Ia Tatou Fiafia Nei

Ou uso pele, e ese le faamanuiaina o i tatou! E le gata o i tatou o ni tagata O Le Ekalesia a Iesu Keriso o le Au Paia o Aso e Gata Ai, ae o i tatou foi o ni uso o le Aualofa—“o le faalapotopotoga lea a le Alii mo tamaitai.”¹ O le Aualofa o le faamaoniga lea o le alofa o le Atua mo Ona afafine.

Pe le olioli ea lou loto pe a e manatuaina le talafaasolopito o le Aualofa ma manatua o tatou amataga sili ona matagofie? I le aso 17 o Mati, 1842, i le fonotaga muamua lava a le Aualofa, na saunoa ai le Perofeta o Iosefa Samita e faapea, o le “faatulagaina o le Ekalesia, e lei atoatoa vagana ai ina ua faatulagaina tamaitai.”² Ona ia faatulagaina ai lea o tamaitai “i lalo o le perisitua e ala i le mamanu o le perisitua.”³ O se vaega eseese ma toaitiiti na faapotopoto i lena Aualofa muamua o ni tamaitai faamaoni, e tutusa lava ma sui o le Aualofa i aso nei. Na i ai tamaitai talavou ma tamaitai matutua; tamaitai na aloaia a latou aoaoga ma tamaitai na leai ni aoaoga aloaia. Na i ai i tamaitai ua faaipoipo, o tina ma tamaitai nofofua. Na i ai tamaitai mauoa ma nisi o e na matua matitiva lava. Na tofu i latou taitoatasi ma se alofa o le tasi mo le isi, o se alofa mo le Alii, ma se naunautaiga e auauna atu. O le manatuaina o mea na faia e uso o le Aualofa i aso ua mavae, tatou te malamalama lelei ai ma taialaina ai i tatou i aso nei.

I le uluai fonotaga a le Aualofa, na talosagaina ai e Iosefa Samita ia uso e fesoasoani atu i le Usoga “e taulima manaoga o e matitiva—ma saili ni mea mo galuega alofa, ma auauna atu i mea latou te manaomia.”⁴ Na ia lapataia foi ia uso ina ia galulue “e tusa ai ma na tigaalofa ua totoina e le Atua i o outou loto.”⁵

Na taliaina e uso lenei tiute ma le loto naunautai ma na avea ai ma sosaiete ua tuuto atu i le auauna atu i tagata matitiva ma e le tagolima. Na saunoa Uso Ema Samita, “O le a tatou faia se mea e sili atu ona tulaga ese. A paulia se vaa i se ogasami matautia, ae o loo i ai i totonu ni tagata Mamona se toatele, e tatau ona tatou manatunatu i lena mea o se valaau leotele mo se toomaga. Tatou te faamoemoeina ni mea tulaga ese ma ni valaau faanatinati.”⁶

I aso tau amata o le Ekalesia, na tuuina atu ai e uso ni fesoasoani a o latou o atu mai lea fale i lea fale. O le faia o le mea ua tatou taua nei o faiaoga asiasi, na o atu ai uso e auauna atu i tagata uma—o le tausia ma le taulimaina o manaoga o isi ma ia mautinoa na maua e tagata ni meaai, lavalava, fale, ma tuuina atu le fesoasoani pe a latou manaomia. Afai na i ai i se uso se mea e faasoa atu, na te foaiina atu i uso asiasi. Afai na te manaomia se mea, e fesoasoani uso e tuuina atu mo ia.⁷

Ia tatou tuuto atu i tatou lava i le Aualofa e pei ona fautauina mai e Peresitene Boyd K. Packer: “O le auaunaga i le Aualofa e faalauteleina ma faapaiaina ai tamaitai taitoatasi … A tuuto atu oe lava i le Aualofa ma faatulagaina ma faagaoioia ma auai ai, ua e lagolagoina le faamoemoega o le a faapea ona faamanuiaina ai tamaitai uma o e oo atu i ai ona aafiaga.”⁸

E pei lava ona faamatalaina e Ema le paulia ai o le vaa i se ogasami matautia, ma le manaomia e tagata o le fesoasoani, e mafai ona tatou faatusaina lena i o tatou aso pe a tatou vaaia ni mea faapena, e pei o se tuaoi o loo gasegase, o se tamaitiiti e manaomia ona faatonutonu, o se tupulaga talavou e manaomia se uo, po o se aiga ua leai sa latou alatupe maua ma ua manaomia se fesoasoani mo i latou. Tatou te faalogo i mala, matagi, po o faalavelave faaletagata lava ia i olaga o o tatou uso i soo se mea. E le tatau ona tatou faatatope ona taumafai e sue ni mea e fai po o ni faamoemoega e faataunuu.

