Ia Aoao, Ia Faia, Ia Avea Ai

Ua outou vaai i se molimau o le malosi o fesoasoani e toalua i le Au Peresitene Sili. Ou te tu atu i o outou luma ma tautino atu ua soofaatasi lenei Au Peresitene Sili ma ua tasi i lalo o le taitaiga a le Alii o Iesu Keriso.

Ou te fia faafetai faapitoa atu i lenei aufaipese a faifeautalai. E i ai so’u aafiaga ou te manatu atonu latou te fia iloa, ma atonu foi o le a outou fiafia i ai. Ua tele ni tausaga talu ai, sa ou maua ai se valaau faanatinati mai le faauluulu o le nofoaga autu e aoao ai faifeautalai. Fai mai a ia, “Peresitene Monson, e i ai le faifeautalai lea o le a alu i le fale. Ua leai se mea e mafai ai ona puipuia o ia mai le faamutaina.”

Sa ou tali atu, “Ia, e le o se mea fou lena mea. Na tupu foi muamua. O le a lana faafitauli?”

Sa ia fai mai, “Sa tofia o ia i se misiona faaSipaniolo, ae ua matua talitonu lava o ia e le mafai ona ia aoaoina le faaSipaniolo.”

Sa ou fai atu, “E i ai sa’u fautuaga mo oe. A oo taeao, ona fai lea i ai e alu i se vasega e aoao ai le faaIapani. Ona fai lea i ai e lipoti atu i le 12:00 i le aoauli.”

O le taeao na sosoo ai, sa telefoni mai ai o ia i le 10:00! Fai mai, “O lea ua ma i i ma le taulealea, ma ua manao ia ou iloa ua matua talitonu lava o ia e mafai ona ia aoaoina le faaSipaniolo.”

O le mea e i ai le loto e i ai foi se ala e fai ai.

O le taimi nei, a o ou tautala atu ia te outou i le po nei, e moni lava, ua potopoto i le po nei se perisitua tautupu i le tele o nofoaga, ae ua soofaatasi. E foliga mai o se potopotoga aupito tele lea ua i ai i latou e umia le perisitua. O lo outou tuuto atu i o outou valaauga paia e musuia. O lo outou naunautai e aoao i o outou tiute ua iloagofie. O le mama o outou agaga ua latalata mai ai le lagi ia te outou ma o outou aiga.

E tele vaega o le lalolagi ua feagai nei ma taimi faigata o le tamaoaiga. Ua gau pisinisi, ua leai ni galuega ma ua tulaga matautia teugaoa faavaitaimi. Ua tatau ona tatou faamautinoa e le o fiaaai, pe le lavalava, pe leai ni mea e nonofo ai i latou ua tatou vaaia. A galulue faatasi le au perisitua o lenei Ekalesia ia tasi i le taulimaina o nei tulaga faigata, e toetoe lava o ni vavega.

Matou te fautuaina le Au Paia uma o Aso e Gata Ai, ina ia faautauta ia latou fuafuaga, ia ola aputiputi, ma aloese mai le soona aitalafu po o aitalafu e le tatau ai. O loo pulea mataupu tautupe a le Ekalesia i le ala lea, aua ua matou mautinoa o a outou sefuluai ma isi saofaga e le o aumaia e aunoa ma ni osigataulaga ma o tupe paia foi.

Ia avea o tatou fale ma malutaga o le amiotonu, o nofoaga o le tatalo, ma fale o le alofa, ina ia mafai ai ona tatou sapi i faamanuiaga ia e na o lo tatou Tama Faalelagi lava e maua mai ai. Tatou te manaomia Lana faatautaiga i o tatou olaga.

O i ai i lenei au toatele naua le mana o le perisitua ma le malosi e aapa atu ai ma faasoa atu le talalelei fiafia i isi. E pei ona ta’ua, ua i ai o tatou lima e sii ae ai isi mai lona lava loto malie ma le le toaga. Ua ia i tatou loto e tautua faamaoni ai i o tatou valaauga faaleperisitua, ma musuia ai isi e savavali i eleele maualuluga atu ma aloese mai ai i faataufusi o le agasala lea ua taufaamata’u e lofituina ai le toatele naua. E moni lava e taua le aoga o agaga i le silafaga a le Atua. Ua ia i tatou le avanoa taua, ua faaauupegaina i lenei malamalama, ina ia faia ai se eseesega i olaga o isi. E mafai ona faatatau upu o loo maua i le Esekielu, ia i tatou uma o e mulimuli i le Faaola i lenei galuega paia:

“Ou te avatu … ia te outou se loto fou, ma ou tuu i totonu ia te outou le agaga fou. Tou te savavali ai i a’u tulafono, tou te auauna foi i a’u faamasinoga, ma outou faia.

