Faamaualuga Le Mea E Te Tu Ai

E tele tausaga ua mavae i lo matou faletapuai i Tamasatai, i Siamani, sa talosagaina se vaega o le usoga, e sii ese se piano tele mai le falesa i le potu talaloa mo faafiafiaga sa i ai i autafa, lea sa manaomia ai mo se faaaliga musika. E leai se tagata polofesa mo fesiitaiga sa i ai, ma sa foliga mai e le mafai ona fai le galuega o le sii atu o lena laau faimusika mamafa mai le falesa i le potu talaloa mo faafiafiaga. Sa iloa e tagata uma e le gata ina manaomia i lenei galuega le malosi faaletino, ae faapea foi le faautautaga e faafoe ai. Sa tele le mau manatu, ae e leai se manatu na mafai ai ona paleni lelei le piano. Sa latou toe faatulagaina faafia le usoga e fuafua i le malosi, o le uumi, ma le matutua—ae leai se tonu na aoga.

A o latou tutu faataamilo i le piano, ua le iloa po o le a le isi mea e fai, sa fai se tala a se tasi o a’u uo lelei, o Uso Hano Lusini. Na faapea lana tala, “Uso, tutu faatasi ona faamaualuga lea o le mea tou te tutu ai.”

Sa foliga mai na matua faigofie tele. E ui i lea, sa tofu faamaualuga e le tagata le mea sa ia tu ai, ma siimalele ane ai le piano mai lalo ma avatu atu ai i le potu talaloa e peiseai o lona lava malosi na alu ai. O le tali lena i le lu’i. Sa na ona manaomia lava ona latou tutu faaputuputu faatasi ma faamaualuga le mea sa latou tutu ai.

E tele taimi sa ou mafaufau ai i le aitia faigofie a Uso Lusini, ma sa faagaeetia lava au i lona moni maoae. O le po nei, ou te fia faalauteleina lena manatu autu faigofie, “faamaualuga le mea e te tu ai.”

E ui lava ina foliga mai e faigofie, o le faamaualuga o le mea tatou te tutu ai, o se mataupu faavae o le mana. O le toatele lava o i latou e umia le perisitua ou te iloa e malamalama ma ola ai i lenei mataupu faavae. E naunau i latou e afe i luga tapulima o ofu, ae o e galulue, pe o le a lava le galuega e fai. Latou te faatinoina ma le faamaoni o latou tiute faaleperisitua. Latou te faalauteteleina o latou valaauga. Latou te auauna atu i le Alii e ala i le tautuaina o isi. Latou te tutu faaputuputu faatasi e faamaualuga le mea latou te tutu ai.

Peitai, e i ai i latou o nisi taimi e tauivi ai ma lenei manatu autu. A oo foi ina latou tauivi, e foliga mai e lua ni faavasegaga e i ai i latou: o le saili e taitai, po o le saili foi e lalafi. Latou te faananau mo se palealii po o se ana.

O i latou o e saili e taitai e mafai ona latou lagonaina latou te gafatia ona faia e sili atu nai lo mea ua talosagaina i latou e faia i le taimi nei. O nisi atonu e manatu, “Maimau e pe a na faapea o au o se epikopo, semanu ou te faia se eseesega.” Ua latou talitonu e tele atu o latou tomai gafatia nai o latou valaauga. A na faapea o latou i ai i se tofiga taua faaletaitai, o le a latou galulue malosi e faia se eseesega. Peitai latou te tau manatunatu, “O le a se uunaiga lelei e mafai ona ou faia i le na o le avea o se faiaoga o aiga po o se fesoasoani i le au peresitene o le korama?”

O i latou o e saili e lalafi atonu latou te faapea e pisi tele i latou mo se auaunaga i le Ekalesia. A manaomia ona faamama le falesa, a manaomia e le aiga o Tui se fesoasoani pe a siitia, a tofia i latou e le epikopo e faiaoga i se vasega, e foliga mai i taimi uma ua i ai sa latou ‘alofaga.

Ua lua sefulu tausaga talu ai, sa faasoa mai ai e Peresitene Ezra Taft Benson ni lipoti mai epikopo ma peresitene o siteki e faapea e i ai ni tagata o le ekalesia “latou te le taliaina ni valaauga e auauna atu ona fai mai ‘e pisi tele’ po o le ‘e leai so latou taimi.’ O isi, ua taliaina na valaauga, ae mumusu e faalautele na valaauga.”