Ia manatua, e masani lava, o le fesoasoani o loo moomia o totonu lava o o tatou aiga, tuaoi ma alalafaga. O se upu alofa o le faamalosiau, o se upu o le faafetai, o se valaau i le telefoni, o se ataata agalelei, o se galuega fesoasoani, ma se faamanatu e alofa le Atua ia i tatou, e masani lava o le mea lena e sili ona moomia. E mafai ona tatou siitia ma faamanuiaina isi i le anoanoai o auala.

O le Aualofa e le na o se vasega i le Aso Sa. E le na o se nofoaga tatou te o atu i ai pe afai tatou te le o faiaoga i faalapotopotoga o le Peraimeri po o Tamaitai Talavou. O le faalapotopotoga a le Alii mo tamaitai. O le auai i le Aualofa o se vaega o lo tatou tofi ma faamanuiaga mamalu i le avea ai o ni tamaitai o le Ekalesia a le Alii.

I na fonotaga i le popofou o le Aualofa, na fautuaina ai e Iosefa Samita ia uso, ina ia aoao e le tasi le isi i le talalelei a Iesu Keriso. Na saunoa o ia, “O le … Sosaiete e le gata ina laveaiina e matitiva, ae ia faaolaina foi agaga.”⁹ Na ia saunoa foi, “Ma o lenei ua ou tuuina atu le ki ia te outou i le suafa o le Atua, ma o le a olioli lenei Sosaiete, ma o le a tafe mai ai i lalo le poto ma le atamai mai lenei taimi.”¹⁰ Ou te fiafia lava i lenei faaupuga. E faamanatu mai ai ia te au ina ia ou olioli i faamanuiaga ua saunia e le Atua mo tamaitai o lenei Ekalesia.

Na saili i taimi uma tamaitai o le Aualofa ina ia aoaoina ma tuputupu ae. Ua tatou iloa “o le mamalu o le Atua o le malamalama lea.”¹¹

I le 1830 i se faaaliga na tuuina mai e ala i le Perofeta o Iosefa i lona faletua, o Ema, na folafola mai ai e le Alii e tatau ona ia, “faamatala atu tusitusiga paia, ma … apoapoai atu i le ekalesia, e pei ona tuuina atu ia te oe e lo’u Agaga.”¹² O lenei tiute na le gata ina tuuina atu ia Ema, ae na faamanino mai e Iosefa, e tatau i uso uma lava ona latou sailia lenei meaalofa.¹³ O tamaitai e aoaoina atu le talalelei a Iesu Keriso ma mulimuli i le Faaola i le upu ma le amio. O uso e tausia e le tasi le isi i le afioga lelei a le Atua.¹⁴

Fai mai nisi o tamaitai e faapea, o se tulaga faapopole tagata le aoaoina o se vasega pe tautala foi i luma o se faalapotopotoga. Ou te tautino atu ia te outou, ua ou iloa mai [ou] aafiaga, e fai lava foi si taufaafefe. Ia tatou manatua le saunoaga a Eliza R. Snow i si ona tei o le na valaauina e faia se tautalaga i luma o se faalapotopotoga. Ina ua tulai si ona tei, sa le mafai ona ia fai atu se tala ona sa lofituina o ia i le fefe. Na iu lava ina toe saofai i lalo o ia. Na fautuaina o ia e Eliza i le agalelei ma le malu e faapea, “Aua e te popole, ae a toe tofia oe e te lauga, ia e taumafai lava e fai atu se upu.”¹⁵

O le a i ai sa tatou tala e fai atu a o tatou saunia i tatou lava e pei ona faatonuina ai i tatou e le Atua. Na fetalai mai o Ia “ia talai atu lau talalelei i le Agaga,” ma o le e talai atu atoa ma le e talia mai, “e malamalama le tasi i le isi, e faamanuiaina ma olioli faatasi i laua uma.”¹⁶ A o tatou sauniuni ma le naunautai e faaaoga ia tusitusiga paia ma tusi faamaonia a le Ekalesia, ma ole atu i le Alii mo le fesoasoani, o le a Ia tuuina mai ia i tatou “le meaalofa e le matalatalaina a le Agaga Paia”¹⁷ ma o le a tatou iloa le upu e fai atu ina ia aoaoina ai tagata uma.

