Tuu Atu ia te Ia e Faafaigofie

O i tatou ua fai si umi o le soifua—o ma’ua ma Elder Wirthlin ua fai si loa o ma i ai—ua iloa ni mamanu patino o tofotofoga o le olaga. Ua i ai taamilosaga o taimi lelei ma taimi leaga, o vesiga ma toafimalie, o vaitaimi o le olioli ma le faanoanoa, ma taimi o le mau faapea foi le oge. A suia o tatou olaga i se itu e lei faamoemoeina pe le manaomia, e i ai nisi taimi tatou te feagai ai ma le faanoanoa ma le atuatuvale. O se tasi o luitau o lenei aafiaga faaletino, o le le faatagaina lea o nei faanoanoaga ma fitaituga o le olaga e faatoilaloina i tatou—ia onosaia vaitau eseese o le olaga a o tumau le silasila i le itu lelei, e i ai le faamoemoe. Atonu, a tulai mai faigata ma luitau, e ao ona tusia upu faalaeiau a Robert Browning i o tatou mafaufau: “E le i oo mai mea silisili” (“Rabbi Ben Ezra,” in Charles W. Eliot, ed., The Harvard Classics, 50 vols. [1909–10], 42:1103). E le mafai ona tatou valoia tauiviga uma ma afa o le olaga, e oo lava i mea ua lalata mai, ae o i tatou, i le avea ai o ni tagata o le faatuatua ma le faamoemoe, ua iloa e aunoa ma se masalosalo e moni le talalelei a Iesu Keriso, ma “e le i oo mai mea silisili.”

Ou te manatuaina se vaitaimi patino o lou olaga, ina ua ou feagai ma se faanoanoaga e le masani ai. Sa i ai faafitauli i la’u galuega, ma o le taimi foi lea, na maua ai lou toalua i se mai e taufao ai le mai ma le magalo. O se tasi lea o taimi na pei ai ua matua osofaia tonu lava au ma lo’u aiga e le fili. I aso na toetoe a manumalo le faanoanoa ma le atuatuvale i lo ma’ua ola fesouaiina, sa ma maua ma lo’u toalua se ala e mapu i ai.

Sa ma tietie i se nofoaga, e na o ni nai maila mai lo matou fale, ia tau lava ina ma mapu i ai mai o maua mapuitiga, ma ma talatalanoa, ma ofoina atu le faamafanafanaga faalelagona o le tasi i le isi. O le ma nofoaga [na ma o i ai] o Walden Pond. O se tamai vailepa matagofie, e sio i le vaomatua. A lagona e lou toalua e lava lona malosi, ona ma savalivali faataamilo lea i le vailepa. O isi aso, pe a na lagona e le lava le malosi e savali ai, ona ma nofonofo lea i le taavale, ma talatalanoa ai. O Walden Pond o le ma nofoaga faapitoa lea e malolo ai, mafaufau, ma faamalolo ai. Atonu ai ona o lona talafaasolopito i se isi itu—o lona sootaga i taumafaiga a Henry David Thoreau, e tuuese ia lava mai le faalelalolagi mo le tele o tausaga—na ofoina mai ai ia te i maua e Walden Pond le faamoemoega tele mai se mea faatauvaa, ma aumaia ai se solaaga faafouina mai o ma olaga ua matuai lofituina.

O Mati i le 1845, na tonu ai ia Thoreau e malaga ese mai tafavai o Walden Pond, ma faaalu se lua tausaga e taumafai ai e vaavaai po o le a tonu lava le uiga o le olaga. Sa faamautu o ia i se fasi fanua o sana uo lelei, o Ralph Waldo Emerson. Sa ia faatauina se fale faafaasee tuai mai se tagata fai auala, ma sa ia talaina. Ma o laupapa lava na mai le fale faafaasee ma ni laau mai le vao, ma fausia ai lona lava tamai fale. Sa ia tausia faamaumauga auiliili tautupe, ma o lana faaiuga e faapea, e na o le $28.12 na ia faaaluina mo se fale ma lona saolotoga. Sa ia totoina se togalaau lea na toto ai pi uumi, pateta, sana, pi pupuu, ma tunipa e fesoasoani e tausi ai si ona olaga faatauvaa. E lua ma le afa eka na ia totoina o pi pupuu, ma le faamoemoe e faaaoga le polofiti laitiiti e fai ai mea na te manaomia. E matuai laitiiti lava le polofiti: e $8.71.

