Ia Tuu Po o le A Lava se Mea e Tupu, Ia Fiafia Pea
O le ala tatou te taulimaina ai puapuaga e mafai ona avea ma sao tele i le fiafia ma le faamanuiaina e mafai ona tatou oo i ai i le olaga.
A o ou laitiiti, ou te fiafia lava e taalo i taaloga, ma e tele mea o na vaitaimi e manatua ou te faapelepele i ai. Ae e le faapea e mananaia na mea uma. Ou te manatua se tasi aso na faiaina ai la’u au i se taaloga faigata lava; na ou foi mai i le fale ma le lagona lotovaivai. Sa i ai iina lo’u tina. Sa faalogologo o ia i la’u tala faanoanoa. Sa ia aoaoina lana fanau ia talitonu ia i latou lava ma le tasi i le isi, ae aua le tuuaia isi ona o o latou faafitauli, ma ia tuu atoa a latou taumafaiga e sili ona lelei i soo se mea latou te faia.
A matou toilalo i se mea, e faamoemoe o ia ia matou toe tutu i luga ma toe taumafai. Ma o le fautuaga na tuuina mai e lo’u tina ia te au i lena aso, sa le o se mea ou te lei mafaufauina. Na tumau ia te au i lo’u olaga atoa.
“Joseph,” sa ia fai mai ai, “ia tuu po o le a lava se mea e tupu, ia fiafia pea.”
E masani ona ou tomanatu i lena fautuaga.
Ou te manatu atonu o le uiga o lana faamatalaga, e tofu lava le aso ma ona lūgā ma lālō, ma aso ia e foliga mai ua leai se fiafia i le lalolagi. Ae peitai, e ui lava i le lotovaivai ma faigata, o i latou o e sili ona fiafia e foliga mai e i ai sa latou auala e aoao ai mai taimi faigata, ma o le taunuuga latou te atili malolosi ai, atamamai ai, ma fiafia ai.
O loo i ai nisi o e faapea o le Au Pulega Aoao e seasea oo i tiga, mafatiaga, po o puapuaga. Maimau pe a na moni lena mea. E ui o tamalii uma o loo i luga o lenei tulaga i le aso ua silafia se fuataga tele o le olioli, ae o i latou taitoatasi foi ua matuai tofo mai le ipu o le le fiafia, faavauvau, ma le maliu. E le punitia e le Alii i Lona atamai soo se tasi mai le faavauvau po o le faanoanoa.
Mo au lava ia, na tatalaina e le Alii pupuni o le lagi ma liligi mai faamanuiaga i luga o lo’u aiga lea e le mafai ona ou faamatalaina. Ae pei lava o isi tagata uma, na i ai taimi i lo’u olaga na foliga ai o le mamafatu o lo’u loto na toetoe a le mafai ona ou tauaveina. I na taimi ou te toe mafaufau ai i na vaitaimi maaleale o lo’u talavou lea na oo mai ai le faanoanoa tele ona o le faiaina o la’u au i se taaloga lakapi.
Na matuai itiiti mea na ou iloa i lena vaitaimi nai lo mea na faapolopolo mo au i ni tausaga mulimuli ane. Ae o soo se taimi ou te oo ai i le faanoanoa ma le faavauvau, ou te toe manatua ai lava upu a lo’u tina: “Ia tuu po o le a lava se mea e tupu, ia fiafia pea.”
E mafai faapefea ona tatou fiafia i ni aso e tumu i le faavauvau? E le mafai—aemaise o le taimi lenei. Ou te manatu e lei fautua mai lo’u tina ia matou natia le lotovaivai pe faafitia le moni o le tiga. Ou te manatu e lei fautua mai o ia, ia matou ufiufia mea moni e le lelei i lalo o se ofutele o le faafoliga o le fiafia. Ae ou te talitonu o le ala tatou te taulimaina ai puapuaga e mafai ona avea ma sao tele i le fiafia ma le faamanuiaina e mafai ona tatou oo i ai i le olaga.
Afai tatou te taulimaina puapuaga ma le poto, e mafai ona avea o tatou taimi sili ona pagatia ma taimi sili o le tuputupu ae, lea e iu ai, ina oo atu i taimi e sili ona fiafia.
