Haʻu ʻo Fanongo ki he Leʻo ʻo e Palōfitá
Ko e Ivi Fakalotoa Mālohi Tahá
Mei ha lea ʻi he konifelenisi lahi ʻi ʻOkatopa 2006.
Ko e moʻoni ʻoku hanga ʻe heʻetau ngaahi fakaʻamú mo ʻetau ngaahi fakakaukaú ʻo tākiekina ʻetau ngaahi tōʻonga moʻuí. Tuku muʻa ke u vahevahe atu ha meʻa ne hoko kiate au ʻi heʻeku kei talavoú, ʻoku fekauʻaki mo e mālohi ʻo e ngaahi fakaʻamu ʻoku angatonú.
Hili e haʻahaʻa ʻo e Tau Lahi Hono II ʻa Māmaní, ne iku nofo ai hoku fāmilí ʻi Siamane Hahake, ne maʻu ʻe he kau Lūsiá. ʻI heʻeku kalasi faá, naʻe pau ke u ako e lea faka-Lūsiá, ʻa ia ko e fuofua lea muli ia he akó. Ne u faingataʻaʻia ʻaupito heni koeʻuhí ko hono fakahokohoko fakamotuʻa leá, ka naʻe ʻalu pē taimí mo e sai ange ʻeku ako iá.
ʻI he hoko hoku taʻu 11, naʻe pau ke mau mavahe fakatuʻupakē mei Siamane Hahake koeʻuhí ko e tuʻunga fakapolitikale ʻo ʻeku tangataʻeikí. Ne u ʻalu leva ai ʻo ako ʻi Siamane Hihifo, ʻa ia naʻe maʻu ʻe he kau ʻAmeliká he taimi ko iá. Naʻe fie maʻu ia he ʻapiakó ke ako ʻe he fānau kotoa pē ʻa e lea faka-Pilitāniá, ka naʻe fuʻu faingataʻa kiate au ʻa e lea faka-Pilitāniá ia. Ne u fakakaukau au ne ʻikai poto feʻunga hoku ngutú ʻoʻoku ke lea faka-Pilitānia. Naʻe siʻi feinga ʻeku kau faiakó. Naʻe faingataʻaʻia ʻeku ongomātuʻá. Pea ne u ʻiloʻi naʻe ʻikai ke u feʻunga au ki he lea faka-Pilitāniá.
Ka naʻe hoko ha meʻa ʻo liliu ai ʻeku moʻuí heʻeku kei siʻí. Ne u meimei heka pasikala he ʻaho kotoa pē ki he malaʻevakapuná ke u sio he puna mo e tau mai ʻa e ʻū vakapuná. Ne u laukonga, ako mo feinga ke ʻilo ʻa e meʻa kotoa pē te u lava, ʻo fekauʻaki mo e folau vakapuná. Ko ʻeku fakaʻamu taupotu tahá ia ke u hoko ko ha pailate. Naʻe lava pē ke u sioloto atu ki haʻaku tangutu he nofoʻanga ʻo e kau pailaté ʻi ha loto vakapuna uta pāsese pe ʻi ha vakapuna fakakautau. Ne u ongoʻi moʻoni ʻi hoku lotó ko e meʻa totonu ia ke u fakahokó.
Ne u ʻiloʻi foki kapau ʻoku ou fie hoko ko ha pailate, kuo pau ke u lea faka-Pilitānia. Naʻe ofo moʻoni ʻa e tokotaha kotoa pē he vave fau e liliu hoku ngutú. Naʻe lava ke u ako ʻa e lea faka-Pilitānia. Naʻe kei fie maʻu pē ki ai ha ngāue lahi, vilitaki mo e faʻa kātaki, ka naʻá ku lava pē ʻo ako e lea faka-Pilitāniá!
Ko e hā hono ʻuhingá? Koeʻuhí ko ha fakaʻamu angatonu mo mālohi ne maʻu ʻe hoku lotó!
Ko e fakamoʻoni ko ia ki hono moʻoni ʻo e ongoongolelei ʻo Sīsū Kalaisi kuo toe fakafoki maí, ko e ivi fakalotoa mālohi taha ia ʻi heʻetau moʻuí. Naʻe toutou fakamamafaʻi mai ʻe Sīsū ʻa e ivi ʻo e fakakaukau leleí mo e fakaʻamu ʻoku leleí: “Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē” (T&F 6:36).
ʻE hanga ʻe he fakamoʻoni ʻoku tau maʻu ʻo kau kia Sīsū Kalaisí pea mo e ongoongolelei kuo toe fakafoki maí, ʻo tokoniʻi ʻetau moʻuí ke tau ʻilo ki he palani makehe ʻa e ʻOtuá maʻatautolú pea tau ngāue leva ʻo fakatatau mo ia. ʻOkú ne fakapapauʻi mai kiate kitautolu ʻa e moʻui, moʻoni pea mo e angalelei ʻa e ʻOtuá, pehē ki he ngaahi akonaki mo e Fakalelei ʻa Sīsū Kalaisí pea mo e uiuiʻi fakalangi ʻo e kau palōfita ʻi he ngaahi ʻaho kimui ní. ʻOku fakalotoa kitautolu ʻe heʻetau fakamoʻoní ke tau moʻui angatonu, pea ʻe hanga leva ʻe heʻetau moʻui angatonú ʻo fakatupulaki ʻetau fakamoʻoní ke toe mālohi ange.