O Le Ala

“Sa i le amataga le Lokou, sa i le Atua le Lokou, o le Atua foi le Lokou… .

“Sa ia te ia le ola; o le ola foi o le malamalama lea o tagata.”¹

Na fetalai o Ia, “O au o le Alefa ma le Omeka, o Keriso le Alii; ioe, o au lava o ia, o le amataga ma le gataaga, o le Togiola o le lalolagi.”²

Na fetalai o Ia, “A o se inu i le vai ou te avatu ia te ia, e le toe fia inu ia e faavavau; a o le vai ou te avatu ia te ia, e avea i totonu ia te ia o le vaipuna, e puna i luga i le ola e faavavau.”³

Na fetalai o Ia, “O au nei o le areto o le ola: o le sau ia te au, e le laina lava ia; o le faatuatua foi ia te au, e le toe fia inu lava ia.”⁴

Na fetalai o Ia, “O au nei o le malamalama o le lalolagi: o le mulimuli mai ia te au, e le savali o ia i le pouliuli, a e ia te ia le malamalama o le ola.”⁵

Na fetalai o Ia, “O au nei o le toetu, ma le ola: o le faatuatua mai ia te au, e ui lava ina oti a e ola lava ia:

“O tagata ola uma o e faatuatua mai ia te au, e le oti lava e oo i le faavavau.”⁶

Na fetalai o Ia, “O au nei le ala, ma le upu moni, ma le ola: e le alu atu lava se tasi i le Tama, pe a le ui mai ia te au.”⁷

O Iesu Keriso o le Ala. O Ia o le Malamalama ma le Ola, Areto ma le Vai, le Amataga ma le Gataaga, le Toetu ma le Ola, le Faaola o le lalolagi, le Upumoni, ma le Ala.

E na o le tasi lava le ala i le fiafia ma le faamalieina. O Ia o le ala. O nisi lava ala uma, soo se isi lava ala, po o le a lava le ala, o le faavalevalea lea.

Ua ofoina mai se vaipuna o le vai ola. A le o le tatou feinu ai ma lē toe fia inu ai lava, pe o le leai ma tumau faavalevalea ai pea i le fia feinu.

O Ia o le Areto o le Ola. A le o le tatou aai ai ma lē toe fia aai ai lava, pe o le leai ma tatou tumau faavalevalea ai pea i le vaivai ma le fia aai.

O Ia o le Malamalama o le Lalolagi. A le o le tatou mulimuli ia te Ia ma manino ai la tatou vaaiga, pe o le leai ma tumau faavalevalea ai pea i le tauaso ma le pouliuli.

O Ia o le Toetu ma le Ola. Na fetalai o Ia, “O upu ou te fai atu ia te outou, o le agaga ia, o le ola foi ia.”⁸ A le o le tatou aoao ia te Ia ma maua atili ai le ola,⁹ pe o le leai ma tumau faavalevalea ai pea i le oti.

O Ia o le Faaola o le lalolagi. A le o le tatou taliaina o faamanuiaga o Lana Togiola ma mama ma lē pona ai, ma agavaa e maua Lona Agaga po o le leai ma tumau faavalevalea ai pea i le tuulafoaiina ma le eleelea.

O Ia o le Ala.

“Matou te talitonu i le Atua, le Tama Faavavau, ma Lona Alo o Iesu Keriso, ma le Agaga Paia.”¹⁰ O le fuafuaga a le Tama na faatinoina e le Alo ina ia mafai ona tatou maua le Agaga o le Agaga Paia. O le ala a le Tama o le ala foi lea a le Alo. Na fetalai o Ia, “Aua nei e fai mo oe ni atua ese i o’u luma.”¹¹