O le aluga o tausaga ua ou aoaoina ai ni nai mea na fesoasoani ia te au i taimi faigata ma tofotofoga. Ou te fia faasoaina atu ia te outou.
Aoao ia Iloa Ata
O le mea muamua e mafai ona tatou faia o le aoao lea ia iloa ata. Ua e vaai i se avetaavale toatamai, a fai e se isi tagata se mea sese, e tali atu o ia e pei ua le faaaloalo lena tagata i lona mamalu, lona aiga, lana taifau, ma ona tuaa e tau lava i tua ia Atamu? Pe na lua fetoai ma se faitotoa e lei tapunia o se kapoti tautau i se nofoaga sese ma se taimi sese lea na e palauvale i ai, tauleagaina, ma faasagatau atu o se tagata ua aafia fua, ua tiga le ulu.
E i ai se vaifofo mo taimi faapena: aoao ia e iloa ata.
Ou te manatua le utaina o le ma fanau i se taavale e tele le keli ma matou o atu i Los Angeles. E tusa ma le toaiva i matou sa i totonu o le taavale ma sa matou feseta’i solo i magaala. Matou te lei feitai, ae sa matou talie. Soo se taimi lava matou te afe sese ai, e atili ai foi ona matou talie.
O le feseta’i e le o se mea faatoa tupu ia i matou. Sa i ai se taimi, a o matou agai atu i saute i Cedar City, i Iuta, sa sese se mea na matou afe i ai, ae matou te lei iloaina vagana ina ua mavae le lua itula, sa matou vaaia le faailo “Susu mai i Nevada.” Matou te lei feitai. Sa matou talie ma, o se taunuuga, e seasea lava ona tupu le le fiafia ma le feitagai. O a matou taliega na fatuina ai a matou mea faapelepele e manatua.
Ou te manatua le taimi na alu ai se tasi o o’u afafine i se tafaoga faamasani ma se paaga na te le’i iloaina muamua. Na uma ona fai ana teuga ma faatalitali mo le taunuu mai o lana paaga, ae tatagi loa ma le logo. Sa savali mai i totonu se alii na fai si matua teisi, ae sa taumafai lava lo’u afafine e faaaloalo i ai. Sa ia faailoa mai le alii ia te au ma lo’u toalua ma isi o le fanau, ona, fai loa lea o lona ofutele ma savavali ese atu. Sa matou matamata atu a o oso o ia i totonu o le taavale, ae sa lei minoi le taavale. Mulimuli ane, na toe oso i fafo lo’u afafine mai le taavale, ma toe tamoe mai i totonu o le fale, ma le maasiasi. O le tamaloa sa faapea a ia o lana paaga tafao lea e le’i vaai i ai, sa sau e piki le isi o ma afafine na malie e tausitama mo i laua ma lona toalua.
Sa matou talie uma lava i lena mea. O le mea moni, sa le mafai ona taofiofi lo matou talie. Mulimuli ane ina ua taunuu mai le paaga tafao a lo’u afafine, sa le mafai ona ou sau i fafo e faafeiloai o ia ona la lava ou te ata i totonu o le umukuka. Ia sa ou faapea o le a faalumaina ma matamuli lo’u afafine. Ae sa matou talie faatasi ma o le taunuuga, e oo mai lava i lenei vaitaimi matou te talie ai lava.
O le isi taimi e faaosoosoina ai oe e tomumu, ia e taumafai e te ata. O le a faaumiumi ai lou soifua ma o le a sili ai ona fiafia soifuaga o isi e siomia oe.
Saili mo le Faavavau.
O le mea lona lua e mafai ona tatou faia o le saili lea mo le faavavau. Atonu e te lagona le tulituliaupuina o oe pe a oo mai faigata i lou olaga. E lulu lou ao ma e faapea “Aisea ua tupu ai ia te au?”
Ae o le nila o le uili o le faavauvau e iu lava ina faasaga mai ia i tatou taitoatasi. Soo se taimi lava, e oo ai i tagata uma le faanoanoa. E leai se tasi e sao ai.
