Elder Jay E. Jensen

Ina ua uma ona faaaluina ni nai aso i le taulimaina o se faafitauli a o avea o se peresitene o le Misiona a Colombia Cali, na manatua e Elder Jay Edwin Jensen, o le na valaauina lata mai nei i le Au Peresitene o Fitugafulu, le susueina o ana tusitusiga paia a o malaga toe foi mai i le ofisa o le misiona.

Na tosina atu o ia i se fuaitau mai le Mataupu Faavae ma Feagaiga 3:5: “Manatua foi o folafolaga na faia ia te oe.”

“I le olaga atoa tatou te feagai ai ma faigata, ae e foliga mai na faamanatu mai e le Alii ia te au e faapea, o folafolaga e maoae atu i taimi uma lava,” o le saunoaga lea a Elder Jensen.

Na amata ona aoao Elder Jensen e uiga i folafolaga a le Alii mai ona tuaa o Ruel Whiting ma Ethel Otte Jensen. Sa soifua o ia i Mapleton, Iuta, ISA, i le aso 5 o Fepuari, 1942, o ia o le lona 6 o ni tamaiti e toa 10 i se aiga “na faapea ona ola ma aoaoina ai le talalelei,” na ia saunoa ai.

Ina ua maea ona auauna atu i le Misiona a Sipaniolo Amerika mai le 1961 e oo i le 1963, sa faaipoipo atu o ia ia Lona Lee Child i le aso 1 o Novema, 1963, i le Malumalu o Manti Iuta. O i laua o ni matua o se fanau e toaono. Sa maua ona faailoga o le tagata malaga, matuaofaiva, ma le fomai o le tofamanino mai le Iunivesite o Polika Iaga.

Ina ua maea ona faiaoga i le seminare, sa faigaluega o ia o se faatonu o mataupu aoaoina mo le seminare ma le inisitituti o mataupu faalelotu, faatonu o aoaoga faamasani mo le Matagaluega o Faifeautalai, ma le faatonu o le au faamaopoopo o tusitusiga paia mo le Matagaluega o Mataupu Aoaoina a le Ekalesia.

Na avea Elder Jensen o se epikopo, fesoasoani i le au peresitene o le MTC i Provo, fautua maualuga, taitai vaega o faitaulaga sili, peresitene o Alii Talavou, faiaoga o le Aoga Sa, ma se peresitene o le misiona. Na valaauina o ia i le Korama Lona Lua a Fitugafulu i le aso 6 o Iuni, 1992, ma i le Korama Muamua a Fitugafulu i le aso 1 o Aperila, 1995.

O mea ua ia aoaoina mai se soifuaga atoa o auaunaga o loo faaalia i lena aafiaga muamua sa oo i ai i tusitusiga paia a o avea ma se peresitene o le misiona. “O loo i ai le mana i le afioga a le Atua,” na ia saunoa ai (tagai Alema 31:5). E faamoemoe o ia e pei foi o Kitiona i le Tusi a Mamona, ia avea ana upu “ia aoga ai” i le Tupu ma tagata o Lona malo (Mosaea 22:4).