“Tou te nonofo foi i le nuu ua ou foaiina atu i o outou tama; e fai foi outou mo’u nuu, e fai foi au mo outou Atua.”¹

E mafai faapefea ona tatou maua lenei folafolaga? O le a se mea tatou te agavaa ai ina ia maua lenei faamanuiaga? Pe o i ai se taiala e mulimuli ai?

Sei ou fautuaina atu ni mea taua se tolu tatou te mafaufau i ai. E faatatau i tiakono faapea faitaulaga sili. O mea lava tatou te gafatia. O le a fesoasonai mai se Tama Faalelagi agalelei i la tatou sailiga.

Muamua, aoao mea e tatau ona tatou aoao.

Lona lua, fai le mea e tatau ona tatou fai.

Ma le lona tolu, ia avea i tatou ma tagata e tatau ona avea ai.

Sei o tatou talanoa i nei faamoemoega, ina ia mafai ona avea i tatou ma auauna faamanuiaina i le silafaga a le Alii.

Muamua, aoao mea e tatau ona tatou aoao. Na tuuina mai e le Aposetolo o Paulo se faanatinati i a tatou taumafaiga e aoao. Na ia fai atu i Filipi: “O le mea e tasi ou te faia, ou te faagalogalo i mea ua tuanai, ou te momoe punoua’i foi i mea o lumanai, ou te tausisi atu i le faailoga, ia maua ai le taui na valaauina ai au mai luga e le Atua ia Keriso Iesu.”² Na ia uunaia le au Eperu: “Ia tuu ese … le agasala[;] … ia tatou taufetuli ma le onosai i le alatanu … o i o tatou luma, ma ia vaavaai atu [mo se faataitaiga] ia Iesu o le na te taitaiina ma le na te faaatoatoaina le faatuatua.”³

Sa tele ina saunoa Peresitene Stephen L Richards, o le ua tele tausaga sa auauna ai i le Korama a Aposetolo e Toasefululua, ona sosoo ai lea ma le Au Peresitene Sili, i e umia le perisitua ma faamamafa atu i ai le tofamanino e faatatau i ai. Sa ia tautino atu: “O le Perisitua e masani lava ona faauigaina ‘o le mana o le Atua ua faasafua mai i le tagata.’ O lena faauigaga, ou te manatu, ua sa’o lelei.

Na ia faaauau: “Peitai, mo faamoemoega faatino, ou te fia faauigaina ai le perisitua e faatatau i le auaunaga, ma e tele lava ina ou faaigoaina ‘o le fuafuaga atoatoa lea o le auaunaga.’ Ou te faia aua e foliga mai ia te au, e na o le faaaogaga lava o le mana paia ua faaee mai i luga o alii, e mafai ai ona latou faamoemoe ia iloa le taua atoatoa ma le paia o lenei meaalofa. O se meafaigaluega e fai ai le tautua … ma o le alii la na te le faaaogaina e ono mafai ona ia le toe maua, aua ua tautino mai ma le malamalama ia i tatou i se faaaliga, o le na te faatamala i ai, ‘o le a le faitaulia e agavaa e tu atu.’”⁴

O Peresitene Harold B. Lee, le Peresitene lona sefulutasi o le Ekalesia, ma o se tasi o faiaoga maoae o le Ekalesia, na ia faaupuina lana fautuaga i se faaupuga e faigofie. Fai mai a ia, “A avea se tasi ma se e umia le perisitua, ona avea lea o ia ma se sui o le Alii. E ao ona ia mafaufau i lona valaauga e faapei o la ua i ai i le feau a le Alii.”⁵

O lenei, atonu e i ai nisi o outou e matamumuli i o outou natura, pe manatu ane ia te outou lava faapea e le gafatia ona talia o se valaauga. Manatua, o le galuega lenei e le o sau galuega na o oe po o sa’u galuega na o au. O le galuega a le Alii, ma a tatou i ai i le feau a le Alii, ua ia i tatou le aia tatau mo le fesoasoani a le Alii. Manatua o le a faagafatia e le Alii le tua e tauamo ai le avega e tuu i ai.

