E oo lava i se Tamaitiiti e Mafai ona Malamalama

E tele taimi e tete’i ai matua i tali e le i faamoemoeina a a latou fanau i fesili mai tagata matutua. I se tasi afiafi, a o ma toesea ma lou toalua, sa le mautonu le tausitama i le tatalo na faalogo o fai e le ma fanau, ona fesili ai lea i le fesili lea: “Ae o le a le eseesega o la outou lotu ma la’u lotu?” Na vave le tali a lo ma afafine e valu tausaga le matua: “E toetoe lava ina tutusa, vagana ai i la matou lotu, e tele atu isi mea matou te aoaoina nai lo outou!” Na matua le manao lo’u afafine e faaita le tausitama, ae sa na ona manao lava o lo’u afafine laitiiti, e faamamafa atu i lana lava ala, le taua e tuu e le Au Paia o Aso e Gata Ai i le sailiga o le malamalama.

Na tautino mai e Iosefa Samita, “E le mafai lava ona faaolaina le tagata i le valea” (MFF 131:6). Na ia faaopoopo mai, “O le mataupu faavae o le atamai, o le mataupu faavae lena o le faaolataga … ; ma o i latou uma e le mauaina le atamai e tatau ai mo le faaolaina, o le a faasalaina” (History of the Church, 5:387). O lenei atamai e faavae i le malamalama i le natura o le Atua ma Iesu Keriso, ma le ata o le faaolataga ua Laua saunia ina ia mafai ai ona tatou toe foi atu i lo Laua afioaga. “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea” (Ioane 17:3).

O le mataupu faavae o le atamai e tele lava ina faauiga sese e le tagata. “O le mamalu o le Atua o le malamalama lea” (MFF 93:36). E silisili atu i lo soo se mea e mafai ona oo i ai le malamalama o lo tatou malosi faalemafaufau. O tagata e taumafai e saili i le Atua, o nisi taimi e mafaufau ai e tatau ona latou sailia o Ia i manatu lavelave.

E ui i lea, e avanoa lo tatou Tama Faalelagi mo i tatou i taimi uma. Na te fetuutuunaia Ia lava i le maualuga o lo tatou malamalama. “Afai e sau o Ia i se tamaitiiti laitiiti, o le a Ia fetuutuunaia Ia lava i le gagana ma le malosi o se tamaitiiti laitiiti” (Joseph Smith, in History of the Church, 3:392).

O le a matua le sa’o lava le Atua pe afai o le talalelei e na o tagata e sili ona popoto e mauaina. Ua Ia faamautinoa i Lona agalelei, o upumoni e faatatau i le Atua e mafai ona malamalama ai Ana fanau uma, pe o le a lava le maualuga o lo latou aotauina, po o le a foi le malolosi o o latou mafaufau.

O le mea sa’o lava, o le mea moni o le mafai e se tamaitiiti ona malamalama i se mataupu faavae, o se faamaoniga lea o lona mana. Na saunoa Peresitene Ioane Teila, “O se tagata atamai moni na te aveina se mataupu e le manino ma faigata e faalauteleina ma faafaigofieina ina ia mafai ona malamalama ai se tamaitiiti” (“Discourse,” Deseret News, Sept. 30, 1857, 238). Nai lo le faaitiitia o lona aafiaga, o le mama ma le faigofie o le faamatalaga e mafai ai e le Agaga Paia ona molimau atu ma le mautinoa sili atu i loto o tagata.

I le taimi o Lana misiona i le fogaeleele, e faatusatusa ai lava e le aunoa e Iesu le manino ma le talafeagai o Ana aoaoga i le lavelave o le faautaga a le au Faresaio ma isi a’oa’o o le tulafono. Sa tele taimi sa latou taumafai ai e tofotofo ia te Ia e ala i le fesili atu ia te ia i fesili faigata, ae o Ana tali sa tumau lava le manino a’ia’i ma le faapei o se tamaitiiti le faigofie.

I se tasi aso sa fesili ai soo o Iesu ia te Ia i le fesili lenei: “O ai ea e sili i le malo o le lagi?”

Sa valaau atu Iesu i se tama itiiti, ma faatu ia te ia i o latou luma ua faapea atu, “E moni, ou te fai atu ia te outou, A le liua outou, ma avea ia pei o tama iti, tou te le sao lava i le malo o le lagi.