Na faaauau le saunoaga a Peresitene Benson, “E finagalo le Alii ia tofu i tatou ma se tofiga i Lana Ekalesia ina ia mafai ona manuia isi tagata ia tatou taleni ma uunaiga.”¹

O nisi taimi, ae masani lava o le afuaga lava o nei aga—o le saili e taitai pe saili e lalafi—e ono tutusa lava: o le manatu faapito.

E i ai se ala e sili atu, ua aoao mai ia i tatou e le Faaola lava Ia: “O se fia muamua foi ia te outou, ia fai o ia ma a outou tautua.”²

A tatou saili e auauna atu i isi, e le faaosofiaina i tatou e le manatu faapito ae o le alofa mama. O le auala lea na soifua ai Iesu Keriso ma o le auala foi lea e tatau ona ola ai se tasi ua umia le perisitua. E le i popole le Faaola i le mamalu o tagata; Na ofo atu i ai e Satani ia te Ia malo uma ma le mamalu o le lalolagi, ae sa matua teena atoatoa e Iesu lena ofo i le taimi lava lena.³ I Lona soifuaga atoa, atonu na lagona e le Faaola le le lava, o le mafatia i le tele o mea e popole i ai, ae seasea maua se taimi mo Ia lava; ae na Ia faaavanoaina lava e le aunoa le taimi mo e mama’i, o e faanoanoa, ma i latou ua faatuatuana’i.

E ui lava i lenei faataitaiga susulu, e matuai faigofie lava ma e matuai tele foi taimi e matele ai i le sailiga o mamalu o tagata ae le tautuaina le Alii ma o tatou manatu, mafaufau, ma le malosi atoa.

Uso e, pe a tatou tutu i luma o le Alii ina ia faamasinoina, mata o le a silasila o Ia i tulaga sa tatou umia i le lalolagi po o le Ekalesia? Pe e te manatu ea e tele se uiga ia te Ia o isi faalaniga sa tatou maua e ese mai le “tane,” “tama,” po o le “umia le perisitua”? Pe e te manatu ea o le a popole o ia pe o le a le lo tatou pisi, ae pe fia foi fonotaga taua sa tatou auai? Pe e te manatu ea o le lelei o le faatumuina o o tatou aso i taimi fono o le a avea lena ma se ‘alofaga o le leai o se taimi e mafuta ai ma o tatou toalua ma aiga?

E matua eseese lava le auala e faamasino ai le Alii mai le ala tatou te faia ai. E fiafia o ia i le tautua tamalii, ae le o le tamalii tautuaina.

O i latou o e lotomaulalo i lenei olaga, o le a laei o latou palealii o le mamalu i le isi olaga. Sa aoao mai e Iesu lava Ia lenei aoaoga faavae ina ua Ia faamatalaina le tala o le mauoa, o le sa laei i ie lino paauli taugata ma tausami mealelei i aso uma, a o moomoo atu le tagata aisi o Lasalo ia tau lava o sina tofo i momoi mea e toulu mai i le laoai a le mauoa. I le isi olaga, na sosoo Lasalo i le mamalu ma Aperaamo, a o le mauoa na lafo i seoli, lea na tepa ae ai ona mata i le mafatia.⁴

O le tausaga lenei e atoa i ai le 200 tausaga talu ona soifua mai John Rowe Moyle. O John o se tagata na liliu mai i le Ekalesia, na tuua lona aiga i Egelani ae malaga mai i le Vanu o Sate Leki o se vaega o le aumalaga o taavale tosolima. Sa ia fausia se fale mo lona aiga i se taulaga laitiiti e le mamao ese mai le Aai o Sate Leki. O John o se tipi maa faamoemoeina, ma ona o lena tomai, na talosagaina ai o ia e faigaluega i le fauga o le Malumalu o Sate Leki.

O Aso Gafua uma lava e tuua ai e John le fale i le lua i le vaveao, ma savali mo le ono itula ina ia taunuu tonu i le taimi i lana galuega. O le Aso Faraile, e tuua ai e ia lana galuega i le itula e lima i le afiafi, ma savali seia toetoe lava ina ta le sefululua i le vaeluapo faatoa taunuu i le fale. E tele tausaga o ia faia pea lenei mea.

