Faamamalu le Perisitua ma Ia Faaaoga Lelei

Ou uso pele, ua tatou potopoto i le lalolagi atoa i se usoga matagofie o le perisitua paia a le Atua. Ua matua faamanuiaina i tatou i le avea ai o ni alii toalaiti i luga o le fogaeleele ua faatagaina e galulue i le suafa o le Faaola ma faamanuiaina isi e ala i le faaaogaina ma le amiotonu o Lana perisitua.

Ou te mafaufau uso e, pe toafia i tatou e mafaufau loloto moni i le taua e le mafuatiaina o le umiaina o le Perisitua Arona ma le Perisitua Mekisateko. Pe a tatou mafaufau i le toalaiti o alii na soifua i le lalolagi ma maua le perisitua, ma le faamamanaina e Iesu Keriso o na tagata e galulue i Lona suafa, tatou te lagona ai le faamaulalo tele ma le agaga faafetai tele mo le perisitua ua tatou umia.

O le perisitua o le pule e galue ai i le suafa o le Atua. O lena pule e taua i le faataunuuina o Lana galuega i luga o le fogaeleele. O le perisitua ua tatou umia o se vaega ua faamatuu mai o le pule faavavau a le Atua. Afai tatou te amio sao ma faamaoni, o le a faavavau o tatou faauuga i le perisitua.

Ae peitai, o le na o le tuuina atu o le pule, e le faapea ua faaee atu ai e le pule lava ia le mana o le tofiga. O le tulaga e mafai ona tatou faalauteleina ai le mana o le perisitua e faalagolago lea i le agavaa o le tagata lava ia, faatuatua i le Alii o Iesu Keriso, ma le usiusitai i Ana poloaiga. Afai e lagolagoina e se faavae mautu o le malamalama o le talalelei, o le a matua faalauteleina lo tatou agavaa e faaaoga tatau ai le perisitua.

O le faataitaiga sili mo le faaaogaina o le perisitua paia, o lo tatou Faaola lea o Iesu Keriso. Sa auauna atu o Ia ma le alofa, agalelei ma le alofafua. O Lona soifuaga o se faataitaiga e le mafaatusalia o le lotomaulalo ma le mana. O faamanuiaga silisili mai le faaaogaina o le perisitua e oo mai mai auaunaga lotomaulalo a isi e aunoa ma le mafaufau ifo o le tagata ia te ia lava. O le mulimuli i Ana faataitaiga o se tagata faamaoni ma usiusitai na umia le perisitua, e mafai ai ona tatou maua le mana maoae. Pe a tatau ai, e mafai ona tatou faaaogaina le mana o le faamalologa, o le faamafanafanaga, ma le fautuaga, a o mulimulitaia ma le faatuatua ia uunaiga filemu a le Agaga.

Mo ni nai minute, o le a ou talosagaina ai outou e mafaufau faapea o loo tuua na o oe ma au i totonu o se nofoaga filemu, o lona siosiomaga e mafai ona oo mai ai aoaoga a le Agaga Paia. O nisi o outou e maua ni faatalatalanoaga faavaitaimi o le agavaa o le tagata lava ia mo le perisitua, ae o isi e i ai ni valaauga e seasea ai ona faia ni faatalatalanoaga. Pe mafai lava ona outou mafaufau faapea i ni nai minute e sosoo ai, o le a faia ai ni o tatou faatalatalanoaga taitoatasi faaleperisitua?

A o tatou fefaasoaai faatasi i nai minute ia, ou te talosaga atu ia mafaufau loloto i lou agavaa faaletagata lava ia e faaaoga le pule paia o loo e umia. O le a ou fai atu foi e te mafaufau pe o le a se tele e te faaaogaina ai lou perisitua e faamanuia ai isi. O lo’u faamoemoega e le o le faitioina o oe ae ia fesoasoani e faateleina ai faamanuiaga e tafe mai e ala i lou faaaogaina o le perisitua.