“O lenei o se faamaulalo o ia ia te ia e pei o le tama itiitti nei, e sili lea i le malo o le lagi” (Mataio 18:1, 2–4).

Sa i ai se isi taimi na fetalai ai Iesu, “Ou te faafetai ia te oe lo’u Tama e, o le Alii o le lagi ma le lalolagi, ina ua e nana ia mea i e popoto ma e atamamai, a ua faaalia atu ia mea i tama valevale” (Luka 10:21).

Atonu o le Tusi Paia o le auga lea o le tele o faaliliuga ma felafolafoaiga faatofamanino nai lo se isi lava tusi. Ae, o se tamaitiiti, e faitauina lenei tusi mo le uluai taimi, o le a tutusa lava, pe afai e le tele atu, avanoa e malamalama ai i aoaoga faavae e pei o le toatele o na faitofamanino o tusitusiga paia. E fetuunai aoaoga a le Faaola mo tagata uma. I le valu o tausaga, ua mafai e se tamaitiiti ona lava le malamalama e ulu ifo ai i le vai o le papatisoga ma osia feagaiga ma le Atua, ma le malamalama atoatoa.

O le a se mea e malamalama i ai le tamaitiiti mai le faitauina o le tala i le papatisoga o Iesu? Sa papatisoina Iesu i le vaitafe o Ioritana e Ioane le Papatiso. Sa faapepepepe ifo le Agaga Paia i Ona luga “ua tino mai e peiseai o se lupe.” Sa faalogoina se siufofoga: “O lo’u atalii pele oe, ua ou fiafia lava ia te oe” (Luka 3:22). O le a i ai i le tamaitiiti se vaaiga manino i le Aigaatua: e toatolu tagata maioio ae e matuai tasi atoatoa—o le Atua le Tama; o Lona Alo, o Iesu Keriso; ma le Agaga Paia.

O le teenaina o le mataupu faavae o le faigofie ma le manino, o le amataga lea o le tele o le liliuese, e le gata i faapotopotoga a o tagata taitoatasi. I le Tusi a Mamona, na ta’uleagaina e le perofeta o Iakopo i latou anamua o e, “na inoino i upu malamalama, na fasiotia foi perofeta, ma ua sailia mea ua le mafai ona lagona. O lenei ona ua tauaso i latou, na oo foi ina tauaso ona ua latou vaavaai atu i ona tala atu o le faailoga, e tatau ona latou pauu; aua sa aveeseina e le Atua lona malamalama mai ia te i latou, ma tuuina atu ia te i latou mea e tele e le mafai ona latou lagona, aua na latou mananao i ai” (Iakopo 4:14).

O nisi taimi e ono tofotofoina i tatou e mafaufau faapea, “Ua faigofie tele,” e faapei lava o Naamanu, le taitai au Suria, o le na tautu i lona faamaualuga, na musu e usitai i le fautuaga a Elisaia, e faatauvaa tele i lona manatu, e faamalolo ai lona lepela. Sa fesoasoani ana auauna ia te ia ia ona iloa lona vasi:

“Sena e, ana fai atu e le perofeta se mea tele ia te oe, e te le faia ea? e te le faia ea ina ua ia fai atu ia te oe, e te taele, e te manuia ai?

“Ona alu ifo ai lea o ia, ua fufui faafitu i Ioritana, e tusa ma le upu a le tagata o le Atua: ona foi mai ai lea o lona tino tuai pei o le tino o le tama itiiti, ua mama foi ia” (2 Tupu 5:13–14).

O lona faamamaaga sa le na o le faaletino; sa faamamaina foi lona tino faaleagaga ina ua ia taliaina lenei lesona matagofie o le lotomaualalo.

Ua i ai i tamaiti laiti ni faanaunauga ofoofogia e aoao. Ua ia te i latou le faatuatuaga atoatoa i lo latou faiaoga, o agaga e mama ma le lotomaualalo tele—i se isi faaupuga, o uiga auau mama foi na e tatala ai le faitotoa i le Agaga Paia. O Ia o le ala tatou te maua mai ai le malamalama i mea a le Agaga. Na tusi atu Paulo i Korinito, “E faapea foi ona le iloa e se tasi mea a le Atua, ua na o le Agaga o le Atua” (1 Korinito 2:11).