E ui e i ai taimi e taufaamatau ai le potuaoga aloaia, o nisi o aoaoga aupito sili ona aoga e tutupu i nofoaga e ese mai le falelotu po o le potuaoga. Ou te manatua lena mea i ni nai tausaga ua mavae, o tagata ua umia le Perisitua Arona e sagisagi fiafia atu i se tafaoga faaletausaga e faamanatu ai le toefuataiga mai o le Perisitua Arona. E malaga alii talavou o le matou siteki i le pasi i le 90 maila i le Fanuatanu o Clarkson, o iina sa matou matamata ai i le fanua maliu o Matini Harisi, o se tasi o Molimau e Toatolu o le Tusi a Mamona. A o [matou] si’oina le maa foaga matagofie sa faailoga ai le tuugamau, e tuuina mai e se fautua maualuga se talaaga o le soifua o Matini Harisi, ma faitau mai le Tusi a Mamona lana molimau, ona tuuina mai lea o lana lava molimau i le moni. Sa faalogologo ma le le gaoia ia alii talavou, ma pa’i atu i le foaga o loo maka ai, ma mafaufau loloto i upu sa latou faalogoina ma lagona sa latou maua.

I se paka i Logan, e fiafia ai i se taumafataga o le aoauli. Ona taotooto ai lea o alii talavou i le mutia i le lotoa o le malumalu o Logan ma pulatoa atu i ona tumutumu maualuluga. E masani ona tapili malie atu e le savili agi malie ia ao papae mananaia i luga atu o tumutumu. Sa aoaoina ai faamoemoe o malumalu. Sa oo ina avea feagaiga ma folafolaga ma mea ua sili atu i le na o ni upu. O le naunau ina ia agavaa e ulu atu i faitotoa o na malumalu, sa ulufale i na loto talavou. Sa matua latalata mai lava le lagi. Sa faamautinoa ua aoao mea e tatau ona matou aoaoina.

Numera lua, fai le mea e tatau ona tatou fai. I se faaaliga e uiga i le perisitua, na tuuina mai e ala ia Iosefa Samita le Perofeta, o loo tusia i le vaega e 107 o le Mataupu Faavae ma Feagaiga, “o le aoao” e sosoo ma le “faia” e pei ona tatou faitauina, “O lea, ia taitoatasi ai le tagata ma aoaoina lana tiute, ma galue i le tofi ua tofia ai o ia, i le maelega atoatoa.”⁶

O i latou taitoatasi o loo umia le perisitua o loo auai mai i lenei sauniga i lenei po, ua i ai se valaauga e auauna atu, ia faia le mea sili na te mafaia i le galuega ua tofia i ai o ia. E leai se tofiga e faatauvaa i le galuega a le Alii, aua ua tofu lava ma taunuuga e faavavau. Sa lapataia i tatou e Peresitene Ioane Teila: “Afai e te le faalauteleina lou valaauga, o le a faamasinoina oe e le Atua ona o i latou semanu e te laveaiina pe a na fai lou tiute.”⁷ O ai foi o i tatou e mafai ona gafatia le tiute o le faatuatuai o le ola faavavau o se tagata soifua? Afai o le olioli tele o le taui lea o le laveaiina o se agaga e toatasi, oka se matautia o le faanoanoa o i latou o a latou taumafaiga faatamala ua afua ai ona alu se atalii o le Atua e aunoa ma se lapataiga po o se fesoasoani, ua faatalitali ai seia oo mai se auauna faatuatuaina a le Atua.

E moni lava se anaga ua leva: “Fai lou tiute i le mea sili; tuu mea o totoe i le Alii.”

O le tele lava o auaunaga e tuuina atu e i latou e umia le perisitua e faataunuuina filemu e aunoa ma se manuo. O se ataata faaleuo, o se faatalofa agalelei, o se molimau faamaoni o le upumoni e mafai ai lava ona siitia olaga, suia natura faaletagata soifua, ma laveai agaga taua.

O se faataitaiga o lena ituaiga o auaunaga o le aafiaga faafaifeautalai o Juliusz ma Dorothy Fussek, o e sa tofia e faamisiona mo le lua tausaga i Polani. Sa fanau Uso Fussek i Polani. Sa tautala o ia i le gagana. Sa alofa o ia i tagata. O Tuafafine Fussek o le Peretania, ma sa laitiiti sona iloa e uiga ia Polani ma ona tagata.

O le faatuatua i le Alii, sa la sagai atu ai i la laua galuega na tofia i ai. O tulaga na nonofo ai sa matua faatauvaa lava, o le galuega e lagona ai le tuua toatasi, ma lo la tofi ua mamafa tele. Sa lei faatuina se misiona i lena taimi i Polani. O le tofiga na tuuina atu i le au Fussek o le teuteu ala ina ia mafai ona faatuina ai se misiona ina ia mafai ona valaauina ai isi faifeautalai e auauna atu, ia mafai ona aoaoina tagata, ia mafai ona papatisoina tagata liliu mai, ia mafai ona faatuina ni paranesi, ma mafai ona fausia ni falelotu.

