Ua Tuu Eseese Nei Taiala o Punaoa mai Mekasini o le Konafesi

O taiala o punaoa mo faiaoga i le Perisitua Arona ma Tamaitai Talavou, lea sa maua muamua i lomiga o le konafesi aoao i le Liahona ma le Ensign, o le a lomia ese nei ma lafoina sao atu i uarota ma paranesi.

“O taiala e faaopoopo atu ma faamalosia ai tusi lesona a le Perisitua Arona ma Tamaitai Talavou, e ala i le tuuina atu i faiaoga o tuleiga ma saunoaga aupito lata mai a taitai o le Ekalesia e faatatau i le autu o le lesona,” o le saunoaga lea a Michael G. Madsen o le Matagaluega o Mataupu Aoaoina a le Ekalesia.

O taiala o loo tuuina atu ai tusi faaopoopo ma mea e faaaoga mo lesona taitasi i tusi lesona masani, e ala i le faatatau atu i tala ma saunoaga lata mai a taitai o le Ekalesia o i ai nei ma isi tusiga i mekasini a le Ekalesia. Ua faaopoopoina foi i le taiala fou ia fesili, upusii, ma motugaafa faafaiaoga mo faiaoga, ua tuuina atu ai i faiaoga nisi tusi ma mea e tele e utuvai mai ai. O taiala fou ua fuafuaina e faaopoopo ma faafou ai tusi ma mea e faaaoga o loo i totonu o tusi lesona o loo i ai nei, ae e le suia ai tusi lesona lava ia.

O le a mafai nei ona lomia ese ia taiala o punaoa e taitasi i le tausaga. E fa vaega o le taiala fou: o fesili, punaoa faaopoopo, aafiaga, ma motugaafa faafaiaoga.

O taiala fou e lomiaina i gagana e 27 ma e ofoina atu ai mea e faaaoga i lesona i Aso Sa faapea ma fautuaga mo gaoioiga i le ogatotonu o le vaiaso ma le autalavou. O nei gaoioiga i le ogatotonu o le vaiaso ua fuafuaina ia o faatasi ma lesona i Aso Sa, e tuu atu ai i le autalavou se avanoa e faataitai ai ma faaaoga mea na aoaoina ai i latou. O le tele o gaoioiga e fesoasoani e faataunuu ai tulaga manaomia o le Tiute i le Atua ma le Alualu i Luma o le Tagata Lava Ia.

“O loo matou faafesootaia mea o loo latou aoaoina i le Aso Sa i se gaoioiga i se afiafi o le vaiaso e fesoasoani ai ia oo ifo le talalelei i o latou loto,” na saunoa ai Brother Madsen.

Ua uunaia taitai o Alii ma Tamaitai Talavou e faaaoga le taiala fou i a latou tusi faafaiaoga. O le taiala o loo aofia ai ni motugaafa faapitoa faafaiaoga se 11 e fesoasoani ai i faiaoga e fuafua ma tuuina atu ni lesona e sili ona tauaogaina.

“Afai e mulimuli faiaoga i nei fesoasoani, o le a matuai faateleina le alualu i luma o a latou aoaoga,” na saunoa ai Brother Madsen.

O taiala fou mo le 2009 na muai maua i le Tautua a Faletusi i le aso 2 o Setema, 2008.