“E Faamoemoe Ua e Silafia, Sa Matou Oo i se Taimi e Sili Ona Faigata”

O le mea na tupu lea na faatoa uma ona ou faamatalaina, e ui o se tulaga faigata o femalagaaiga, ae na puupuu ma sa leai ni ona taunuuga tumau. Ae peitai, o le tele o tofotofoga ma faigata tatou te fetaiai i le olaga e ogaoga ma e foliga mai e i ai ni taunuuga tumau. O i tatou taitoatasi o le a oo i nisi o nei tulaga i le taimi o suiga o le olaga. O le toatele o loo faafofoga mai i lenei konafesi o loo feagai ma tulaga e sili atu ona tuga i lenei lava taimi.

Tatou te faaleoina faatasi le augani a le Perofeta o Iosefa Samita ina ua tuuai seseina o ia ma faafalepuipuiina i le Falepuipui o Liperate mo le tele o masina: “Le Atua e, o i fea ea oe? Po o fea foi le maota ua ufitia ai lou afioaga lilo?”

O le tali a le Alii e faamalosiau:

“Lo’u atalii e, ia i ai le filemu i lou agaga; o lou tiga ma ou puapuaga o le a na o sina ituaso itiiti lava;

“Ma afai o le a e onosaia lelei, ona faaeaina lea o oe e le Atua i le mea maualuga.”¹

O le tasi o aoaoga faavae taua na faamalamalamaina e le Toefuataiga e faapea, e ao ona i ai le faafeagai o mea uma ina ia faataunuuina ai le amiotonu.² E le faigofie lenei olaga i taimi uma, pe sa faamoemoe foi ia faigofie; o se taimi e tofotoina ai ma o se taimi foi e faamaonia ai. E pei ona tatou faitau i le Aperaamo, “Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua … ”³ Na aoao mai Elder Harold B. Lee, “O nisi taimi o mea e sili ona lelei mo i tatou ma mea e aumaia ai taui e faavavau, e foliga mai i le taimi nei o mea ia ua sili ona oona, ae o mea ua faasaina, o le tele lava o taimi ua foliga mai ai o mea ia ua sili ona manaomia.”⁴

O le tala, O Se Tala i Nuu e Lua, e amataina i se laina e masani ona ta’ua e faapea: “O taimi ia na sili ona lelei; o taimi ia na sili ona leaga.”⁵ Ua faamanino mai e tusitusiga paia e faapea, o augatupulaga taitasi ua i ai lava ona tala o taimi e sili ona lelei ma taimi e sili ona leaga. Tatou te oo uma lava i le faafeagai o le lelei ma le leaga,⁶ ma le eseesega o le malamalama ma le pogisa, faamoemoe ma le leai o se faamoemoe. E pei ona faamalamalama mai e Elder Neal A. Maxwell, “O le fetaiai soo ma mea suamalie ma mea oona o le olaga, e alagatatau ona i ai, seia oo lava i le iuga o lenei olaga puupuu faaletino.”⁷ Ua tatou iloa mai a tatou aoaoga faavae o le lelei o le a faatoilalo ai le leaga,⁸ ma o i latou o e salamo ma faapaiaina, o le a tuuina atu i ai le ola faavavau.⁹

E lata i le taimi na tusia ai e Dickens lana tala, na tutupu ai taumafaiga totoa a uluai au paia o e na nofoia va o Atumauga i Sisifo.

E ui lava i lo latou faatuatua masani, ae na oo le Au Paia i le tele o faigata ma sa latou feagai foi ma le aveesea faamalosi mai Navu ma ni faamoemoega na matuai ese lava. O nisi na vaai agai i luma ma le manatu o le a lelei mea uma; ae o isi sa manatu popole. O ni faataitaiga lelei lava se lua o loo tuuina mai e Helen Mar Whitney ma Bathsheba Smith. Na tuua uma e i laua ni faamaumauga mamana o o laua lagona.

Na tusia e Sister Whitney ona faamoemoega ina ua tuua Navu: “… O le a ou teuina uma au tamai lipine, o kola o ofu, ma leise, ma isi mea, aua o le a matou o i le mea e le mafai ona faatauina ai ia mea. O le a matou o ese mai le lalolagi ae o atu e nonofo i talaatu o Mauga Papa lea e leai se isi e moomoo e alu atu i ai… . O le a leai se tagata e mauoa pe mativa o i matou, ma o le a leai lava se isi mea o le a matou maua ae na o le faamaoni ma le mama, … ”¹⁰ E tatagi mai pea upu a Sister Whitney ma se manatu maualuga o le a lelei mea uma.

