Ko e Himi ʻi ha Falelotu
Ne u folau ki Hōlani ʻi Sepitema ʻo e 2004 mo ha toko ua ʻo hoku makapuná, ko Simi mo ʻAliena, ki hono fakamanatu ʻo e taʻu 60 ʻo e tauʻatāina ʻa Hōlaní lolotonga e Tau Lahi Hono II ʻa Māmaní. Naʻe fakaafeʻi kimautolu ʻe he Kulupu Ngāue ki he Hisitōlia ʻo Hōlaní ke mau kau ange ki he kātoanga fakamanatu ko ʻení he naʻe mālōlō hoku tokoua ko ʻĒvení, ko ha tokoni pailate ʻo ha vakapuna fakatō pomu B-24, lolotonga ʻene tokoni ki hono fakatauʻatāinaʻi ia ʻi he 1944.
Lolotonga ʻemau ʻi aí, naʻa mau fononga atu ki Homasamu, ʻa ia naʻe kiʻi fakalaka siʻi atu pē ʻi he kauʻāfonua mo Siamané, ke kau ki hono huufi ʻo ha maka fakamanatu ʻi he feituʻu naʻe tō ai e vakapuna hoku tokouá. Naʻá ma lea ai mo Faifekau Sēlati Tēningi, ko e taha ʻo kinautolu naʻa nau fokotuʻutuʻu e polokalamá, hili ko iá naʻe hivaʻi ʻe ʻAliena, ʻa ia naʻe taʻu 17, e fasi fakafonua ʻa ʻAmeliká, ko e “The Star-Spangled Banner,” pea tokoni ʻa Simi, taʻu 15, ki hono fusi ʻo e fuka ʻAmeliká.
Ne u fakahā kia Faifekau Tēningi ki mui ange ai ʻemau fie kau ki he Misa makehe hono fakatauʻatāinaʻi ʻo e fonuá ʻa ia ʻe fakahoko he ʻaho hono hokó ʻi hono falelotú ʻi ʻOusitahausi. Naʻá ne tali fiefia ʻemau fie kau angé peá ne fakaafeʻi kimautolu ki ai. Naʻá ku feinga ke toʻa hoku lotó ʻo fokotuʻu ange ʻe loto fiemālie pē ʻa ʻAliena ke hiva ʻi he fakatahaʻangá he naʻá ma ʻosi talanoa foki ki ai mo ʻAliena.
Naʻá ne ʻohovale peá ne fehuʻi mai, “Ko e hā e foʻi hiva te ne hivaʻí?”
Ne u talaange, “‘Ko e Fānau Au ʻa e ʻOtuá,’”1
Ne fakakaukau siʻi ki ai e tangata lelei mo angaʻofá ni peá ne pehē mai, “Ko e fānau kotoa foki kitautolu ʻa e ʻOtuá. ʻOku lelei.”
Naʻe fonu e falelotú ʻi he taimi ne mau aʻu pongipongia atu ai ki he Misá he pongipongi hono hokó. ʻI he vaeua ʻa e polokalamá, naʻe fakaafeʻi ʻe Faifekau Tēningi ʻa ʻAliena ke ʻalu hake ki muʻa ʻo hiva. Hili ʻene taki atu ia ki muʻá, naʻá ne pehē, “Te tau fanongo leva he taimí ni ki ha foʻi hiva mei ha taʻahine Māmonga mei ʻIutā.”
Naʻe kamata leva ke hiva taʻemeʻalea pē ʻa ʻAliena. ʻI he ongona ʻa hono leʻó mei he ngaahi ʻaofi māʻolunga ʻo e falelotú, naʻe kamata ke ngangana e loʻimata ʻo e kāingalotu ʻo e siasí ʻi he mahino kiate kinautolu ʻa e pōpoaki fakafiemālie naʻe ʻomai ʻe he himí.
ʻI he ʻosi ʻa e fakatahaʻangá, naʻe fakahā ʻe ha tokolahi ʻa ʻenau fakamālō mo ʻenau ʻofa kia ʻAliena ʻi heʻene hivaʻi ʻa e himí. Naʻe hoko ʻa e meʻá ni ko ha fakamanatu kiate kimautolu kotoa ko e fānau kitautolu ʻa e ʻOtuá—ʻo tatau ai pē pe ko e hā e matakali, tui fakalotu, mo e lea ʻoku tau kau ki aí.