O Le Suega

O lou faamoemoe o le faailoa atu e faapea, i taimi faigata e saunia ai e le Alii i taimi uma se auala saogalemu i luma atu. Ua tatou ola i na “taimi faigata” lea na valoia e le Aposetolo o Paulo o le a oo mai i aso amuli.¹ Afai tatou te mananao ina ia saogalemu taitoatasi, o ni aiga, ma malupuipuia o se ekalesia, o le a mafai e ala i le “usiusitai i tulafono ma sauniga o le Talalelei.”²

I le aso 24 o Iulai, 1849, ua atoa lelei i ai le lua tausaga talu ona i ai le Au Paia i le vanu. Ua latou faatoa mapu mai tausaga o tagata faatupu faalavelave ma sauaga. O lena tulaga ua tatau ai se sauniga faamanatu tele.

I nai tausaga na muamua atu i ni tulaga matautia, sa mafatia ai le Perofeta o Iosefa Samita i le Falepuipui i Liperate mo le tele o masina, a o tutulieseina e tagata faatupu faalavelave le Au Paia mai o latou fale. O upu liperate [saolotoga] ma le falepuipui e matua le ogatusa lava.

Sa alaga atu Iosefa:

“Le Atua e, o i fea ea oe? Po o fea foi le maota ua ufitia ai lou afioaga lilo?

“Pe taofia ea lou aao seia afea, ma silasila atu mai le lagi faavavau lau silafaga, ioe lau silafaga mama lava, i sese ua faia i lou nuu atoa ma au auauna ma oo atu i lou fofoga a latou tagi?”³

Sa saili atu le Perofeta o Iosefa Samita i le taimi muamua mo se taitaiga, ma sa ta’u atu e le Alii i le Au Paia ina ia latou faatauanau atu i se vaifofo mai faamasino, o le kovana, ona o atu ai lea i le peresitene.⁴

Sa le talia a latou talosaga i faamasino. I lona soifuaga, sa molia ai Iosefa Samita i le faamasinoga i le silia ma le 200 taimi i ituaiga eseese o tuuaiga fatufua. E lei tausalaina lava o ia..

Ina ua latou saili atu i se vaifofo mai ia Kovana Boggs o Misuri, sa ia tuuina atu se folafolaga: “E tatau ona taulima ia Mamona o ni fili ma e tatau ona fasiotia i latou pe tutuliese mai le setete, pe afai e tatau ai mo le lelei o tagata lautele.”⁵ O lena folafolaga na tulai mai ai faiga faatufanua e le fia mafaufau i ai, atoa ai ma le amioleaga.

Sa latou toe talosaga ia Peresitene Martin Van Buren o le Iunaite Setete, o le na fai atu ia te i latou, “E sa’o la outou mataupu, ae e leai se mea ou te mafaia mo outou.”⁶

O le a ou faitauina atu parakalafa faaiu o la latou talosaga lona tolu na faatuatusi i le Konekeresi a le Iunaite Setete:

“O mafatiaga o i latou na tusia tusi talosaga ua matua lofituina, ua matua mamafa tele naua mo se tagata soifua, ua matua tele naua mo le onosaia e tagatanuu o Amerika e aunoa ma se faasea. Ua matou mafatia i faiga a le lima u’amea o pulega faafitafita pulepuletutu i le tele o tausaga. Ua faoa a matou meatotino o lona tau e lua miliona tala. Ua tuli faamanu aivao o le vao i matou. Ua matou vaai i o matou toeaiina o e sa tau mo le Saolotoga o Amerika, ma a matou fanau e leai se sala, ua faapena foi ona fasiotia e le au faaoosala. Sa matou vaai i afafine lalelei o tagatanuu o Amerika o faatiga ma faia faatautala i se tulaga e aupito sili ona faatufanua, ma le mea mulimuli, ua matou vaaia agaga e sefululima afe, o alii, o tamaitai, ma tamaiti o aveeseina faamalosi e le au fitafita, i le taimi o le ogaoga o le taumalulu, mai o latou malutaga paia ma magalafu, ma avatu ai i se nuu o tagata ese, leai se tupe ma aunoa ma se puipuiga. Ona o nei tulaga pagatia uma, o lea ua matou aapa atu ai ma le agaga faatauanau i le aufono sili a lo matou atunuu, ma talosagaina ai ma le lotomaulalo i Senate ma Sui mamalu o se atunuu maoae ma le saoloto, mo se vaifofo ma se puipuiga.