Pe sa le fiafia ea Elder ma Sister Fussek ona o le mamafa o lo la tofiga? Sa lei i ai se taimi na le fiafia ai. Sa la iloaina o lo la valaauga na mai le Atua. Sa la tatalo mo Lana fesoasoani faalelagi, ma sa la tuuto atu i laua lava ma le loto atoa i le la galuega. O lo la nonofo ai i Polani sa le mo le lua tausaga ae na lima tausaga. O faamoemoega uma lava sa i ai, sa faataunuuina.

Sa matou malaga atu faatasi ma Elder Russell M. Nelson, Hans B. Ringger, ma Elder Fussek, e feiloai ma le Minisita o Adam Wopatka o le malo o Polani, ma na matou faalogo o saunoa mai, “E talia fiafia la outou ekalesia iinei. E mafai ona fau ni a outou falelotu, e mafai ona auina mai a outou faifeautalai. E talia fiafia outou i Polani. O le tamalii lea,” a o tusi atu ia Juliusz Fussek, “sa tautua lelei i la outou ekalesia. E mafai ona outou faafetaia ana faataitaiga ma ana galuega.”

Faapei o Fusseks, ia tatou faia mea e tatau ona tatou faia i le galuega a le Alii. Ona mafai lea ona tatou pepese faatasi ma Juliusz ma Dorothy Fussek, i le Salamo: “O lo’u fesoasoani e mai ia Ieova lea, o le na faia le lagi atoa ma le lalolagi … ; o lou leoleo e le tulemoe lava. Faauta, o le leoleo ia Isaraelu, e le tulemoe ia, e le moe lava.”⁸

Lona tolu, ia avea i tatou ma tagata e tatau ona avea ai. Na fautuaina e Paulo lana uo ma lana soa faapelepele o Timoteo, “A ia fai oe ma faaaoao i e ua faatuatua, i le upu ma le amio, ma le alofa, ma le loto ma le faatuatua, ma le le gaoia.”⁹

Ou te uunaia i tatou uma e tatalo mo o tatou tofiga ma ia saili le fesoasoani faalelagi, ina ia mafai ona tatou manuia i le ausiaina o mea e faapea ona valaauina i tatou e fai. Na fai mai se tasi tagata e faapea, “o le faafetaia o se mana e maualuga atu nai lo le tagata lava ia, e leai lava se tulaga e faalumaina ai o ia.”¹⁰ E ao ona ia saili, talitonu, tatalo ma faamoemoe o le a ia mauaina. E leai se taumafaiga faamaoni ma loto tatalo faapena o le a le taliina mai: o le faavae tonu lava lena o le filosofia o le faatuatua. O le a oo mai le fesoasoani faalelagi ia i latou o e saili i ai ma le lotomaulalo.

Mai le Tusi a Mamona o loo aumaia ai le fautuaga ua ta aofai uma ai. Ua fetalai le Alii: “O lea foi, pe faapefea la outou amio e tatau ai? E moni, ou te fai atu ia te outou, e pei lava o au nei.”¹¹

Ma o le a le ituaiga tagata sa i ai o Ia? O le a le faataitaiga sa Ia faia i Lana auaunaga? Mai le Ioane, mataupu e 10, ua tatou iloa ai:

“O a’u le leoleo mamoe lelei: e tuu atu e le leoleo mamoe lelei o lona ola e sui ai ana mamoe.

“A o le auauna, e le o le leoleo foi o ia, e le ana le lafu mamoe, ua vaai atu ia i le luko ua sau, ona lafoai lea e ia o mamoe, a e sola: ona puea lea o mamoe e le luko, ma faasalalauina.

“E sola le auauna, aua o le auauna lava ia, e le manatu foi o ia i mamoe.

Na fetalai mai le Alii: “O au nei o le leoleo mamoe lelei, ua ou iloa au mamoe, ua iloa foi au e au mamoe.

“Pei ona silafia au e le Tama ma ou iloa le Tama: ou te tuuina atu foi lo’u ola e sui ai mamoe.”¹²

Uso e, tatou aoao mea e tatau ona tatou aoao, fai le mea e tatau ona tatou fai, ma ia avea i tatou ma tagata e tatau ona avea ai. O le faia o ia mea, o le a faapea ona oo mai ai faamanuiaga o le lagi. O le a tatou iloa ai e le o tuua na o i tatou. O le a faafetaia i tatou e le Na te silafia mea uma, i Lana lava ala.

