O Outou o ē O Atu

Ou uso pele, o le po nei ou te fia faamalosiau atu i e umia le perisitua, o e e i ai taimi e lofituina ai i o latou tiutetauave. O se luitau lena na ou tautala foi i ai muamua. Ua ou toe foi i ai, aua e tele taimi e toe foi mai ai i olaga o i latou ou te alofa ma auauna atu i ai.

O le toatele o outou ua silafia, o o outou tiute faaleperisitua o le a manaomia ai mea e sili atu nai lo mea ua e manatu e te mafai ona fai. Atonu na tupu ina ua talosagaina oe e te lauga i se konafesi faalesiteki i luma o le fiaselau o tagata. Mo le tagata faatoa liliu mai, atonu o le tofi atu o oe e te faia se tatalo i luma o le lautele po o le faiaoga foi i se vasega mo le uluai taimi. Mo nisi, atonu o le faatonuina e taumafai e aoao se gagana i le nofoaga autu e aoao ai faifeautalai. Afai e lei lu’itauina e lena mea ou tomai, na mautinoa lava le tupu i luga o auala o se aai ese ina ua faatonuina oe e lou peresitene o le misiona e te talanoa atu i tagata taitasi uma e te feiloai i ai, e molimau atu ai i le Faaola ma le Toefuataiga o le perisitua paia.

Atonu sa e manatu, “E uma loa la’u misiona, o le avea ai ma se perisitua faamaoni o le a faigofie atu.” Peitai, i ni nai tausaga sa tau le mafai ona e moe i le po, ao e taumafai e lagolago atu i lou toalua ma se pepe fou, ma taumafai e tau fai se a’oga, aapa atu i uso o lau korama a toeaina, atonu e fesoasoani atu ia i latou e tasii a latou meaafale, ma taumafai e sue se taimi e tautuaina ou augatama i totonu o le malumalu. Atonu sa e tausisia se ataata i ou foliga ma e mafaufau: “A ou matua teisi a’e, ma avea o se perisitua faamaoni, o le a le tele ni mea e manaomia mai. O le a sili atu ona faigofie.”

O lena e soisoi mai outou na ua matutua atu, aua ua outou silafia se mea e uiga i le tautua faaleperisitua. O le mea lenei: o le tele o lau tautua faamaoni e tuuina atu, o le tele foi lena o mea e talosaga mai ai le Alii ia te oe. O la outou soisoi mai o se ataata o le fiafia, aua ua outou silafia Na te faateleina lo tatou mana e tauaveina ai se avega e mamafa atu.

Peitai, o le vaega matautia o lena mea moni o le, ina ia mafai e Ia ona tuuina atu ia te oe lena mana faateleina, e tatau ona faaauau pea ona e auauna atu ma ia faamaoni ia sili atu i lo le mea ua e talitonu e te gafatia.

E pei o le fausiaina o le malosi o musele. E tatau lava ona e faamasofaina ou musele ina ia galueaiina ai. E te faaaogaina ou musele seia oo ina ua vaivai lava. Ona latou lipeaina lea o i latou lava ma latou atiina ae ai le malosi sili atu. O le malosi faaleagaga faateleina, o se meaalofa mai le Atua lea e mafai ona ia tuuina mai pe a tatou tuleia Lana gauega i le mea e gata mai ai lo tatou malosi. E ala i le mana o le Togiola a Iesu Keriso, e mafai ona suia ai o tatou natura. Ona mafai lea ona faateleina lo tatou mana e tauaveina ai avega e sili atu nai lo le mea e manaomia, e tauia ai le auaunaga faateleina o le a talosagaina i tatou e tuuina atu.

Na fesoasoani lena mea ou te malamalama ai pe a ou vaai atu i se tasi o faia le auaunaga faaleperisitua ia foliga mai e faigofie. Ou te iloa atonu ua latou pasiaina suega faigata po o le lei oo mai foi o suega po o tofotofoga mo i latou. O lea la, nai lo le lotomatau’a ia i latou, a ua ou sauniuni e fesoasoani pe a oo ina faigata o latou tiute mo i latou, aua o le a faigata moni lava.