Na tusia e Sister Bathsheba Smith ni lagona e tumu foi i le faatuatua, ae na atagia ai sina atuatuvale. Sa ia vaai i ni tagata leaga o faapotopoto e faasagatau atu i le Au Paia i Misuri, ma sa i ai o ia i le maliu o le Aposetolo o David W. Patten.

A o tomanatu o ia i lo latou tuua o Navu, sa ia tusia: “O la’u toe gaoioiga lava i lena nofoaga faapelepele o le tapenaina lea o potu, salu le fola, ma faatu le salu i lona nofoaga masani i tua o le faitotoa. Ma faatasi ai ma le ootia o lou loto … na ou tapunia lemu ai le faitotoa ma aga atu i se lumanai e le mailoa, na ou faia ma le faatuatua i le Atua ma e le faaitiitia le faamautinoaga o le faatuina tele o le Talalelei i Sisifo ma ona aoaoga faavae moni ma tumau, nai lo na lagona na ou lagonaina i na taimi faigata i Misuri.”¹¹

O nei tamaitai paionia e toalua o le Au Paia o Aso e Gata Ai na tumau malolosi i le talalelei i o laua soifuaga atoa ma sa la tuuina atu le tautua mata’ina i le fausiaina o Siona, ae sa la feagai ma le tele o isi tofotofoga ma faigata faaopoopo lea na la taufai onosaia ma le faamaoni.¹² E ui lava i le manatu o Sister Whitney o le a lelei mea uma, ae o lana fanau muamua e toatolu na maliliu i le taimi pe latalata foi i le taimi na fananau ai—o le toalua o lana fanau na maliliu i le taimi o lana malaga umi mai Navu i Sate Leki.¹³ Ua faamanuiaina i tatou e Sister Whitney i ana tusitusiga e puipui ai lo tatou talitonuga ma o ia o le tina o le Aposetolo o Orson F. Whitney.

Na tusia e Sister Smith e uiga i le matitiva, mamai, ma faigata na puapuagatia ai le Au Paia a o latou agai atu i sisifo.¹⁴ Ia Mati i le 1847 na maliu ai lona tina ma o le masina na sosoo ai na fanau ai lana tama tama lona lua o John. E puupuu lava lana faamaumauga o lena mea: “O ia o la’u tama mulimuli, ma sa na o le fa itula na ola ai o ia.”¹⁵ Mulimuli ane i lona olaga, na avea o ia ma faatina o le Malumalu o Sate Leki, ma le peresitene aoao lona fa o le Aualofa.

E matua ootia i tatou ona o faigata na onosaia e le uluai Au Paia. Na malie le faaupuina e Polika Iaga o lenei aafiaga ia Fepuari, 1856 ina ua ia ta’ua: “Ou te fia fai atu se faamatalaga e uiga i aso faigata. Ua outou iloa ua uma ona ou fai atu ia te outou, afai lava ua i ai se tasi ua fefe i le oti ona o le fiaai, e mafai lava ona aluese o ia, ma alu atu i le mea o loo tele ai meaai. Ou te le o mafaufau lava i se matautia itiiti o le fiaai, sei vagana lava ua tatou aina le miula mulimuli, e amata mai lava i le pito o le taliga seia oo i le pito o le fuelago [siusiu], ou te le o fefe i le oti ona o le fiaai.

Sa faaauau lana saunoaga, “E toatele tagata i le taimi nei e le o mafai ona maua ni galuega, ae le o toe mamao ae tele galuega e galulue ai, ma o le a tatou le toe pagatia mo se isi mea mo lo tatou lelei.”¹⁶

O luitau o loo tatou feagai i aso nei, e tutusa lava o latou uiga ma luitau o aso ua mavae. O le mala o loo i ai nei i le tamaoaiga ua afua ai se popolega tele i le lalolagi atoa. O le leai o ni galuega ma faafitauli tautupe e le o se mea e le masani ai. E toatele tagata o loo i ai ni luitau o le soifua maloloina faaletino ma le mafaufau. O isi o loo feagai ma faafitauli faalefaaipoipoga po o fanau faalogotata. O nisi ua maliliu a latou pele. O mausa ma mea le talafeagai po o amioga leaga ua mafua ai le lototiga. Po o le a lava le pogai o tofotofoga, ua latou faamatua’ia ni tiga ogaoga ma mafatiaga mo tagata taitoatasi ma i latou o e tatou te alolofa i ai.