“Faafofoga maia! Se faafofoga maia i le leo o le talosaga a le mano o afe o tagatanuu Amerika o e o loo faatoga atu i le faaaunuua … ! Faafofoga maia! Se faafofoga mai i le tagiaue ma le tagitui a fafine ua oti a latou tane ma e ua matuaoti, o a latou tane ma tama na faamaturoina ma le le alofa i le laueleele e faapepepepe ai … le aeto mitamita [o le saolotoga]! Ia aua lava nei teumauina i faamaumauga a malo, faapea … na saili atu e i latou na faaaunuua se vaifofo ma se puipuiga, ae na a’e fua la latou sailiga. Ua ia te outou le malosi e laveai ai i matou, o a matou ava, ma a matou fanau, mai le toe faaluaina o vaaiga faamasaa toto i Misuri, ma o le a mapu ai le atuatuvale o se nuu ua sauaina ma faamanu’alia, ma o le a faaauau pea ona tatalo atu i latou ua tagi atu.”⁷

Sa leai se gaualofa, ma sa teena i latou.

I le 1844, a o i ai i lalo o le puipuiga tautino a Kovana Thomas Ford o Ilinoi, sa fasiotia le Perofeta o Iosefa Samita ma lona uso o Ailama i le Falepuipui i Karefasi. E le mafai e upu ona faamatala le matautia ma puapuaga sa onosaia e le Au Paia.

I lenei la aso 24 o Iulai i le 1849, ina ua saoloto mai tagata faatupu faalavelave, sa latou fuafua ai loa e faamanatu.⁸

O meatotino uma a le Au Paia, o le a aumaia i le afe o maila (1,600 km) o le toafa e se taavale tosolima po o se taavale toso. Pe toe 20 tausaga pe sili atu foi faatoa oo mai auala o nofoaafi i le Aai o Sate Leki. Sa toetoe e leai se mea e fai ai a latou galuega, ae sa latou naunau o le sauniga faamanatu o se faaaliga tele lea o o latou lagona.

Sa latou fausia se malutaga i le Lotoa o le Malumalu. Sa latou faatuina se pou o le fu’a e 104 futu (32 m) le maualuga. Sa latou faia se fua tele faalemalo e 65 futu (20 m) le umi ma faaagiagia ai i le tumutumu o lena pou o le saolotoga.

Atonu e faigata ona malamalama, e maoae foi toetoe lava ina le talitonu i le autu o lenei sauniga faamanatu, na latou filifili ai le lotonuu ma le faamaoni i lena lava malo lea sa tetee ma lē lagolagoina i latou. O le a se mea sa latou mafaufau i ai? Afai e mafai ona e malamalama i le mafuaaga, o le a e malamalama foi i le mana o aoaoga a Keriso.

Sa tata la latou faaili pu a o taimua Peresitene Polika Iaga i se solo tele agai atu i le Lotoa o le Malumalu. Sa mulimuli atu ia te ia Aposetolo e Toasefululua ma le Au Fitugafulu.

Ona sosoo atu ai lea ma alii talavou e toa 24, sa ofuvae papae; peleue uli; o sikafu papae i o latou tauau taumatau; o pale i o latou ulu; ma se pelu e sulu i lona faamoega i o latou itu tauagavale. E le gata i lena, sa tofu tauaveina foi e i latou i o latou lima taumatau, se kopi o le Tautinoga o le Tutoatasi ma le Faavae o le Iunaite Setete. Sa faitauina le Tautinoga o le Tutoatasi e se tasi o na alii talavou.

Ona sosoo mai ai lea ma tamaitai talavou e 24 sa laei papae, o sikafu lanumoana i o latou tauau taumatau ma fuarosa papae i o latou ulu. Sa tofu tauaveina e i latou se Tusi Paia ma se Tusi a Mamona.

Toeitiiti lava ae e le maoae tele e pei o la latou filifiliga o le lotonuu mo se autu le mea na sosoo ai: E 24 toeaiina matutua (e pei ona ta’ua ai) sa taitaia e peteriaka Isaako Moli. Sa lauiloa i latou o Lauao Sinasina—ua tai 60 uma o latou tausaga pe matutua atu foi. Sa tofu tauaveina e i latou se tootoo sa vali mumu e faalelelele ai se lipine paepae i le pito i luga. Sa tauaveina e se tasi le Fu’a. O nei tamalii o se faatusa o le perisitua, lea sa i ai lava “mai le amataga a o lei faavaeina le lalolagi”⁹ ma ua toefuataiina mai i lenei tisipenisione.

Sa silafia e le Au Paia na poloaiina i latou e le Alii ina ia latou “usiusitai i tupu, ma peresitene, ma faipule, ma faamasino, [ia] usiusitai ma faamamalu ma lagolagoina le tulafono.”¹⁰ O lena poloaiga, na faaalia i lena taimi, ua moni foi mo o tatou tagata i atunuu uma. E ao ina avea i tatou ma tagatanuu tausi tulafono, ma agavaa.