O lena tofotofoga o mea tatou te gafatia i le auaunaga faaleperisitua, ua tatau ai e ala i le fuafuaga a le Atua e faaagavaa Lana fanau ina ia toe ola faatasi ma Ia e faavavau. E alofa le Tama Faalelagi i Lana fanau. Sa Ia ofoina mai ia te i tatou uma le ola e faavavau, ina ia toe nonofo faatasi ma Ia i aiga ma le mamalu e faavavau. Ina ia faaagavaaina i tatou e maua lena meaalofa, na Ia tuuina mai ai ia te i tatou se tino faaletino, o le avanoa e tofotofoina ai ia agasala, ma se auala e faamamaina ai mai lena agasala ma tulai mai ai i le Uluai Toetutu. Na Ia auina mai ia i tatou Lona Alo Pele, o Ieova, e avea ma o tatou Faaola ina ia mafai ai. Na soifua mai le Faaola i le olaga nei, na tofotofoina ae e lei agasala lava, ona oo ai lea i Ketesemane ma Kolokota na totogi ai le tau o a tatou agasala ina ia mafai ona faamamaina i tatou. O le faamamaina, e na o i latou lava e lava le faatuatua ia Iesu Keriso e salamo ai mai agasala e oo mai i ai, ma faamamaina e ala i le sauniga o le papatisoga, ma osia ma tausia feagaiga e usitai i Ana poloaiga uma. Ma sa tatau ona i ai se fili malosi o o tatou agaga, o Lusifelo, o le o le a taumafai pea lava pea ma ana ‘au, e pueina fanau uma a le Atua ina ia taofia ai i latou mai le mauaina o le olioli i le ola e faavavau.

I Lona agalelei ma i le talitonuga tele, na faatagaina ai e le Tama Faalelagi faatasi ai ma le Faaola se vaega filifilia toalaiti o Ona atalii i le fogaeleele e umia le perisitua. Ua ia te i tatou le pule ma le mana e galulue ai i le suafa o le Atua, e ofo atu ai le talalelei moni a Iesu Keriso ma ona sauniga i le tele tatou te mafaia o fanau a le Tama Faalelagi. O lea, ua mafai ona outou malamalama i le maoae o lo tatou faatuatuaina mai le Atua. Ua mafai foi ona outou malamalama i le matuai taua o le perisitua faapea foi le faafeagai o loo tatou fetaiai.

E le o se mea e ofo ai lo tatou lagonaina mai lea taimi i lea taimi le lofituina. O lou mafaufau faapea, “Ou te lei mautinoa ou te mafai ona faia lenei mea,” o se faamaoniga lea ua e malamalama i le uiga moni o le umia o le perisitua a le Atua. O le mea moni, e le mafai ona e faia na o oe. E matua faigata tele le tiutetauave, ma e matua taua tele foi e le gafatia e lou mana faaletino ma a’u foi. O le iloaina o lena mea, ua i ai lea i le faavae o le galuega tele faaleperisitua.

A oo ina osofaia i tatou e na lagona o le le gafatia, o le taimi lea e manatua ai le Faaola. Ua Ia faamautinoa mai tatou te le faia na o i tatou lenei galuega. O loo i ai mau e faapipii i luga o lau faaata, ma manatua i taimi e te faaletonu ai i lou malosi.

Mo se faataitaiga, sa manatua e Peresitene Thomas S. Monson upu folafola a le Faaola a o ia faamanuiaina au i le ono masina talu ai, ina ia ou tu atu ma le le fefe i lo’u valaauga ina ua foliga mai ua matua faigata tele. O na afioga a le Faaola na tuuina atu i si Ana au toaitiiti o e umia le perisitua i lenei tisipenisione, na oo mai i le mafaufau o le perofeta a o faaee ona aao i luga o lo’u ulu: “Ai foi se talia outou, ou te i ai foi, aua ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u agaga, o le a i o outou loto, e siomia foi outou e a’u agelu, e lagolagoina outou.”¹

O le folafolaga na manatua e Peresitene Monson ma ia sii mai, ua faataunuuina mo au. Ua suia e le mautinoa le masalosalo, na oo mai le Agaga, sa musuia le au fesoasoani faafomai, ma sa faasaoina lo’u ola, ma ua ou ola. Ona o le faamanuiaga na tuuina mai e Peresitene Monson, o le a faigofie pea lava pea ia te au ona manatua le Faaola ma faalagolago i Lana folafolaga e muamua atu o Ia ma i ai foi i o tatou autafa i Lana galuega.

Ua ou iloa o le folafolaga o le a sapasapaia i tatou e agelu e moni. Atonu a tatou manatua le faamautinoaga a Elisaia i lana auauna atuatuvale. E avea lena faamautinoaga mo i tatou pe a tatou taulalata atu ina lofituina i la tatou auaunaga. Sa feagai Elisaia ma se tetee moni ma le matautia.

“Ua tulai le auauna a le tagata o le Atua i le taeao lava, ua alu i fafo, faauta, o au ua si’o le aai ma a latou solofanua ma kariota. Ona fai mai ai lea o lana auauna ia te ia, aue! Le Alii e, pe faapefea se mea tatou te fai a’i?

“Ona tali atu ai lea o ia, Aua e te fefe, aua e toatele ua ia te i tatou i e ua ia te i latou.