Ua tatou iloa mai tusitusiga paia, o nisi o tofotofoga e mo lo tatou lava lelei, ma ua alagatatau mo lo tatou lava alualu i luma faaletagata lava ia.¹⁷ Ua tatou iloa foi e oo luitau i e amio lelei ma e amio leaga.¹⁸ E moni foi, e le faapea o ao uma tatou te vaai i ai o le a timu mai ai. E ui lava i luitau, tofotofoga, ma faigata tatou te oo i ai, ae o le mafanafana o le aoaoga faavae o le Togiola na faataunuuina e Iesu Keriso e aofia ai le aoaoga a Alema e faapea, o le a tauave e le Faaola i Ona luga o tatou vaivaiga, ma “tausi ai lona nuu e tusa ma o latou vaivai.”¹⁹

Ua faamanino mai e tusitusiga paia ma perofeta i ona po nei e faapea, o le a i ai tausaga oge ma tausaga mau.²⁰ O loo faamoemoe le Alii ia tatou saunia mo le tele o luitau e oo mai. Ua Ia tautino mai, “Ae afai ua saunia outou, o le a outou le matatau ai lava.”²¹ O se vaega o le faalavelave na ou oo i ai i le sopoiaina o le Sierra i lena matagi kiona i le tele o tausaga ua alu, na tupu ona sa ou le saunia mo lenei mea faafuasei sa lei mafaufauina. O se tasi o faamanuiaga sili o tusitusiga paia, e lapataia i tatou e uiga i luitau e le mafaufauina, ae e masani ona tutupu. O le a sili ona lelei mo i tatou lo tatou sauniuni mo ia mea. O se tasi o ituaiga o sauniuniga, o le tausia lea o poloaiga.

I le tele o vaega i le Tusi a Mamona, na folafola atu ai i tagata o le a latou manuia i le nuu, “pe afai latou te tausia poloaiga.”²² O lenei folafolaga e masani ona aumaia faatasi ma se lapataiga, afai latou te le tausia poloaiga a le Atua, e aveeseina i latou mai Lona afioaga.²³ O le mea mautinoa, o le mauaina o faamanuiaga o le Agaga— o le fesoasoani a le Agaga Paia—o se elemene taua e manuia moni ai i le nuu ma ia saunia.

E ui lava i o tatou tofotofoga, ma le anoanoai o loo tatou fetaiai i aso nei, o le a avea i tatou o ni tagata e le lotofaafetai pe afai tatou te le talisapaia o tatou faamanuiaga. E ui foi i le natura moni o faigata na oo i ai paionia, ae na saunoa Peresitene Polika Iaga i le taua o le agaga faafetai. Na saunoa o ia, “Ou te le iloa se isi agasala, sei vagana le agasala e le mafaamagaloina, e sili atu nai lo le agasala, o le le lotofaafetai.”²⁴

O la tatou faafetai sili e tatau ai, o le Faaola lea ma Lana Togiola. Ua tatou iloa o le toatele o e o faafofoga mai i lenei konafesi o loo i ai tofotofoga ma faigata e sili ona ogaoga, ma o le lagona masani lava i o latou loto a o latou o atu i lo tatou Tama oi i le Lagi i le tatalo o le “E faamoemoe ua e silafia, o loo ou i ai i se taimi sili ona faigata.”

Sei ou faasoa atu ia te outou se tala moni a se tasi o tuafafine, o Ellen Yates mai Grantsville, Iuta. O le amataga o Oketopa i le 10 tausaga talu ai, na sogi faatofa atu ai o ia i lana tane o Leon, ina o le a alu e faigaluega i le Aai o Sate Leki. O le taimi mulimuli lenei o le a ia vaai ai ia Leon o soifua. Sa lavea o ia i se faalavelave na fetoai tonu ai lana taavale ma le taavale a se alii talavou e 20 tausaga le matua o le na tuai i lana galuega muamua lava, ma sa taumafai e tipi se isi taavale na alu lemu, ma iu ai ina fetoai tonu a la taavale ma maliliu uma ai i laua i le taimi lava lena. Fai mai Sister Yates, ina ua uma ona logoina o ia e ni alii leoleo auala agalelei, sa lofituina o ia i le te’i ma le faavauvau.