Ou te fiafia lava i tusitusiga paia aua o loo faaali mai ai faataitaiga o alii ma tamaitai maoae ma le mamalu e pei o Aperaamo, Sarai, Enoka, Mose, Iosefa, Ema ma Polika. O i latou taitoatasi na oo i aafiaga o faigata ma faanoanoaga na faapea ona tofotofoina, faamalolosiaina, ma atiina ae ai o latou tagata.
O le aoao e onosaia taimi o faanoanoaga, mafatiaga, ma le faavauvau o se vaega o lo tatou aotauina i mea moni o le olaga. O nei aafiaga, e ui ina e masani ona faigata ona onosaia i le taimi e tupu ai, ae o ituaiga aafiaga moni ia e faalauteleina ai o tatou malamalamaaga, fausia o tatou tagata, ma faateleina lo tatou agalelei mo isi.
Talu ai ona sa matuai ogaoga puapuaga o Iesu Keriso, o lea e malamalama ai o Ia i o tatou mafatiaga. E malamalama o Ia i o tatou tiga. Tatou te oo i mea faigata ina ia tatou maua foi le faateleina o lo tatou agalelei ma le malamalama i isi.
Manatua le fetalaiga faagaeetia a le Faaola i le Perofeta o Iosefa Samita ina o puapuagatia o ia ma ana soa i le lofituina o le pogisa o le Falepuipui o Liperate: “Lou atalii e, ia i ai le filemu i lou agaga; o lou tiga ma ou puapuaga o le a na o sina ituaso itiiti lava.
“Ona faaeaina lea o oe e le Atua i le mea maualuga; afai e te onosai o le a e manumalo foi i ou fili uma.”1
Faatasi ai ma lena vaaiga e faavavau, na faamafanafanaina ai Iosefa i na upu, ma e faapena foi i tatou. O nisi taimi, o taimi sili lava ia e foliga mai e lofituina ai i tatou i puapuaga o taimi na o le a iu ina mafai ona tatou manumalo ai.
O Le Mataupu Faavae o le Tauia
O le mea lona tolu e mafai ona tatou faia o le malamalama lea i le mataupu faavae o le tauia. E tauia e le Alii tagata faamaoni mo soo se puapuaga. O mea e faapea ona aveesea mai mai ia i latou o e alolofa i le Alii, o le a faaopoopoina ia i latou i Lana lava ala. Atonu o le a le oo mai i le taimi tatou te mananao ai, ae o le a iloa e tagata faamaoni o loimata uma lava i le taimi nei, o le a iu ina toe faafoi mai sautuaselau i loimata o le olioli ma le agaga faafetai.
O le tasi o faamanuiaga o le talalelei o le iloa lea o le taimi e faailo mai ai le oti mo le mutaaga o o tatou olaga i le tino, o le a faaauau le olaga i le isi itu o le veli. O iina o le a tatou maua ai ni avanoa fou. E oo lava i le oti e le mafai ona aveesea mai ia i tatou faamanuiaga e faavavau ua folafolaina mai e se Tama Faalelagi alofa.
Talu ai ona e tumu le Tama Faalelagi i le alofa, o lea e malosi ai le mataupu faavae o le tauia. Ua ou vaaia lenei mea i lo’u lava olaga. O Iosefa o le tama tama a lo’u afafine, e faaletonu lona mafaufau. Sa matuai faigata ona taulima e lona tina ma lona tama aafiaga o lenei mafatiaga.
Sa la iloaina atonu o le a le mafai lava ona pei Iosefa o isi tamaiti. Sa la malamalama i le uiga o lena mea e le gata mo Iosefa, ae faapea foi i le aiga. Ae o se fiafiaga sili o ia ia te i matou. O tamaiti e faaletonu mafaufau e masani ona faigata ona faaali mai ni o latou lagona loloto, ae o taimi uma lava ma te faatasi ai, e aumai lava e Iosefa se opo lapoa ia te au. E ui ina sa i ai luitau, ae ua ia faatumuina o matou olaga i le olioli.
Na uunaia o ia e ona matua e auai i taaloga. O le taimi muamua lava na amata ai ona taalo o ia i le pesipolo, sa i ai o ia i le au talituaa. Ae ou te iloa e lei malamalama o ia i le tatau ona tamoe e tuli polo e lavevea i ta. Sa mafaufau o ia i se auala e sili atu ona lelei e fai ai le taaloga. A ta atu se polo i lana itu, e matamata lelei lava Iosefa i le alu a le polo, ona sei mai lea o se isi polo mai lana taga ma togi atu i le faatea.
