u fai ki muʻa. Ki muʻa pea hifo hoku kaumeʻá, naʻá ku talaange ʻoku ou ʻiloʻi ʻoku moʻui ʻa e ʻOtuá, ko hotau Fakamoʻuí ʻa Sīsū, pea naʻe mamata ʻa Siosefa Sāmita kiate kinaua ʻi ha meʻa-hā-mai.
Ne u faʻa talanoa pē mo ia ʻo kau ki he ngaahi meʻa ko ʻení, ka naʻe teʻeki ai ke u fakahā tuʻo taha kiate ia naʻá ku ʻilo ʻoku moʻoni. Neongo ia, ne u ʻiloʻi kapau naʻá ku fie fakahā kiate ia ha meʻa ʻe nofo fuoloa ʻi heʻene manatú, kuo pau pē ke u fakamoʻoniʻi ange kiate ʻa e ngaahi meʻa ni.
ʻI heʻene fakaava e matapā ʻo e kaá, naʻá ma lulululu peá ne pehē mai, “ʻEi, kaumeʻa, ko e meʻa lelei ia. ʻOku fie maʻu ke tau tuʻu mālohi kotoa pē ʻi he ngaahi meʻa ʻoku tau tui ki aí.”
Neongo ia, ko e palopalemá ʻa e ʻikai ke u ʻiloʻi paú. Ne u ongoʻi ko e meʻa totonu pē ia ke u leaʻaki ʻi he taimi ko iá, ka ne teʻeki ai pē ke u maʻu hano fakapapauʻi mai ʻe he laumālié ʻoku nau moʻoni.
Ne u lele ki ʻapi ʻi ha miniti ʻe 20. Ne liliu ʻe he miniti ʻe 20 ko iá ʻa ʻeku moʻuí. ʻI heʻeku toe fakakaukau atu ki heʻema talanoá, naʻe kamata ke u fakakaukau ki heʻeku moʻuí mo e feituʻu ne u huʻu ki aí. Lolotonga ʻeku fakakaukaú, ne haʻu ki hoku ʻatamaí ʻa e himi “ʻOku Moʻui Hoku Huhuʻí” pea ne aʻu ia ki hoku laumālié. Ne kamata leva ke u hiva leʻo lahi:
[ʻOku ou ʻilo ʻoku moʻui hoku Huhuʻí.
Toki lea fakafiemālie ka ko ʻeni!
ʻOkú ne moʻui, ʻokú ne moʻui, ʻa ia ne pekiá.
ʻOkú ne moʻui, ko hoku ʻEikí ʻo taʻengata].1
Ne tafe hoku loʻimatá lolotonga ʻeku hivá ʻi hono fakamoʻoniʻi kiate au ʻe he Laumālié ʻa hono moʻoni ʻo e ngaahi lea ko iá mo fakapapauʻi mai ʻoku moʻoni ʻeku fakamoʻoní. Ne u ʻiloʻi leva ʻe lava ke maʻu haʻate fakamoʻoni ʻi he taimi ʻokú te fai ai ʻete fakamoʻoní.2
He ʻikai teitei ngalo ʻa hono fakamoʻoniʻi kiate au ʻe he Laumālié ʻoku moʻoni ʻeku fakamoʻoní. ʻOku ou ʻiloʻi ʻoku moʻui hoku Huhuʻí he naʻe fakamoʻoniʻi ia ʻe he Laumālié ki hoku lotó—ʻa ia ko ha fakamoʻoni ne u fiefia ke vahevahe mo ha niʻihi kehe ʻi heʻeku hoko ko ha faifekau taimi kakato hili pē ha taimi nounou mei ai.