O Lenei, Ia Outou O Atu

Na aoao mai le Alii e faapea “afai e le fanau se tasi i le vai ma le Agaga, e le mafai ona sao o ia i le malo o le Atua.”¹ O le mea lea, o le papatisoga, e alagatatau mo lo tatou faaolataga.

A o lei afio ae le Faaola toetu i le lagi, na Ia poloaiina Ona soo, “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia: Aoao atu ia te i latou ia tausi i mea uma ua ou fai atu ai ia te outou.”²

I le taimi o le Toefuataiga, na Ia toe fetalai mai ai i Lana poloaiga: “O le mea lea, ua valaauina ai oulua e alagaina le salamo i lenei nuu.”³

Ua i ai i le Ekalesia a le Alii le tiutetauave o le talai atu o le talalelei i le lalolagi. O le faavae lenei o le galuega faafaifeautalai, ma o le tiute o o tatou faifeautalai “ia valaaulia isi e o mai ia Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga.”⁴

Ou te fia tautala ma molimau atu i le aafiaga taua ma faamanuiaga o le galuega faafaifeautalai i olaga o tagata fou liliu mai, augatupulaga i le lumanai, ma faifeautalai ma le auala e mafai ona tatou auai i le galuega faafaifeautalai.

Ina ua 14 ou tausaga, i se taeao manaia lava ia Aokuso, na tuitui mai ai Elder Prina ma Elder Perkins i lo matou faitotoa. Na amata ona la aoaoina lo matou aiga e uiga i le natura moni o le Atua. I asiasiga na sosoo mai ai, na la aoaoina ai i matou i le ala e tatalo ai. Na la aoaoina foi i matou e uiga i le Toefuataiga ma le ata o le faaolataga. Ina ua uma le asiasiga lona tolu ma le lona fa, na toatele lo matou aiga na le toe faalogologo i faifeautalai, vagana ai i maua ma lou uso e 17 tausaga o Dina. Na ma taufai lagonaina le molimau a le Agaga Paia i o maua loto, ma maua se faamautinoaga faaleagaga e moni le savali.

Na ma faatauina se kopi o le Tusi a Mamona ma amata loa ona faitau. O aso uma lava, pe a tuua le aoga, ma te taututuu ai i le fale po o ai e muamua i le tusi. A o faitau e le tagata e muamua taunuu i le fale le tusi, e faatalitali ma le le to’a le isi seia oo i le taimi o le taumafataga i le afiafi, ona tope lea o le ai, ma faaaoga lona avanoa e faitau ai le tusi seia oo i le taimi e momoe ai. E faapena le fiafia na ma lagonaina. Na amata ona ma auai i le ekalesia ma e lei umi ae ma talosagaina e papatiso i maua. Na tuuina mai ma le lotomalie e lo ma tama lana faatagaga, ae na musu lo ma tina, ma na atoa lelei le masina o tauanau o ia e saini le pepa faataga [o o ma papatisoga]. O le aso o le ma papatisoga, na o atu ai o ia ma le isi vaega uma o nai ou tei i le lotu mo le taimi muamua lava. Na ia lagonaina le Agaga. Ina ua uma ona faalogo o ia i a ma molimau, na alu o ia i faifeautalai ma fai atu i ai e toe amata ona aoao o ia. O ni nai vaiaso mulimuli ane, na papatisoina ai Tina ma lo maua uso laitiiti ma o ma tuagane. Na suia lou olaga e faavavau, ma na avea le talalelei a Iesu Keriso ma malosiaga e le masuia i lo’u olaga.

E le mafai e upu ona faamatala ia lagona loloto o le agaga faafetai mo le Alii ma faifeautalai na Ia auina mai i lo matou fale. Ua faamanuiaina au e le Alii i le malamalama o le talalelei toefuataiina, ma na ou lagonaina se naunautai e faasoa atu lenei malamalama i isi. Na ou manao e avea au ma se faifeautalai.

I totonu o ni masina, na valaauina ai i maua ma lou uso o Dina e avea o ni faifeautalai i le lotoifale i San Salvador. O lenei valaauga na ma maua ai le avanoa e o atu ai mai lea faitotoa i lea faitotoa e faasoa atu le tala fiafia o le talalelei toefuataiina a Iesu Keriso ma aumai le toatele o tagata i le vai o le papatisoga. I le taimi na tatau ai, na ma auauna uma atu ai o ni faifeautalai faamisiona i le Misiona a Amerika Tutotonu.

