O Le Mauaina o se Molimau E Mafai Ona Avea o se Faagasologa

O ni nai tausaga ua mavae atu, a o ou auauna ai o se Fitugafulu Eria i Pasila, sa matou fai malologa ai ma lou aiga i se nuu matagofie lava o Florianópolis. O le Aso Sa, e pei ona masani ai, sa matou o ai i le lotu sa aupito latalata ane na mafai ona matou maua. Sa matou auai ma lou toalua ma lo ma afafine matua i le vasega a le Aoga Sa lea sa latou talanoaina ai a tatou molimau faaletagata lava ia e uiga i le talalelei.

O se taimi o le lesona, sa fesili ai le faiaoga i tagata o le vasega pe mafai ona latou faasoaina atu se aafiaga mamana faaleagaga foi na latou oo i ai a o atiina ae a latou molimau i le Ekalesia. A o faamatalaina e nisi uso ma tuafafine a latou tala, sa ou iloiloina i lou lava mafaufau ou lava aafiaga i le avea ai o se tagata liliu mai mo se mea e mafai ona ou fetufaai atu ia i latou, ae sa leai se mea tulaga ese i lau faagasologa o le mauaina o se molimau na mafai ona ou mafaufau i ai.

A o ou mafaufau ma faalogologo i aafiaga o isi, na ou iloa ai sa faamoemoe le faiaoga ou te auai [i le fetufaaiga o aafiaga]. Sa faalogologo o ia i isi tagata, ma sa ia faailoa mai sa faatalitali o ia mo le faasoaina atu o so’u aafiaga maoae. E ui lava i mea uma, ae o au o se Fitugafulu Eria ma e tatau ona i ai sa’u faamatalaga manaia e faasoa atu. O le lagonaina o loo alu le taimi ma sa faatalitali mai o ia mo au, sa ou taumafai malosi ai lava e saili se mea e fetaui lelei i lenei vaega o se mea mamana, sa le fiafia le faiaoga ona sa le mafai ona ou mafaufau i se mea. E ui ina sa ou manao lava e fesoasoani atu, ae sa le mafai ona ou ausia lona faamoemoega.

O le mea na lelei ai o se Aso Sa anapogi lena, ma i le taimi o le sauniga faamanatuga, sa ou faaaogaina le avanoa e faailoa atu ai lau molimau i le faapotopotoga ae maise lava i lena tuafafine ma lana vasega a le Aoga Sa. Sa le o se aafiaga maoae lea sa tatau ai ona ou faasoaina ae o se molimau faamaoni o loo ia te au e uiga i upumoni o le talalelei toefuataiina.

O nisi taimi, tatou te manatu ai e faapea, ina ia maua se molimau e uiga i le Ekalesia, tatou te manaomia se aafiaga maoae ma mamana, po o se mea e tasi e mafai ona soloiesea ai soo se masalosaloga e faapea, ua tatou maua se tali po o se faamautinoaga.

Na aoao mai Peresitene Boyd K. Packer: “O le leo o le Agaga o loo faamatalaina i tusitusiga paia e le ‘leotele’ pe ‘saua.’ E ‘le o le leo o le faititili, po o … le leo o le pisapisao tele.’ Ae faauta, ‘o le leo itiiti ma le malie lava ia, e peiseai o le musumusuga,’ ma e mafai ona ‘atia ai le agaga’ ma ‘mu ai [le loto].’ (3 Nifae 11:3; Helamana 5:30; MFF 85:6–7). Manatua, na iloa e Elia o le siufofoga o le Alii sa lei i ai i le matagi, pe sa i ai i le mafuie, pe sa i ai i le afi, ae o se ‘leo filemu ma le itiiti.’ (1 Tupu 19:12).”

Na faaauau le saunoaga a Peresitene Packer: “E le maua e le Agaga o tatou taulaiga e ala i le tuu alaga po o le luluina o i tatou i se lima malosi. Ae na te musumusu mai. E pai malu mai ma afai tatou te le magafagafa atonu o le a tatou le lagonaina lava… .

“E i ai taimi o le a uunaia malosi ai i tatou ina ia tatou gauai atu. Ae o le tele o taimi, afai tatou te le usitai i le lagona malu, o le a tuumuli le Agaga ma faatalitali sei iloga tatou te toe sailia ma faalogo ma faailoa atu e ala i a tatou amioga ma faataitaiga, e pei o Samuelu i aso anamua, ‘Fetalai mai ia [le Alii], aua o loo faalogologo atu lau auauna’ (1 Samuelu 3:10).” (“The Candle of the Lord,” Ensign, Ian. 1983, 53).

O mea maoae e le o se faamautinoaga lea o le a malolosi a tatou molimau. O Lamana ma Lemuelu o ni faataitaiga lelei ia o lenei tulaga. Sa asiasi atu ni agelu ia te i laua, ma e ui lava i na mea, na toetoe lava o le minute na sosoo ai, sa laua fesiligia ai le finagalo o le Alii. E mafai e nisi taitai maoae o nei aso e gata ai ona aoaoina i tatou e uiga i lenei mataupu faavae. Sa aoaoina i latou mai luga i taimi popofou o le Toefuataiga, ae sa le lava lava lo latou malolosi e tumau ai e oo i le iuga. O nei aafiaga ua faaali mai ai ia i tatou, o le mauaina o se molimau a le “leo itiiti,” o nisi taimi e mafai ona i ai se aafiaga malosi atu i a tatou molimau nai lo le asiasiga a se agelu.