“Ona tatalo ai lea o Elisaia, ua faapea atu, Ieova e, ia e faapupula i ona mata ina ia na iloa. Ona faapupulaina lea e Ieova o mata o le taulealea, ona iloa ai lea e ia, faauta foi, ua tumu le mauga i solofanua ma kariota afi, ua latou vagavagai ia Elisaia.”²

E pei foi o lena auauna o Elisaia, e toatele atu o loo faatasi ma oe nai lo i latou e mafai ona e vaaia o loo tetee ia te oe. O nisi o loo faatasi ma oe e le mafai e mata faaletino ona vaaia. O le a sapasapaia oe e le Alii ma e i ai taimi, o le a Ia valaauina foi isi e tutu faatasi ma oe. O le mafuaaga lena o le i ai o a tatou korama. O le mafuaaga lena e vaavaai atu ai taitai o korama i foliga ma mata i le taimi o fonotaga faalekorama. O le mafuaaga lena o le epikopo e le na o le pulefaamalumalu i le korama a aoao. Na te matauina foliga o aoao. O le a i ai so outou epikopo faapena po o se peresitene faapena o le korama a toeaina po o se peresitene faapena o le misiona. Ma o le a fesoasoani o ia ia te oe ma valaauina foi se tasi lua te tutu faatasi. Atonu o le valaauina o le soa sa’o lua te galulue i le taimi e manaomia ai le fesoasoani.

Ua fautuaina mai i lena mea ni mea se lua. O le tasi, o le faailoa lea ma faafeiloai i latou e auina mai e le Alii e fesoasoani ia te i tatou. O le isi, o le vaavaai lea i tofiga uma lava le avanoa e fefaamalosia’i ai le tasi i le isi. Sa faamatala mai e se peresitene o le misiona ia te au se faifeautalai na ia tofia i le silia ma le toa 12 pe 13 ni soa. Sa ia fai mai ia te au, “O na soa taitasi uma lava na toetoe lava ina toe foi vave i le fale, pe toe faafoi foi. Peitai, e lei i ai lava se tasi o i latou na leiloa atu.”

Ina ua ou ta’ua lena mea ofoofogia i se taimi mulimuli ane i le soa lea sa laveaiina le anoanoai mai lo latou lofituina, sa ou maua se tali sa ou ofo ai ma sa aoaoina ai au. O le tali lea, “Ou te le manatu e sa’o lena tala. E lei iai lava sa’u soa na toilalo.”

Sa mafai ona ou iloa sa musuia se peresitene o le misiona e auina atu le agelu sa’o, i lea taimi ma lea taimi. E mafai ona tatou faamoemoe i la tatou auaunaga, ia i ai se fesoasoani e auina mai ia te i tatou i le taimi sa’o e vaai i le malosi o ia te i tatou, ma siitia i tatou i luga. Ma e mafai ona tatou sagisagi atu e avea ma le tagata e auina atu e le Alii e faamalosiau i se tasi.

E mafai ona ou faamatalaina atu mai se aafiaga, se mea e uiga i le ala e fesoasoani ai pe afai o oe lena o le a auina atu. E lei leva ona tofia au i le Korama a le Toasefululua, ae ou maua se telefoni mai ia Peresitene Faust, le fesoasoani i le Au Peresitene Sili. Sa fesili mai ou te alu atu i lona ofisa. Sa ou alu ma ni nai popolega pe aisea o le a faaalu ai sona taimi ma te talanoa.

Ina ua mavae ni nai feofoofoaiga, sa tilotilo mai o ia ia te au ma faapea mai: “Pe ua tupu?” Ina ua foliga atu ua ou fenumiai sa ia faapea mai, “Sa ou matauina lava oe i fonotaga. E foliga mai ia te au o loo e manatu ua faigata tele lou valaauga mo oe, e le mafai ona e faataunuuina lou tofiga, ma e te le agavaa.”

Na ou fai atu na oo mai lena faaletonu ia te au, e pei ua ma fetoai ma se pa. Sa ou faamoemoe o le a ia faamautinoa mai ia te au. Sa ou fai atu ia te ia, ou te faafetaia lona silafia o o’u faaletonu ma fesili atu mo lana fesoasoani. Peitai, sa ou te’i i lana tali agalelei, ma le mautu. Fai mai a ia, “Aua e te fesili mai ia te au. Alu ia te Ia.” Ona faasino lea o lona lima i le lagi. O lenei, ua mavae ni tausaga mulimuli ane ai, ua ou nofo i lena lava ofisa e tasi. A ou savali atu i ai i totonu, ou te tilotilo i luga ma manatua ai o ia ma le ala na ia aoao mai ai ia te au e ala i se faataitaiga, o le ala e fesoasoani ai ia i latou ua lagona le lofituina i le galuega a le Alii. Saili se ala e auina atu ai i latou ma le mautinoa ia te Ia. Afai o le a latou mulimuli i lau fautuaga, o le a latou iloa ua latou maua le malosi o loo latou manaomia, ma faaleoleo.