Sa ia tusia, “A o ou taumafai ou te vaai atu i luma i le olaga, na pau lava le mea na ou vaaia o le pogisa ma le tiga.” Na iloa mulimuli ane o le uo lelei lava a lona toalua, o le epikopo lea o le uarota a le alii talavou. Na valaau mai le epikopo ia Sister Yates ma fai atu ia te ia, o loo fia talanoa Jolayne Willmore, o le tina o le alii talavou ia te ia. Na te manatua, “sa ou matua te’i ona sa ou mafaufau lava au ia i lou faavauvau ma le tiga, o lea sa ou le mafaufau ai lava i le alii talavou ma lona aiga. Na faafuasei ona ou iloaina, o se tina lenei sa oo foi i le tiga tele pe na sili atu foi lona tiga nai lo a’u. Sa vave ona ou tuuina atu le faatagaga … mo se asiasiga.”

Ina ua taunuu mai Brother ma Sister Willmore, sa la faailoa mai lo la faanoanoa tele ona o lo la atalii na mafua ai le maliu o Leon, ma sa tauaaoina atu mo ia se ata o le Faaola o loo opoina se teineitiiti laitiiti i Ona aao. Fai mai Sister Yates, “Pe a oo mai taimi e sili ona faigata ona onosaia, ou te tilotilo i lenei ata ma manatua ai o loo silafia lelei au e le Faaola. Na te silafia lo’u tuuatoatasi ma o’u tofotofoga.” O se tasi o mau e faamafanafanaina ai Sister Yates o le, “O lea, ina fiafia ai ia, ma aua le fefe, aua o au le Alii o loo faatasi ma outou, ou te tu foi faatasi ma outou.”²⁵

O masina taitasi o Oketopa e o ai faatasi ia Sister Yates ma Sister Willmore (o loo mafuta mai i laua i le Maota Autu mo Konafesi i le aso) i le malumalu ma tuuina atu le faafetai mo le Togiola a Iesu Keriso, mo le ata o le faaolataga, mo aiga e faavavau, ma mo feagaiga ua fusia faatasi ai tane ma ava ma aiga i itu uma e lua o le veli. Na faaiuina e Sister Yates, “E ala mai i lenei tofotofoga, ua ou lagonaina ai le tele naua o le alofa o lo’u Tama oi le Lagi ma lo’u Faaola, nai lo se isi lava taimi muamua.” Na molimau o ia, “E leai se faavauvau, leai se tiga, leai se ma’i e sili atu ona ogaoga e le mafai e le Togiola a Keriso ma le alofa o Keriso ona faamaloloina.”²⁶ Oka se faataitaiga ina a matagofie tele o le alofa ma le faamagalo atu o loo faaalia e nei tuafafine e toalua. Ua mafai ai ona aoga le Togiola a Iesu Keriso i o laua soifuaga.

Mafaufau i le Faaola i le Faatoaga o Ketesemane i le taimi o le faagasologa o le Togiola, na puapuagatia ai i le tiga na matua tele na faapea ona puna mai ai le toto mai pu laiti uma lava [o le tino].²⁷ O Lana faatoga i Lona Tama na aofia ai le upu Tama. ²⁸ Atonu e faamatalaina lenei tulaga o le tagi a se atalii o le ua pagatia i lona tama, “Lo’u Tama e, afai e mafai, ia aveese lenei ipu ia te au: a e aua le faia lo’u loto, a o lou finagalo.”²⁹ Ou te molimau atu o le Togiola a Iesu Keriso ua aofia ai tofotofoga ma faigata uma o le a oo i ai soo se tasi o i tatou i lenei olaga. I taimi tatou te lagonaina ai le fia faapea atu, “E faamoemoe ua e silafia, sa ou oo i se taimi sili ona faigata,” ia tatou mautinoa o loo i ai o Ia iina, ma o loo tatou saogalemu i Ona aao agaalofa.

Ina ua fesiligia lo tatou Perofeta peleina o Peresitene Thomas S. Monson, i lona aso soifua i le masina o Aokuso ua tuanai atu, pe o le a se meaalofa lelei e mafai e tagata o le ekalesia i le lalolagi atoa ona tuuina atu mo ia, sa ia saunoa mai e aunoa ma sina faatuai, “Sue se tasi o loo i ai i se taimi faigata … ma fai se mea mo i latou.”³⁰

O au faatasi ai ma outou, ou te faafetai e faavavau ia Iesu Keriso, le laveai o tagata uma. Ou te molimau atu o Ia o le Faaola ma le Togiola o le lalolagi. I le suafa o Iesu Keriso, amene.