E na o le Atua lava e mafai ona faamanuiaina i tatou. E na o Ia lava e mafai ona lagolagoina i tatou. E na o Ia foi e mafai ona afua ai le tata o o tatou fatu ma aumaia ia i tatou le manava. E na o Ia e mafai ona faasaoina ma puipuia i tatou. E na o Ia e mafai ona tuuina mai ia i tatou le malosi e tauave ai avega o le olaga. E na o Ia e mafai ona tuuina mai ia i tatou le mana, malamalama, filemu, ma le olioli. E na o Ia e mafai ona faamagaloina a tatou agasala. E na o Ia e mafai ona faamaloloina i tatou. E na o Ia e mafai ona suia i tatou ma faia se agaga faaleatua. E na o Ia e mafai ona toe aveina atu i tatou i Lona afioaga. Ma o le a Ia faia na mea uma ma isi mea e tele pe afai tatou te manatua o Ia ma tausi Ana poloaiga. O le a la le mea e ao ona tatou faia? O le a tatou manatua o Ia ma tausi Ana poloaiga. E na o le pau lea o le mea atamai e fai.

Fai mai Ioane le Papatiso e faapea, o ia e papatisoina i le vai, ae o Iesu e papatisoina “i le Agaga Paia.”¹²

E leai se mea o lenei olaga e sili atu le taua nai lo le meaalofa faalelagi o le Agaga Paia. O le punavai o le olioli, filemu, malamalama, malosi, alofa, ma isi mea lelei uma. O le Togiola, o le mana lea e mafai ai ona tatou suia ma malolosi ai i tulaga tatou te vaivai ai. O le perisitua, o le mana lea e faamau faatasi ai e faavavau faaipoipoga ma aiga.¹³ O le mana e faailoa mai ai e le Alii o Ia lava ia i latou o e talitonu ia te Ia.¹⁴ O mea lelei uma e faalagolago lea i le mauaina ma le faatumauina o le mana o le Agaga Paia i o tatou olaga. O mea uma ua faalagolago i ai.

Mo lenei faamoemoega, na ulu atu ai Iesu Keriso i se faatoaga na ta’ua o Ketesemane, o iina na Ia faatoilaloina ai le agasala mo i tatou. Na Ia tauaveina i Ona luga a tatou agasala. Na puapuagatia o Ia i le faasalaga ona o o tatou sese. Na Ia totogia le tau o a tatou aoaoga. Ou te le iloa pe na faapefea ona Ia faia le mea na Ia faia. E pau le mea ou te iloa, na Ia faia ma talu ai ona sa Ia faia, ua mafai ai e oe ma au ona maua le faamagaloga o a tatou agasala, ina ia mafai ona faaeeina i tatou i Lona mana. O mea uma ia faalagolago i ai. O le a la se mea e ao ona tatou faia? O le a tatou “ave i o [tatou] luga le suafa [o le] Alo, ma manatua pea o Ia ma tausi i Ana poloaiga ua Ia tuuina mai ia te i [tatou]; ina ia [tatou] maua pea Lona Agaga e faatasi ma i [tatou].¹⁵ O mea uma ua faalagolago i ai.

O se tasi o filosofia lauiloa ma le faatosina o tagata o le ola i le olaga i lau lava ala, fai a oe lava mea, ia e pei o oe lava, aua nei e faatagaina isi tagata e tau atu ia te oe le mea e fai. Ae ua fetalai le Alii, “O Au nei le ala.”¹⁶ Na fetalai o Ia, “Mulimuli mai ia te au.”¹⁷ Na Ia fetalai mai, “Pe faapefea la outou amio e tatau ai? E moni, ou te fai atu ia te outou, e pei lava o au nei.”¹⁸

Aua nei e manatu e te le mafaia. Atonu tatou te faapea e le mafai moni ona tatou mulimuli ia te Ia ona o le tulaga o Lona soifuaga e matuai maualuga lava lea e foliga mai ai e le mafai ona ausia. Atonu tatou te ono mafaufau e faigata tele, e maualuga tele, ua tele naua ma e le mafai ona tatou gafatia, ia pe a mo le taimi nei. Ia aua nei outou talitonu faapena. E ui o le tulaga o le Alii e sili ona maualuga, ae ia aua lava nei e mafaufau e na o ni nai tagata filifilia o e e sili ona gafatia e mafai ona latou ausia.

