Ko e Sivi Lahi Taha ʻo ʻEne Moʻuí. …ʻo Aʻu Mai ki he Taimi Ní
Lolotonga e teuteu ʻa ʻAnitulia ki heʻene sivi lahí, naʻá ne ako ai ʻo ʻiloʻi ʻa e founga ke paasi ai ʻi he sivi māʻolunga tahá.
ʻI he tupu hake ʻa e finemui ko ʻAnitulia Konisālesí ʻi Sanitiako ʻi Silé, naʻe ʻikai haʻane meʻa ʻe maʻu ka ko ha fakaʻānaua pē—ke maʻu hano mataʻitohi mei he ʻunivēsití ke ne lava ʻo tokoni ki hono fāmilí ʻo ka fie maʻu.
Ke aʻusia ʻene fakaʻānauá, naʻá ne ʻamanaki te ne ʻosi mei he seminelí, lelei hono maaka ʻi he akó, pea maaka māʻolunga ʻi heʻenau sivi ʻahiʻahi fakakolisí (PSU) ke hū ki ha ʻunivēsiti ʻe lava ke ne ako fakaʻenisinia ai.
Ka ʻi he hokosia e taimi naʻe kamata ai hono taʻu fakaʻosi ʻi he akoʻanga māʻolungá ke teuteu ki he PSU, naʻe kamata ke ne fifili pe ʻe lava nai ha taha ʻo e ngaahi meʻa ko iá. ʻOkú ne pehē ʻi heʻene manatu ki aí, “Naʻe hangehangē he ʻikai te u lavaʻi kātoa ʻeku ngaahi taumuʻá.”
Naʻe ʻIkai ko Ha Ngaahi Taumuʻa Faingofua
Naʻe feinga ʻa ʻAnitulia ke ne ako ʻi ha faʻahinga tafaʻaki naʻe feʻauʻauhi ai e tamaiki tangatá pea nau toe tokolahi ange pē ai. Pea tupu mei he feʻauʻauhi ki aí, naʻe kumi ʻe he ngaahi ʻunivēsiti lelei tahá ia ha niʻihi naʻe mātuʻaki māʻolunga ʻaupito honau māká ʻi he tafaʻaki ʻa e fika ʻi he sivi PSU, ʻa ia ko e ngaahi maaka ʻeni naʻe meimei ke maʻu pē ʻe kinautolu naʻe ʻi ai ʻenau paʻanga ke nau ako ʻi he ngaahi ʻapiako fakatāutahá.
Ko e taimi-tēpile faingataʻa ʻa ʻAnitulia ʻi hono taʻu fakaʻosí ʻi heʻene feinga ko ia ke lavaʻi ʻa e ngaahi meʻá ni. Naʻá ne ʻā hengihengia hake peá ne ako ʻi he tuku ʻa e akó ʻo aʻu ki he fuoloa ʻa e poʻulí, ʻo ne toki kai pē ʻo ka ʻi ai hano kiʻi taimi ʻatā mo fakaʻataʻatā hano taimi ki he seminelí ʻi he pō ʻe fā he uike.
ʻOkú ne pehē, “Naʻe fakalotosiʻi he taimi ʻe niʻihi. Naʻe fie maʻu ke u feilaulau lahi. ʻOku ʻikai te u ʻilo pe ko e tuʻo fiha ʻeni e fanongo mai hoku ngaahi kaumeʻá ki heʻeku pehē, ʻʻIkai, ʻoku fie maʻu ia ke u ako’ pe ko e hā hono tuʻo lahi ʻenau fakamataliliʻi au ʻi heʻeku potó.”
Ka naʻá ne ʻiloʻi he ʻikai lava ke ne foʻi ʻo kapau naʻá ne fie maʻu ke pau hono kahaʻú.
Ko e Lava ʻi he Siví
Naʻe ʻaonga ʻene feilaulaú. ʻI he konga ʻa e fiká ʻi he sivi PSU, naʻe kau ʻa ʻAnitulia ʻi he fānau ako ʻe toko 200 ʻi he fonuá naʻa nau maʻu ʻa e maaka haohaoa ko e 850 pea ko e toko taha pē ia ʻo e ongo tamaiki fefine mei he ngaahi ʻapiako ʻa e puleʻangá naʻá na maʻu ʻa e maaka ko ʻení.
Naʻá ne ʻosi foki mei he seminelí, lelei hono ngaahi maaka naʻá ne ako mālohi ke maʻú, pea naʻe ui ia ʻe hono kaungā kalasí ko e “Kaumeʻa Lelei Taha” ʻo e taʻú koeʻuhi ko e taimi naʻá ne fakamoleki ke tokoni ai ki he niʻihi kehé ʻi heʻenau akó.