Sa soifua Thoreau e aunoa ma se taimi. E leai sana uati po o se kalena i si ona tamai fale. Sa ia faaaluina lona taimi e tusitusi ai ma suesue i mea matagofie ma le ofoofogia o le natura sa siomia ai o ia, e aofia ai laau toto i le lotoifale, o manulele, ma manu vaefa. E lei soifua o ia e pei o se tagata faaesea—sa asiasi o ia i le taulaga o Concord i le tele o aso, ma sa ia valaaulia foi isi e o mai i lona fale mo ni talatalanoaga faatupu manatu. Ina ua maea le lua tausaga, sa ia tuua lona tamai fale e aunoa ma le faanoanoa. Sa ia manatu o le taimi sa nofo ai iina, o se aofaiga lelei lea o le taimi e ausia ai lona faamoemoega—ia ona iloa faamanuiaga faaleagaga o se olaga faatauvaa. Na ia lagona foi, o loo i ai isi aafiaga o le olaga o i luma mo ia. Ua oo i le taimi e faagasolo ai ma sailiili mo isi avanoa.

O ona aafiaga i Walden Pond, na tonu ai ia Thoreau e faapea e na o le fa lava mea e manaomia moni e se tagata: o meaai, lavalava, malutaga, ma le malosiaga. Ou te fia faalauteleina nei manaoga faavae o le olaga, faapea foi faamanuiaga faaleagaga o se olaga faafaigofie.

O le mea muamua e manaomia o meaai. I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua ia te i tatou le malamalama paia mai upumoni ua faaalia e uiga i le sootaga o le tino ma le agaga. O loo tau mai i le Mataupu Faavae ma Feagaiga e 88:15: “O le agaga ma le tino o le ola atoatoa lea o le tagata.” Ina ia faamanuiaina i tatou i le faaletino ma le faaleagaga, sa faaalia mai foi e le Alii ia i tatou le tulafono o le soifua maloloina, ma sa tau mai ai ituaiga meaai ma mea e lelei mo le tino ma mea foi e le lelei. O loo aumai faatasi ma nei faatonuga le folafolaga o loo maua i le vaega e 89 o le Mataupu Faavae ma Feagaiga:

“O le au paia uma lava foi o e manatua e tausia ma faia nei mea uma, ma savavali i le usiusitai i poloaiga, o le a maua le malosi i o latou pute ma le ga’o i o latou ivi;

“O le a maua foi le poto ma oa sili o le malamalama e oo lava i oa natia;

“Latou te taufetuli foi a e le vaivai, ma savavali a e le matapogia.

“O A’u foi le Alii, ou te avatua ia i latou le folafolaga o le a laaloa ia i latou le agelu o le faafanoga, e pei o le fanauga a Isaraelu, a e le fasia i latou” (f.18–21).

E leai se isi fautuaga e sili atu e faatatau i le Upu o le Poto nai lo lea o loo maua i le tamaitusi, Mo Le Malosi o le Autalavou. O loo faapea mai:

“Ua poloiina oe e le Alii ina ia tausia lelei lou tino. Ina ia faia lenei mea, ia tausi le Upu o le Poto, o loo maua i le Mataupu Faavae ma Feagaiga e 89. Taumamafa i meaai e maua ai le soifua maloloina, faamalositino e le aunoa, ma ia lava le moe. A e faia nei mea uma, ua aunoa oe ma vaisu faatamai ma o le a pulea lelei lou olaga. E te maua faamanuiaga o se tino e maloloina, o se mafaufau e matala, ma le taitaiga a le Agaga Paia.

“So o se fualaau faasaina, o vailaau, po o se faiga matautia e faaaoga ia maua mai ai faalogona malolosi po o le “lele” e mafai ona faatamaia ai lou soifua sololelei faaletino, o le mafaufau, ma le faaleagaga. O nei mea e aofia ai fualaau oona , o le faaaogaina ma le le tatau o fualaau ma vai e tusi mai e fomai po o vailaau foi e mafai ona faatau e aunoa ma se pepa mai le fomai, ma vailaau e faaaoga i le fale” ([2001], 36–37).