I se tasi aso, a o faia ana feau i le fale, sa aa lona vae e se povi, ma sa gau matuia ai le ponaivi. Ona o le utiuti o punaoa faafomai, na pau lava le mea e tatau ona fai o le tipi motu o le vae ua gau. O lea na fusi saisai ai John e lona aiga ma ana uo i se faitotoa, ma ili ese ai i se ili laau lona vae i nai inisi mai lona tulivae.

E ui lava o se taotoga faatauvaa ma le matautia, ae na amata ona toe pe le vae. O le taimi lava na mafai ai ona nofo i luga John mai le moega, sa amata ai ona ia vaneina se vae laau e i ai se sooga na mamanuina ma le faautauta, lea na avea ma se tapuvae i se vae faapipii. O le savali ai i lenei vae faapipii, sa matuai tiga lava, ae e lei fiu ai John, ae sa galueaiina pea lona onosai seia oo lava ina mafai ona ia savalia le 22-maila e malaga ai i le malumalu i Sate Leki i vaiaso taitasi, lea na faaauau ai lana galuega.

O ona lima lava na vaneina upu “E Paia i le Alii” lea o loo i ai i le taimi nei o se faailoga auro ia i latou uma e asiasi mai i le Malumalu o Sate Leki.⁵

E le i faia e John lenei mea mo se viiga o le tagata. E le i ‘alo foi o ia i lona tiute, e ui lava ina sa ia te ia mafuaaga uma e faia ai lena mea. Sa ia iloa na faamoemoe mai le Alii ia te ia na te faia.

I ni tausaga mulimuli ane, sa tofia ai, le atalii o le atalii o John, o Henry D. Moyle, e avea ma se uso o le Korama a le Toasefululua, ma na mulimuli ane, avea ma se tasi o le Au Peresitene Sili o le Ekalesia. O le tautua a Peresitene Moyle i nei valaauga sa faamamaluina, ae o le tautua a lona tamamatua o John, e ui lava e tau le iloa, ae na faapena foi ona faamanuina i le Alii. O uiga o John, o lana talatuu o le ositaulaga, ua avea o se fu’a o le faatuatua ma le faamaoni ma se tagavai o le tiute i lona aiga ma le Ekalesia. Na malamalama John Rowe Moyle i le uiga o le “faamaualuga le mea e te tu ai.”

O le faalauiloaga aloaia o tagata taitoatasi, e seasea ona avea o se faailoga o le taua o la tatou tautua. Mo se faataitaiga, tatou te le iloa igoa, o se tasi o atalii e 2,000 o Helamana. O le avea ma ni tagata taitoatasi, e le ta’ua ni igoa. Peitai, afai o se taufaatasiga o tagata, o le a manatua pea lo latou igoa ona o le faamaoni, lototele, ma le naunau e auauna atu. Sa latou faataunuuina faatasi se mea semanu e le mafai e se toatasi o i latou ona faataunuuina.

O le lesona lena mo i tatou, uso e o le perisitua. A tatou tutu faaputuputu faatasi ma faamaualuga le mea tatou te tutu ai, a tatou mafuli atu mo le mamalu o le malo o le Atua ae le o o tatou lava mamalu ma mea e fiafia i ai, o le a matua tele atu mea e mafai ona tatou ausia.

E leai se valaauga faapea e maualalo mo i tatou. O valaauga uma lava e maua ai se avanoa e tautua ai ma tuputupu ae. Sa faatulagaina e le Alii le Ekalesia i se ala e maua ai e tagata taitoatasi se avanoa e tautua ai, lea e tau atu ai i le tuputupu ae faaleagaga. Po o le a lava lou valaauga, ou te fautuaina oe ina ia e tagai atu i ai o se avanoa e le gata ina faamalolosia ai ma faamanuia isi, ae e avea ai foi ma tagata e finagalo le Tama Faalelagi e avea ai oe.

Ina ua ou malaga atu i siteki o Siona mo le faamoemoe e toe faatulaga se au peresitene o le siteki, e i ai taimi sa ou maofa ai a o faagasolo se faatalanoaga, sa tau mai ai e se uso sa na ia maua se uunaiga, o le a i ai o ia i le isi au peresitene e sosoo ai.

Ina ua ou faatoa faalogo i lea mea, sa ou le mailoa pe o le a la’u tali.