O ni tausaga ua mavae, sa ou mauaina ai se tusi mai se uo ua leva lava. Sa ia tuuina mai lana molimau i lena tusi. Ou te fia faasoa atu sina vaega ia te outou i le afiafi nei, ona o loo faaalia ai le malosi o le perisitua i se tagata o le na aoaoina mea sa tatau ona ia aoaoina, o le sa faia mea sa tatau ona ia faia, ma o le sa taumafai e le aunoa ina ia avea ma tagata e tatau ona avea ai o ia. O le a ou faitauina ni vaega o lena tusi mai la’u uo o Theron W. Borup, o le na maliu i le tolu tausaga talu ai i le 90 o tausaga o lona soifua:

“I le valu o ou tausaga, ina ua papatiso au ma ou maua le Agaga Paia, sa matua faagaeetia au i le avea ma se tagata lelei ma le mafai ona maua le Agaga Paia e avea ma se fesoasoani i lou olaga atoa. Na ta’u mai ia te au e faapea, o le Agaga Paia e na o le amio lelei lava e faatasi mai ai, ma a oo mai mea leaga i o tatou olaga, o le a alu ese o ia. O le le iloaina po o afea o le a ou manaomia ai ana musumusuga ma taitaiga, o lea na ou taumafai ai e ola ina ia aua nei aveesea lenei meaalofa. I se tasi taimi sa faasaoina ai [e le Agaga Paia] lo’u ola.

“I le taimi o le Taua Lona II o le Lalolagi, sa avea au ma se enisinia faapafana i se vaalele tau o le ituaiga B-24 i le Pasefika i Saute. I se tasi aso na faia ai se faasilasilaga e faapea o le a taumafai se solo umi o vaalele faapau pomu e tu’i i lalo se fale gaosi suauu. Na uunaia au e le Agaga o le a tofia au i lenei malaga ma o le a le faaumatia ai lo’u ola. O le taimi lena sa avea au ma peresitene o le vaega a le AAG.

“Sa matua matamataita le taua a o matou felelei ae i luga o Borneo. Na taia le matou vaalele e ni vaalele na osofai mai ma sa lei umi ae mu loa ma na fai mai le pailate matou te sauni e feosofi i fafo. O au na mulimuli alu i fafo. Sa tafana mai i matou e le fili a o matou faaopeope agai i lalo. Sa faigata ona tatala la’u vaa faaola. Sa ou magoto ma alu ae i luga o le vai, sa amata ona ou malemo ma le iloa se mea. Sa ou tei ifo i se taimi ona ou alaga lea, “Le Atua e, laveai au!” … Sa ou toe taumafai loa e tatala la’u vaa faaola ma na mafai ai loa. Na ona maua lava o sina ea e mafai ai ona ou opeopea, ou taavale loa i ai i luga, ma ua vaivai tele e toe minoi.

“E tolu aso o matou faaopeopea i le itulagi o le fili, faatasi ma vaa sa siomia ai i matou ma vaalele i o matou luga. Pe aisea na le mafai ai ona latou iloa mai ni vaa faaola samasama i luga o le sami lanumoana, o se mealilo lea,” na ia tusia ai. “Sa agi mai se afa ma galu e tolusefulu futu le maualuluga na saeia ai o matou vaa. Sa leai se meaai po o se vai mo le tolu aso. Sa fesili mai isi ia te au pe sa ou tatalo. Sa ou tali atu sa ou tatalo ma o le a laveaiina lava i matou. O le afiafi lena, sa matou vaaia ai la matou vaamaulu sa i ai iina e laveai i matou, ae na alu loa. O le isi taeao [na toe faapena foi. Sa matou iloa] o le aso mulimuli lea [o le a] i ai iina. Ona oo mai lea o le uunaiga a le Agaga Paia. ‘Ua ia te oe le Perisitua. Poloai i le vaamaulu e sau e aveatu outou.’ Sa ou tatalo le leoa. ‘I le suafa o Iesu Keriso ma le mana o le perisitua, toe liliu mai ma aveatu matou.’ E lei leva a ua i o matou autafa. Ina ua matou i ai i luga o le fogavaa, sa fai mai le kapeteni, ‘Ou te le iloa pe na faapefea ona matou maua outou, aua matou te le i sailia outou.’ Sa ou iloa.”¹³

Ou te tuuina atu la’u molimau e moni lenei galuega tatou te galulue ai. O loo tu le Alii i le foe. Ia tatou mulimuli ia te Ia, o la’u tatalo faamaoni lea, ma ou te ole atu ai, i le suafa o Iesu Keriso, amene.