Na ia faaopoopo mai, “A e le talia e le tagata faaletino o mea a le Agaga o le Atua: aua o mea valea ia ia te ia, na te le mafai foi ona iloa, aua e faamasinoina faaleagaga” (1 Korinito 2:14).

Ua tatou iloa o lenei tagata faaletino po o le lalolagi “o le ita lea i le Atua, vagana ua gauai o ia i galuega alofa a le Agaga Paia.” O lea e tatau ai ona avea o ia “e pei o le tama itiiti, ua fia usiusitai, ma agamalu, ma faamaulalo, ma onosai, ma ua tumu i le alofa ma le fia gauai i mea uma ua silafia e le Atua e tatau ona faatiga ai o ia, e pei lava ona gauai le tama itiitii i lona tama” (Mosaea 3:19).

I lana tala puupuu faafilosofia O Le Perenise Laitiiti, o loo faamatala mai ai e Antoine de Saint-Exupéry le fenumiai o se tamaitiiti ina ua vaai i se toga rosa, na ia manatu ai o le fuarosa o loo ia te ia, lea na te vaavaaia ma le alofa, e le o se fugalaau e uiga ese, ae o se fugalaau ua taatele. Ona ia iloa ai lea, o le mea e tulaga ese ai lana fuarosa, e le o lona vaaiga mai fafo ae o le taimi ma le alofa ua ia faapaiaina e tausia lelei ai. Fai mai a ia

“O tagata … latou te totoina rosa e limaafe i le togalaau lava e tasi—ae latou te le mauaina le mea o loo latou sailia… .

“Ae o le mea o loo latou sailia, e mafai ona maua i se fuarosa e tasi po o sina vai itiiti… .

“Peitai ua tauaso o latou mata. E tatau ona e saili ma lou loto” ([1943], 79).

O le ala lava foi lea e tasi, o lo tatou atamai e uiga i le Atua e le faalagolago i le tele o faamatalaga tatou te faaputuputuina. O le mea moni, o le atamai uma o le talalelei lea e aoga mo lo tatou faaolataga, e mafai ona aotele i ni nai manatu autu o aoaoga faavae, mataupu faavae, ma poloaiga taua, na ua i ai i lesona a faifeautalai ia tatou te mauaina a o lei papatisoina. O le iloaina o le Atua o se mataupu e uiga i le tatalaina o o tatou loto ia maua ai se malamalama faaleagaga ma se molimau faamaoni i le moni o nei manatu autu faavae o aoaoga faavae. O le iloaina o le Atua o le i ai lea o se molimau o loo soifua o Ia, ma lagonaina i le loto o se tagata e alofa o Ia ia te i tatou. O le taliaina lea o Iesu Keriso ma o tatou Faaola, ma le i ai o se naunautaiga faamaoni e mulimuli i Lana faataitaiga. O le auauna atu i le Atua ma o tatou tuaoi, tatou te molimau atu ai ia Keriso ma faataga i latou o loo siomia ai i tatou, ia latou iloa atili o Ia.

O nei mataupu faavae e mautu lona faaaogaina i aoaoga o loo tuuina mai ia tatou uarota ma paranesi. Mo outou faiaoga o le Ekalesia, o le sini autu o au lesona o le faaliliuina lea o loto. O le uiga auau mama o se lesona, e le fuaina i le tele o fasi faamatalaga fou e te tuuina atu i lau vasega. E sau mai lou malosi e valaaulia le afio ai o le Agaga ma faaosofia tagata o lau vasega ia faia ni tautinoga. O le faaaogaina o lo latou faatuatua e ala i le ola ai i lesona sa aoaoina, o le a latou faateleina ai lo latou atamai faaleagaga.

Ou te tatalo ina ia tatou iloa le ala e tatala ai o tatou loto e faapei o se tamaitiiti, ma ia fiafia e faalogo ma ola ai i le afioga a le Atua i le mana uma o lona faigofie. Ou te molimau atu afai tatou te faia lenei mea, o le a tatou maua le atamai po o le malamalama “i mea lilo [a le Atua] atoa ma [le] mataupu tau le filemu—e aumaia ai le olioli, e aumaia foi le ola faavavau” (MFF 42:61). I le suafa o Iesu Keriso, amene.