Sa fetalai atu le Alii ia te i latou, “Ua ou faavaeina le Tulafono Faavae o lenei atunuu, i lima o tagata faautauta na ou faatuina mo lenei lava galuega.”¹¹

Ma i se isi fuaiupu, na ta’u atu ai e le Alii ia te i latou “e le tatau i soo se tagata ona nofo pologa i se tasi tagata.”¹² O lona uiga, sa tetee le au paia i le nofo pologa. O se mea lea sa matua inaina ai tagata sa aumau i Misuri.

O le mea la lea, i lena aso o le sauniga faamanatu i le 1849, “sa tulai Elder Phineas Richards e fai ma sui o toeaiina matutua e luasefulufa, ma faitau la latou saunoaga faamaoni ma le lotonuu.” ¹³ Sa saunoa o ia i le tulaga manaomia mo i latou e aoao atu le lotonuu ia latou fanau, ma alolofa ma faamamaluina le saolotoga. Ina ua uma ona pa’i teisi i faigata sa latou asaina, sa ia saunoa:

“Uso e ma uo, o i tatou ua aulia le taiono sefulu tausaga, ua tatou vaai i le malo o le Iunaite Setete i lona mamalu, ma ua iloa o le agaleaga matautia sa tatou mafatia ai, na afua mai i se pulega piopio ma le le faavaea, a o mataupu faavae mama o la tatou Tulafono Faavae ua lauiloa ai e tumau pea e le masuia… .

“… Ona ua tatou ola mai ma le agaga o le saolotoga ma le afi o le lotonuu mai o tatou tama, o lea ia latou faaauau ai pea [ia le masuia] na mataupu faavae o le saolotoga ma le lotonuu mama ia tatou fanau.”¹⁴

E ono manatu se tasi, ona o lagona malolosi o le natura faaletagata, o le a saili atu ai le Au Paia e tauimasui, peitai e i ai se mea e malosi atu na manumalo nai lo lena natura faaletagata.

Sa faamatala atu e le Aposetolo o Paulo:

“E le talia e le tagata faaletino o mea a le Agaga o le Atua: aua o mea valea ia ia te ia, na te le mafai foi ona iloa, aua e faamasinoina faaleagaga… .

“… Ua tatou maua le finagalo o Keriso.”¹⁵

Sa faauiga e le Agaga na uluai tagata o le Ekalesia o soo o Keriso.

Afai e mafai ona e malamalama i ni tagata ua matua tumu i le onosai, tumu i le faapalepale, tumu i le loto faamagalo, tumu i le Kerisiano ina ua mavae ona latou mafatia, o le a e iloa ai le mea e igoa o le Au Paia o Aso e Gata Ai. E le nopiai i le tauimasui, ae malupuipuia i faaaliga. Ua faatuina lo latou ala i aoaoga o loo maua pea i aso nei i le Feagaiga Tuai ma le Feagaiga Fou, o le Tusi a Mamona, o le Mataupu Faavae ma Feagaiga, ma le Penina Tau Tele.

Afai e mafai ona e malamalama i le mafuaaga o le a latou faia ai le sauniga faamanatu e pei ona sa latou faia, e mafai foi lea ona e malamalama i le mafuaaga ua tatou faatuatua ai i le Alii o Iesu Keriso, i mataupu faavae o le talalelei.

Ua aoao mai le Tusi a Mamona, “Ua matou tautalatala ia Keriso, ua matou olioli ia Keriso, ua matou talai atu Keriso, ua matou vavalo atu foi ia Keriso, ua matou tusitusi e tusa ma a matou valoaga, ina ia iloa e a matou fanau le mea latou te faamoemoe ai mo le faamagaloina o a latou agasala.”¹⁶

Ma o lea, o aso nei i nei taimi taufaamata’u faigata, i totonu o le Ekalesia moni a Iesu Keriso¹⁷ tatou te aoao atu ai ma ola i mataupu faavae o Lana talalelei.

O mea e tolu e uiga i le sauniga faamanatu i le 1849 e taufai faafaatusa ma faaperofeta: muamua, o alii talavou sa tauaveina le Tulafono Faavae ma le Tautinoga o le Tutoatasi; o le isi, o tamaitai talavou sa tauaveina le Tusi Paia ma le Tusi a Mamona; ma le mea mulimuli, o toeaiina—le Lauao Sinasina—sa faamamaluina i le solo.

Ina ua maea le polokalama sa faia sa latou taumafataga i laulau na fau mo sina taimi. E toatele ni aumalaga su’e auro ma Initia e toa 60 sa valaaulia latou te talisua.