I se fonotaga matagofie lava a le Aualofa, na tusia ai e Eliza R. Snow i minute [o le fonotaga] e faapea, “na toetoe lava o i latou uma na auai na tutulai ma saunoa, ma o le agaga o le Alii na pei o se vai faamama, na faafouina ai loto uma.”¹⁸ Matou te faamoemoe e lagona e o tatou uso i aso nei le fafagaina, aoaoina ma le siitiaina i taimi uma latou te auai ai i se lesona o le Aso Sa, o e faataunuu faiaoga asiasi, auai i se gaoioiga, po o le faatino o soo se galuega auauna atu.

Uso e, o le taimi lenei e sili atu nai lo se isi lava taimi, tatou te manaomia ai ni tamaitai o e folafola atu le upumoni i le malosi, faatuatua, ma le totoa. Tatou te manaomia ni tamaitai e faia se faataitaiga o le amiotonu. Tatou te manaomia ni tamaitai e “galulue ma le naunautai i mea lelei.”¹⁹ E tatau ona tatou ola ina ia molimau o tatou olaga tatou te alolofa i lo tatou Tama Faalelagi ma le Faaola o Iesu Keriso, ma o le a tatou faia mea ua La fetalai mai tatou te faia. E tatau ona tatou “faasaoina mea silisili i le taele o o [tatou] loto”²⁰ ma o le avea ai o ni afafine o le Atua, e mafai ona fai la tatou vaega o le fausiaina o le malo o le Atua. O le a tatou fesoasoani e faia lenei mea. E pei ona tautino mai e Iosefa, “afai tou te ola agavaa ai mo o outou avanoa, e le mafai ona taofia agelu i le avea ai ma a outou paaga.”²¹

Ia tatou tauave avega a le tasi ma le isi, faanoanoa faatasi ma e faanoanoa, faamafanafana i e ua tatau i ai le faamafanafanaga, ma faapea ona tausia ai feagaiga na tatou osia.²²

Ua matua sili ona faamanuiaina i tatou. O le Faaola o le faaao lea o lenei Ekalesia. O loo taitaiina i tatou e perofeta soifua, tagatavaai ma talifaaaliga. Ua tatou maua tusitusiga paia e faitau, suesue, ma maua ai tali mo o tatou olaga i aso taitasi. Ua tatou maua malumalu paia i le lalolagi atoa, e mafai ona tatou maua ai sauniga tatau e fesoasoani tatou te toe foi atu ai i lo tatou Tama Faalelagi. Ma ua ia i tatou le tasi ma le isi e fesoasoani ia i tatou.

Ou te vaaia “le faatusa o le Atua o faaalia [i] foliga”²³ o outou tamaitai lelei a o ou femalagaai i le tele o atunuu o le lalolagi. Ou te faalogo i a outou galuega lelei ma le tuuto mata’ina. Ou te vaaia le Malamalama o Keriso e atagia i o outou fofoga.

Ou te iloa, e pei ona fautuaina mai e Ema, e mafai ona tatou faia se mea tulaga ese i nei aso. E mafai ona avea i tatou o se autau amiotonu o tamaitai ua faaauupegaina i le alofa, lotoalofa, agalelei, auauna atu, ma le faatuatua. E mafai ona avea i tatou ma se malosiaga maoae mo le lelei i lenei lalolagi. Ma, o le a tatou faapei ai o le mea na faamatalaina e Peresitene Packer: “O le Aualofa e mafai ona faatusaina i se sulufaiga—o le nofoaga o le saogalemu ma le puipuiga… . O le a e saogalemu ai i totonu. Na te siomia uso taitoatasi e pei o se pa o le puipuiga.”²⁴ E tatau lava ona tatou maua lenei nofoaga o le saogalemu ma le puipuiga!

Pe tou te le mitamita ea i lou aofia ai i le Aualofa? A o tatou manatuaina mea na faia e nei tamaitai tamalii i le taimi ua tuanai, o le a faapea ona taialaina ai i tatou i aso nei ma le lumanai.

Ou te molimau atu o loo soifua le Atua, lo tatou Tama Faalelagi ma Lona Alo o Iesu Keriso, ma e alolofa ia i tatou. Ou te molimau atu o loo taitaiina i tatou e se perofeta a le Atua. Ou te molimau atu a tatou tausia a tatou feagaiga, o le a le mafuatiaina le faamanuiaina o i tatou. I le suafa o Iesu Keriso, amene.