Pe o fesoasoani ou lava mafaufauga patino e aumai ai le taitaiga a le Agaga Paia pe e manaomia se fesoasoaniga sili atu e aumaia ai? O e fafagaina lou mafaufau i mea e faagaeetia pe ua e gauai atu i tusitusiga faaponokarafi po o Uepi saite? O e aloese ma le faaeteete mai le faaaogaina o fualaau ma vailaau faasaina e faaosofia ai lagona malolosi ia e feteenai ma le faamoemoega o le Upu o le Poto, pe ua e faia ni ’alofaga patino e ta’uamiotonuina ai [au aimoga]? Pe o e matua faaeteete ea i le taulimaina o mea e oo atu i lou mafaufau e ala i mea e te vaaia ma faalogoina ina ia mautinoa o ia mea e lelei atoatoa ma faagaeetia?

Afai ua tatala lau faaipoipoga, pe o e tuuina atu ea le tausiga moni o mea tautupe mo tamaiti na e fanauina, ae le na o se aofaiga ua faatonuina e le tulafono?

Afai ua e faaipoipo, pe o e faamaoni ea i lau ava i le faalemafaufau ma le faaletino? Pe o e faamaoni ea i au feagaiga o le faaipoipoga e ala i le le auai lea i ni talanoaga ma se isi tamaitai lea e te le manao e faalogo i ai lou toalua? O e agalelei ma lagolagoina lau lava ava ma lau fanau? O e fesoasoani i lau ava i le faia o nisi o galuega i le fale? O e taitai i gaoioiga faaleaiga e pei o le faitauina o tusitusiga paia, tatalo faaleaiga, ma afiafi faaleaiga, pe o fai e lou toalua ona e te le o faia i totonu o lou aiga? Pe o e ta’u atu ea ia te ia e te alofa ia te ia?

Afai e i ai se tasi o outou o lagonaina le le mautonu i tali faalemafaufau na e tuuina mai i fesili sa ou tuuina atu, ia faasa’o loa lava i le taimi nei. Afai o i ai ni mataupu e uiga i le agavaa, ou te fautuaina oe ma le agaga vaivai lava ina ia e talanoa i lou epikopo po o se tasi o le au peresitene o lo outou siteki i le taimi nei. O loo e manaomia le fesoasoani. O mataupu o loo fai ma faalavelave ia te oe, e le mafai ona latou faamaloloina i latou lava. A aunoa ma le togafitiga talafeagai, o le a faapea ona faateteleina le leaga. Atonu e faigata ona e talanoa atu i lou taitai perisitua, ae ou te fautuaina oe ia fai i le taimi nei mo lou lava manuia ma mo le manuia o i latou e alolofa ia te oe.

Uso e, o le a ou talanoa atu nei i le ala e tatau ona faaaoga ai le perisitua e faamanuia ai olaga o isi, ae maise lava o afafine o le Tama oi le Lagi.

O loo ta’ua i le folafolaga i le aiga e faapea, o le tane ma le ava e tatau ona avea ma se paaga tutusa. Ou te talitonu o le a talia fiafia ma lagolagoina e ava uma i totonu o le Ekalesia lena avanoa. Pe o tupu pe leai, e faalagolago lava lea i le tane. E toatele tane o loo latou faatinoina le paaga tutusa ma a latou soa, lea e manuia uma ai i laua o le ulugalii ma faamanuiaina ai le la fanau. Ae peitai e toatele foi e le o faia. Ou te fautuaina soo se alii o loo musu e atiina ae se faiga paaga tutusa ma lana ava, ia usitai i le fautuaga musuia a le Alii ma ia faia loa. O paaga tutusa e maua mai ona faamanuiaga silisili pe a saili uma le tane ma le ava i le finagalo o le Alii i le faiga o faaiuga taua mo i la’ua lava ma lo la’ua aiga.

Ia mataala i musumusuga a le Agaga i le faaaogaina o lena faamanuiaga sili o le galue i le suafa o le Alii e ala i lou perisitua. Ia e nofouta atili i auala e mafai ona e faaaogaina tele ai le mana o le perisitua i olaga o i latou e te alofa i ai ma tautuaina. O loo ou mafaufau faapitoa lava i tagata e pei o se fafine mativa ua oti lana tane, o lē atonu o le a faamanuiaina mai le fesoasoani a se tagata o loo umia le perisitua e loto malamalama ma agalelei. O le toatele o tagata faapena latou te le talosagaina lava se fesoasoani. Ia mataala i luitau eseese e mafai ona e fesoasoani ai ia te ia e taulima i lona aiga e pei: o le faamatuu atu o ni atugaluga e ala i se faamanuiaga musuia faaleperisitua po o le manaomia o le faia o ni galuega lipea laiti.