O lenei lava manatu e tasi o le aafiaga i le olaga e taitaiseseina ai i tatou. Ua tatou aoaoina i le olaga o tulaga maualuga e ausia i soo se taumafaiga a le tagata, e masani lava ona aupito faigata ma, o lea, e na o ni nai tagata filifilia o e e sili ona gafatia e mafai ona latou ausia. O le maualuga lava o le tulaga, o le toaitiiti foi lea o tagata e mafai ona ausia.

Ae e le o le tulaga lena iinei, aua e le pei o se isi lava aafiaga i lenei olaga, e le o se taumafaiga lenei a se tagata, ae o le galuega a le Atua. O le galuega a le Atua ma o Lona “… mamalu ia faataunuu le faaofuina o le tagata i le tino ola pea ma le ola faavavau.”¹⁹ E leai lava se isi mea e pei o lea. E le maua lava i se isi mea. E leai lava.

E leai se aoaoga, fuafuaga, polokalama, po o faiga ua faia e tagata e mafai ona maua ai le mana togiola ma le liuaina o le Togiola a Iesu Keriso, ma le meaalofa o le Agaga Paia. O le mea lea, e ui lava o le valaaulia a le Alii ina ia mulimuli atu ia te Ia e aupito maualuga i mea uma, ae e mafai ona ausia e tagata uma, e le faapea ona tatou te gafatiaina, ae ona e mafai ona Ia gafatia, ma e mafai foi ona ia faia i tatou ina ia tatou gafatiaina foi. “Matou te talitonu e faaolaina tagata uma lava [o tagata uma, o e ola ma e oti] i le togiola a Keriso pe a tausia poloaiga ma sauniga o le Talalelei.”²⁰

E le faigata le ala a le Alii. E faigata le olaga, ae le o le talalelei. “E ao lava ina i ai le faafeagai o mea uma,”²¹ i soo se mea, mo tagata uma lava. E faigata le olaga mo i tatou uma lava, ae e faigofie foi le olaga. E na o le lua lava a tatou filifiliga.²² E mafai ona tatou filifili a le o le mulimuli i le Alii ma ia faaeeina i Lona mana ma maua le filemu, malamalama, malosi, atamai, lototele, alofa, ma le olioli, pe o le tatou o foi i se isi auala, i soo se auala, po o le a lava le auala ma tatou o ai lava na o i tatou—e aunoa ma Lana fesoasoani, e aunoa ma Lona mana, e aunoa ma le taitaiga i le pogisa, i faigata, le mautonu, faanoanoa, mafatia, ma le atuatuvale. Ma ou te fesili atu, o le fea le ala e faigofie atu?

Na fetalai o Ia, “Ia outou o mai ia te au o outou uma o e tigaina ma mafatia i avega, o au foi e malolo ai outou.

“Ia outou amoina la’u amo, ma ia outou faaaoao ia te au; … ona maua lea e outou o le malologa mo outou agaga.

“Aua e avegofie la’u amo, o la’u avega foi e mama ia.”²³

E faigata le olaga, ae e faigofie foi. Ia savali i le ala ma aua, aua lava nei fiu. E te le fiu lava. E tatau lava ona e alu pea. E te le aluese mai ai ma o le a e taunuu lava.

E na o le tasi lava le ala i le fiafia ma le faamalieina. O Iesu Keriso o le Ala. O Ia o le ala. O nisi lava ala uma, soo se isi lava ala, po o le a lava le ala, o se mea faavalevalea lea.

Ou te molimau atu ia te Ia, o Iesu Keriso, o Ia o le Alo o le Atua soifua, o Ia o le Areto o le Ola, o Ia o le Upumoni, o Ia o le Toetu ma le Ola, o Ia o le Faaola ma le Malamalama o le Lalolagi. O Ia o le Ala, le Ala lava e tasi.

Talosia ia tatou maua le mafaufau lelei e mulimuli ai ia te Ia. I Lona suafa paia, o Iesu Keriso lea, amene.