Ua Maea le Konafesi Aoao Lona 178 Faaleafatausaga

I lana uluai konafesi aoao faaleafatausaga talu ona lagolagoina o ia i le alofisa ia Aperila na tea nei, na fofogaina mai ai e Peresitene Thomas S. Monson ni malumalu fou se lima o le a fausiaina i le lalolagi.

Talu mai Aperila i le 2000 e le’i toe i ai ni malumalu se tele na fofogaina i se taimi e tasi. (Tagai i le tala o loo auina atu ai i le i. 126 mo nisi faamatalaga.)

Ua faamaloloina Elder Earl C. Tingey ma Elder Sheldon F. Child mai le Korama Muamua a Fitugafulu ma ua avea ai o ni Pulega Aoao Faamalolo Faamamaluina, ae faamaloloina ai foi Elder Gerald N. Lund ma Elder Robert R. Steuer mai le Korama Lona Lua a Fitugafulu.

Na lagolagoina Elder Jay E. Jensen o le Fitugafulu e faatumu le avanoa i le Au Peresitene o Fitugafulu lea na tuua ona o le faamalologa o Elder Earl C. Tingey. (Tagai i le faamatalaga o le soifuaga [o Elder Earl C. Tingey] o loo auina atu ai i le i. 128.)

O le Susuga a Peresitene Monson, o le na faamanatuina le 81 tausaga o lona soifua i le aso 21 o Aokuso, na pulefaamalumalu i le konafesi ma taitaia ni sauniga se tolu. Sa la faamanatuina ma lona faletua o Frances, le 60 tausaga o le la faaipoipoga i le aso 7 o Oketopa.

E faaopoopo atu i le lomiaina o le lomiga o le konafesi i mekasini a le Ekalesia, o loo maua foi taualumaga [o le konafesi] i le initoneti i le LDS.org. O loo maua vitio o sauniga uma o le konafesi i le Gagana Fai Faailoga Amerika, Igilisi, Potukale, ma le Sipaniolo. O loo maua foi i le initoneti faila i le leo i le silia i le 90 gagana ma tusiga i gagana e 30.