Ona latou toe foi loa lea e galulue.

Fai mai Peresitene Iaga, “Afai e tuu pea lava i tatou e tagata o le Iunaite Setete mo ni tausaga se sefulu o le a tatou le faatalauula atu lava ia i latou i se mea.”¹⁸

Ina ua valu tausaga talu ona mavae le sauniga faamanatu i le 1849, sa i ai le Au Paia i le Vanu o Big Cottonwood e faamanatu se isi aso 24 o Iulai. E toafa ni alii tietie solofanua sa logoina mai, ua oo mai i fanua laugatasi se autau o ni fitafita se toatele e 2,500. O le ami a le Iunaite Setete, sa taitaia e Kolone Albert Sydney Johnston, ma sa faatonuina e Peresitene James Buchanan e faatoilalo se au tetee o tagata Mamona sa le’i i ai.

Sa taape le faatasiga a le Au Paia ma o atu i aiga e sauniuni a latou puipuiga. Nai lo le sosola ese, o le taimi lenei na tautino atu ai e Peresitene Iaga, “E leai se tulafono na tatou solia, ma e leai foi se mafuaaga o le a tatou faia ai, pe tatou te fuafua foi e fai; ae o soo se atunuu e oo mai e faaumatia lenei nuu, e avea le Atua Silisili ese ma ou fesoasoani, ma e le mafai ona latou oo mai iinei.”¹⁹

Na lagomau e ou matua matutua se la tama i le ala mai Sisifo Mamao, ina ua tutuli faamalosi atu i latou i Navu, ma se isi tamaitiiti i Uinita Kuota, ina ua tutuli i latou i sisifo.

O se isi tina tinamatua, a o talavou, sa ia tuleiina se taavale tosolima a o uia ituvai i saute o le Vaitafe o Palate. Sa latou pepese:

I le isi itu o le vaitafe, sa latou vaaia ai le segaia e le la o lau maamaai o auupega a fitafita o le vaegaau.²¹

I St. Louis sa faatau mai ai e le tina o lo’u tinamatua se tamai pine vali iila o le tagavai a Amerika. Sa ia faapipiina lea [pine] i lona ofu mo aso uma na totoe o lona soifua.

Sa le mafai e tagata leaga po o fitafita ona liliueseina le Au Paia mai le mea na latou iloa ua moni. Sa soalaupuleina se nofoaga e nofoia [e le Au Paia] ma mulimuli ane ai ua maea le Taua a Iuta (lea na ta’ua mulimuli o le Mea Sese a Buchanan).

O loo taialaina i tatou e na lava faaaliga ma taitaia e se perofeta. Ina ua maliu le Perofeta o Iosefa Samita, sa suitulaga le isi ia te ia. O le faasologa o e suitulagaina o loo faaauau pea e oo mai i le aso.

I le ono masina talu ai i le konafesi aoao, sa lagolagoina ai Thomas S. Monson o le Peresitene lona 16 o le Ekalesia, ae toe lima masina oo i lona aso soifua e atoa ai lona 81 tausaga. Ua suitulaga o ia ia Peresitene Gordon B. Hinckley, o le na maliu i le lona 98 o tausaga o lona soifua.

O le a tele lava ina maua e taitai sinia o le Ekalesia le tomai ona o le tele o tausaga o sauniuniga.

Ua talafeauga lelei lava Peresitene Monson mo luitau o o tatou vaitaimi. O loo lagolagoina o ia e ni fesoasoani se toalua ma le Korama a Aposetolo e Toasefululua—o i latou uma o ni perofeta, tagatavaai, ma talifaaaliga.

O loo galue pea lena lava Lusifelo o le sa tuliesea mai le afioaga o lo tatou Tama. O ia faatasi ma agelu o e na mulimuli atu ia te ia, o le a latou faalavelaveina le galuega a le Alii ma faaumatia, pe a ia mafaia.

Ae peitai, o le a tatou tutumau pea i le alafua. O le a taula i tatou lava o ni aiga ma se ekalesia i nei mataupu faavae ma sauniga. Po o a lava tofotofoga o i luma atu, ma o le a tele lava, e tatau lava ona tatou tumau faamaoni ma amiosa’o.

Ou te molimau atu i le Atua le Tama ma Lona Alo, o Iesu Keriso, o loo soifua i Laua, o Thomas S. Monson ua valaauina e le Atua e ala i valoaga.

“O le tulaga o le upu moni ua faatuina; e leai se lima eleelea e mafai ona taofia le galuega mai lona alualu i luma” (History of the Church, 4:540). E oo mai i le aso, e le o goto lava le la i aulotu a le Au Paia o Aso e Gata Ai. I le suafa o Iesu Keriso, amene.