Ngaahi Foʻi Mā mo ha Ngaahi Fakamoʻoni

ʻI he lolotonga e Fineʻofá ʻi ha Sāpate ʻaukai ʻe taha, naʻe tuʻu hake ai ha fefine ʻi homau uōtí ʻo fai ʻene fakamoʻoní. Hili haʻane pehē naʻá ne ʻiloʻi ʻoku ʻofa lahi mo tokanga mai ʻa e ʻEikí kiate iá, naʻá ne fakamatala ki he meʻa ko ʻeni naʻe hokó.

Naʻá ne puke he niumōniá, pea naʻá ne faingataʻaʻia lahi he pongipongi ʻe taha. Naʻe mole ʻaupito pē ifo ʻene kaí, pea ko e meʻa pē naʻá ne fakakaukau ʻe lava ke ne kaí ko ha mā taʻo pē ʻi ʻapi. Naʻe fakaʻau ke ne loto foʻi pea naʻá ne lotua pē ha tokoni ke ne kātakiʻi hono ngaahi faingataʻaʻiá.

ʻI he pongipongi pē ko iá naʻe ʻalu ange ai ʻene faiako ʻaʻahí mo ha foʻi mā naʻe taʻo pē ʻi ʻapi. Naʻe fakamoʻoni ʻa e fefiné ki he ʻofa naʻá ne ongoʻi mei he Tamai Hēvaní. Naʻá Ne fanongo ki heʻene ngaahi lotú peá Ne foaki ʻa e meʻa pē ko ia naʻá ne fie maʻú.

ʻI heʻeku fanongó, ne u ʻiloʻi ko au ʻa e faiako ʻaʻahi ko iá. Naʻe foki ʻeku manatú ki he pongipongi ko iá, ʻa ʻeku feinga ke manatuʻi hono ʻuhinga naʻá ku fakakaukau ai ke ʻave ʻa e maá he taimi ko iá. Naʻe ʻikai ke u fanongo ki ha leʻo pe ongoʻi māfana ʻi hoku fatafatá. Ne u ʻā hake pē he ʻaho ko iá ʻo ongoʻi ʻoku ou fie taʻo mā.

ʻI heʻeku teuteu ke taʻo e maá, naʻá ku fakakaukau ki ha fefine ʻi homau uōtí ʻa ia naʻe puke. Lolotonga ʻene puké ne u ongoʻi ʻeku taʻeʻaongá he naʻe ʻikai te u ʻiloʻi ha meʻa ʻe lava ke u fai ke fakafiemālieʻi hono mamahí. Ne haʻu ki heʻeku fakakaukaú ke u ʻave ki ai ha foʻi mā. Ne u fakakaukau ke toe tuku pē he naʻe ʻikai ke fuo lelei e ngaahi foʻi maá. Ka ʻi heʻeku ʻahiʻahi ha foʻi mā ʻe taha, naʻe sai pē ia. Ne u fakakaukau pē, “Ko e meʻa mahuʻingá ʻene ʻilo naʻá ku fakakaukau ange kiate ia.”

Ne u kofukofuʻi e foʻi mā mafana mo fuo faikehe ko ʻení ʻo ʻave ki hono ʻapí. ʻI heʻeku ʻoange ia ki aí, naʻá ne malimali mo fakamālō mai ka naʻe ʻikai te ne toe fie maʻu ha tokoni kehe. Ne u foki ki ʻapi mo e ongoʻi fiefia ka naʻá ku kei hohaʻa pē naʻa ʻoku teʻeki ai feʻunga ʻeku tokoní.

Hili ha ngaahi māhina mei ai, ne u fanongo ki heʻene fakamoʻoní, pea naʻe mahino kiate au ko hono ueʻi ia ʻe he Laumālie Māʻoniʻoní au, ko e tali ki heʻene ngaahi lotú. Ne akoʻi kiate au ha lēsoni maʻongoʻonga ʻe he meʻá ni ʻo kau ki hono mahuʻinga ke tau fakaongoongo ki he ngaahi ueʻi ʻa e Laumālié. Kapau te tau maʻu ha faʻahinga fakakaukau ke fai ha meʻa ʻoku lelei, ʻoku totonu ke tau fai ia. Naʻe folofola ʻa e Fakamoʻuí, “Pea ʻilonga ha meʻa ʻokú ne fakalotoʻi ʻa e tangatá ke faileleí, ʻoku tupu ia meiate au; he ʻoku ʻikai tupu ʻa e leleí mei ha taha ka ko au pē” (ʻEta 4:12).

ʻI ha taimi pē ʻoku tau fakakaukau ai ke failelei, ʻe lava ke tau ʻiloʻi ʻoku tupu ia mei he Laumālié. He ʻoku ʻikai ke tau ʻiloʻi hono mahuʻinga ʻo e ngaahi ueʻi fakalaumālie peheé. Naʻe ʻikai haʻaku teitei fakakaukau ʻe taha ko e foʻi mā taʻo ʻi ʻapí ko ha tali ia ki ha lotu ʻa ia te ne fakamālohia ha fakamoʻoni. Pea ʻi hono ueʻi ʻa e fefiné ke fakamatala ʻi he Fineʻofá ki he meʻa naʻe hokó, naʻe ʻikai haʻane ʻilo ki he lēsoni mahuʻinga ko ia ne u ako ʻo kau ki hono ʻiloʻi ʻo e Laumālié.