Tatou te le mananao e faatamaia o tatou tino faaletino, aua o se meaalofa mai le Atua, ma o se vaega o le fuafuaga sili o le fiafia a lo tatou Tama Faalelagi o le toe tuufaatasia lea o o tatou tino faitino ma o tatou agaga.

O le isi mea faavae e manaomia o o tatou lavalava. O se olaga faigofie e aumaia ai faamanuiaga faaleagaga e manaomia ai le faia o lavalava taugofie ma talafeagai. O o tatou lavalava ma teuga e auina atu ai se savali i isi e uiga i o tatou ituaiga tagata, ma e aafia ai a tatou aga e fai i isi tagata. A fai e talafeagai o tatou lavalava, ua tatou valaauliaina foi le Agaga o le Alii e avea ma se talipupuni ma se puipuiga mo i tatou.

O itu faalelalolagi e lilifa i ai tifiga a tamaitai, e masani lava ona aumaia ai faatosinaga matautia. O a latou sitaili fou, o le tele lava o le au mamanu tifiga e taumafai e fai ni ofu se lua pe tolu i le tele o le ie e tatau ona fai ai se ofu se tasi. O le tele lava, e tele ina tipi ese le pito i luga, ma le tele foi e tipi o le pito i lalo o ofu o tamaitai, ma o nisi taimi e faaimamago ai foi le ogatotonu. Ua apo foi e tifiga a alii sitaili ua ova atu. I lo’u vaitaimi, e ta’u o le faainaelo [tulou] ma le le talafeagai. Ou te talitonu o ofu e matua le ano i ai, e toetoe a foi ina sosoo atu ai e le aunoa ma uiga faaleanoano.

O le toatele o outou o loo taumafai malosi ina ia tulaga ese i ou laei ma au teuga ina ia faatosina mai ai, le mea ua manatu le Alii, o le gauai sese. I le tala a le Tusi a Mamona i le laau o le ola, o tagata “sa matua lelei le uiga o o latou ofu” o i latou ia na faatauemu ia i latou sa aai i le fua o le laau. Ua manino lava o le au faatauemu e “mafaufau i tifiga” na i le faletele vateatea, na pau i ai le faamaina o le toatele, ma o i latou na maasiasi, “na pauu ese i ala leaga ma ua leiloloa” (1 Nifae 8:27–28).

Na fautuaina i tatou e Peresitene N. Eldon Tanner i se taimi i upu nei: “O le tauagafau i laei, o se uiga auau mama lea o le mafaufau ma le loto, e pogai mai i le faaaloalo mo oe lava, o ou uso a tagata, ma le Foafoa o i tatou uma. “O le tauagafau e atagia mai ai se uiga o le lotomaulalo, aga tamalii, ma le tausaafia. O le ogatusa ma nei mataupu faavae ma tomatauina e le Agaga Paia, ia tuu atu i matua, o faiaoga, ma le autalavou, latou te talanoaina auiliiliga o ofu, teuga, ma foliga vaaia o le tagata lava ia, ma faatasi ai ma le filifiliga saoloto ia talia le tiutetauave [e fai ai] ma filifili ma le mea sa’o” (“Friend to Friend,” Friend, June 1971, 3).

Se i tatou liliu atu ia i le mea lona tolu lea ua fai mai Thoreau e manaomia, o le malutaga lea. Ua tutumu nusipepa i lipoti o le tulaga pagatia ua i ai nei mea tau fale. Ua uma ona fautuaina i tatou e toetoe o konafesi aoao uma a le Ekalesia e mafai ona ou manatua, ia aua nei ola e sili atu ma mea tatou te maua. O a tatou tupe maua e tatau ona fuafua ai le ituaiga o fale e mafai ona tatou gafatia, ae le o le fale tele o lou tuaoi i le isi ituala.Na saunoa Peresitene Heber J. Grant i se tasi taimi: “Ou te manatua, mai aso o Polika Iaga e oo mai i le taimi nei, ua ou faalogo i tamalii o tutu i le pulelaa … ma uunai tagata ina ia aua nei nofo aitalafu; ma ou te talitonu o le tele lava o o tatou faafitauli i le taimi nei, e mafua mai i le le usitaia o lena fautuaga” (i le Conference Report, Oct. 1921, 3).