I le avea ai ma se epikopo ia nofouta ma mataala i tamaitai o loo galulue i aufono a lau uarota. E mafai ona latou faailoaina atu manaoga o tamaitai o lau uarota o e e le o faamanuiaina i le i ai o se perisitua i le aiga, e ala atu i uso magafagafa ma mataala o le Aualofa. E ala i se asiasiga i le aiga, e mafai ai e le Aualofa ona silafia manaoga ma fautua atu ni fofo ia te oe. Mo mataupu e le oo i ai le malosi o le Aualofa, e mafai ona e valaau atu i le korama a le au toeaina po o vaega o faitaulaga sili e tuuina atu le fesoasoani e tusa ai ma mea o loo manaomia.

I le avea ai ma se epikopo, pe a e fautuaina se tane ma se ava e i ai se faafitauli faaleulugalii, mata o tutusa lou talitonuina o le faamatalaga a le tamaitai e pei foi o lou talitonuina o le faamatalaga a le alii? Ao ou faimalaga solo i le lalolagi atoa, na ou iloa ai e le o tuuina atu i nisi o tamaitai le faaaloalo ma le gauai e tatau ai, e sili atu le faatauanauina o se taitai perisitua e se atalii nai lo se afafine o le Tama oi le Lagi. E le tatau lava ona tupu lena tulaga faapitoau.

Pe o maua e tamaitai nofofua le amanaia ma le tausiga talafeagai e tatau mo i latou pe a latou auai atu i uarota e i ai aiga? Pe o latou maua ni avanoa e auauna atu ai i valaauga taua lea latou te lagona ai le taliaina ma le manaomia? Pe o latou maua le lagolago faaleperisitua o loo manaomia?

O le faamoemoega o le pule o le perisitua o le tuuina atu, ia auauna atu, ia siitia, ia musuia—ae le o le faaaogaina o le pulega po o faiga faamalosi amioletonu. I nisi o tu ma aga faaleaganuu e tuu atu ai i se tama se tulaga iloga, e pulea ma faatautaia ai mea uma o se aiga. E le o le ala lena a le Alii. I nisi o atunuu e toetoe lava a pule le tane i lana ava, ua pei o le ava o se isi lea o ana lava meatotino. O se vaaiga saua, le lelei, ma le sese lea i le faaipoipoga ua uunaia e Lusifelo faapea e tatau ona teena e i latou uma ua umia le perisitua. Ua faavae lea i le manatu sese e faapea o le alii e maualuga atu i lo le tamaitai. E leai se manatu nai lo le manatu lenei, ua sili atu le mamao mai le upu moni. Ua faamautu mai e tusitusiga paia e faapea, na tuu lava e le Tama oi le Lagi Lana foafoaga aupito maoae, aupito matagofie, ma tulaga ese, o le tamaitai lea, i le faaiuga. Ina ua mae’a uma lava isi mea, ona faatoa foafoa ai lea o le tamaitai. O le taimi foi lena na faatoa fofogaina ai ua maea ma lelei le galuega.

O a tatou ava, tina, tinamatutua, ma tuafafine faapea ma isi tamaitai taua i o tatou olaga, na saunoa mai Peresitene Hinckley e uiga ia i latou e faapea: “Mai foafoaga uma a le Silisili Ese, e leai se isi mea na sili atu ona matagofie, leai se isi mea e sili atu ona musuia, nai lo se afafine lalelei o le Atua o le e savali i uiga tonu faatasi ma se malamalama i le ala e tatau ai ona faia faapea e ia, o le na te faamamaluina ma faaaloalo i lona tino o se mea e sa ma paia, o le na te faaleleia lona mafaufau ma faalauteleina e ia e le aunoa lona malamalama, o le na te fafagaina lona agaga i upu moni e faavavau.”¹

E ala i se fuafuaga paia, e tele itu e matua eseese ai se tamaitai mai se alii.² E agalelei o ia, ma saili i mea e manaomia e isi e siomia o ia. Ae peitai o lena uiga o le agalelei e mafai ona avea ma se mea e lofituina mo tamaitai o e e sili atu mea latou te taumafai e ausia nai lo mea e mafai ona latou faia, e tusa lava pe i ai ma le fesoasoani a le Alii. O nisi e oo ina lotovaivai ona latou te lagonaina latou te le o faia mea uma e tatau ona latou faia. Ou te talitonu o se lagona lea ua oo i ai le toatele o tamatiai agavaa, tauaogaina, ma le faamaoni o le Ekalesia.