Sa umi sina taimi ona faatoa aumaia lea e le Agaga Paia ia te au le malamalama. Ou te talitonu ua i ai i le Alii se valaauga patino mo tagata uma. O nisi taimi, Na te tuuina mai uunaiga faaleagaga e ta’u mai ai ia te i tatou, ua tatou agavaa e maua ni valaauga faapitoa. O se faamanuiaga faaleagaga, o se alofa e mutimutivale mai le Atua.

Peitai o nisi taimi tatou te le lagonaina ai le toega o mea o loo ta’u mai e le Alii ia te i tatou. “E ui lava ina e agavaa e galue i lenei tofiga,” atonu e faapea mai o Ia, “e le o le valaauga lea ua ou filifilia mo oe. Ae ou te manao ia e faamaualuga le mea e te tu ai.” Ua silafia e le Atua le mea e sili mo i tatou.

O i latou uma e umia le perisitua, e tulai i se tulaga uiga ese, ma ua i ai se galuega taua e na o ia lava e mafai ona faia.

Ua tatou faalogo uma lava i tala o asiasiga a Peresitene Monson na faamanuiaina ai toeaiina ma olomatutua ma e mama’i, o lona gauai atu i mea latou te manaomia ma avatu ai le fiafia ia i latou, o le mafanafana, ma le alofa. E i ai ia Peresitene Monson se uiga faalenatura masani, e maua ai e tagata ni lagona lelei e uiga ia i latou lava. Mata e le o se mea matagofie pe a na mafai e Peresitene Monson ona asiasi ma vaavaai aiga taitasi o le Ekalesia?

E matagofie. Peitai, e le mafai—ma e le tatau lava ona ia faia. E le o poloaiina foi o ia e le Alii na te faia lena mea. Ua poloaiina tatou e le Alii, e avea o ni faiaoga o aiga, e alolofa ma vaavaai aiga ua tofia i ai outou. E le i poloaiina e le Alii ia Peresitene Monson, na te faatulagaina ma taitai lau afiafi faaleaiga. E finagalo o Ia ia i tatou, i le avea ai ma tamā, tatou te faia le mea lena.

Atonu tou te manatu faapea o loo i ai isi e sili atu ona gafatia ma sili atu le poto masani, e mafai ona faataunuuina o outou valaauga ma tofiga i se tulaga e sili atu nai lo oe, ae ua tuuina atu e le Alii ou tiutetauave mo se mafuaaga. Atonu e i ai ni tagata ma ni loto e na o oe lava e mafai ona maua ai ni aafiaga mo le lelei. Atonu e leai lava se tasi e mafai ona faia i le ala lava lea e tasi.

Ua poloaiina i tatou e lo tatou Tama Faalelagi, ia avea i tatou ma Ona sui i le galuega paia o le aapa atu ma faamanuia olaga o Lana fanau. Ua Ia poloaiina i tatou ina ia tutu mausali ma le mana o le perisitua i o tatou loto ma agaga, ma tuuina atu i le valaauga ua ia te i tatou i le taimi lenei, a tatou taumafaiga aupito silisili.

Uso e, po o le a lava lou malosi, e le mafai ma e le tatau ona e siiina na o oe se piano. E faapena foi, e leai se tasi o i tatou e mafai pe tatau ona ia tuleia toatasi le galuega a le Alii. Peitai afai tatou te tutu faaputuputu faatasi i le tulaga ua atofa mai e le Alii ma faamaualuga le mea tatou te tutu ai, e leai lava se mea e mafai ona taofia lenei galuega paia mai le agai i luga ma luma.

Uso e, ina sei soia ia le moomoo i tofiga ma sei soia ia le ‘alo mai le auauna atu i isi!

Talosia ia tatou manatuaina e le aunoa lenei lesona maoae, o i tatou o avefu’a a le Alii o Iesu Keriso, o loo lagolagoina e le Agaga Paia o le Atua, e moni ma faamaoni e oo i le iuga, ua tofu tuuto e tuuina atu a tatou mea uma mo le tuutuuga fuafuaina o Siona ma ua noatia i le feagaiga e tutu faaputuputu faatasi ma faamaualuga le mea tatou te tutu ai.

Ou te tatalo ai, ma momoli atu a’u faamanuiaga ma lo’u alofa ia te outou i le suafa o Iesu Keriso, amene.