Na i ai se aafiaga tele o lo’u olaga ona o la’u misiona. Na ou aoao ai le faalagolago atili i le Alii, e saili le taitaiga a le Agaga, ma ia lagona se alofa lofituina mo le fanau a le Atua. Na faateleina lou malamalama i tusitusiga paia ma aoaoga faavae. Ma na faapena foi lou manao ia usiusitai ma ia tausi poloaiga i le sao atoatoa. Na faamalosia lau molimau i le Faaola ma Lana Togiola e le iu. O ou aafiaga faafaifeautalai na avea ma se vaega o lou tagata ma le ituaiga tagata ua ou i ai. Na avea le galuega faafaifeautalai ma mea e sili ona ou faamemelo i ai. Na aafia ai lou olaga faapea ma olaga o lou aiga nai lo se isi lava mea.

Ua faamatalaina e Elder Jeffrey R. Holland le aafiaga o lona olaga ona o lana misiona i upu nei: “O lau misiona e matuai taua lea ia te au i le tuanai ai o le 47 o tausaga talu ona maea. Atonu na i ai se aso se tasi i na tausaga e 47 ou te lei mafaufau ai i lau misiona; Ae ou te le mautinoa foi po o anafea lena aso.”⁵

O le lua tausaga ua mavae, na atoa ai le valu tausaga o Christian le tama a la’u tama, ma sa fuafuaina ma le fiafia tele le sauniga o lona papatisoga. Na fai o ia i lona tina pe mafai ona avea au ma se tasi o failauga e faasoa atu le tala o lo’u liliuga. Ina ua ou fesiligia o ia pe aisea na manao ai ou te faia lea mea, na tali o ia, “Tinamatua, e ese le taua o lena mea. E te iloa a na e le taliaina le talalelei, semanu ou te le papatiso? Semanu foi ou te le pei o le tagata ua ou i ai nei.”

Ou te le iloa pe o silafia e faifeautalai le aafiaga loloto o le la galuega. I lou lava aiga, ua oo atu faamanuiaga o le talalelei i le fa o augatupulaga. Pe lei saunoa ea Peresitene Gordon B. Hinckley e faapea “pe a tatou laveaiina se teine, ua tatou laveaiina augatupulaga”?⁶ Na ou faaipoipo i le malumalu ma maua se fanau e toavalu. O i latou uma o ni tagata faamaoni o le Ekalesia, ua maua faaeega paia i le malumalu. O le toaono o i latou ua faaipoipo nei ma fai a latou lava fanau. O le taimi nei, ua toa 34 i matou. Ma e le na o le pau ai lena. O maua uma ma lou toalua na faamisiona, ma o o ma atalii e toalua ma le toatolu o le ma fanau teine e toaono ua uma foi ni misiona. Pe a tuufaatasia, e faitau fiaselau i latou na matou fesoasoani i ai e talia le talalelei i ni atunuu se tele. O nisi o na tagata liliu mai ma a latou fanau na auauna atu foi i ni misiona.

O le galuega faafaifeautalai o le toto ola lea o le Ekalesia. E leai se isi galuega e sili atu, e leai se isi galuega e sili atu le taua. E faamanuiaina ai olaga o i latou uma o e auai i le faatinoina. O le a faaauau pea ona faamanuiaina ai augatupulaga i le lumanai.

Atonu o le a e fesili ifo ia te oe lava: E mafai faapefea ona ou fesoasoani i le galuega faafaifeautalai? O a ni auala e mafai ona ou auai ai? E lua ni upumoni taua e ao ona manatua a o e feagai ai ma le galuega. Muamua, ia maua sou malamalamaaga manino e alofa le Atua i Ana fanau uma ma e finagalo ia latou maua le faaolataga. I le Mataupu Faavae ma Feagaiga e 18:13 tatou te faitau ai, “E! faauta i le silisili o lona olioli i le agaga ua salamo.” Lona lua, o la tatou savali e uiga ia Keriso ma Lana talalelei toefuataiga o le meaalofa aupito taua lea e tatau ona e tuuina atu.