Ka ʻoku tui ʻa ʻAnitulia naʻe siʻisiʻi ange e kaunga ʻa e meʻa ia naʻá ne ʻiló ki heʻene lavameʻá, ʻi hono fakafehoanaki atu ki he meʻa ko ia ʻokú ne ʻiloʻi kuo pau ke ne faí. ʻI hono fakalea ʻe tahá, ʻoku maʻu e ngaahi tāpuakí mei he muimui ki he ngaahi akonaki ʻa e ʻOtuá, kae ʻikai ki hotau potó (vakai, 2 Nīfai 9:28–29). ʻOkú ne pehē, “ʻOku ʻikai hano mahuʻinga ʻe taha haʻatau poto kapau ʻoku ʻikai ke tau tokanga ki he ʻOtuá. Kuo pau ke ke fakamuʻomuʻa maʻu pē ʻa e ʻOtuá.”
Ko e Sivi ʻe Tahá
Naʻe mahuʻinga ki he sivi ʻe taha naʻe fai ʻe ʻAnituliá ke ne ʻiloʻi ʻa e tefitoʻi moʻoni ko ia lolotonga ʻene ako ki heʻene sivi ʻahiʻahi fakakolisí—ʻa e sivi ko ia ʻo e moʻuí kuo pau ke fai ʻe he tokotaha kotoá.
ʻOku folofola tonu pē ʻa e ʻEikí ʻo kau ki he sivi ko ʻení: “Te tau siviʻi ʻa kinautolu ʻi he meʻá ni, ke vakai pe te nau fai ʻa e ngaahi meʻa kotoa pē ʻe fekau ʻe he ʻEiki ko honau ʻOtuá kiate kinautolú” (ʻĒpalahame 3:25).
ʻOku fakakaukau ʻa ʻAnitulia ki he taimi-tēpile faingataʻa naʻá ne ngāueʻakí mo ʻene faʻa kātakiʻi hono fakamataliliʻi iá, ʻo ne pehē, “ʻOku siviʻi kitautolu ʻe he Tamai Hēvaní ke sio pe ko e hā te tau faí. Kuo pau ke tau talangofua ka tau lavaʻi e sivi ʻo e moʻuí.”
Pea ʻikai ʻi he taimi pē ʻoku faingofua aí ka ʻi he ngaahi taimi faingataʻá foki.
ʻOku pehē ʻe Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí, “Ko e sivi lahi taha ʻo e moʻuí ko hono vakaiʻi pe te tau tokanga mo talangofua ki he ngaahi fekau ʻa e ʻOtuá ʻi he lotolotonga ʻo e ngaahi taimi faingataʻa ʻo e moʻuí.”1
ʻOku ʻIkai ha Sivi ia ʻe Faingataʻa Kiate Ia
Naʻe faʻa fepakipaki ʻene ongo siví. Ko e taimi ia ne ako ai ʻe ʻAnitulia ʻo ʻiloʻi ko e fakapulipuli ki hono fakatou lavaʻi e ongo siví, ko hono fakamuʻomuʻa ʻo e ʻOtuá.
Naʻe lahi e taimi naʻe pau ai ke ne fili ʻi he vahaʻa ʻo e ngaahi ʻekitivitī faka-Siasí mo e ngaahi ʻekitivitī ʻa e akó, ʻi hono ako ʻo e ongoogoleleí pea mo ʻene ako ki heʻene siví. ʻOkú ne pehē naʻá ne ʻilo pē ki muʻa ʻene ongoʻi fiemālie ange kapau naʻá ne ʻuluaki fili ʻa e Siasí. Naʻe fakamālohia ai ʻene fakamoʻoní ʻe tokoniʻi ia ʻe he Tamai Hēvaní ʻi he ngaahi meʻa naʻá ne tokanga ki aí ʻo kapau ko Ia ʻa e ʻuluaki meʻa naʻá ne tokanga ki aí.
Ne akoʻi foki ʻe he ngaahi meʻa ko ʻeni naʻe hokó ha lēsoni mahuʻinga ʻe taha kia ʻAnitulia. Okú ne pehē, “ʻE lava ke Ne tokoniʻi au ʻi he ngaahi sivi ko ia kuó Ne tuku maí.”
Pe hangē ko e lea ʻa ha taha ʻo ʻene kau heló, ʻa ia ko Nīfai, “ʻOku ou ʻilo ʻoku ʻikai tuku mai ʻe he ʻEikí ha fekau ki he fānau ʻa e tangatá kae ʻikai te ne teuteu ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú” (1 Nīfai 3:7).
ʻOku ʻiloʻi ʻe ʻAnitulia neongo kuó ne lavaʻi ʻene sivi ʻuluakí, ka ʻoku kei lahi ʻaupito e ngaahi meʻa kuo pau ke ne ako ka ne toki ongoʻi kuó ne mateuteu ke paasi ʻi he sivi hokó.
Ka ʻokú ne ʻiloʻi kapau te ne fakamuʻomuʻa e ʻOtuá, te Ne tokoni kiate ia ke ne lavaʻi mo e sivi ko iá.