O le mea lea, i le avea ai o ni tane po o atalii, ia faaali atu le agaga faafetai i mea ua faia e lau ava ma lou tina mo oe. Ia faailoa soo atu lou alofa ma lou agaga faafetai. O lena mea o le a sili atu ai ona faamanuiaina, sili atu ona matagofie ma anoa le olaga mo le toatele o afafine o le Tama oi le Lagi, o e e seasea ona faalogo i se upu faamalo ma e le o faafetaia mo le anoanoai o mea latou te faia. I le avea ai o se tane, pe a e lagonaina ua manaomia e lau ava se faafiafiaina, opo o ia ma ta’u atu i ai e te alofa tele mo ia. Talosia ia tatou taitoatasi ona lagona le faapalepale ma le agaga faafetai i tamaitai faapitoa ua faatamaoaigaina ai o tatou olaga.

E tele lava ina le iloa le taua moni o se mea sei iloga e aveesea mai ia i tatou. Ina ia faamalamalamaina, mafaufau i se alii sa le mafai ona toe faaaogaina lona perisitua ona o se solitulafono. Mulimuli ane, sa toe faafoi atu ai ia te ia o se vaega o le toefuataiga o sauniga sa ia mauaina e ala i le salamo atoatoa. Ina ua uma le toefuataiga, sa ou faliu atu i lona faletua ma fesili atu, “E te manao i se faamanuiaga?” Sa tali mai o ia ma le naunautai. Ona ou tilotilo atu lea i le tane, ua mafai nei ona faaaoga le perisitua ma faapea atu, “E te manao e tuuina atu se faamanuiaga i lou faletua?” E le mafai e upu ona faamatalaina le loloto o lagona o se aafiaga faapena, ma na fatuina ai sootaga o le alofa ma le talitonuina, ma le loto faafetai. E le tatau ona e oo i le aveesea o lou perisitua ina ia e talisapaiaina atoatoa ai.

Ua ou iloa le tele o le olioli ma le fiafia lea e oo mai i le alofaina, faapelepeleina, ma le faaaloaloina o lo’u toalua faapelepele i lo’u loto ma lo’u agaga atoa. Talosia ia aumaia i lou olaga e ala i lou faaaogaina o le perisitua ma le taulimaina o tamaitai taua lena lava loto ua faamalieina.

I le avea ai ma se tasi o Aposetolo e toa 15 a le Alii o Iesu Keriso i luga o le fogaeleele, ou te faailoa atu ai o’u lava lagona e uiga i le perisitua e pei ona atoatoa lona faaalia i le saunoaga lenei a Peresitene Howard W. Hunter: “I le avea ai o i matou o ni molimau faapitoa a lo tatou Faaola, ua tuuina mai ia te i matou se tofiga maoae lava o le taulimaina lea o mataupu o lana ekalesia ma le malo, ma talai atu i ona afafine ma ona atalii i soo se mea o i ai i latou i lenei lalolagi. Ona o lo matou valaauga e molimau atu, taitai, ma talai atu, o lea ua tatau ai ia te i matou, po o le a lava le matutua, vaivai, le lavava, ma lagona o le le agavaa, matou te faia lava le galuega ua Ia tuuina mai matou te faia, seia oo lava i le matou toe manava o o matou olaga.”³

O le a tatou tali atu i le Atua e tusa ai ma lo tatou taulimaina o Ona afafine faapelepele. O le mea lea, ia tatou taulima i latou e tusa ma le ala ua Ia finagalo tatou te taulimaina ai i latou. Ou te tatalo ia taialaina i tatou ina ia atili musuia, nofouta, ma faamanuiaina i le perisitua ua tatou umia, ae maise lava o Ona afafine. I le suafa o Iesu Keriso, amene.