A o avea au ma se alii talavou i Porto Alegre, Pasila, sa ou aoao ai e uiga i le Ekalesia mai ni tamaitai faifeautalai se toalua, ou te manatua lo’u sailia o se tali i au talosaga—i se mea tele ma e le mafesiligia. E lei tupu lava. E le faapea la ou te lei atiina ae se lagona mautinoa ou te auai ai i le Ekalesia toefuataiina.

Na aoao mai e Alema lenei faagasologa o le faafaileleina o se molimau: “Ae peitai, faauta, afai tou te ala mai, ma fagua o outou mafaufau e oo i le tofotofo i a’u upu, ma faaaoga sina faatuatua itiiti lava; ioe, afai tou te le mafaia se mea e sili i le manao i le fia faatuatua, [ma ou te manatua le tulaga lena sa ou i ai a o avea ma tagata sailiili], ina tuu ia lenei manao e galue i totonu ia te outou, seia lava lo outou faatuatua e talia ai nisi o a’u upu” (Alema 32:27).

Talu mai na aso, i le avea ai o au ma se tagata sailiili i le Ekalesia, ma mulimuli ane avea ai ma se faifeautalai, sosoo ai ma le avea ma se tama ma se taitai, o nei aafiaga uma na fatuina faatasi ai se vaega o aafiaga ma lagona, na tele lava ina itiiti, e leai se masalosalo na i ai, o le fatu “o se fatu lelei ia” (Alema 32:30).

Na faaauau pea le aoaoga a Alema e uiga i le molimau: “O lenei, tatou te faatusatusaina le upu i le fatu. O lenei, afai tou te tuuina mai se mea e totoina ai se fatu i o outou loto, faauta, afai o le fatu moni ia, po o le fatu lelei, afai foi tou te le tiai ai ona o lo outou le talitonu, ina ia outou tetee atu i le Agaga o le Atua, faauta, e amata ona tupu ai i totonu o outou fatafata; pe a outou lagona foi le tupu o le fatu, ona amata ai lea ona outou faapea ifo—e moni o le fatu lelei lenei, po o le upu lelei, aua ua amata ona faateleina ai lou loto, ioe, ua amata ona faamalamalamaina ai lou mafaufau; ioe, ua amata ona suamalie ia te au” (Alema 32:28).

O se molimau la, mo nisi tagata, e mafai ona oo mai e ala i se mea se tasi e le faamaonia e sese. Ae mo isi, e mafai ona oo mai e ala i se faagasologa o aafiaga ia, atonu e le matua mata’ina ae a tuufaatasi, ma molimau atu i se ala e le matineia, o mea ua tatou aoaoina ma ola ai ua moni ia.

O le aso, ina ua mavae ni tausaga se tele o le avea ai ma se tagata O Le Ekalesia a Iesu Keriso o le Au Paia o Aso e Gata Ai, atonu o le a le mafai ona ou manatua le tele o aafiaga na faapea ona faatulagaina ai lau molimau. Ae o nei aafiaga uma ua tuua o latou faailoga ma saofaga i la’u molimau i le Ekalesia toefuataiina. O le aso, ua ou matuai mautinoa ai upumoni o le talalelei a Iesu Keriso.

Ou te fia faaiu ai i le faailoa atu o lenei molimau, e le gata mo lena tuafafine na faiaoga i le vasega a le Aoga Sa, ae mo outou uma foi. Ou te iloa o loo soifua lo tatou Tama Faalelagi. Ou te iloa e alofa o Ia ia te i tatou. O i tatou o Ana fanau. Na te faafofogaina a tatou talosaga. Ou te iloa o Iesu Keriso o lo tatou Faaola. Na maliu o ia, na toetu, ma togiola mo a tatou agasala. O Lana Togiola ua faamanuiaina ai au i aso uma o lo’u olaga.

Ou te molimau atu o le Ekalesia a Iesu Keriso na toefuatai mai i nei aso e gata ai e le Perofeta o Iosefa Samita. O ia o se perofeta a le Atua. Ou te iloa o loo taitaiina i tatou e se perofeta soifua o Peresitene Thomas S. Monson. Ou te iloa o ia o se perofeta mo o tatou vaitaimi, e pei lava ona i ai Mose, Aperaamo, ma Isaia i o latou vaitaimi.

O le Tusi a Mamona o le afioga a le Atua, faapea foi ma le Tusi Paia, ma o le tasi molimau i le Faaola. Ou te iloa o le mana o le perisitua na toefuataiina mai ma ua faamanuiaina ai le toatele o le Au Paia i le lalolagi atoa. Ma ou te molimau atu ai i le suafa paia o Iesu Keriso, amene.