O se tasi o ala e sili atu e faafaigofie ai o tatou olaga, o le mulimuli lea i le fautuaga ua faatele ona tatou mauaina, ia: ola e tusa ma a tatou tupe maua, aloese mai le aitalafu, ma le faaputuputu mo aso leaga. E ao ina tatou ola ai ma faateleina o tatou mausa o le faasoasoa ma le poto, sogasoga, ola magumagu, ma ia faautauta. O tagata o se aiga e pulea lelei, latou te le totogiina atu se tului; ae latou te mauaina mai.

O le mea mulimuli ua fai mai Thoreau e manaomia o le malosiaga. Ua faatele ona tatou faalogo i le suauu ma le malosiaga—i le maualuga o le tau, o le utiuti o le sapalai i le lotoifale, o le le saogalemu ma le faalagolago ma le le mailoa i ona lava tagata e sapalaia, ma le manaomia o ni puna fou ma le tumau o le malosiaga. O le a ou tuu atu le talanoaina o nei mataupu lavelave i taitai o le malo ma falegaosioa. O le malosiaga ou te fia talanoaina o le malosiaga faaleagaga.

Ua tuuina mai ia i tatou e le Alii se fuafuaga matagofie e uiga i le ala e mafai ai ona tatou toe foi atu ia te Ia, peitai o le faamaeaina o la tatou malaga faaletino e manaomia ai le suauu po o le malosiaga faaleagaga. Tatou te mananao e faaaoao i taupou popoto e toalima, o e sa teuina a latou suauu ia lava ina ia feiloai atu i le faatoa faiava pe a afio mai o Ia (tagai Mataio 25:6–10). O le a le mea e manaomia ina ia faatumauina ai se teuga suauu faaleagaga ia lava? E tatau ona tatou mauaina le malamalama i le fuafuaga e faavavau a le Atua ma la tatou matafaioi i le fuafuaga, ona ola amiotonu lea, ma gauai atu o tatou loto i le finagalo o le Alii, ona tatou maua ai lea o faamanuiaga folafolaina.

E pei ona sa aoao mai e Elder William R. Bradford i lenei pulelaa: “O le amiotonu o loo i ai le manino tele. O mea uma lava e lutia ai i tatou i le olaga, e i ai lava se ala sa’o po o se ala sese e ui ai. Afai tatou te filifili le ala sa’o, e lagolagoina a tatou gaoioiga e ala i le mataupu faavae o le amiotonu, lea o loo i ai le mana mai le lagi. Afai tatou te filifili le ala sese ma faatino ai i lena filifiliga, e leai se folafolaga faalelagi po o se mana, ma e tuulafoaiina foi i tatou ma taunuu i le toilalo (“Righteousness,” Liahona, Jan. 2000, 103).

A o le i maliu Thoreau, na fesiligia o ia pe ua faalelei ma le Atua. Na ia tali mai, “Ou te lei iloa se taimi na ma feeseeseai ai” (in Mardy Grothe, comp., Viva la Repartee [2005], 181).

I la tatou sailiga ina ia maua le faamama avega mai faanoanoaga o le olaga, ia tatou saili atu ma le pulunaunau i ni auala e faafaigofie ai o tatou olaga. Ia tatou usiusitai i le fautuaga musuia ma le poloaiga na tuuina mai e le Alii ia i tatou i le fuafuaga sili o le fiafia. Ia tatou agavaa mo le mafutaga ma le Agaga Paia, ma mulimuli i le taitaiga a le Agaga, a o tatou folau i lenei malaga i le olaga nei. Ia tatou saunia i tatou lava ina ia ausia le faamoemoega laualuga o lenei tofotofoga faaletino—ia toe foi atu e nonofo faatasi ma lo tatou Tama Faalelagi—o la’u tatalo lea i le suafa o Iesu Keriso, amene.