E tele taimi i lou olaga e tuuina atu ai e le Alii ia te oe le poto masani e fausia ai le malosi, lototele, ma le naunautai. Ua Ia silafia mea e te manaomia e auauna ai ia te Ia. O nisi atonu na oo mai, e pei ona oo mai ia te au, ina ua outou tutu faatasi ma isi tagata e umia le perisitua ma ta’u leotele upu nei: “O le mea lea, o outou o e o atu i le galuega a le Atua, ia outou auauna atu ia te ia ma o outou loto atoa, ma mafaufau atoa, manatu atoa ma le malosi atoa, ina ia mafai ona outou tutu ma le le pona i luma o le Atua i le aso gataaga.”³

A e tautino atu i lena tulaga maualuga ma ausia, sa fausia e le Alii se tulaga mautinoa ma le malosi i totonu ia te oe, ina ia i ai iina pe a e manaomia i soo se taimi e tofia ai oe e te auauna atu ai i se faamoemoega e sili atu ona taua nai lo le mea sa naunau i ai. Sa ou lagonaina i se tasi aso laofie o le tautotogo i se malae. Sa faatonuina au e puipuia lo’u atunuu. Matou te lei i ai i se taua i le taimi lena, ae sa ou aga atu mo se tautua e le mailoa ae sa ou iloa o le a manaomia ai mea uma e mafai ona ou tuuina atu, atonu o lo’u ola. Sa sii lo’u lima taumatau faatasi ma isi e tauto o le a ou puipuia lo’u atunuu i le “faatuatua moni ma le lotonuu” ma “ou te tauaveina e au lava ia lenei matafaioi, e aunoa ma se faatuatuai faalemafaufau po o se faamoemoe e aloese; ma o le a ou faataunuuina lelei ma le faamaoni tiute o le tofi o le a ou ulu atu nei i ai; O lea, le Atua fesoasoani mai ia te au.” ⁴

E leai so’u masalosalo o le mana na tausia ai lena folafolaga, lea sa ou tausia, sa fausia i totonu ia te au mai le taimi na avea ai au ma se tiakono. I le popofou o lo’u i ai i le perisitua, sa tele ni taimi sa ou nofo ai i le mea sa ta’ua i na taimi o se “faamavaega a se faifeautalai.” Ona o le toatele naua o i latou ua talia le valaauga i le taimi nei e auauna atu, o lea ua tatou faatagaina ai i latou e na o ni nai saunoaga pupuu lava i sauniga faamanatuga a o lei o. Peitai o aso ia, o se sauniga faamanatuga atoa lava sa taulai atu i le faifeautalai o le a alu i le misiona. Sa masani ona aofia ai ni musika filifilia. O loo mafai lava ona ou manatua le mea sa ou lagonaina pe a usuina e se aufaipese toafa a faifeautalai, “Ou te alu i mea e te tofia, le Alii e,” ona folafola atu lea o upu, “Ou te fai atu au afioga,” ma faaiu ai, “Ou te usita’i ia te oe.”⁵

Sa ootia lo’u loto i na aso e faapei foi o le taimi nei i le tautinoga maumaututu e moni le folafolaga mo au, ma i tatou i a tatou auaunaga uma faaleperisitua. O le a tatou maua le olioli i lo tatou o po o fea lava e finagalo le Alii tatou te galulue ai. O le a tuuina mai ia i tatou le faaaliga e tautala atu ai i Ana upu e valaaulia le fanau a le Tama Faalelagi ina ia suia e ala i le Togiola, ma agavaa ai e toe foi atu ma mau faatasi ma Ia. Sa ou lagonaina foi i lena taimi, e pei ona i ai i le taimi nei, o la tatou auaunaga faamaoni o le a mafai ai e Ia ona suia o tatou loto ina ia tatou saunia mo le mafutaga ma Ia, ma auauna atu ia te Ia e faavavau.

Ou te tuuina atu la’u molimau a tatou tuuina atu mea uma tatou te maua i le auaunaga faaleperisitua, o le a tuuina mai e le ‘alii ia i tatou uma le lototoa tatou te manaomia, ma le faamautinoaga tatou te o faatasi ma ia ma o le a lagolagoina i tatou e agelu.

Ou te molimau atu ua tofia i tatou e le Atua. O Lana Ekalesia moni lenei ma ua outou umia lana perisitua e faavavau. O au o se molimau, o loo umia e Peresitene Thomas S. Monson ia ki uma o le perisitua ma faaaogaina i le lalolagi i le taimi nei. I le suafa o Iesu Keriso, amene.