Soo se atugaluga lava na ono i ai i lona aiga i le tausiga o Iosefa, soo se ositaulaga na latou faia, ua tauia sautuasefulu. Ona o lenei agaga filifilia, ua iloa ai e lona tina ma lona tama mea e tele e uiga i tamaiti e i ai manaoga faapitoa. Ua latou molimauina tonu lava le agalelei ma le agaalofa o aiga, tuaoi ma uo. Ua latou olioli faatasi a o alualu i luma Iosefa. Ua latou maofa i lona amio lelei.
Tuu le Faatuatuaga i le Tama ma Lona Alo.
O le mea lona fa e mafai ona tatou faia o le tuu atu lea o lo tatou faatuatuaga i lo tatou Tama Faalelagi ma Lona Alo o Iesu Keriso.
“Aua ua faapea lava ona alofa mai o le Atua i le lalolagi, ua ia aumai ai lona Atalii pele e toatasi.”2 O le Alii o Iesu Keriso o la tatou soa, fesoasoani, ma le fautua. E finagalo o Ia ia tatou fiafia. E finagalo o Ia ia tatou manuia. Afai e fai la tatou vaega, o le a Ia fesoasoani mai.
O Ia o le na alu ifo i lalo o mea uma o le a fesoasoani mai ia i tatou. O le a Ia faamafanafana ma lagolagoina i tatou. O le a Ia faamalosia i tatou i o tatou vaivaiga ma faasaogalemuina i tatou i o tatou mafatiaga. O le a Ia faia mea vaivai e avea ma mea malolosi.3
Na ma’i tigaina se tasi o le ma fanau teine, ina ua uma ona ia fanauina se pepe. Sa matou tatalo mo ia, faamanuia ia te ia, ma lagolagoina o ia i le mea sili na matou mafaia. Sa matou faamoemoe o le a ia maua se faamanuiaga o le faamalologa, ae o aso na iu i masina, o masina na iu i tausaga. I se tasi taimi na ou fai atu ai ia te ia, atonu o lenei mafatiaga o le a faapea ona la tauivi mo le taimi atoa o totoe o lona olaga.
I se tasi taeao, ou te manatua na ou aumaia ai se kata laitiiti ma momono i totonu o la’u masini lomitusi. O nisi nei o upu na ou taina mo ia: “O le mealilo faatauvaa lenei: tuu lou faatuatuaga i le Alii, fai le mea sili e te mafaia, ae tuu mea uma o totoe ia te Ia.”
Sa ia tuu atu lona faatuatuaga i le Atua. Ae sa lei tea ai lona mafatiaga. E tele tausaga sa pagatia ai o ia, ae i le taimi tatau lava, na faamanuiaina ai o ia e le Alii, ma iu ai ina toe manuia.
O le iloaina o lenei afafine, ou te talitonu a na faapea na te le mauaina lava le toomaga, na te faatuatuaina lava lona Tama Faalelagi ma “[tuu ai] mea uma na totoe ia te Ia.”
Faaiuga
E ui lava ua leva ona tea atu lou tina i lona taui e faavavau, ae ou te manatuaina pea ana upu. Ou te manatua lava lana fautuaga na tuuina mai ia te au i lena aso ua leva ina ua faiaina la’u au lakapi: “Ia tuu po o le a lava se mea e tupu, ia fiafia pea”
Ua ou iloa le mafuaaga e tatau ai ona i ai le faafeagai o mea uma. O puapuaga, pe a sa’o ona taulimaina, e mafai ona avea o se faamanuiaga i o tatou olaga. E mafai ona tatou aoao ia fiafia i ai.
A o tatou vaavaai mo mea malie, saili mo le vaaiga e faavavau, malamalama i le mataupu faavae o le tauia, ma faalatalata atu i lo tatou Tama Faalelagi, e mafai ai ona tatou onosaia faigata ma tofotofoga. E mafai ona tatou faapea atu e pei ona fai mai lotina, “Ia tuu po o le a lava se mea e tupu, ia fiafia pea.” Ou te molimau atu ai i nei mea i le suafa o Iesu Keriso, amene.