E pei ona faaalia i le Talai La’u Talalelei, o le galuega faafaifeautalai o se taumafaiga e fusi-fa: sailia o tagata e aoaoina, aoao atu ma le papatisoina, faaaumeaina ma le aoaoina o uso fou, ma le faaaumeaina o tagata o le Ekalesia e le toaaga mai.⁷ O tagata uma o le Ekalesia—o tamaiti, autalavou, ma tagata matutua—e mafai ona fesoasoani i soo se tasi po o vaega uma o nei taumafaiga.

Amata i le avea ma se tuaoi lelei ma se uo lelei. Fai se faataitaiga o le amiotonu ma le agalelei. Ia faasusulu atu e lau ataata le alofa, filemu, ma le fiafia. Ola i se olaga e faatotonugalemu i le talalelei.

Sosoo ai ma le, ia matuai faapatino au taumafaiga faafaifeautalai. Sei ou fautuaina atu ni nai manatu. Atonu o le a aoga ni mea se lua pe tolu ia te oe:

• Afai o i ai sau fanau i le fale, fesoasoani e saunia i latou mo le galuega faafaifeautalai.

• Ia saunia oe lava mo le galuega faafaifeautalai.

• Ia valaaulia aiga ma uo e faalogologo i faifeautalai pe ia auai atu i sauniga Lotu ma gaoioiga.

• Ia o atu ma faifeautalai i fale o tagata sailiili, pe ia valaaulia faifeautalai e aoaoina tagata le lolotu i lou fale.

• Valaaulia tagata i se afiafi faaleaiga i lou fale.

• Valaaulia tagata i se nofoaga autu o talafaasolopito o aiga pe fesoasoani ia i latou i le sailia o talafaasolopito o aiga.

• Tuuina atu igoa o tagata [e fia faalogo i le talalelei] i faifeautalai. O tagata o le ekalesia e mafai ona avea ma punaoa sili ona lelei i le tuuina atu o igoa o tagata i faifeautalai.

• Ia fetufaai atu ou talitonuga ma molimau i uo ma aiga e le auai i le ekalesia.

• Saili mo avanoa e aapa atu ai i isi.

• Faalautele atu le agaga faauo i tagata sailiili ma tagata fou liliu mai.

• Tuu atu au taumafaiga aupito lelei i le sailia o i latou o loo sailia le upumoni.

• Afai o i ai ni tagata o lou aiga po o ni uo i le misiona, auina atu ia i latou ni tusi o le alofa ma faamalosiauga, ma tatalo mo i latou.

O le a e maua le olioli i fua o au galuega. O lou naunautai faateleina mo le galuega faafaifeautalai o le a faamalosia ai lau uarota po o le paranesi atoa. O le a lagona e le Ekalesia aoao aafiaga o au galuega.

A o i ai le ma tama teine o Margie i le vasega lua, na ia valaaulia lana uo lelei lava la te o i le Peraimeri. Na tofia uma i laua mo ni tautalaga i le polokalama o le sauniga faamanatuga. Na teena e le tama o lana uo ia faifeautalai i aso ua mavae, ae ina ua oo atu Margie i lona fale ma se luuga tamaitusi o le Ekalesia, sa faalogo ma le totoa o ia i ana faamalamalamaga faatauvaa ma lana molimau ia Iosefa Samita ma le Uluai Faaaliga. Sa le gata ina ia faatagaina lona afafine e faaauau pea ona alu i le Peraimeri ae na tuuina atu foi ia le faatagaga e fai ai ana lesona e faifeautalai ma ia papatisoina. Na faapea ona auai atu [lea tama] ma lona faletua i le sauniga o le papatisoga.

E mafai e i tatou uma ona auai i le galuega faafaifeautalai. O le galuega lenei a le Alii, ma o le a fesoasoani mai o Ia ia i tatou ia tatou faia. E tatau ona oo atu Lana talalelei i atunuu uma, ma e mafai ona avea i tatou ma meafaigaluega i Ona aao, e faamanuia ai olaga o isi e ala i le faasoaina atu ia i latou o Lana upumoni. O le a matuai faamanuiaina i tatou i le faagasologa.

O i tatou o fanau a se Tama Faalelagi alofa. Na Ia auina mai Lona Alo e tatala le ala ina ia mafai ona tatou toe mafuta faatasi ma Ia e faavavau. Ou te molimau atu ai i nei mea i le suafa o Iesu Keriso, amene.